स्थानीय तहया चुनावय् थःपिं त्याना वनीगु अवस्थाय् नेवाःतय्गु मंकाःगु अडान पौ कथं ज्या यायेत तयार दु धकाः किपुलिइ क्रियाशिल जुयाच्वंगु प्रमुख पार्टीया नेतानिसें उम्मेदवारपिन्सं प्रतिबद्धता प्वंकादीगु दु।

एमालेया किपू नगर समितिया अध्यक्ष राधाकृष्ण बस्नेत, एमालेपाखें मेयर उम्मेदवार जुयादीम्ह केशरत्न बज्राचार्य, उपमेयरया उम्मेदवार जुयादीम्ह विन्दु महर्जन, नेपाली कांग्रेस किपू नगर समितिया उपसभापति रजिता महर्जन गौतम, कांग्रेसया चुनाव चिं कया उपमेयरय् उम्मेदवार जुयादीम्ह जसपाया नेतृ सुनिता महर्जन शाक्य, माओवादी केन्द्रपाखें मेयर उम्मेदवार जुयादीम्ह प्रा. डा. शिवशरण महर्जन लगायतपिन्सं नेवाः मंकाः पौयात कया उगु कथं प्रतिबद्धता प्वंकादीगु खः।

थःपिं चुनावयु त्याइगु अवस्थाय् नेवाः मंकाः अडान पौयात कार्यान्वयन यायेगु नितिं एकीकृत समाजवादीया उम्मेदवार नापं नेतापिं, नेपाल मजदुर किसान पार्टीया उम्मेदवार नाप. नेतापिन्सं नं प्रतिबद्धता प्वंकादीगु खः।

शुक्रवाः नेवाः देय् दबू किपू नगर समितिं सांस्कृतिक बाजा गाजा सहित जुलुस पिकया किपुलिइ क्रियाशिल जुयाच्वंगु थीथी राजनीतिक पार्टीया ज्याकुथिइ हे वना नेवाः मंकाः अडान पौ लःल्हाःगु इलय् राजनीतिक दलया नेता नापं उम्मेदवारपिन्सं उगु कथंया प्रतिबद्धता प्वंकादीगु खः।

देय् दबू स्वनिगः विशेष प्रदेशं तयार याःगु झिंच्यागू बुँदा नापं किपूया सन्दर्भयात कया थप स्वंगू बुँदा दुथ्याका मुक्कं नीछगू बुँया अडान पौ देय् दबू किपू नगर समितिया अध्यक्ष बुद्धिलाल ज्यापु, देय् दबू येँ जिल्लाया नायो धनबहादुर महर्जन व देय् दबू स्वनिगः विशेष प्रदेशया अध्यक्ष श्रीकृष्ण महर्जनं मंकाः कथं लःल्हनादीगु खः।

उगु कथंया अडान पौ लःल्हायेगु ज्या निरन्तर रुपं थाय् थासय् जुइ धकाः स्वनिगः विशेष प्रदेशया अध्यक्ष महर्जनं धयादीगु दु । किपुलिइ लःल्हाःगु अडान पतिइ किपूया सन्दर्भय् दुथ्याकूगु स्वंगू बुँदा थुगु कथं दुः

क) त्रिभुवन विश्व विद्यालय व किपूया समुदायया दथुइ २०७२ सालं जूगु सम्झौता याकनं कार्यान्वयन यायेमाः।

नापं किपू नगरपालिकाया नियम कथं नक्सा पास मयासे कानुनयात हाचांगाया त्रिविपाखें भवनत दयेकेगु ज्या यानाच्वंगुुलिं कानुनया दायराय् हयेमाः ।

ख) किपू नगर दुनेया सार्वजनिक जग्गात भागाधिकार थीथी संघ संस्थापाखें यानाच्वंगु दु । अज्वःगु संस्थापाखें सामाजिक दायित्व व किपूवासीपिन्त लाभ बिइगु कथं ज्या यानाच्वंगु खने मदु । उकिं अज्वःगु संस्थायात आम्दानीया हिस्सा सामाजिक दायित्व कथं किपू नगरवासीया नितिं ज्या याकेमाः ।

ग) किपू नगरपालिका वडा नं. १ लागा लाय्कूया गुरु योजना दयेकेमाः । नापं तलेजु द्यःछेँ नापं देगः नेवाः वास्तुकला कथं पुनःस्थापित यायेमाः । 

निर्वाचन आयोगं पालिका चुनावया लागि उम्मेदवारी बिउगु दल नाप स्वतन्त्र कथं मनू तयेगु निति थौं चुनाव चिं लल्हाइगु जुगु दु।

