नेकपा एमालेपाखे प्रतिनिधि सभा सदस्यया लागि येँ क्षेत्र नम्बर ६ या उम्मेदवार सर्वेन्द्र खनालं येँयात पर्यटकीय व सांस्कृतिक कथं म्हसिकेगुलि थम्हेसिया माःगु कथं ज्या यायेगु जुइ धका धयादीगु दु।

येँ हना वया च्वंगु संस्कृति, परम्परा थःत तसक यः धका धयादीगु दु। उम्मदेवार खनालं थःम्हेसिया प्रहरी सेवाय् न थीथी जात्रापर्वय् स्थानीय जनतानाप समन्वय यासे सुरक्षा व्यवस्था कायम यायेगु निति व जात्रायात व्यवस्थित ढङ्गं सम्पन्न यायेगु ज्या न उगु इलय् यानागु दु धका धयादीगु खः। ‘उगु इलय् प्रहरीया रुपं समाजसेवा यानागु धका धयादीगु खः।

आः हाकन छकः स्थानीय जनताया ग्वाहालि दत धाःसा जनप्रतिनिधि जुया देय् व राष्ट्रया सेवा यायेत धका वयागु दु, भलसा दु सकसिया ग्वाहालि दइ’ धका खनालं धाःगु दु। स्थानीय संस्कृति न थःम्हेसिया यक्को खँ सय्काःगु दु धका धयादीगु खः । वयकलं न उगु इलय् २०६५ दँया येँया जात्राय् जुगु काण्डयात लुमकादीगु खः । ‘उगु ईया परिस्थिती मेगु आन्दोलन स्वया बिस्क खः।

उगु ईलय् थःगु परम्परा, संस्कृति बचे यायेगु माग यासे स्थानीय जनसमुदाय आन्दोलनय् कुहावःगु खः। दमन यायेगु खँ हे मजुल, स्थानीय समुदायनाप मिले जुया जि समन्वयकारी भूमिका म्हिता’ खनालं १५ दँ पुलागु ई लुमकादिसे धयादीगु दु तत्कालीन अर्थमन्त्री बाबुराम भट्टराई न येँया लागि बियावया च्वंगु बजेट क्वपागुलि तं चाया स्थानीय जन समुदायपिन्स जात्रा हे रोकेयाना आन्दोलनय् कुहावःगु खः। उगु इलय् स्थितीयात नियन्त्रणय् काःगु खनालया भूमिकायात यक्कोसिया च्वछाउगु खः।

पूर्व संघीय मामिला तथा सामान्य प्रशासन मन्त्री नाप जनता समाजवादी पार्टीया नेता राजेन्द्र श्रेष्ठ प्रतिनिधि सभा सदस्यया नितिं येँ क्षेत्र नम्बर ७ पाखें कुसा चिं ज्वनाः उम्मेदवारी बियादीगु दु।

नेपालभाषा मंकाः खलःया दुजः कथं वय्कलं ताः ई न्ह्यःनिसें हे थीथी नेवाः आन्दोलनय् न्ह्यज्याना च्वनादीगु खः । म्ये च्वय्गु, हालेगुलिइ नं जाःम्ह राजेन्द्र श्रेष्ठं थ्वयां न्ह्यः सांसद जूबलय् संसदय् थीथी मुद्दा ल्ह्वनाः जनताया सः न्ववाइम्ह नेता कथं थःगु छवि दय्केधुंकूगु दु । राज्यं ययःथे लालाःथाय् डोजर चले यानाः विना क्षतिपुर्ति जनताया छेँ थुनाच्वंगु इलय् वय्कलं उकिया विरुद्ध संसदय् सः तयादीम्ह खः।

नापं आवास सम्वन्धि विधेयकय् संशोधन प्रस्ताव तयाः विना क्षतिपुर्ति जनताया छेँ थुने मदइगु व्यवस्था सुनिश्चित यानादिल । शिक्षा सम्वन्धि विधेयकय् नं वय्कलं हे संशोधन प्रस्ताव तयाः मातृभाषा शिक्षा सुनिश्चित याकादिल । थ्व हे विधेयकय् चुयाः आः येँ महानगरपालिका, किपू नगरपालिका, यल महानगरपालिकां स्थानीय मातृभाषां स्थानीय पाठ्यक्रम लागू याय्धुंकूगु दु ।

वय्कः मन्त्री मखुबलय् वा पदय् मदुबलय् नं २०७२ सालय् भुखाचं पिडित जूपिं पुलां गुह्येश्वरीया परिवारयात वय्कलं पहल यानाः १२० खा छेँ दय्कादीगु दु ।

राजनीति व सामाजिक ख्यलय् क्रियाशील रिसा श्रेष्ठं यल क्षेत्र नं २ (१) य् प्रदेशसभा सदस्यया लागि उम्मेदवारी बिःगु दु।

संयुक्त वाम– लोकतान्त्रिक गठबन्धनपाखे नेपाली काँग्रेसया उम्मेदवार श्रेष्ठं ल्याय्म्ह व मिसापिनिगु प्रतिनिधित्वयासे चुनावी मैदानय् कुहावःगु दु । महिला संघया केन्द्रीय प्रतिनिधि, आदिवासी जनजाति विभागया केन्द्रीय सदस्य नाप सामाजिक व मिसापिनिगु आर्थिक विकासय् उतिकै हे क्रियाशील जुयाच्वम्ह खः।

महालक्ष्मी प्याब्सन व ललितपुर ओमन च्याम्बरको कोषाध्यक्ष, वल्र्ड नेवाः अर्गनाइजेशनया पूर्व केन्द्रीय सदस्य व नेवाः देय् दबू अन्तर्गत नेवाः विद्यार्थी दबूया संस्थापक अध्यक्ष न खः। वयकलं थःगु उम्मदेवारी मिसा पिनिगु आर्थिक बिकास नाप मिसापिनिगु रोजगारी सुनिश्चित यायेगु निति न खः धका धयादीगु दु।

यल क्षेत्र नं २ य् संस्कृति, सम्पदाया संरक्षण, महिला उद्यमशीलताया विकास, सूकु थायेगु  परम्परागत पेशायात प्रवद्र्धन, लःया समस्या समाधान, सतकयात स्तरोन्नति हे थःगु मू एजेण्डा दु धका धयादीगु दु।

थ्व हे वइगु मंसिर ४ गते जुइगु प्रतिनिधि सभा व प्रदेश सभा निर्वाचनया लागि थौंनिसे स्थिर ई सुरु जुगु दु।

थौं चान्ह्यः १२ बजेनिसे स्थिर ई सुरु जुइ धका निर्वाचन आयोगं धाःगु दु। थ्व स्वया न्ह्यः निर्वाचनया इलय् प्रचारप्रसार याये मदुइगु ईयात मौन अवधि धायेगु याइ।

थुगु पटक धाःसा आयोगं थुगु ईयात स्थिर ई धायेगु यागु खः। थुगु ई मतदान जुइगु दिं मतदान केन्द्र बन्द मजुतले कायम जुइ ।

थुगु इलय् भौतिक वा अभौतिक छु न कथं निर्वाचन प्रचारप्रसार याये दइ मखु।

येँया क्षेत्र न ८ बागमती प्रदेश सभाया उम्मेदवार प्रतिमा शाहीं थःम्हेसिया बहुजातीय, बहु सास्कृतिक नाप ३३ प्रतिशत मिसापिनिगु सहभागीतयात ५० प्रतिशत थ्यकिइगु निति जुगु उम्मेदवारी खः धका धयादीगु दु।

येँय् यात मौलिक नाप साँस्कृतिक कायम याना पर्यटकिय सहरया रुपं बिकास यायेगु थःगु प्रतिबद्धता दु धका धयादीगु दु।

अथहे नागरिकपिनिगु आधारभूत शिक्षा स्तरीय व सर्वसुलभ यायेगु निति सः थ्वय्केगु जुइ धका धयादीगु दु।

थौंकन्ह्य जुयाच्वंगु बिकृति, बिसंगती, भ्रष्टाचार, असुरक्षा व अव्यवस्थायात अन्तयाना सुशासन, सामाजिक न्याय व सदाचारिता बिकास यायेगु निति कुतः यायेगु जुइ धका धयादीगु दु।