सन् २०११ या मिस नेवाः सुनिता डंगोल नेकपा एमालेपाखे येँ महानगरया उपप्रमुखया प्रत्यासी खः।

डंगोलं रञ्जना लिपि प्रचार यायेगु कथं छम्ह अभियन्ता कथं ज्या याउगु खः। नेपाल भाषा विज्ञ कथं टेलिभिजनया ज्या याये धुकुम्ह खः। डंगोल पार्टीया मत जक मखु स्वतन्त्र मत तक थःपाखे वइ धका दाबी याउगु दु।

‘येँच्वपिनिगु मतिना याउगु दु, पार्टीया शक्ति न दु’ डंगोल धाउगु दु, ‘न्युट्रल भोट स्वयेगु खःसा आः देयन्यक ल्याय्म्हपिन्त मौका बिइमाः धका सः वयाच्वंगु दु।’ मतदातापिनिगु इच्छा कथं हे थःत पार्टी न अवसर बिउगु खः धका उम्मेदवार डंगोलं धाउगु दु। 

येँ महानगरपालिकाया मतपत्र देयन्यकया हे दकलय् तपागु जुगु दु।

येँ महानगरय् ६४ गु प्रकारया चिं समावेश याउगु दु। राजनीतिक दल व स्वतन्त्रपिनिगु चिं निगु लहरय् मतपत्र छापे याउगु दु।

गुलि स्वतन्त्र उम्मेद्वारपिनिगु नाप फरक फरक चिं दुगुलि तपागु मतपत्र जुगु धका कर्मचारीपिन्स धाउगु दु।

थीथी जातजातिया पहिचानय् वयाच्वंगु कमी कमजोरीयात वाःचाय्काः थुकियात ज्यंकाः सकसित छधी छप्पाँय् दय्केत न्ह्यचिलेगु जमर्को यासें जिं उम्मेदवारी बियागु दु ।

नेवाः संस्कृति, सम्पदाया संरक्षण, सम्वद्र्धन याय्माःगु दु, नेवाः धयापिं थनया आदिवासी खः धइगु खँ थुइकाः न्ह्याय्माःगु खँय् वास्ता दयाच्वंगु मदु । झीगु संस्कृतिइ विकृति वयाः बिरुप जुयाच्वंगु अवस्थाय् छगू गुरुयोजना हे तयार यानाः मूल्य मान्यता कायम याय् नं हथाय् जुइधुंकल।

थीथी जातजातिमध्ये नेवाःत समुच्च रुपय् आर्थिक स्तरय् थहां वयेफुगु अवस्था मदुनि। थन स्वायत्तता म्हुतुइ जक जुयाः व्यवहारय् छ्यलेमफुबलय् परनिर्भर जुजुं वनाच्वंगु दु। सरकारय् बाय् गनं नं प्रतिनिधित्व याकेत सबल, सक्षम व निस्वार्थ भावना ब्वलंम्ह लोकंह्वाःम्ह नेतृत्व झीथाय् खनेदयाच्वंगु मदु।

उकिं एकताया नितिं जोड बीमाःगु दु । थ्व सकतां खँयात बिचाः यानाः वडाय् दुने थीथी कथंया ज्याझ्वःत हय्गु जुइ । वडा विकासया लागिं वइगु बजेट वडाय् दुने च्वंपिं बेरोजगार दाजुकिजापिंत ज्याय् छ्यलेगु नं जिगु मू लक्ष्य खः । थन झीगु त्वाःबहाःयात कुरुप दय्काच्वंगु अव्यवस्थित तार, सडकय् लालाःथे मोटर पार्किङ्ग आदि कथं समस्या चीकेत ज्या याय्गु योजना दु । वडाय् दुने मूलँपु, दुने लँपु (गल्ली) बहाः बहि, चुक, ननिइ मगाःमचाःथाय् बिजुली मतया व्यवस्था याय्।

