Display Style:
Column Style
प्रतिनिध सभाया बैठक थौं च्वनिइगु
लहनान्युज | सिल्लागा आमै ११४२, फागुन १८ बुधवाः
प्रतिनिध सभा (संसद) बैठक थौं च्वनिइगु जुगु दु।
थौं न्हिनय् १ बज बैठक सःतूगु दु धका संघीय संसद सचिवालयं धाउगु दु। एमसीसी अनुमोदन जुइवं थ्व न्हापागु संसद बैठक खः।
आइतबाः संसद बैठकय् एमसीसी सम्झौता अनुमोदन जुया बैठक स्थगित याउगु खः।
संसद सचिवालयया कथं थौंया बैठकय् सूचना आयोगया वार्षिक प्रतिवेदन पेस यायेगु सम्भावित कार्यसूचीइ दुथ्यातःगु दु।
२७ वडा भवन निर्माण विवाद
लहनान्युज | सिल्लागा चतुर्दशी ११४२, फागुन १७ मंगलवाः
येँया ज्याथाय्च्वंगु छुस्याबहालय् येँ महानगरपालिका २७ वडा कार्यालयया भवन दय्केत शिलान्यासया ज्या क्वचाय्धुंकूगु दु । वंगु माघ २३ गते येँ महानगरया मेयर विद्यासुन्दर शाक्य, उपमेयर हरिप्रभा खड्गी, वडाध्यक्ष चिनियाँमान बज्राचार्य च्वनाः विधिपूर्वक पूजा यानाः भवनया शिलान्यास याःगु खः । शिलान्यास धुंकाः धाःसा थ्व भवन दय्केत्यंगु थाय्यात कयाः विवाद शुरु जूगु दु । भवन दय्केत्यंगु थाय् पुरातात्विक व ऐतिहासिक महत्वया छुस्याबहाःया ब्व बय्लाछि सतः खःगु धासें सम्पदा अभियन्तातय्सं विरोध याय्वं विवाद न्ह्याःगु खः ।
अभियन्तातय्सं अन वडा भवन मदय्कुसे सतः हे दय्केमाःगु माग यासें येँ महानगरपालिकाय् ज्ञापन पौ तकं लःल्हाय्धुंकूगु दु । विरोधय् कुहांवःपिन्सं स्थानीययात छुं हे जानकारी मब्युसे सतः व सार्वजनिक खुल्ला जग्ग्गा न्हंकाः २७ वडा ज्याकुथिं व्यापारीक भवन दय्केत्यंगु द्वपं ब्यूगु दु । तर वडा सदस्य नरेशमान महर्जनं धाःसा अन वडा भवन दय्केगु लागिं तयारी जुयाच्वंगु ताः ई दयेधुंकूगु व थुकिया बारे सकलें त्वाःबहाःयात जानकारी नं दुगु दावी यानादिल । ‘थन वडा भवन दय्केत स्थानीयलिसे सहलह नं जूगु खः, अबलय् सुना नं छुं मधाः, तर आः वयाः छक्वलं छुस्याबहाःया छुं मनूतय्सं जग्गा दावी याःगुलिं स्थानीय मनूत हे अजूचायाच्वंगु दु’ वडा सदस्य महर्जनं धयादिल ।
थुकिया दथुइ सार्वजनिक थाय् छुस्याबहाःया हे स्वामित्वय् दुगु प्रमाण बहाः दुने सुरक्षित दुगु व जग्गाधनीया नां मदुगु कित्ता नम्बर २१३१ या सार्वजनिक खाली जग्गाय् कानून अःखः भवन दय्केत्यंगु द्वपं अभियन्तातय्गु दु । थ्व खँय् येँ मनपा २७ वडाया वडाध्यक्ष चिनियाँमान बज्राचार्यं बय्लाछिया जग्गाया कित्ता नम्बर १७५८ खःगु, आः वडां छेँ दयेकेत्यंगु २१३१ कित्ता नम्बरया जग्गा छुस्याबहाःयागु मखूगु धयादिल । उगु जग्गा छुस्याबहाःया सम्पत्ति खः धइगु छुं हे प्रमाण मदुगु दावी यानादिल । छुस्याबहाः न्ह्यःनेसं च्वंगु उगु जग्गाया लालपुर्जा वहे त्वाःया स्थानीय जनतां चाय्कातःगु ज्याथा युवा तथा सामुदायिक विकास क्लबया नामय् दुगु जुयाः वडा ज्याकुथिं वहे क्लबलिसे जानाः वडा भवन दयेकेत्यनागु वडाध्यक्ष वज्राचार्यं कनादीगु दु ।
‘उगु जग्गाया लालपुर्जाय् क्लब व बौद्धिक विकास प्राथमिक विद्यालयया नां लानाच्वंगु दु । उगु विद्यालय नं थँहितिया छगू विद्यालयलिसे मर्ज जुयाः थौंकन्हय् मदय्धुंकल’ बज्राचार्यया धापू खः, ’ बज्राचार्यया धापू खः, ‘उकिं स्थानीय सरकार ऐन कथं जग्गाया बछि हकदार अथें नं वडा ज्याकू जुइधुंकल । आः क्लबं नं वडा भवन दय्केत सहमति ब्यूगु जुयाः अन वडा कार्यालय तय्त्यनागु खः ।’ आः वडा भवन दय्केत्यंगु थासय् न्हापा क्लबया हे छेँ दुगु खः । वहे छेँ थुनाः तिनि आः वडा भवन दय्केत्यनागु वडाध्यक्ष बज्राचार्यं कनादिल ।
फल्चा धयातःगु जग्गाय् वडां छुं हे दय्केत्यंगु मदुगु धासें वडाध्यक्ष बज्राचार्यं यदि अन फल्चा दुगु किपा वा छुं नं कथंया प्रमाण लुल धाःसा वडां फल्चा हे दय्काबीगु प्रतिवद्धता तकं प्वंकादिल । छुस्याबहाः संरक्षणया लागिं वडां दँय्दसं बजेट फ्यानातयागु जुयाः थःपिंत सम्पदा विरोधी धकाः द्वपं ब्यूगु पाय्छि मजूगु नं वय्कलं धयादीगु दु ।
सम्पदा हे झीगु पहिचान खः । सम्पदाया संरक्षणया मू दायित्व आः स्थानीय सरकारयाके वःगु दु । स्थानीय सरकार अन्तर्गतयागु वडायागु हे भवन दय्केत्यंबलय् अन स्थानीय सरकारं ऐतिहासिक, धार्मिक व पुरातात्विक महत्वया सम्पदा न्हंकेत्यंगु द्वपं लाःगु दु, गुगु गम्भीर विषय खः । थ्व विषयस गम्भीर व दुग्यंगु अध्ययन अनुसन्धान यानाः छगू निष्कर्षय् थ्यंकेमाःगु खनेदु । फल्चा दुगु प्रमाण लूसा वडापाखें हे फल्चा पुनर्निर्माण यानाबीगु प्रतिवद्धता वडाध्यक्ष प्वंकूगु खँ लसकुस याय्बहःजू । आः वडा भवन दय्केत्यंगु थाय् हे फल्चाया थाय् खः अथवा व लिसे स्वानाच्वंगु अथवा जःखः गन फल्चाया थाय् खः निक्र्यौल यानाः फल्चाया पुनर्निर्माण नं याय् हे माःगु खनेदु । ताकि मेगु पुस्तां नं सतः, फल्चा गन दुगु खः धकाः विवाद यानाच्वनेम्वाःलेमा ।
देयन्यक थप १५८ म्ह कोरोना संक्रमण पुष्टि
रसिया श्रेष्ठ | सिल्लागा चतुर्दशी ११४२, फागुन १७ मंगलवाः
