नेपाल संवत् न्हूदँ राष्ट्रिय समारोह समिति ११४३ ब्यवस्थापन समितिया दुजःपिन्सं थौं येँ महानगरपालिकाया मेयर बालेन शाह व उपमेयर सुनिता डंगोलयात नापलानाः ध्यानाकर्षण पौ लःल्हाःगु दु।

थौं बुधवाः समारोह समितिया नायः प्रा.डा. नरेशमान बज्राचार्यया नेतृत्वय् वंगु पुचलं बिस्कं बिस्कं मेयर शाह व उपमेयर डंगोलयात नापलानादीगु खः । थथे नापलायेगु झ्वलय् मेयर शाह नं समारोह समितिं ब्यूगु ज्ञापन पौ लःल्हाना कासें ध्यानाकर्षण पतिइ न्ह्यथनातःगु नेपाल संवतयात कयाः यायेमाःगु सकतां ज्या येँ महानगरपालिकां यायेगु बचं बियादीगु खः ।वय्कलं नेपाल संवत् नेपाःया मौलिक संवत् जूगुलिं थुगु संवतं नेपाःयात म्हसीका बियाच्वंगु विचाः नं प्वंकादीगु खः।

अथेहे, उपमेयर डंगोलं नं समारोह समितिया दुजःपिं नापलायेगु झ्वलय् नेपाल संवतयात कयाः येँ महानगरपालिकां उच्च सम्मान यायेगु कथं ज्या यानायंकेगु बचं बियादीगु खः । समारोह समितिं न्ह्यब्वःगु ध्यानाकर्षण पतिइ महानगरपालिकां न्हूदँया लसताय् तःजिक नगरबासीपिन्त भिंतुना देछायेगु नितिं भिंतुना विज्ञप्ति पिथनेगु, महानगरस्तरीय भिंतुना कालबिल ज्याझ्वः यायेगु, महानगरपालिकाया कार्यपालिका बैठकया निर्णय पुस्तिकाय् नेपाल संवत् च्वयेगु, नेपाल सरकारनाप शंखधर प्रतिष्ठान दयेकेगु नितिं महानगरपालिकां पहल यायेगुलिसेंया थीथी खँ न्ह्यथनातःगु दु।

थुगु दँया न्हूदँ ११४३ कछलाथ्व पारु (कार्तिक ९ गते) समारोह समितिं दँय् दसंथें सुथय् ७ ता इलय् बसन्तपुरं भिंतुना ¥याली व ¥याली लिपा भिंतुना सभा यायेत्यंगु दु ।अथेहे, समारोह समितिं न्हूदँया भिंतुना सभा व ¥याली तःजिक हनेगु नितिं थीथी तयारी यानाच्वंगु दु।

डेंगूया संक्रमणं कारण देयन्यक ४४ म्ह सी धुकुगु दु।

स्वास्थ्य तथा जनसंख्या मन्त्रालयया कथं डेंगूया कारण साउननिसे असोज २४ गते तक ४४ म्ह सी धुकुगु पुष्टि जूगु दु।

७६ जिल्लायकं फैलै जूगू डेंगू साउनतक दुने ३३ हजार ९७५ म्ह संक्रमित जुइ धुकुगु दु धका मन्त्रालयं धाःगु दु।

लुँया भाः थौं १ हजार २ सय कुहावःगु दु। थौं लुँ तोलां १ हजार २ सय रुपैयाँ घटे जुया ९४ हजार रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे, वहः तोलां न झीन्यातका कुहावःगु दु। वहः तोलां झीन्यातका कुहावया १ हजार २ सय १५ रुपैयाँ न कारोवार जूगु दु धका महासङ्घं धाःगु दु।

राष्ट्रपति विद्यादेवी भण्डारीयात कोरोना संक्रमण पुष्टि जूगु दु।

म्हिगः आइतबाः राष्ट्रिय जनस्वास्थ्य प्रयोगशालापाखे राष्ट्रपति भण्डारीयात कोरोना संक्रमण पुष्टि जूगु रिपोर्ट वःगु धका स्रोतं धाःगु दु।

चिकित्सकपिनिगु कथं वयकःया आः स्वास्थ्यय् छु भचा सुधार वःगु दु।

राष्ट्रपति भण्डारी म्ह मफया वंगु २२ असोजय् त्रिवि शिक्षण अस्पतालय् भर्ना जूयादीगु खः।

आगामी मंसिर ४ गते हुने प्रतिनिधि सभा तथा प्रदेश सभा सदस्य निर्वाचन अन्तर्गत थौं आइतबाः मनोनयन दर्ता याःपि उम्मेदवारपिनिगु विरोधय् उजुरी बिइफइ धका निर्वाचन आयोगं धाःगु दु।

सू न उम्मेदवार कानुनी रुपं अयोग्य दू सा वयागु उम्मेदवारविरुद्ध उजुरी बिइगु लागि थौं सुथय् १० बजेनिसे न्हिनय् ३ बजेतकया ई बिःगु दु। अथेहे मनोनयपत्र व उजुरीउपर जाँचबुझ याना निर्णय यायेगु ई असोज २४ गते बहनि ३ बजेनिसे २५ गते बहनि ५ बजे तक तयातःगु दु धका आयोगया निर्वाचन कार्यतालिका उल्लेख दु।

उम्मेदवारपिनिगु नामावली प्रकाशन यायेत असोज २५ गते बहनि ५ बजेनिसे ७ बजेतक दु। आइतबाः मनोनयन दर्तायापि उम्मेदवारपिनिगु थःगु नां लितकायेत असोज २६ गते सुथय् १० निसे न्हिनय् १ बजे तक ई तयातःगु दु।

वया लिपा प्रतिनिधि सभा व प्रदेश सभा सदस्य निर्वाचनया प्रत्यक्षतर्फ प्रतिस्पर्धा याइपि उम्मेदवारपिनिगु लिपागु नामावली २६ प्रकाशन याइगु धका निर्वाचन आयोगं धाःगु दु।