मध्यपुर थिमिइ विपन्न परिवारपिन्त छेँ लःल्हाःगु दु ।

बागमती प्रदेश सरकारया ग्वाहालिं ‘अति विपन्न आवास कार्यक्रम’ अन्तर्गत थिमिइ प्यंगू विपन्न परिवारपिन्त प्रदेश सांसद राजेन्द्रमान श्रेष्ठं छेँया ताःचा लःल्हाःगु खः ।

उपभोक्ता समितिया अध्यक्ष रमेश प्रजापतिया सभापतित्वय् जूगु हस्तान्तरण ज्याझ्वलय् न्ववासें सांसद श्रेष्ठं चालु आर्थिक दँय् नं थ्व योजना तयेगु कुतः यानागु खःसा थीथी कारणं सफल मजूगु खँ कनादिल । जनता जागे जुल धाःसा थज्याःगु योजनायात निरन्तरता बीफइ धासें सांसद श्रेष्ठं मानवीय सेवाया ज्या तायेकाः थज्याःगु ज्यायात लिपा नं ग्वाहालि याना वनेगु बचं बिउगु खः ।

बागमती प्रदेश सरकारया १७ लाख २० हजार अनुदान ग्वाहालिं थिमि नगरपालिकाया वडा नं. ८ बोडेय् छखा, वडा नं. ७ नगदेशय् छखा, वडा नं. ६ चपाचोय् छखा व वडा नं. ५ ताहाननिइ छखा यानाः प्यखा छेँ दयेकाः ताःचाः लःल्हाःगु खः ।

ज्याझ्वलय् न्ववासें सभापति प्रजापतिं थिमिइ अझ नं यक्व हे विपन्न परिवार दुगु व उमिगु नं च्वनेगु समस्या जुयाच्वंगुलिं वइगु दँय् नं थज्याःगु योजनायात निरन्तरता बीमाः धयादिल ।

शताब्दी पुरुष नाप संस्कृतिविद सत्यमोहन जोशीया भिं उसाँया कामनायासें नेपाल संबत न्हूदँ समारोह समितिया दुजःपिन्स वयकःयात नापलानादिगु दु।

किष्ट शिक्षण अस्पतालय् वनाः नापलावंगु खः। समारोह समितिया सल्लाकार समितिया संयोजक तीर्थराम डंगोलं जोेशीयात नापलानाः वयकःया भिं उसाँय कामनायानादीगु खः ।

सरकार व डा. गोविन्द केसी दथुइ १० बुँदे सहमति जूगु दु। सरकारनाप सहमति जुइवं केसीं झीस्वन्हु लिपा अनशन तोडे याःगु दु।

सहमतिलिपा त्रिवि शिक्षण अस्पतालय् अनशनर च्वना च्वंम्ह केसीं अन हे उपचारयाना च्वंम्ह सरिता चौधरीया ल्हातं जुस त्वना अनशन तोडे याःगु खः।

सहमतिपत्रय् सरकारया पाखे प्रधानमन्त्री नाप मन्त्रिपरिषद् कार्यालयया सचिव गणेश पाण्डेय व अनशन च्वना च्वम्ह डा. केसीया पाखे ल्हाचिं तःगु खः। सरकारी अस्पतालं स्वास्थ्य सेवा सुधार यायेत आःतक कायम जूपि चिकित्सकपिनिगु दरबन्दी थप यायेत सरकार तयार जूगु दु।

उकिया लागि ५०० शय्याया अस्पतालपिनिगु संगठन व व्यवस्थापन सर्वेक्षणया ज्या याकन क्वचायेका यकेगु सहमति जूगु दु। अथेहे मेमेगु सरकारी अस्पतालय् न संगठन व व्यवस्थापन सर्वेक्षणया ज्या याकन क्वचायेकेगु सरकारं सहमति याःगु दु।

हनुमानध्वाका–स्वयम्भू सम्पदामार्ग निर्माणया थौं छगु ज्याझ्वः दथुइ शिलान्यास जूगु दु। मरु गणेद्यः नाप निसे सम्पदामार्गया शिलान्यास संस्कृति, पर्यटन नाप नागरिक उड्डयन मन्त्री जीवनराम श्रेष्ठं यानादीगु खः।

हनुमानध्वाका व स्वयम्भू निगुलि हे विश्वसम्पदा सूचीइ सूचीकृत जूयाच्वंगु दु। थुगु निगु हृ थाय् यात स्वायेगु कथं २ किलोमिटर सतक निर्माण नाप उगु सतक  नाप स्वाना च्वंगु सतः व मौलिक छेँ न निर्माण व पुनर्निर्माण यायेगु योजना दु ।

मन्त्री श्रेष्ठं कार्यकालय् थःगु न्हापागु ज्या हे सम्पदामार्ग यायेगु धका धयादीगु खः। हनुमानध्वाका–स्वयम्भू सम्पदामार्ग निर्माणसम्बन्धी न्हापागु ज्या थौनिसे न्ह्याःगु खः।

न्ह्याकल नेपाल संवत् न्हूदँ राष्ट्रिय समारोह समिति ११४२ या ग्वसालय् नेपाल संवतया छ्यलाबुला व थुगु संवतया महत्वयात कयाः स्यनेकने ज्याझ्वः जुगु दु ।

थौं  नेपाः ब्याकेटय् समारोह समितिं दँय्दसं पिकयाच्वंगु तिथिपौ पिथनाया दुजः लिसें अङ्क विज्ञान ज्योतिष देवनारायण महर्जनं थथे स्यनेकने यानादिगु खः ।

वयकलं नेपाल संवतया महत्व व थ्व संवत गुगु कथं छयलाच्वंगु दु धइगु खँ ध्वाथुकादिगु खः। ज्याझ्वलय् समारोह समितिया सल्लाकार समितिया संयोजक तीर्थराम डंगोलया सभापतित्वय् जुगु खःसा तिथि पौं उप समितिया दुजः बिष्णु चित्रकारं नं नेपाल संवतया महत्व व छय्लाबुलायात कयाः बिचाः प्वंकादिगु ।