वंगु २४ घण्टाया दुने देयन्यक थप १५८ म्ह कोरोना भाइरस संक्रमण पुष्टि जुगु दु।
स्वास्थ्य तथा जनसंख्या मन्त्रालयया कथं ४ हजार ४५८ म्हेसिगु पीसीआर परीक्षण याउगुलि ९२ म्ह व २ हजार ४६ एन्टिजेन परीक्षणय् ६६ म्ह याना १५८ म्हेसित संक्रमण पुष्टि जुगु दु।
मन्त्रालयया कथं वंगु २४ घण्टाय् ३५४ म्ह कोरोना संक्रमणमुक्त जुगु दु। अथेहे संक्रमणया कारण निम्ह सीउगु दु।
नारायणकाजी श्रेष्ठ नापलायेत प्रचण्ड हात्तीवन वन
लहनान्युज | सिल्लागा चतुर्दशी ११४२, फागुन १७ मंगलवाः
नेकपा माओवादी केन्द्रया अध्यक्ष पुष्पकमल दाहाल प्रचण्ड नेता नारायणकाजी श्रेष्ठ नापलायेत वयकःया निवास हात्तीवन वंगु दु।
अमेरिकी सहयोगसम्बन्धी सम्झौता एमसीसी सम्झौता प्रतिनिसधसभापाखे अनुमोदन यायेगु पार्टीया निर्णय नेता श्रेष्ठ असन्तुष्ट जुगु खः।
एमसीसी पास यायेमज्यु धका अडान तया वयाच्वंम्ह नेता श्रेष्ठं १२ बुँदे ब्याख्यात्मक घोषणायात स्वीकार याउगु मदुनि। थुगु विषययात कया माओवादी केन्द्रया अध्यक्ष प्रचण्ड व नेता श्रेष्ठ दथुइ मतभेद जुगु खः।
एमसीसीया विषय पार्टी दुने असहमति तयावया च्वम्ह श्रेष्ठयात नापलायेत अध्यक्ष प्रचण्ड मंगलबाः न्ह्यिनय् वयकः निवासय् वंगु खः।
एमसीसी राष्ट्रहितया पक्षय् कार्यान्वयन यायेमाः, अध्यक्ष ओली
लहनान्युज | सिल्लागा चतुर्दशी ११४२, फागुन १७ मंगलवाः
नेकपा एमालेया अध्यक्ष केपी ओलीें अमेरिकी सहयोग परियोजना एमसीसी राष्ट्रहितया पक्षय् कार्यान्वयन यायेमाः धका धाउगु दु।
एमसीसीबारे पार्टीया धारणा सार्वजनिक यासे एमाले न मंगलबाः याउगु पत्रकार सम्मेलनय् अध्यक्ष ओलीं एमसीसी सम्झौता थःपिन्स यानागु मखु व संसदपाखे अनुमोदन यायेगु इलय् अनुचित ढंगं अलग तःगु धका धाउगु दु।
वयकलं धाउगु दु, ‘छगु सम्झौता संसदपाखे पारित जुइ धुका कार्यान्वयन यायेमखु धका धाये धइ मखु। प्रक्रियागत त्रुटि याये दइमखु, सरकारं यात। तर न्ह्याथे याना न पास जुइ धुका छ कार्यान्वयनय् वनेमा विकल्प मदु।’ आः एमसीसी कार्यान्वयन यायेगु इलय् राष्ट्रिय हितया प्रत्याभूति जुइमाः धका एमाले अध्यक्ष ओलीं धाउगु दु। ओलीं गठबन्धन सरकार विघटन याना जनादेश कथं न्ह्यावनेमाः धका धाउगु दु।
वयकलं धाउगु दु, थ्व सरकार दयके मबिउगु व, ढाले याये थ्व छु न्हुगु जुल ले?’ नेपाली कांग्रेसनाप थःगु दलया खँ जुगु, तर पार्टीया अडान मत्वताउगु धका अध्यक्ष ओलीं धाउगु दु।
