येँ महानगरपालिका वडा १८ या पुलांम्ह वडा अध्यक्ष लिसें पुलांम्ह वामपन्थी नेता चन्द्रानन्द नेवाः ९० दँय् मन्त।

वि.सं. २०१९ निसें हे वडाय् स्वतन्त्र उम्मेदवारया रुपय् विजयी जुया च्वनादीम्ह वय्कः वि.सं. २०३२ सालय् येँया प्रधानपञ्च समेत जुयादीगु खः ।

देशय् बहुदलीय व्यवस्था वयेधुंकाः २०४९ व २०५४ सालय् नं वय्कः स्वतन्त्र हे जुयाः वडाय् त्याकादीगु खः । मदुम्ह भाजु नेवाःया मस्त मदुसा जहान नं मदयेधुंकल ।

म्हिगः पशुपतिया आर्यघाटय् वय्कःया अन्तिम संस्कार याःगु खः ।

रिभर फल्स पावर लिमिटेडं सर्वसाधारणया लागि साधारण शेयर निष्कासन व बिक्री खुल्ला याउगु दु।

कम्पनीं थौं बुधवाःनिसे प्राथमिक सार्वजनिक निष्कासन (आईपीओ) या बिक्री खुल्ला याउगु दु। सर्वसाधारणया लागि कम्पनीं प्रतिकित्ता १ सय रुपैयाँ अङ्कित दरं २७ लाख ३० हजार कित्ता शेयर बिक्री यायेगु प्रयोजनया लागि दरखास्त आह्वान याउगु दु।

कम्पनीया कथं २७ लाख ३० हजार कित्ता शेयरमध्ये २ प्रतिशत अर्थात् ५४ हजार ६ सय कित्ता कम्पनीया कर्मचारी व ५ प्रतिशत अर्थात् १ लाख ३६ हजार ५ सय कित्ता सामूहिक लगानी कोषयात छुटे याना बाँकी दुगु  २५ लाख ३८ हजार ९ सय कित्ता शेयर खरिदया लागि सर्वसाधारणं आवेदन बिइत धाउगु दु।

निष्कासित शेयरय् लगानीकर्तापिन्त थौंनिसे खुलेयाना याकन जेठ ४ गते तक न्यूनतम १० कित्तानिसे अधिकतम १ लाख कित्तातक आवेदन बिइफइ। कम्पनीया धितोपत्र निष्कासन व बिक्री प्रबन्धक प्रभु क्यापिटल लिमिटेड याइगु जुगु दु।

येँ न धनगढीया लागि ब्बःगु श्री एअरलाइन्सया जहाजय् इन्जिनय् समस्या वयेवं येँ लिहावया सुरक्षित अवतरण याउगु दु।

येँपाखे २५ नटिकल माइल अर्थात् झन्डै ४७ किलोमिटर तापक्क ब्बये धुकुगु उगु जहाजय् खवय् च्वंगु इन्जिनं ज्या मयागु सङ्केत क्यःगु खः।

वया लिपा पाइलटं जहाजयात येँ लितहया सुरक्षित अवतरण याउगु खः। जहाजय् यात्रु व चालक दलय् सदस्यपि याना ८७ म्ह मनूत दुगु खः।

न्हुपि मतदातापिनिगु लागि निर्वाचन आयोगं थौं व कन्ह्यः मतदाता परिचय पत्र वितरण याइगु जुगु दु ।

न्हापागु मतदाता नामावलीइ नां दर्ता यापि व परिचय पत्रया लागि जिल्ला निर्वाचन कार्यालयय् निवेदन बिउपिन्त आयोगं बुधबाः व बिहीवाः निन्हु मतदाता परिचयपत्र वितरण यायेत्यःगु खः।

वइगु स्थानीय तहया निर्वाचनय् मतदान थ्व हे वइगु वैशाख ३० गते शुक्रवाः देयन्यक जुइत्यःगु खः। 

भारतीय सुरक्षाकर्मी (स्पेशल प्रोटेक्सन गार्ड) ज्वना भारतीय वायु सेनाया विमान गौतमबुद्ध अन्तर्राष्ट्रिय विमानस्थल भैरहवाय् अवतरण याउगु दु।

उगु जहाज थौं सुथय् भैरहवाय् अवतरण याउगु खः। भारतीय प्रधानमन्त्री नरेन्द्र मोदी बुद्ध जयन्ती कुन्हु जेठ २ गते लुम्बिनी भ्रमण वयेत्यःगुलि सुरक्षा व्यवस्था मिले यायेत भारतीय सुरक्षाकःमि उगु विमानय् वःगु खः।

थ्व हे न्हापागु गौतमबुद्ध अन्तर्राष्ट्रिय विमानस्थलय् अवतरण याउगु अन्तर्राष्ट्रिय विमान जुगु दु। भारतीय सुरक्षाकःमिपि त्वःता थौं हे उगु विमान दिल्ली लिहावनिइ।

थुगु गौतमबुद्ध अन्तर्राष्ट्रिय विमानस्थल जेठ २ गते हे औपचारिक उलेज्या जुइत्यःगु दु।