समुन्नत महानगरया निति विकास व साझेदारी नारा ज्वना पोखराय् साउन १३ व १४ गते न्हापागु महानगर सम्मेलन याइगु जुगु दु।

पोखरा महानगगरपालिका–१८ सराङकोटया सराङकोट माउन्टेन लजय् उगु भेला जुइत्यःगु खः। पोखराया मेयर धनराज आचार्य निर्वाचित जुइवं पोखराय् मेयर सम्मेलन याये धका धाउगु खः।

निन्हु त जुइगु उगु भेलाय् खुगु हे महानगरया प्रमुख, उपप्रमुख व प्रमुख प्रशासकीय अधिकृतपि सहभागी जुइ धका पोखरा महानगरपालिकाया सूचना अधिकारी भरत पौडेलं जानकारी बिउगु दु।

शेयर बजाः परिसूचक नेप्से थौं मङ्गलवाः ४४ दशमलव ८० अङ्कं घटे जुया २ हजार ८८ दशमलव १६ विन्दुइ कुहावंगु दु।

दक्को समूहया शेयर घटे जुगु दु। बजाः नाप कारोबार ल्याः व रकम न घटे जुगु दु। म्हिगः ४ अर्ब रुपैयाँ स्वया अप्पो कारोबार जुगु खःसा थौं २२२ गु कम्पनीया ८७ लाख ४० हजार कित्ता शेयर ३ अर्ब ७० करोड ४९ लाख रुपैयाँ कारोबार जुगु दु।

दकलय् अप्पो शिवम् सिमेन्टया १९ करोड ३६ लाख व अरुण काबेली हाइड्रोया १५ करोड ५७ लाख रुपैयाँ शेयर किनबेच जुगु खः। थौं गणपति लघुवित्त कम्पनीया शेयर सात प्रतिशत स्वया अप्पो घटे जुगु दु।

रिभर फल्स पावर कम्पनी, दकलय् अप्पो लघुवित्त, पोखरा फाइनान्स व गुहेश्वरी मर्चेन्ट बैंकिङ एन्ड फाइनान्स कम्पनीया शेयर ५प्रतिशत स्वया अप्पो घटे जुगु दु। समग्र बजार घटे जूसा मल्टिपर्पोज फाइनान्सया शेयर ९ प्रतिशत स्वया अप्पो थहावंगु दु।

वंगु २४ घण्टाया दुने देयन्यक थप ६३८ म्हेसित कोरोना संक्रमण पुष्टि जुगु दु स निम्हेसिगु ज्यान वःगु दु।

स्वास्थ्य तथा जनसंख्या मन्त्रालयया कथं ५ हजार ५५ म्हेसिगु परीक्षण याउगलि ६३८ म्हेसित संक्रमण पुष्टि जुगु खः।

उकि मध्ये २ हजार २१५ म्हेसिगु पीसीआर परीक्षण याउगुलि ४०० म्हेसित व २ हजार ८४० म्हेसिगु एन्टिजेन परीक्षण याउगुलि २३८ म्हेसित संक्रमण जुगु दु धका मन्त्रालयं धाउगु दु।

थ्व नाप आःतक सक्रिय संक्रमितपि ३ हजार ७१४ म्ह थ्यःगु दु सा २४ घण्टाय् २१८ म्ह संक्रमणमुक्त जुगु दु।

प्रधानमन्त्री शेरबहादुर देउवाविरुद्ध नाराबाजी याःपि स्वम्हेसित रिहा याउगु दु।

उपि स्वम्हेसिया प्रधानमन्त्री देउवा सहभागी जुगु छगु ज्याझ्वलय् एमसीसी याउगु धासे नाराबाजी याउगु खः।

नागरिकता विधेयकय् न विरोध याउगु खः। स्वम्हेसित न थौं रिहा याउगु खः।

राष्ट्रपति विद्यादेवी भण्डारीं स्पेन, रुसी महासंघ व डेनमार्कया लागि राजदूत नियुक्त याउगु दु।

स्पेनय् शर्मिला पराजुली ढकाल, रुसी महासंघय् मिलनराज तुलाधर व डेनमार्कय् प्रा.डा. रामस्वार्थ राययात राजदूत नियुक्त याउगु दु।

मन्त्रिपरिषदं राजदूतय् सिफारिस यायेवं उमिगु नां संसदीय सुनुवाइ समितिं सुनुवाइ लिपा नियुक्तिया लागि अनुमोदन याउगु खः। अथेहे भारतया लागि नेपाली राजदूत डा. शंकरप्रसाद शर्मा भुटानया लागि गैर आवासीय राजदूतय् नियुक्त याउगु दु।