पश्चिमी सीमा नाका गड्डाचौकी जुया नेपाः वःपिन्त कोरोनाया सङ्क्रमण खनेदुगु दु।

भारतपाखे लिहावया च्वपिन्त कोरोना सङ्क्रमण खनेदुगुलि स्वास्थ्यकःमिपिन्सं उच्च सर्तकता अपने याउगु दु। शङ्कास्पद मनूपिन्त एन्टिजेन विधिपाखे कोरोना परीक्षणया ज्या यायेत सीमा क्षेत्रय् हे व्यवस्था याउगु दु।

सीमा नाका गड्डाचौकीइ दुगु हेल्थडेस्कया प्रमुख तर्कराज भट्टया कथं न्हि प्यम्ह निसे न्याम्हेसित तक कोरोना सङ्क्रमण खने दुगु धका धाउगु दु। छवाःया दुने जक उगु थासय् २२ म्ह स्वया अप्पोसित कोरोना सङ्क्रमण खनेदुगु खः।

वंगु २४ घण्टाया दुने देयन्यक कोरोना संक्रमणं निम्ह सीउगु दु।

स्वास्थ्य तथा जनसंख्या मन्त्रालयया कथं जंगु २४ घण्टाया दुने ३४७ म्ह संक्रमित जुगु दु।

वंगु २४ घण्टाय् २ हजार ३६० म्हेसिगु पीसीआर परीक्षण याउगुलि ३०३ म्ह व १५२८ म्हेसिगु एन्टिजेन परीक्षणय् ४४ म्ह याना ३४७ म्हेसित संक्रमण पुष्टि जुगु दु।

अथेहे थप ९५ म्ह कोरोना संक्रमणमुक्त जुगु दु। जंगु २४ घण्टाया दुने येँ जक १६९ म्हेसित संक्रमित जुगु दु। अथेहे यलय् ३५ म्ह, कास्कीइ २७, मोरङय् १७ व ख्वपय् १२ म्हेसित संक्रमित जुगु दु।

स्वास्थ्य तथा जनसङ्ख्यामन्त्री भवानीप्रसाद खापुङया चिनी ल्वय्या उपचारया वीर अस्पतालय् भर्ना जुगु दु धका मन्त्रीया स्वकीय सचिव मनोज लिम्बू न जानकारी बिउगु दु।

वीर अस्पतालया निमित्त प्रमुख प्रशासकीय अधिकारी डा. भूपेन्द्र बस्नेतं इकुया व बान्ता जुगुलि उपचारया लागि स्वास्थ्यमन्त्री खापुङ अस्पताल भर्ना जुगु धका धाउगु दु।

वयकःया धापू कथं मन्त्री खापुङ आः वीरया इमर्जेन्सी वार्डय् उपचार याना च्वंगु दु धका धाउगु दु।

यल महानगरपालिका १६ वडा योग साधना केन्द्र संचालन याउगु दु।

केन्द्रया संंरक्षक नाप वडा १६ या अध्यक्ष निर्मलरत्न शाक्यं वडा स्तरया न्हापागु पटक योग साधना केन्द्र संचालन यानागु धका धयादीसे थुकि ज्याय् सार्थक दयकेगु ग्वाहालिया पिन्त सुभाय् बिउगु खः। “थुगु केन्द्र निरन्तर संचालन जुइ” वयकलं धयादीगु खः । वडा १६ न संचालन यानागु योग शिविरया समापन समारोहय् योग साधना केन्द्र न्ह्याउगु खः।

ज्याझ्वः मुपाहाँ कथं पतञ्जली योग समिति नेपाल बागमती प्रदेश संगठन मन्त्री कमलप्रसाद घिमिरे न स्थानीय तहं योग साधना केन्द्र याउगु लसताया खँ खः मेमेगु स्थानीय तह नाप थुगु अभियान अघि न्ह्याकेगु छलफल जुगु जानकारी यानादीगु खः। ज्याझ्वलय् पाहाँ कथं पतञ्जली योग समिति नेपाल बागमती प्रदेश संगठन मन्त्री शारदा रिमाल, पतञ्जली योग समिति यल जिल्ला अध्यक्ष जोहन गोपाल कायस्थ लगायतपिनिगु उपस्थिति दुगु खः।

