नेवाः देय् दबू वाग्मती प्रदेश, देय् दबू स्वनिगः व नेपाल तामाङ घेदुङ वाग्मती प्रदेश विशेष समितिं मंकाः कथं आन्दोलनया ज्याझ्वः पित बिउगु दु।

भाषा आयोगया सिफारिस कथं वाग्मती प्रदेशय् नेपालभाषा व तामाङभाषायात सरकारी कामकाजि भाषाया रुपमा लागू यायेत मागयासें दबाव मुलक कार्यक्रम आन्दोलन ज्याझ्वः घोषणा याउगु खः। साउन ८ गते आइतवाः वाग्मती प्रदेशया राजधानी हेटौंडाय् उगु संगठनया नेतृत्वया मंकाः मुँज्या च्वना क्वःछिना प्रेस विज्ञप्तिपाखें आन्दोलनया ज्याझ्वः घोषणा याःगु खः।

देय् दबू वागमती प्रदेश अध्यक्ष विष्णुगोपाल महर्जन, नेपाल तामाङ घेदुङ वागमती प्रदेश अध्यक्ष लिला कुमार घलान व देय् दबू स्वनिगः विशेष प्रदेशया अध्यक्ष श्रीकृष्ण महर्जनं मंकाः कथं ल्हाःचिं तया जारी याःगु विज्ञप्तिइ साउन ८ गतेनिसें १० गते तकया दुने वाग्मती प्रदेशया फुक्क सांसद व राजनीतिक दलयात पौ छ्वयेगु, साउन ११ गतेनिसें १३ गते तक सांसदपिन्त माग पुरा यायेगु नितिं भूमिका म्हितेत एसएमएस छ्वयेगु, साउन १४ गतेनिसें २० गते तक सामाजिक सञ्जालय् नारांनिसें सन्देशत तयेगु व स्थानीय आवश्यकता कथं अन्तरक्रिया, गोष्ठी, बैठक, भेलानिसें प्रदर्शनयात निरन्तरता बिइगु धकाः धाउगु दु।

विज्ञप्तिइ नेपालया संविधान कथं भाषा आयोगं नेपालभाषा व तामाङ भाषायात वागमती प्रदेशमा सरकारी कामकाजि भाषा कथं सिफारिस याःगु, भाषा आयोगं सरकायात प्रतिवेदन लःल्हाये धुंकूगु, संस्कृति पर्यटन तथा नागरिक उड्डयन मन्त्रालययात पौ छ्वःगु नापं संस्कृति पर्यटन मन्त्रालयपाखें प्रदेश मन्त्रालययात पौ छ्वःगु जूसां नं प्रदेशं भाषा आयोगया सिफारिस कथं ज्या मयाःगुलिं दबाव मुलक ज्याझ्वः कथं आन्दोलन यायेत बाध्य जूगु खँ न्ह्यथना तःगु दु।

येँ महानगरपालिका वडा नम्बर ३० या अध्यक्ष दलबहादुर कार्की न ‘पिखालुखु’ बारे थःगु अभिव्यक्ति लितः काउगु दु।

वडाध्यक्ष कार्की विवादास्पद अभिव्यक्तिबारे छलफल यायेत सम्पदा संरक्षणया अभियान्तापिके माफी फ्वःगु दु। नेवा समुदाय पिनिगु मू लुखाय् बिषय बिबादस्पत खँ तःगु खः।

नेवाः तयेत न्हि न्हि सुथय् पूजा यायेगु ‘पिखालखु’ यत विकासया बाधक खः धका न्ववागु खः। छगु सञ्चारमाध्यम नाप अन्तरवार्ताया झ्वलय् वडाध्यक्ष कार्कीं, ‘येँ पिखालुखुलि छगः ल्ह्वः तया पूजा याइ, अन धः दयके फइ मखु, सतक दयके दइ मखु धाइ, थ्व हे मुख्य विकासया बाधक खः।’

सोमबाः वडा कार्यालय वना  अभियान्तापि अध्यक्ष कार्की न मेमेगु धर्म व आस्थायात सम्मान यायेमाः धका धाउगु खः। ‘छिपिन्त जिगु अभिव्यक्तिं दुःखी जूसा जि क्षमा फ्वने,’ धका धयादीसे,’आः बिचाः याना जक न्ववाये।’

अध्यक्ष कार्की न दक्को मिले जुया विकासया ज्या व सम्पदा संरक्षण यायोः धका न धयादीगु खः।

वंगु २४ घण्टाय् देयन्यक ५६८ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ४ हजार ८०० परीक्षणय् ५६८ म्हेसित संक्रमण पुष्टि जुगु दु। वंगु २४ घण्टाय् कोरोना संक्रमणं छम्ह सीउगु दु।

अथेहे, ९५ म्ह कोरोना संक्रमणमुक्त जुगु दु। देयन्यक कोरोना भाइरस सक्रिय संक्रमितपि ३ हजार ५३४ म्ह थ्यःगु दु।

लुँया भाः थौं तोलां सच्छि कुहावंगु दु धका नेपाल सुनचाँदी व्यवसायी महासंघं धाउगु दु।

लुँ तोलां सच्छि कुहावया थौं ९४ हजार ४०० रुपैयाँ तोके याउगु दु सा तेजाबी लुँ तोलां ९३ हजार ९ सय रुपैयाँ तोके याउगु दु धका महासंघं धाउगु दु।

अथेहे, थौं वहःया भाः धाःसा स्थिर जुया ११ सय ५५ रुपैयाँ न हे कारोवार जुगु दु धका महासंघं धाउगु दु।

राप्ती हाइड्रो एण्ड जनरल कन्स्ट्रक्सन लिमिटेडया धितोपत्रको प्राथमीक सार्वजनिक निष्कासन (आईपीओ) बाँडफाँट जुगु दु।

बिक्री प्रबन्धक सिद्धार्थ क्यापिटलं थौं सोमबाः सुथय् कम्पनीया आईपीओ बाँडफाँट याउगु दु। कम्पनीं २९ असार निसे १ साउन तक सर्वसाधारणया लागि २३ लाख ६६ हजार २ सय ४० कित्ता आईपीओ विक्री खुल्ला याउगु खः।

सार्वजनिक निष्कासन याउगु कुल सेयरमध्ये १ लाख १८ हजार ३ सय १२ कित्ता सामुहिक लगानी कोषया लागि छुटे याउगु खः। अथेहे ७० हजार ९ सय ८८ कित्ता सेयर कम्पनीया कर्मचारीपिन्त छुटे याउगु खः।

ल्यःदनिइगु २१ लाख ७६ हजार ९ सय ४० कित्ताया लागि सर्बसाधारणपाखे आवेदन माग याउगु खः। उगु सार्वजनिक निष्कासनय् १४ लाख ९१ हजार ७ सय २२ म्हेसिगु पाखे १ करोड ६२ लाख ७६ हजार ६ सय १० कित्ताया आवेदन जुगु खः।

उकि मध्ये १४ सय २४ म्हेसिगु आवेदन रद्द जुगु खःसा १४ लाख ९० हजार २ सय ९८ म्हेसिगु आवेदपिनिगु आवेदन सदर जुगु धका बिक्री प्रवन्धक सिद्धार्थ क्यापिटलं धाउगु दु।