अमेरिकी सहयोग नियोग मिलेनियम च्यालेन्ज कम्प्याक्ट (एमसीसी) विरुद्ध २२ म्ह दलीय गठबन्धनं विरोध प्रदर्शन याउगु दु।

एमसीसी सम्झौता खारेजीया माग यासे थीथी २२ गु दलया मंकाः गठबन्धनं थौं येँ माइतीघरनिसे न्हुगु बानेश्वरतक विरोध प्रदर्शन याउगु खः।

उमिसं एमसीसी सम्झौता खारेज याः, एमसीसी म्वाः, देश मिइ दइ मखु,नेपाल विदेशी स्वार्थया लागि परेड म्हितिइगु थाय् मखु लगायतया नारा थ्वयका प्रदर्शनय् कुहावंगु खः।

उगु प्रदर्शनय् नेकपा (मसाल), नेकपा (क्रान्तिकारी माओवादी), नेकपा (माले), राष्ट्रिय जनमोर्चा, नेपाल, देशभक्त जनगणतान्त्रिक मोर्चा, नेपाल कम्युनिस्ट पार्टी, नेकपा (माओवादी केन्द्र), राष्ट्रिय जागरण मञ्चलगायत सहभागी दुगु खः।

नेपाल संवत न्हूदँ राष्ट्रिय समारोह समिति ११४२ पाखें न्हापाम्ह न्हूदँ समारोह समितिया अध्यक्ष प्रा. सुवर्ण शाक्ययात हनीगु जूगु दु।

समारोह समितिया मुँज्यां प्रा. शाक्ययात हनेगु निर्णय याःगु खः। समारोह समितिं थुगु दँनिसें नेपाल संवत आन्दोनलय् योगदान बिउपं संस्था, व्यक्ति, खलः पुचःयात दँय् दसं हनेगु निर्णय याःगु खः।

प्रा. शाक्यं नेपाल संवतया आन्दोलन न्ह्याकेगु नितिं समारोह समितिया न्हापांम्ह नायः जुयाः ज्या यानादीगु व तःदँ न्ह्यःनिसें न्हूदँया लसताय् सफू पिथनेगु लिसें तुच्चा ज्याझ्वः यानाः वयाच्वंगु व न्हूदँया आन्दोलनयात थपू यायेगु नितिं वय्कलं निरन्तर रुपं यानावयाच्वंगु ज्यायात लुमंकूसें थथे हनेगु निर्णय याःगु खः ।

समितिं ब्यूगु जानकारी कथं वय्कःयात थ्वहे वइगु शुक्रवाः छगू ज्याझ्वःया दथुइ हनेज्या यायेत्यंगु खः।

थौं हिलंयंक भ्यालेन्टाइन्स डे अर्थात् प्रेम दिवस हनेज्या जुयाच्वंगु दु । ल्याम्ह ल्यासिकं थुकियात विशेष महत्वया नखः कथं हनेगु याःगु दु ।

नेपालय् नं लिपांगु छुं दँ निसें भ्यालेन्टाइ डेलय् विशेष चहःपहः खनेदइगु याःगु दु । थुगु दिं मतिना ह्यमिपिन्सं छम्हसिनं मेम्हसित थी थी द्वहलपा बिया मतिना क्यनिगु व थःपिन्त यःम्ह मनू न्ह्योने थःगु मतिना प्रस्ताव तयेगु याः ।

भ्यालेन्टाइन्स डे या औपचारिक शुरुवात सन् २६९खय् रोमनं जूगु नालेगु याः । थुगु दिवसलिसे छगू दुःखान्त मतिनाया बाखँ स्वागु दु । तत्कालीन रोमन सम्राट क्लाउडियस द्वितीयं थः सैनिकयात मनिता व इहिपाः यायेगुलिइ रोक तःगु खः ।

मतिना व इहिपाःलं सैनिक कमजोर जुइ व युद्धलिसे स्वागु गोप्य सूचं सार्वजनिक जुइ धइगु विचाःलं सम्राट क्लाउडियसं थुकिइ बन्देज तःगु खः । तर सम्राटया नियम मयेकुपिं मध्ये रोमनया पादरी सन्त भ्यालेन्टाइनं मतिनया पक्षय् सः थ्वयेकल ।

वयेकलं प्रतिबन्ध हाचांगाना आपालं सैनिकया सार्वजनिक रुपये इहिपाः याकल । सम्राटं वयेकयात ज्वना मृत्युदण्डया कसा न्यंका जेलय् तल । वयेकयात सन् २६९ या फेब्रअरी १४ य् मृत्युदण्ड बिउगु खः ।

सन्त भ्यालेन्टाइनं मतिनाया नितिं याःगु त्यागया लुमन्तिइ हलिंयंक दँय्दसं १४ फेब्रुअरीइ प्रेम दिवसया रुपय् भ्यालेन्टाइन डे हनेगु याःगु खः ।

नेप्से परिसूचक थौं आइतवाः १ सय स्वया अप्पो अङ्कं घटे जुगु दु।

नेप्से थौं १ सय १ दशमलव २४ अङ्कं घटे जुया २ हजार ७ सय दशमलव ३२ अङ्कं कुहावःगु दु। थौं दक्को समूहया शेयर घटे जुगु सा बीमा समूह, विकास बैंक, उत्पादन समूह, माइक्रोफाइनान्स, फाइनान्स व जलविद्युत् समूहया शेयर तधःगु अङ्कं घटे जुगु दु।

थौं २ सय २७ कम्पनीया १ करोड १६ लाख कित्ता शेयर ५ अर्ब ९७ करोड रुपैयाँया कारोबार जुगु खः। दकलय् अप्पो तामाकोशीया ३२ करोड रुपैयाँया शेयर किनबेच जुगु खः।

थौं माथिल्लो तामाकोशी व नारायणी विकास बैंकया शेयर दकलय् अप्पो ८ प्रतिशत स्वया अप्पोे घटे जुगु दु। समग्र बजाः घटे जूसा न्यागु कम्पनीया शेयर सामान्य थहावंगु दु।

वंगु २४ घण्टाया दुने देयन्यक ५२१ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ६ हजार ३७ म्हेसिगु पंीसीआर परीक्षण याउलि ४२१ म्ह व ४ हजार ७८ म्हेसित एन्टिजेन परीक्षण याउगुलि ९४ म्ह याना ५२१ म्हेसित संक्रमण पुष्टि जुगु दु।

मन्त्रालयया कथं वंगु २४ घण्टाया संक्रमण दर करिब ७ प्रतिशत दुगु खः। अथेहे २४ घण्टाय् कोरोना संक्रमणया कारण झीम्हेसिगु ज्यान वंगु दु। थौं ३ हजार ९३५ म्ह संक्रमणमुक्त जुगु दु।

स्वास्थ्य मन्त्रालयया कथं येँ ९७, यलय् ४४, मोरङय् ४०, कास्कीइ ३६, झापाय् २३, सुनसरीइ १३ व रुपन्देहीइ १२ म्हेसित कोरोना संक्रमण पुष्टि जुगु दु।