सेयर बजार परिसूचक नेप्से ५४ अंकं थहावंगु दु। वाः न्हापागु दिंया कारोबार नेप्से ५४.५८ अंकं थहावंगु खः।

थौं २.५५ प्रतिशतं थहावना २ हजार १९५.१० बिन्दुइ थ्यःगु दु। थौं न्हिच्छियक २२० कम्पनीया १ करोड १३ लाख ३९ हजार ४७६ किक्ता सेयर किनबेच जुगु खः।

४ अर्ब ६० करोड ९७ लाख ९१ हजार २७२ रुपैयाँया कारोबार जुगु खः। सेन्सेटिभ इन्डेक्स न २.५५ प्रतिशतं थहावना ४१९.२० बिन्दुइ थ्यःगु खः।

थौं १३ उपसमूहमध्ये १२ समूहया परिसूचक थहावंगु दु सा मेगु उपसमूहया परिसुचक घटे जुगु दु। थौं दकलय् अप्पो लगानी समूहया ४.७६ प्रतिशतं थहावंगु दु। फाइनान्स समूह १.६ प्रतिशतं घटे जुगु दु।

वंगु २४ घण्टाया दुने देयन्यक थप ६२० म्हेसित कोरोना संक्रमण पुष्टि जुगु दु। अथेहे छम्ह सीउगु दु।

स्वास्थ्य तथा जनसंख्या मन्त्रालयया कथं ५ हजार ८४६ म्हेसिगु परीक्षण याउगुलि ६२० म्हेसित संक्रमण पुष्टि जुगु दु।

उकि मध्ये २ हजार ६५१ म्हेसिगु पीसीआर परीक्षण याउगुलि ४९६ म्ह व ३ हजार १९५ म्हेसिगु एन्टिजेन परीक्षण याउगुलि १२४ म्हेसित संक्रमण खनेदुगु धका मन्त्रालयं धाउगु दु।

नेकपा माओवादी केन्द्रया नेता जनार्दन शर्मा अर्थमन्त्री नियुक्त जुयादीगु दु।

प्रधानमन्त्री शेरबहादुर देउवाया सिफारिसय् शर्मायात राष्ट्रपति विद्यादेवी भण्डारीं अर्थ मन्त्रालयया जिम्मेवारी सम्हले यायेगु कथं मन्त्री नियुक्त याउगु दु धका राष्ट्रपति कार्यालयया प्रवक्ता सागर आचार्य न जानकारी बियादीगु दु।

बजेट निर्माणय् अनधिकृत मनूपिन्त संलग्न याउगु द्धपनय् संसदीय छानबिन समिति गठन यायेवं तत्कालीन अर्थमन्त्री शर्मा न २२ असारय् राजीनामा बिउगु खः।

संसदीय छानबिन समिति बजेट निर्माणय् अनधिकृत मनू संलग्न मजुगु धइगु प्रमाण मजुगु धइगु प्रतिवेदन बिइवं प्रधानमन्त्री देउवां हाकन अर्थ मन्त्रालयया जिम्मेवारी बिउगु खः।

लुँया भाः थौं हाकन निसः थहावंगु दु। लुँ तोलां थौं निसः थहावना ९५ हजार ८ सय रुपैयाँ थ्यःगु दु।

अथेह, वहः तोलां न झीतका थहावगु दु। वहः तोलां झीतका थहावना १ हजार २ सय ३० रुपैयाँ न कारोबार जुगु दु।

प्रेस सेन्टर नेपालं केन्द्रीय समितिइ ६१ सदस्यीय पदाधिकारी सर्वसम्मतिं ल्यःगु दु। सेन्टरया निक्वःगु पूर्ण बैठकं सर्वसम्मतिइ पदाधिकारी ल्यउगु खः।

मङ्सिर १९ गते चितवनय् सम्पन्न जुगु राष्ट्रिय महाधिवेशनं अध्यक्षय् विष्णु सापकोटा ‘जुगल’ यात सर्वसम्मतिं ल्यउगु खःसा पदाधिकारी जक ल्यःदनिइगु खः।

सेन्टरया वरिष्ठ उपाध्यक्षय् कमल गिरी ल्यःगु दु। अथेहे समावेशी उपाध्यक्षय् गोरखापत्रया उपेश महर्जन व सुरेश यादव नाप प्रदेशया कथं २० म्ह उपाध्यक्ष ल्यःगु खः। महासचिवय् सन्तोष पौडेलयात ल्यःगु दु।

खुम्ह खुल्ला व प्यम्ह समावेशी नाप झीम्ह उपमहासचिव ल्यःगु खः। समावेशी जनजातिपाखे गोरखापत्रया राजेश चाम्लिङ उपमहासचिवयात ल्यःगु खः। अथेहे, १५ म्ह खुल्ला सचिव ल्यःगु खःसा १२ म्ह समावेशीपाखे सचिव जुगु खः।

आदिवासी जनजाति, दलित, महिला, मधेसी समुदायपाखे निम्ह निम्ह सचिव जुइगु विधानय् व्यवस्था दु।