गुथि विधेयक विरुद्ध संघर्ष समितिं सरकारनाप नेवाःतय्गु गुथि सम्बन्धी माग न्ह्यब्वइगु जूगु दु। समितिं सःतूगु परिषदया मुँज्याय् थथे गुथि सम्बन्धी नेवाःतय्गु माग न्ह्यब्वयेगु नितिं सहलह याउगु दु।

समितिया अध्यक्ष डा. महेशमान श्रेष्ठया सभाध्यक्षताय् जूगु उगु मुँज्याय् नेवाः देय् दबूया अध्यक्ष नाप समितिया न्वकू पवित्र बज्राचार्यं गुथि आन्दोलनं न्ह्यब्वःगु मागयात कयाः भूमिसुधार मन्त्रालययात अवगत याकेगु लिसें सरकारं हयेत्यंगु गुथि विधेयकय् झीगु माग अनुमोदन याकेगु नितिं सकसिया ग्वाहालि यायेत इनाप यानादीगु खः।

येँया ओलम्पस क्लबय् जूगु उगु सहलह मुँज्याय् समितिया अध्यक्ष डा. श्रेष्ठं सरकारं हयेत्यंगु गुथि विधेयकयात कया भूमि सुधारमन्त्री शशी श्रेष्ठं इनाप याःगुलिं अथे सहलह याना नेवाःतयेस गुथि सम्बन्धी ल्ह्वनाच्वंगु माग पूवंकेगु नितिं पवित्र बज्राचार्यं बार एशोसियसनया पुलांम्ह अध्यक्ष चण्डेश्वर श्रेष्ठ व प्रा.डा. चुन्दा बज्राचार्य छ्वयेगु निर्णय जूगु खँ कनादीगु खः।

अथेहे, उगु सहलह मुँज्याय् समितिया सल्लाहकार लिसें नेवाः न्ह्यलुवाः मल्ल के सुन्दरं कानूनी विज्ञपिनिगु पुचः दयेकाः नेवाःतसें ल्ह्वनाच्वंगु मागयात कयाः ड्राफ भूमिसुधार मन्त्रालयस छ्वयेमाःगु विचाः प्वंकादीगु खः।

सयपत्री हाइड्रोपावरं थौंनिसे सर्वसाधारणया लागि साधारण सेयर (आईपीओ) बिक्री खुल्ला याइगु जुगु दु। कम्पनीं आयोजना प्रभावित स्थानीयपिनिगु विक्री मजुगु १ लाख २१ हजार ६० कित्ता थपयाना कुल ७ लाख २१ हजार ६० कित्ता सेयर निष्कासन यायेत्यःगु खः।

उकि मध्ये ५ प्रतिशत अर्थात् ३६ हजार ५३ कित्ता सेयर सामूहिक लगानी कोष व २ प्रतिशत अर्थात् १४ हजार ४२१ कित्ता सेयर कम्पनीया कर्मचारीपिनिगु लागि छुटे याउगु खः। बाँकी ६ लाख ७० हजार ५८६ कित्ता सेयर सर्वसाधारणपिन्स आवेदन बिइफइ धका कम्पनीं जानकारी बिउगु दु।

थुकिइ कित्ताया १०० रुपैयाँ दरं न्यूनतम १० कित्तानिसे अधिकतम ३० हजार कित्तातक आवेदन बिइफइगु जुगु दु। साउन १७ गतेतक आईपीआया लागि आवेदन बिइफइ। उगु इलय् न माग बमोजिम आवेदन मवल धाःसा साउन २७ गते तक आवेदन बिइफइगु कथं ई थपे याउगु दु।

थुगु कम्पनीं बागलुङ जिल्लाय् २.५ मेगावाट ‘दरम खोला ए’ जलविद्युत् आयोजना निर्माण यानाच्वंगु खः।

वंगु २४ घण्टाया दुने देयन्यक थप ७१० म्हेसित कोरोना भाइरस (कोभिड–१९) या संक्रमण पुष्टि जुगु दु। अथेहे निम्ह सीउगु दु।