चुनावी कार्यतालिका कथं आयोगं हे चुनाव चिं लल्हाइगु जुगु दु।

आयोगं पालिका चुनावया लागि दर्ता जुगु दलपिन्स उमिगु थःगु हे चिं दइसा स्वतन्त्र उम्मेदवारया लागि आयोगं चिं लल्हाइगु जुगु दु।

कांग्रेसया शीर्ष नेतापिनिगु इनाप व चेतावनीया बाबजुद भरतपुर महानगरपालिका मेयरया स्वतन्त्र उम्मेदवार जगन्नाथ पौडेलं थःगु मनोनयन लितकाउगु मदु।

थौं शुक्रवाः बहनि ५ बजे तक उम्मेदवारी लितकायेगु लिपागु दिं न पौंडेलं उम्मेदवारी लितकाउगु मदु। उम्मेदवारी लितकायेगु ई क्वचाय्वं हे कोण सभाय् सम्बोधन यासे थःम्हेसिया उम्मेदवारी लित मकायउगु धका धाउगु खः।

पौडेलयात ह्यकेगु निति गृहमन्त्री बालकृष्ण खाण व राज्यमन्त्री उमेश श्रेष्ठ चितवन वःगु खः। वयकः राष्ट्रिय सभाया सदस्य जुइ धुकुम्ह खः। ७० दँ दुम्ह पौडेल वरिष्ठ अधिवक्ता न खः।

नेपाल कम्युनिष्ट पार्टी (एमाले) यल महानगरपालिका मेयर, उपमेयर, वडाध्यक्ष व वडासदस्य पदया उम्मेदवारपिन्स थौं निसे घरदैलो अभियान शुरु याउगु दु।

महानगरयात लालकिल्ला दयकेगु योजना ज्वना उम्मेदवारपि चुनावी घरदैलो शुरु याउगु खः। थौं यलया वडा नं ७ व ८ च्यासलं अभियान शुरु याउगु मेयर पदया उम्मेदवार हरीकृष्ण व्यञ्जनकारं धाउगु दु।

वयकलं धयादीगु दु– “थुगु पटक महानगरपालिकाय् एमाले न विजय हासिल याइगु निश्चित जुइ धुकुगु दु। जिमिगु पार्टीया नेतापि विजय जुइ धुका थुगु थाय्या ख्वा हे हिलेगु जुइ। नकतिनि हे देशय् न्यूनिकरण जुया वनाच्वंगु कोरोना महामारीं याना जनताया हितय् तक थीथी ज्या यायेगु योजना एमाले के दु।”

कला व संस्कृतिं जाःगु  थुगु महानगरपालिकाय् थीथी सम्भावना मालां जनतायात रोजगारी प्रदान यायेगु लक्ष्य थःपिके दु धका धयादीगु खः।

नेकपा माओवादी केन्द्रया येँ महानगरपालिका वडा–१३ या वडाध्यक्ष उम्मेदवार रामशरण डंगोल नेकपा (एमाले) प्रवेश याउगु दु।

नेकपा (एमाले)पाखे येँ महानगरपालिकाया मेयर उम्मेदवार केशव स्थापितं सिन्ह टिका एमाले प्रवेश याकूगु खः। पार्टी प्रवेशनाप छगु विज्ञप्ति जारी यासे नेकपा माओवादीं गठबन्धनया नामय् उम्मेदवार ल्ययेगु निति नातावाद, कृपावादयात जक प्राथमिकता बिउगुलि असन्तुष्टि प्वकूगु खः।

‘जि २०४३ सालनिसे निरन्तर वामपन्थी आन्दोलनय् सक्रिय जुया वयाच्वनाम्ह व  वामपन्थी आन्दोलनया माध्ययमपाखे जक देय् समृद्ध याये फइ धइगु जिगु भलसा याइम्ह जि खः,’ वयकलं जारी याउगु विज्ञप्तिइ धाउगु दु,’ ‘जिगु जीवनया महत्वपूर्ण व उर्जाशील ई जि वामपन्थी आन्दोलनय् हे सक्रिय जुया च्वनागु खँ लुमसे वःगु दु।’

वयकलं जारी याउगु विज्ञप्तिइ ०६२–०६३ निसे तत्कालिन नेकपा माओवादी केन्द्रय् सक्रिय जुयाच्वना जि माओवादी केन्द्रय् जिल्ला कमिटी सदस्य व येँ महानगर कमिटीइ महत्वपूर्ण जिम्मेवारी कःघाना च्वनागु खः।