राष्ट्रिय स्वतन्त्र पार्टी (रास्वपा) सरकारं पिहावनेगु निर्णय याःगु दु। केन्द्रीय सदस्य व सांसदपिनिगु मंकाः बैठकं सरकारं पिहावनेगु निर्णय याःगु दु।

सरकारयात बियातःगु समर्थन धाःसा लितमकायेगु निर्णय जुगु दु धका छम्ह केन्द्रीय सदस्यं धाःगु दु।

रास्वपापाखे डोलप्रसाद अर्याल श्रममन्त्री, शिशिर खनाल शिक्षामन्त्री व डा. तोसिमा कार्की स्वास्थ्य राज्यमन्त्री जूगु खः।

रास्वपा सभापति रवि लामिछाने उपप्रधान नाप गृहमन्त्री जूगु खः। तर नागरिकता मुद्दाय् वंगु माघ १३ गते सर्वोच्च अदालतं सांसद पद खारेज यायेवं पदमुक्त जूगु खः।

नेपाल राष्ट्र बैंकया न्हापाम्ह गभर्नर हिमालय शमशेर जबरा मन्त।

९५ दँया जबरा नर्भिक अस्पतालमा उपचार यायेगु झ्वलय् थौं सुथय् मदुगु खः। जबरा नेपाःया न्हापाम्ह गभर्नर नाप पूर्वअर्थसचिव नाप हिमालयन बैंकया संस्थापक न खः।

१४ दँय् मेट्रिक पास जुया नेपाः सरकारया सचिव जुया नेपाल राष्ट्र बैंकया न्हापाम्ह गर्भनर जुयादीम्ह खः।

जुजु महेन्द्र शाह नं राष्ट्र बैंकया स्थापना याना लच्छिया ८ सय तलब नया गभर्नरय् नियुक्ति जूगु इलय् २९ दँ जुक दुम्ह खः।

लच्छिया जुयाच्वंगु स्वस्थानी व्रत थौै क्वचाइगु जुगु दु।

हिन्दू धर्मावलम्बीपिन्स पुसया पून्हिनिसे माघया पून्हितक थुगु ब्रत यायेगु नाप स्वस्थानी व्रतया बाखं छेँ छेँ कनेगु याइ।

राष्ट्रियसभा उपाध्यक्ष पदय् थौं मनोनयन दर्ता जुइगु दु। मनोनयन दर्ताया ई थौं न्हिनय् १ बजेनिसे ४ बजेतक ई बियातःगु दु ।

सत्ता पक्षं नेकपा माओवादी केन्द्रया उर्मिला अर्यालयात उम्मेदवारया रुपं न्ह्यने यकूगु दु सा विपक्षी दलं थौं उम्मेदवार ल्ययेत्यःगु दु ।

तत्कालीन राष्ट्रियसभा उपाध्यक्ष शशीकला दाहालया कार्यकाल २०७८ य् क्वचागुलि आःतक खाली जुयाच्वंगु खः।

येँ १७ वडां महानगरपालिकां नागरिक विद्युतीय सुशासन सेवा संचालनय् हःगु दु येँ महानगरपालिकाया प्रवक्ता नापं १७ वडाअध्यक्ष नविन मानन्धरं डिटिनल सिग्नेचरया टोकन प्रयोग यानाः नागरिक विद्युतीय सुशासन सेवा शुभारम्भ यानादीगु खः ।

सेवाया शुरुवात यासें महानगर प्रवक्तानापं १७ वडाअध्यक्ष मानन्धरं थःपिनिगु लक्ष्य पेपरलेस याना यंकाः फेसलेस गभर्नेन्स खः धयादिल । ‘वडा ज्याकू धइगु महानगरया मखसे जनतायात सेवा बीगु जूगुलिं थ्व जनताया हे ज्याकू खः । थनं प्रवाह जुइगु सेवायात जनतानं थःगु हे खः धइगु महसुस याकेगु जिमिगु कुतः जुइ’, प्रवक्तालिसें १७ वडाअध्यक्ष मानन्धरं धयादिल ।’

‘विद्युतीय शासनया निंतिं दकलय् न्हापां थुकिया प्रयोगकर्ता ल्याय्म्हत जुइ, थुकियात अप्वयेका यंकाः सकसिगुं पहुँचय् तक थ्यंकेगु लक्ष्य दु’ वय्कलं धयादिल ’गुकुन्हुया दिंनिसें पूर्णरुपं विद्युतीय सुशासन सेवा संचालन जुइ व हे दिंनिसें भ्वंया प्रयोग यायेगु ज्या नं बन्द जुइ ।

प्रणाली संचालनया निंतिं विकासकर्ता विज्ञतय्सं ग्वाहालि याइगु जूगु दुसा वडां नियुक्त याःपिं वडास्तरीय परामर्शदातां वडाअध्यक्ष, वडासचिवलिसें सेवालिसे सम्बन्धित कर्मचारीयात सहजीकरण याइ । थुुगु प्रणालीइ ई–सिफारिस, दर्ता, चलानी सेवा दुथ्याकातःगु दुसा सेवा कायेत सेवाग्राहीं येँ महानगरपालिकाया मोबाइल एप ‘केएमसी’पाखें थःगु विवरण जायेका छ्वयेगु व प्राप्त तथ्यांक व सूचना वडा सचिवयाथाय् थ्यनेवं थुकिया प्रक्रिया न्ह्याइ ।

थुकिया प्रमाणीकरणया निंतिं वडा सचिवतय्त डिजिटल हस्ताक्षरया टोकन नं बीधुंकूगु दु ।आःयात येँ १७ वडां शुरु जूगु थुगु सेवा वइगु दिनय् मेमेगु वडाय् नं विस्तार याना यंकेगु ग्वसाः दुगु महानगरं न्ह्यथंगु दु ।