प्रधानमन्त्री पुष्पकमल दाहाल ‘प्रचण्ड’ न शहीदपिनिगु म्हगस पूरा यायेत सकसिया ल्हाः मिलेयाना न्ह्या वनेमाः धका धयादीगु दु।

चुनौतीपूर्ण परिस्थितिइ गठन जूगु न्हगु सरकार सामाजिक न्याय, सुशासन व समृद्धिया आजुइ थ्यकेत न्ह्यावनेगु दृढ सङ्कल्पित उल्लेख यासे वयकलं शहीदपिनिगु म्हगसः पूरा यायेत इनाप याःगु दु ।

प्रधानमन्त्री दाहालं सङ्घीय लोकतान्त्रिक गणतन्त्रयात संस्थागत यायेत व न्हुगु संविधानयात कार्यान्वयनपाखे देश समृद्ध व समुन्नत दयकेत शहीदपिनिगु म्हगसः नाप योगदान न्ह्यावलय् प्रेरणादायी जुइ धका भलसा कयादीगु दु।

वयकलं धयादीगु दु, ‘तानाशाही व निरङ्कुश व्यवस्थाया विरूद्ध सङ्घर्ष यायेगु झ्वलय् तधःगु बलिदानी यानादीपि महान् शहीदपिनिगु बलिदानी वःगु दिंयात झीसं शहीद दिवसया रूपं लुमंका वयाच्वनागु खः, थौं दिं नेपाः व नेपाःमिपिनिगु आत्मसम्मान व स्वतन्त्रताया लागि थःगु जीवन बलिदान यायेत शहीदपिन्त विशेष सम्मान यायेगु दिं खः।’

राष्ट्रपति विद्यादेवी भण्डारीं शहीद दिवस, २०७९ या लसाताय् नागरिक स्वतन्त्रता, लोकतन्त्रया स्थापना व राष्ट्रियताया रक्षा यायेगु लागि थःगु अमूल्य जीवन उत्सर्ग यापि शहीदपि शुक्रराज शास्त्री, धर्मभक्त माथेमा, दशरथ चन्द, गङ्गालाल श्रेष्ठ लगायत सकल ज्ञात–अज्ञात शहीदपिन्त श्रद्धाञ्जली देछागु दु।

वयकलं शहीद दिवसया लसताय् थौं छगु सन्देश जारी यानादीसे शहीद दिवस देश व जनताया लागि प्राण आहुति बिइपि महान् शहीदपिन्त विशेष लुमन्ति जुइगु दिं खः धका उल्लेख यानादीगु खः।

नेपाःमिपिनिगु जनतायात स्वतन्त्र व सार्वभौमसत्ता सम्पन्न नागरिक दयकेगु इतिहासय् थीथी इलय् निरंकुश व तानाशाही शासन व्यवस्थाविरुद्ध जूगु आन्दोलनय् थःगु जीवन बलिदान याःपि वीरपिन्त हनेगु दिं कथं माघ १६ गते शहीद दिवस हना वयाच्वंगु खः। 

राष्ट्रिय स्वतन्त्र पार्टीया सभापति रवि लामिछाने न प्रधानमन्त्री पुष्पकमल दाहाल प्रचण्डयात नापलागु दु।

आइतबाः नेपाली नागरिकताया प्रमाणपत्र काम्ह लामिछानें राष्ट्रिय स्वतन्त्र पार्टीया सभापतिइ न मनोनित जुइ धुकुगु दु।

अमेरिकी नागरिकता त्यागेय् याये धुका नेपाली नागरिकता कायेगुलि प्रक्रिया पूरा मयागु कारण सर्वोच्चया फैसलालिपा शुक्रबाः उपप्रधानमन्त्री नाप गृहमन्त्रीया पद त्वःतेमाःगु खः।

रास्वपां गृह मन्त्रालयय् थःगु दाबी कायम दु धका धाःगु दु।

शिक्षालय नेपालं नेवाः पत्रकार राष्ट्रिय दबूया न्हुगु ज्यासना पुचःयात भिंतुना देछायेगु ज्याझ्वः जुगु दु।

उगु ज्याझ्वलय् मूपाहाँ कथं बागमती प्रदेशया सांसद रामकृष्ण चित्रकारं न्हुगु ज्यासना पुचःया भिंतुना पौं लःल्हागु खःसा सार्क जनलिस्त फोरमया केन्द्रिय नायः राजु लामां स्वामां क्वखाय्कादीगु खः।

शिक्षालय नेपालया अध्यक्ष श्याम तडुण्कार, बागमती प्रदेशया सांसद चित्रकार, सार्क जनलिस्त फोरमया केन्द्रिय नायः लामा, फोरमया नेपाः च्याटरया नायः प्रकाश शिसवालपिन्स दबूया न्हुगु ज्यासना पुचःयात भिंतुना नाप कार्यकाल सुथौलाक्क न्ह्यायेमाः धका भिंतुना देछानादीगु खः।

येँ महानगरपालिकाया मेयर बालेन साहं याना वयाच्वंगु थीथी ज्यादतिपूर्ण ज्याखँया विरोधय् फिब्व ख्यलय् तःजिक प्रदर्शन जुगु दु।

उपत्यकाव्यापी सडक विस्तार पीडित संघर्ष समितिया संयोजनय् जूगु उगु प्रदर्शनय् मेयर साहया ज्याखँपाखें पीडित जूपिं थीथी ख्यःया पुचः व मनूतय्सं ब्वति काःगु खः । ज्याझ्वलय् सहभागीजूपिन्ु ‘डोजर आतंक बन्द या’, ‘सडक विस्तारया नामय् उठिवास याये दइ मखु’, ‘महानगरपालिकाया ज्यादति बन्द या’ धकाः च्वयातःगु प्लेकार्ड ब्वया वःगु खः ।

लिसें थीथी खलः पुचःतय्सं थःथःपि ब्यानर नं ब्वःगु खः । ज्याझ्वलय् थीथी कथंया नेवाः अभियानया अभियन्तातय्सं ब्वति काःगु खः । उगु ज्याझ्वलय् सम्बोधनयासें आदिवासी जनजाति महासंघया पुलांम्ह न्वकु गोविन्द छन्थालं येँय् येँ देय्यात हे विनास याइम्ह मेयर माःगु मदु, उकिं येँ देय्यात विनास यायेगुपाखें रोके यायेमाः धकाः आह्वान यानादिल । वय्कलं धयादिल, ‘येँया स्थानीय जनतायात नोक्सान जुइगु ज्या यात धाःसा उकिया विरुद्ध आदिवासी जनजाति समेत सतकय् कुहां वये मालीगु जुइ ।’

सडक विस्तार आन्दोलनया न्ह्यलुवा शान्तप्रकाश श्रेष्ठं थौं सडक विस्तारया नामय् सरकारं नेवाःतय्त विस्थापित यायेत स्वयाच्वंगु दु धासें स्थानीय जनतां सडक मिचे याःगु मखु, सडकं हे स्थानीयवासीयात मिचे याना हयाच्वंगु दु धयादिल ।

अथेहे, रविन्द्र श्रेष्ठ, साहेल सिंह महर्जन, शंकर लिम्बुपिन्स न सभाय् न्ववानादीगु खः।