इतुंबहाः सुधार समितिपाखें श्री भाष्करदेव संस्कारित केशचन्द्रकृत पारावर्त महाविहार इतुंबहाःया झिम्ह थाय्पापिंत छगू विशेष ज्याझ्वःया दथुइ हनेज्या याःगु दु।

चक्रेश्वर ओमरत्न वज्राचार्य (सानुरत्न), मू थाय्पा मणिरत्न शाक्य, मोतिकाजी शाक्य, अमिररत्न शाक्य, बोधवीर शाक्य, रविबहादुर शाक्य सानुबाबु शाक्य, तेजरत्न शाक्य, विजेन्द्र शाक्य व सानुमान शाक्ययात हनेज्या याःगु खः।

चक्रेश्वर ओमरत्न वज्राचार्य, रत्नाकर वज्राचार्य व संजिब वज्राचार्यं स्वस्ति वाचन यानाबिज्याःगु खःसा इतुंबहाः मिसा पुचलं नेवाः परम्पराकथं ख्येँ सगं बिउगु खः।

अथेहे सम्मानित जुयादीपिंत समितिया नायः मनोज शाक्यं खादा क्वखायेकादीगु खःसा सल्लाहकार भगवान शाक्यं दोसल्लां न्ययेकादीगु खः।

ज्याझ्वलय् सर्वसंघया दुजः भगवान शाक्य, महाविहारया छ्याञ्जे प्रज्ञारत्न शाक्य, केशचन्द्र गुंला बाजं खलःया गुरु दीपकमान शाक्यं नुगःखँ तयादीगु खः।

वंगु फागुनया लिपांगु वालय् जक वसपोलपिंत थाय्पा लुइगु ज्याझ्वः जूगु खः।

नेपालभाषा केन्द्रीय विभागया प्रमुखय् सह प्राध्यापक डा. राजनलाल (रास) जोशी नियुक्त जुयादीगु दु ।

सह प्राध्यापक जोशीं वंगु सोमवाः हे विभाग प्रमुखया पदभार लःल्हाना कयादीगु खः। वय्कः ताःई न्ह्यवंनिसें नेपालभाषा केन्द्रीय विभागय् प्राध्यापन याना वयाच्वनादीम्ह खः।

केन्द्रीय विभागया ज्याकू पाटन क्याम्पसय् दु।

येँ महानगरपालिका वडा १८ या पुलांम्ह वडा अध्यक्ष लिसें पुलांम्ह वामपन्थी नेता चन्द्रानन्द नेवाः ९० दँय् मन्त।

वि.सं. २०१९ निसें हे वडाय् स्वतन्त्र उम्मेदवारया रुपय् विजयी जुया च्वनादीम्ह वय्कः वि.सं. २०३२ सालय् येँया प्रधानपञ्च समेत जुयादीगु खः ।

देशय् बहुदलीय व्यवस्था वयेधुंकाः २०४९ व २०५४ सालय् नं वय्कः स्वतन्त्र हे जुयाः वडाय् त्याकादीगु खः । मदुम्ह भाजु नेवाःया मस्त मदुसा जहान नं मदयेधुंकल ।

म्हिगः पशुपतिया आर्यघाटय् वय्कःया अन्तिम संस्कार याःगु खः ।

रिभर फल्स पावर लिमिटेडं सर्वसाधारणया लागि साधारण शेयर निष्कासन व बिक्री खुल्ला याउगु दु।

कम्पनीं थौं बुधवाःनिसे प्राथमिक सार्वजनिक निष्कासन (आईपीओ) या बिक्री खुल्ला याउगु दु। सर्वसाधारणया लागि कम्पनीं प्रतिकित्ता १ सय रुपैयाँ अङ्कित दरं २७ लाख ३० हजार कित्ता शेयर बिक्री यायेगु प्रयोजनया लागि दरखास्त आह्वान याउगु दु।

कम्पनीया कथं २७ लाख ३० हजार कित्ता शेयरमध्ये २ प्रतिशत अर्थात् ५४ हजार ६ सय कित्ता कम्पनीया कर्मचारी व ५ प्रतिशत अर्थात् १ लाख ३६ हजार ५ सय कित्ता सामूहिक लगानी कोषयात छुटे याना बाँकी दुगु  २५ लाख ३८ हजार ९ सय कित्ता शेयर खरिदया लागि सर्वसाधारणं आवेदन बिइत धाउगु दु।

निष्कासित शेयरय् लगानीकर्तापिन्त थौंनिसे खुलेयाना याकन जेठ ४ गते तक न्यूनतम १० कित्तानिसे अधिकतम १ लाख कित्तातक आवेदन बिइफइ। कम्पनीया धितोपत्र निष्कासन व बिक्री प्रबन्धक प्रभु क्यापिटल लिमिटेड याइगु जुगु दु।

येँ न धनगढीया लागि ब्बःगु श्री एअरलाइन्सया जहाजय् इन्जिनय् समस्या वयेवं येँ लिहावया सुरक्षित अवतरण याउगु दु।

येँपाखे २५ नटिकल माइल अर्थात् झन्डै ४७ किलोमिटर तापक्क ब्बये धुकुगु उगु जहाजय् खवय् च्वंगु इन्जिनं ज्या मयागु सङ्केत क्यःगु खः।

वया लिपा पाइलटं जहाजयात येँ लितहया सुरक्षित अवतरण याउगु खः। जहाजय् यात्रु व चालक दलय् सदस्यपि याना ८७ म्ह मनूत दुगु खः।