वडाय् सेवाग्राहीपिन्त थःगु मातृभाषा छ््यय्केबीगु, यदि भाय् मथूम्ह जूसा छकःया लागिं थःपिन्सं ग्वहालि यानाबीगु जुइ । वडाय् दुने नेपालभाषां ब्वंकावःगु सरकारी व निजी बिद्यालययात थप व्यवस्था यासें मातृभाषा शिक्षायात धिसिलाकेगु जुइ । अथे हे, वडा दुने च्वंपि स्थानिय मनूत अस्पताल वनेमालीबलय्यात आःयात छगः एम्बुलेन्सया व्यवस्था याय्गु जुइ। वडा दुनेया छुं नं ज्याखँय् आवश्यकता कथं हनेबहःपिं प्रबुद्ध व्यक्ति, दाजुकिजापिनि सल्लाह सुझाव कथं ज्या न्ह्याकेगु जुइ।

जि वडाया संस्कृति, सम्पदा, स्वास्थ्य, शिक्षालिसेंया क्षेत्रया सर्वाङ्गिण विकासया योजनालिसें थः चुनावी मैदानय् कुहांवयागु खः।

वडा दुनेया मूर्त, अमूर्त सम्पदाया संरक्षण, सम्वद्र्धन, शिक्षा व स्वास्थ्यय् सहज पहुँच, पर्यावरण आदि सकतां पक्षयात ध्यानय् तयाः जिं थःगु योजना व प्रतिवद्धता सार्वजनिक यानागु दु। वडाया विकासया लागिं अल्पकालीनलिसें दीर्घकालीन थीथी योजना दु ।

निर्वाचन त्याकाकथं १७ वडा दुने अव्यवस्थित तारया व्यवस्थापन, वडाया सरसफाई, विष्णुमति किनारयात हरियाली पार्क दय्केगु व लुँति अजिमाया देगःनापाया खुल्ला थाय्यात खुल्ला व्यायामशालाया रूपं विकास याय् । अथे हे, वडाया विपन्न विद्यार्थीतय्त निःशुल्क शिक्षालिसें जेहेन्दार विद्यार्थीतय्त छात्रबृत्तिया व्यवस्था याय् । अथे हे, क्षेत्रपाटी निःशुल्क चिकित्सालय अस्पताललिसे समन्वय यानाः ज्येष्ठ नागरिकयात निःशुक्ल स्वास्थ्य परिक्षणया व्यवस्था नं याय् ।

ज्येष्ठ नागरिकयात बीगु विशेष भत्ता वडाध्यक्षं खल्ती तयाः ज्वनाजुइगु प्रवृत्तीयात अन्त्य यासें बैंकमार्फत उपलब्ध याके । १७ वडा दुनेया मूर्त सम्पदाया पुनर्निर्माण, जिर्णोद्धारलिसें अमूर्त सम्पदाया संरक्षण व सम्वद्र्धनया लागिं गुरुयोजना हे दय्काः न्ह्याःवने । 

येँ महानगरपालिका दुने दकले तःधंगु वडा हे १६ वडा खः । थन २०द्वलं मयाक्क मतदातात दु।

अथे हे, व्यापारिक ल्याखंलिसें सांस्कृतिक ल्याखं नं थुकिया तःधंगु महत्व व भूमिका दु । थनया सांस्कृतिक पक्षया विकासपाखे, थनया थीथी देगः, ल्हुतिया बाइसधारा, आदि थुज्वःगु मूर्त सम्पदानिसें अमूर्त सम्पदाया संरक्षणया भाला ला दुगु हे जुल । उकिया नापं थनया व्यापारी, उद्योगीतय् नितिं माःकथंया वातावरण दय्काः उद्योग, उत्पादनयात थकाय् नं माःगु दु।

स्वास्थ्यया खँय् दकले महत्वपूर्ण धयागु ला, वडाबासीया सहज पहुँच दय्केगु खः, माःबलय् माःकथं उपचार याय्खनेमाःगु हे खः । थुकिया नितिं थन दुगु अस्पताल, स्वास्थ्य केन्द्रलिसे सहकार्य यानाः उपचारया व्यवस्था याय्गु, एम्बुलेन्सया व्यवस्था याय्गु ज्या याय् । अथे हे, शिक्षाया नितिं नं जेहेन्दार विपन्न वर्गया विद्यार्थीत धेबाया हे कारणं शिक्षा बन्चित जुइ म्वाःलेमा धइगु मान्यता दु। व हे कथं योजना हय् । सेवाग्राहीं अःपुक सेवा काय् खनेमा धइगु ल्याखं आधुनिक प्रविधियात लिनाः वडाया सेवायात न्ह्याके ।