येँ महानगरपालिकाया खुक्वःगु् कार्यपालिका बैठकं महानगरपालिकाया प्रवक्ताय् येँ महानगर १७ वडाया अध्यक्ष नविन मानन्धर नियुक्त याउगु दु।

१७ वडाध्यक्ष मानन्धर थ्व स्वया न्ह्यः सूचना तथा प्रविधि संयोजकया जुयादी धुकुगु खः।

नेपालभाषाया नांजाम्ह उपन्यासकार मथुरा साय्मि माइल्ड ब्रेन स्ट्रोक जुयाः नर्भिक हस्पिटलय् आइसीइयुलय् उपचार याना च्वनादीगु दु।

वंगु शुक्रबाः सनिलया खुता ईलय् वय्कःया उसाँय् आकाझाकां स्यं चाबहिइया ओम अस्पतालय् भर्ना याउगु खः। अनं वय्कःया न्ह्यपुइ (ब्रेन) य् समस्या जुउगुलिं नर्भिक अस्पताल यंकुगु खः।

उपन्यासकार साय्मि चयप्यदं (८४) बुदिं वंगु गुरु पुन्हि, असार २९ गते बुधबाः हंगु खः। वय्कः लिपांगु कृति “महाअभियान“ खः।

नेपाल भाषा व साहित्य ख्यः प्यंगः थां कथं नाप भाषा निभाः प्रेमबहादुर कंसाःया झ्वाता शनिबाः उलेज्या ज्या जुगु दु।

नासः दबू जीर्णोद्धार समितिया ग्वसालय् जुगु उगु ज्याझ्वलय् जनकवि दुर्गालाल श्रेष्ठं महाकवि सिद्धिदास महाजु, पूर्व उपप्रधानमन्त्री प्रकाशनमान सिंहं गद्यगुरु नाप पण्डित निष्ठानन्द बज्राचार्य, वाग्मती प्रदेशया खानेपानी, सिंचाई नाप उर्जा मन्त्री वसन्त मानन्धरं योगवीरसिंह कंसाः, येँ महानगरपालिकाया पूर्वमेयर विद्यासुन्दर शाक्यं मास्टर जगतसुन्दर मल्ल, वडाअध्यक्ष नीलकाजी शाक्यं भाषा निभा प्रेमबहादुर कंसाःया झ्वाता उलेज्या यानादीगु खः। वाग्मती प्रदेश सरकारया ग्वाहालिं मूर्तिकार महेश तुलाधर दयकादीगु उगु झ्वाता येँ महानगरपालिका– २५ जनबहाःया केल त्वालय्  नासः डबूलिइ उगु झ्वाता तःगु खः।

उगु ज्याझ्वलय् वाग्मती प्रदेशया मन्त्री मानन्धरं नेपाल भाषा साहित्य ज्वः मदुगु योगदान यानादीपिनिगु झ्वाता तये खगुलि गौरवको अनुभव जुगु धका धयादीगु खः। नेपाल भाषा साहित्यय् ज्वःमदुगु योगदान यानादीपिनिगु जीवनी, योगदान, कृतित्वबारे जानकारी कायेत थुगु हे थासय् टिओआर कोट तयेमाःगु वंं उकया लागि वाग्मती प्रदेशं माःगु ग्वाहालि यायेगु धका मन्त्री मानन्धरं बचं बियादीगु खः।

अथेहे येँ महानगरपालिकाया पूर्व मेयर शाक्यं थः मेयर जुयागु इलय् ‘येँ देय् म्हसिके’ पाठयक्रम दयका शिक्षकपिनिगु व्यवस्था याना येँ महानगर दुनेया निजी व सार्वजनिक विद्यालय कक्षा १ निसे ८ तक ब्बकेगु शुरुआत यानागु धका धयादीसे उकियात अझ व्यवस्थित व मजुबत यायेमाःगुलि बः बियादीगु खः।

येँ दुनेया बँ पसः चिइकेगु अभियान मदिक्क न्ह्याकेगु नितिं येँ महानगरपालिकाया मेयर बालेन शाहयात ज्ञापन पौ लःल्हाइगु जूगु दु।

थौं शुक्रवाः येँया नेपाः ब्यांक्वेटय् नेवाः जागरण मञ्चं ग्वसालय् बँ पसःयात कयाः नेवाः सरोकार विषयस जूगु सहलह मुँज्या थथे क्वःछ्यूगु खः।

उगु सहलह मुँज्याय् नेवाः देय् दबूया न्वकू उमेश स्थापित, अभियन्तापिं सुमन सायमि, गणपतिलाल श्रेष्ठ, यादवलाल कायस्थ, मनिष मानवलिसें थीथी क्लब व संघसंस्थाया प्रतिनिधिपिन्स बँ पसः चिइकेगु अभियानयात ताःलाकेगु नितिं ग्वाहालि यायेगु व थुकियात मदिक्क न्ह्याकेगु नितिं खबरदारी यायेगु सहलह जूगु खः।

विश्व बैंकं नेपाःया लागि १ सय मिलियन डलर (पौने १३ अर्ब रुपैयाँ) ऋण स्वीकृत याउगु दु।

विश्व बैंकया कार्यकारी निर्देशक बोर्डं नेपाःया जलवायु–उत्थानशील व समावेशी विकासय् ग्वाहालि यायेगु उद्देश्यं उगु ऋण स्वीकृत याउगु दु धका विश्व बैंकं धाउगु दु।

ग्रीन, रेसिलियन्ट व इन्क्लुसिभ डेभलपमेन्ट ((जीआरआईडी) य् स्वःगु चरणया मध्ये न्हापागु चरणया ज्याझ्वः कार्यान्वयन यायेत थुगु ऋण ग्वाहालि याउगु खः धका विश्व बैंकं धाउगु दु।

विश्व बैंकया माल्दिभ्स, नेपाल व श्रीलंकाया लागि निर्देशक फारिस हदाद जेभोसं कोभिड–१९ महामारी लिपा नेपालय् हरित व समावेशी विकासय् विश्व बैंकं ग्वहालि केन्द्रित याउगु खः।