नेपाल संवत् ११४३ न्हूदँ तःजिक हनिइगु नितिं नेपाल संवत राष्ट्रिय न्हूदँ समारोह समितिं थीथी समिति व उपसमिति यानाः २६ गू समितित नीस्वंगु दु ।

समारोह समितिया नायः प्रा.डा. नरेशमान बज्राचार्यया उपस्थितिइ येँया नेपाः ब्यांक्वेटय् च्वंगु मुँज्या थीथी समिति व उपसमिति नीस्वंगु खः । समारोह समितिं ब्यूगु जानकारी कथं थ्वहे वइगु कछलाथ्व पारुया दिं येँया बसन्तपुरय् जुइगु भिंतुना ¥याली व भिंतुना सभा ताःलाकेगु नितिं व न्हूदँया भिंतुना सभा व ¥याली लिपा दच्छियंकं थीथी ज्याझ्वः यायेगु नितिं थथे उपसमिति नीस्वंगु खः।

समारोह समितिं संचार उपसमिति, आर्थिक उपसमिति, स्वयंसेवक उपसमिति, सांस्कृतिक बाजा समन्वय उपसमिति, देय् न्यंक न्हूदँ ज्याझ्वः धलः उपसमिति, मिसा दुजः मनोनयन उपसमिति, क्रियाशील व्यक्तित्व मनोनयन उपसमिति, जातीय खलः पुचः उपसमिति, मञ्च व माइक व्यवस्थापन उपसमिति, गैरनेवाः मनोनयन उपसमिति, नासः पूजा ज्याझ्वः उपसमिति, न्हिल्याःपौं प्रकाशन उपसमिति, सांस्कृतिक ज्याझ्वः उपसमिति, मू नारा क्वःछिना उपसमिति, क्लब संघसंस्था परिचालन उपसमिति, नसात्वसा व ज्याझ्वःया थाय् ब्यवस्थापन उपसमिति, माइन्युट पुस्तिका व्यवस्थापन उपसमितिलिसें थीथी उपसमितित नीस्वंगु खः ।थथे नीस्वंगु उपसमितिया मुँज्या मोहनी नखः क्वचायेवं हे न्ह्याकेगु खँया जानकारी न्हूदँ समारोह समितिं ब्यूगु दु ।

अथेहे, न्हूदँ ११४३ या सकतां ज्याझ्वः न्ह्याकेगु नितिं १९ म्ह दुजः दूगु व्यवस्थापन समिति नीस्वंगु दु।

लुँ तोलां थौं १ हजार २ सय रुपैयाँ थहावंगु दु। थौं लुँ तोलां १ हजार २ सय रुपैयाँ न थहावना ९२ हजार ८ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोला न २५ रुपैयाँ थहावंगु दु। वहः तोलां नीन्यातका थहावना १ हजार १ सय ७० रुपैयाँ न कारोबार जूगु दु धका महासङ्घं धाःगु दु।

राष्ट्रिय प्रजातन्त्र पार्टी (राप्रपा) प्रवेशयाम्ह रवीन्द्र मिश्रं थुगु पटक येँया क्षेत्रनम्बर १ पाखे हे प्रतिनिधि सभा सदस्यया लागि चुनाव ल्वाइगु जुगु दु।

मिश्रं थौं शुक्रबाः छगु औपचारिक रुपं थःगु उम्मेदवार घोषणा याइगु ज्याझ्वः तःगु दु। वंगु निर्वाचनय् मिश्र क्षेत्र नम्बर १ य् विवेकशील साझा पार्टीपाखे चुनाव ल्वाःगु खः।

उगु इलय् तराजु चिंकया मिश्रं १० हजार ११८ हःगु खः। आः राप्रपाय् दुहावना हलो चिं ज्वना चुनाव ल्वायेत्यःगु खः । राप्रपाय् मिश्रयात वरिष्ठ उपाध्यक्षया जिम्मेवारी बिइगु निर्णय याःगु दु।

बागमती प्रदेशया मुख्यमन्त्री राजेन्द्रप्रसाद पाण्डे व एमाले नेता सुरेन्द्र पाण्डेया मां मनमाया पाण्डे थौं मन्त।

मदुम्ह मनमाया पाण्डे ८७ दँय् सितापाइलाय् चिधिकम्ह काय् दीपेन्द्र पाण्डेया छेँ मदुगु खः। मदुम्ह मनमायाया न्याम्ह काय् व स्वम्ह म्ह्याय् दी।

नेपालभाषा साहित्यय् मिसा स्रष्टातय् योगदान बिषययात कयाः जुगु विचार गोष्ठिया उलेज्या नेपाल प्रज्ञा प्रतिष्ठान कुलपति गंगाप्रसाद उपे्रतीं यानादीगु दु।

नेपाल प्रज्ञा प्रतिष्ठान मातृभाषा विभागया ग्वसालय् गुञ्जनलिसेया सहकार्ययय् उगु विचार गोष्ठि जूगु खः । गोष्ठिया उलेज्यायासें उपे्रतीं राष्ट्रिय अन्तर्राष्ट्रिय संघसंस्थालिसे सहकार्य यानाः थुकथंया ज्याझ्वः याना वनेगु उद्देश्यकथं मिसा साहित्यकारतय् संस्था गुञ्जनलिसेया सहकार्य थुगु विचार गोष्ठि यानागु खः धयादिल । लिसें वय्कलं प्रतिष्ठानपाखें पिथनेत्यनागु नेपालभाषाया सर्वमान्य खँग्वःधुकू याकनं पिथनेगुकथं तयारी जुयाच्वंगु नं जानकारी बियादिल ।

विभागया प्रमुख लक्ष्मी मालीया सभाबध्यक्षताय् जूगु उगु ज्याझ्वलय् नेपालभाषाया स्रष्टा गजल च्वमि ईश्वरीमैँया श्रेष्ठं ‘नेपालभाषा साहित्य नारी स्रष्टातय् योगदान’ विषयय् ज्यापौ न्ह्यब्वयादीगु खःसा कवयित्री प्रतिसरा साय्मिं टिप्पणी यानादीगु खः ।

गुञ्जनया अध्यक्ष साहित्यकार जलेश्वरी श्रेष्ठं लसकुस यासें नेपालभाषा मिसा स्रष्टातय् योगदान व भावी योजना न्ह्यब्वयादीगु ज्याझ्वलय् प्रेमहिरा तुलाधर, बद्री बेदना, सुमा श्रेष्ठ, कृष्ण प्रजापतिपिंसं मिसा स्रष्टा व साहित्यया थीथी पक्षयात कयाः न्ह्यसः तयादीगु खः ।