थ्व नाप कोरोना संक्रमणं सीपि ११ हजार ९६२ म्ह थ्यःगु दु। स्वास्थ्य तथा जनसंख्या मन्त्रालयया कथं देयन्यक ५ हजार २५ नमुना म्हेसिगु परीक्षण याउगुलि ७१० म्हेसित कोरोना संक्रमण पुष्टि जुगु खः।

उकि मध्ये २ हजार ५४१ म्हेसिगु पीसीआर परीक्षण याउगुलि ५२४ म्ह व २ हजार ४८४ म्हेसिगु एन्टिजेन परीक्षण याउगुलि १८६ म्हेसित संक्रमण जुगु दु धका मन्त्रालयं धाउगु दु।

शेयर बजाः थौं थहावंगु दु। शेयर बजाः परिसूचक नेप्से थौं बिहीवाः १५ दशमलव ४४ अङ्कं थहावना २ हजार १ सय २७ दशमलव ४२ विन्दुइ थ्यःगु दु।

दोहोरो अङ्कं बजाः थहावना निर्जीवन बीमा, उत्पादन व मेमेगु मेमेगु बाहेक दक्को समूहया शेयर थहावःगु दु। थौं कारोबाः ल्याः व रकम न थहावःगु दु।

२२१ कम्पनीया १ करोड १९ लाख ५५ हजार कित्ता शेयर ४ अर्ब ९७ करोड ६४ लाख रुपैयाँ न कारोबार जुगु दु। दकलय् अप्पो अरुण काबेली जलविद्युत् कम्पनीया झन्डै १८ करोड व शिवम् सिमेन्टया १५ करोड ८६ लाख रुपैयाँ शेयर किनबेच जुगु दु।

थौं विन्ध्यवासिनी हाइड्रो विकास कम्पनी व राष्ट्र उत्थान लघुवित्तया शेयर १० प्रतिशतं थहावना सकारात्मक सर्किटय् थ्यःगु दु। अथेहे हिमालयन पावर पार्टनर व एक्सेल डेभलपमेन्ट बैंकया शेयर साढे ९ प्रतिशतं स्वया अप्पो थहावःगु दु।

समग्र बजाः थहावःसा राधी जलविद्युत्, बलेफी हाइड्रो व ग्रीन भेन्चर्स कम्पनीया शेयर धाःसा झन्डै ४ प्रतिशतया दरं घटे जुगु दु।

स्वनिगःया फोहोर वांछ्वयेगु थाय् सिसडोल–बञ्चरेडाँडा ल्यान्डफिल साइटय् फोहोर वांन्छ्वयेगु बन्द यायेगु धका स्थानीयवासीपिन्स घोषणा याउगु दु।

बिहीबार पत्रकार सम्मलेन यासे बञ्चरेडाँडा ल्यान्डफिल साइट सरोकार समितिं १ भदौनिसे न्ह्यावलयेया निति स्वनिगःया वां छ्वयेगु बन्द यायेगु धका घोषणा याउगु दु।

महानगरं सम्झौता कथं ज्या मयाउगु, स्वनिगलं मेमेगु थाय् ल्यान्डफिल साइट स्वया बञ्चरेडाँडा च्वपिन्त बेवास्ता यायेत स्वंगु धासे समितिं फोहोर वांन्छ्वयके मबिइगु धका घोषणा यासा सरोकार समितिया संयोजक श्रीराम ढुंगानां जानकारी बिउगु खः।

समितिं थुगु विषय प्रधानमन्त्री कार्यालय, सहरी विकास मन्त्रालययात न जानकारी बियाउगु दु धका धाउगु दु। सरकारनाप १ भदौनिसे फोहोर वांछ्वयेत निगु जक विकल्प दु धका धाउगु दु।

ढुंगानां धाउगु दु, ‘मानबस्तीरहित ल्यान्डफिल साइट विकास क्षेत्र वा फोहोरमैला प्रदूषणरहित मानवबस्ती विकास क्षेत्र मध्ये सरकारं छगु जक ल्यये दइ। बञ्चरेडाँडाया मनू तयेगु जिउधनया रक्षा यायेगु, जिमिगु माग पूरा यायेगु ग्यारेन्टी यासा जक १ भदौनिसे फोहोर वांन्छ्वये दइ।’