दँय् दँसं जन्माद्यः सालिइगु लँपु येँया रत्नपार्कय् ध्वाये ब्वयेकेत ढलान यानाः पिलर तयेगु कथं संरचना यानातःगु दु।

थथे उगु लँपुइ सुनां थथे पिलर तःगु खः धका धाःसा सिइमदुनि । उगु लँय् ढलान याना तःगुलि येँ महानगरपालिका २५ वडाया निवर्तमान वडाध्यक्ष नाप जन्माद्यःया पुजारी निलकाजी शाक्य न बिरोध याउगु दु।

शाक्य धयादीगु दु, थुगु लँय् जन्माद्यः सालेमाःगु लँ जुगुलि थन सुया निर्देशनय् थुगु ज्या जुगु खः उकिया जिमिगु बिरोध दु धका धयादीगु खः।

२८ वडाय् लागु थुगु थासय् सु ना दयकलं व धका वडा कार्यालययात न जानकारी मदु धका सम्पदा अभियन्ता गणपतिलाल श्रेष्ठं जानकारी बिउगु दु।

किपा गणपतिलाल श्रेष्ठया फेसबुकपाखे 

राष्ट्रिय परीक्षा बोर्डं माध्यमिक शिक्षा परीक्षा एसईईया लिच्वः थौं सार्वजनिक याइगु जुगु दु।

एसईईया लिच्वः सार्वजनिक यायेगु दक्को तयारी पूरा जुइ धुकल धका परीक्षा नियन्त्रक अर्जुन रायमाझीं जानकारी बिउगु दु। थौं न्हिनय् ३ बजे लिपा लिच्वः सार्वजनिक यायेगु तयारी दु।

लिच्वः सार्वजनिक जूसा विद्यार्थीपिनिगु जन्म मिति, ल्याः लगायतय् गल्ती मजुइमा धका थुगु पटक कडा यायेगु नाप विद्यार्थीपिनिगु विवरण रुजु (पुनः जाँच) यायेगु ज्याया कारण लिच्वः पिकायेत लिबागु धका वयकलं धयादीगु खः।

थुगु लिच्वः स्वयेत नेपाल टेलिकमय् १६०० नम्बरय् एसएमएस याना वा www.see.gov.np य् वना थःगु सिम्बोल नम्बर तया लिच्वः स्वये फइ।

लिच्वः थुकथं न स्वयेफइ

येँ जक १२ म्ह मचापिन्त एडिनो भाइरसया संक्रमण खनेदुगु दु।

महाराजगञ्जया कान्ति बाल अस्पतालय् राष्ट्रिय जनस्वास्थ्य प्रयोगशाला टेकुइ छ्वया हःगु १३ गु नमुनामध्ये १२ गु एडिनो भाइरसया संक्रमण खनेदुगु दु।

उगु १२ नमुना मध्येपाखे स्वम्हेसित इन्फ्लुएन्जा ’ए’ न खनेदुगु दु धका कान्ति बाल अस्पतालया निर्देशक डा. युवनिधि बर्सौलां जानकारी बिउगु दु।

अमेरिकी सरकारें ’सेन्टर फर डिजिज कन्ट्रोल एन्ड प्रिभेन्सन (सीडीसी)’ या कथं एडिनो भाइरस जूपिन्त सेँय्, ज्वरो, गःपः स्याइगु, सासः ल्ह्याये थाकुइगु थे जाःगु समस्या खने दइगु लक्षण खः धका धाउगु दु।

भुखाचं जीर्ण अवस्थाय् जुगु श्रीकृष्णया देगः न्हुघलय् आः पुनःनिर्माणया चरणय् थ्यःगु दु। म्हिगः देगः पुनःनिर्माणया छगु ज्या दथुइ येँ महानगरपालिकाया पुर्वमेयर विद्यासुन्दर शाक्यं शिलान्यास यानादीगु दु।

कामपाया आर्थिक सहयोगया ग्वाहालि उगु देगः निर्माण याये त्यःगु खः। ५३ लाख ३० हजार २ सय ४६ रुपैयाँ २१ पैसा लागत इष्टिमेट दुगु उगु देगःया निर्माणया महानगरं ५० लाख ६३ हजार ७ सय ३३ रुपैया ९० पैसा अनुदान व बाँकि २ लाख ६६ हजार ५ सय १२ रुपैयाँ ३१ पैसाया लागि जनसहभागिता निर्माण यायेत्यःगु खः।

देगः न्याद्धः स्वया अप्पो आर्थिक ग्वाहालि यायेपिनिगु शिलापत्रय् नां तयेगु धका उपभोक्ता समितिं धाउगु दु। शिलान्यास ज्याझ्वलय् येँ महानगर २१ वडाध्यक्ष उदय चुडामणि बज्राचार्य, जैशीदेवल यूथ क्लबया अध्यक्ष राजेश प्रजापति लगायत पिनिगु न उपस्थिति दुगु खः।

प्रमुख निर्वाचन आयुक्त दिनेश थपलियां मन्त्रिपरिषद बैठकं मंसिर ४ गते प्रदेश व प्रतिनिधिसभा निर्वाचन यायेगु घोषणा जूसा अजू चायेम्वाः धका धयादीगु दु।

आयोगं मंसिर २ तिथि उपयुक्त जुइगु धका परामर्श बिउगु दु। तर उगु दिं शुक्रबाः जुगुलि निन्हु लिपा ४ मंसिर आइतबाः यायेत प्रधानमन्त्री व मन्त्रीपि नाप आयोगया पदाधिकारी पिनिगु छलफल जुगु दु धका धयादीगु खः।

स्थानीय तह निर्वाचनया लिच्वः व खर्च विवरण सार्वजनिक यायेत थौं मंगलबाः ग्वसाः ग्वगु पत्रकार सम्मेलनय् प्रमुख निर्वाचन आयुक्त थपलियां धाउगु दु, ‘आः मन्त्रिपरिषद् बैठकं मंसिर ४ या तिथि घोषणा याःसा अजू चाये मालिइ मखु।’