पतञ्जली योग पीठ शाखाया रुपं संचालन जुइलि १६ वडा योग साधना केन्द्रया पदेन सदस्यय् वडा सदस्यपि पञ्चबज्र बज्राचार्य, मदन महर्जन व बबिता श्रेष्ठ च्वनादिगु खःसा विक्रम शाक्यया संयोजकय् संचालन जुगु योग शिविरया सह–संयोजक दिनेश शर्मा, सचिव विणा शाक्य, सह–कोषाध्यक्ष दानशोभा शाक्य, ज्येष्ठ सदस्य अशोक श्रेष्ठ, युवा सदस्य विनोद बज्राचार्य, सदस्य नन्दकिशोर श्रेष्ठ, रोजन बज्राचार्य, दिनेश डंगोलपि च्वनाीगु खः। योग यल महानगरपालिका १६ वडा बालिफलय् अशोक पार्टी प्यालेसय् सञ्चालन जुगु खः।

बौद्ध वक्तृत्वकला मूगुठीया झीखुक्वःगु वार्षिक साधारण सभां विश्वन्तर शाक्यया अध्यक्षताय् १३ म्ह सदस्यीय कार्यसमिति ल्यःगु दु।

थौं शनिबाः यलया न्याखाचुकःय् जुगु सभां शाक्यया नेतृत्वय् कार्यसमिति ल्यःगु खः। शाक्य निर्वाचित जुइवं वयकलं थःगु कार्यकालय् संस्थाया ज्याकू स्थापना, दँय् दँसं वक्तृत्वकला सञ्चालनया लागि आर्थिक सुनिश्चित यायेगु कथं अक्षयकोषया स्थापना यायेगु व ब्वतिइ काइपिनिगु लागि नगद पुरस्कार ५० हजार रुपैयाँ थ्यकिइगु प्रतिबद्धता व्यक्त यानादीगु खः।

अथेहे उगु समितिया निर्वतमान अध्यक्ष पूर्णराज शाक्य, उपाध्यक्षय् रविन्द्र शाक्य, महासचिवय् मदनरत्न तुलाधर, सचिवय् श्रमिक अवाले, कोषाध्यक्षय् गौतम शाक्य रव सहकोषाध्यक्ष कर्ण शाक्ययात ल्यःगु खः। अथेतु, कार्यसमिति सदस्यपि सञ्चित बुद्धाचार्य, सुनीता मानन्धर, दीपक शाक्य, प्रशान्तदेव शाक्य, गौतम शाक्य व अमोवीर बज्राचार्ययात ल्यउगु खः।

वाग्मती प्रदेशया सांसद् ज्ञानेन्द्र शाक्यं उलेज्या यानादीगु उगु ज्याझ्वलय् वयकलं धयकादीगु दु वक्तृत्वकलाया माध्यमपाखे ल्याम्ह तयेत बुद्ध शिक्षा प्रवाह यायेत २८ दँनिसे  सञ्चालन जुयावयाच्वंगु वक्तृत्वकलायात निरन्तरता व माःगु कथं ग्वाहालि यायेत थः न्ह्यावलय् न तयार दु धका बचं बियादीगु खः।

अध्यक्ष पूर्णराज शाक्यया सभाध्यक्षताय् जुगु उगु ज्याझ्वलय् बौद्ध विहार संघया अध्यक्ष नानीकाजी शाक्य, यल महानगरपालिका वडा नं ६ या अध्यक्ष रुपेन्द्रराज शाक्य, वडा नं १६ या वडाअध्यक्ष निर्मलरत्न शाक्य, लोटर्स रिसर्च सेन्टरया अध्यापक वीरराज शाक्य, स्कोप सहकारीया पूर्वअध्यक्ष किशोरभाई बज्राचार्य, विश्वशान्ति पुस्तकालया पूर्वअध्यक्ष बाबुराजा बज्राचार्य, मूगुठीया पूर्वअध्यक्ष शुक्रराज शाक्य, देवेन्द्र बज्राचार्य बौद्ध युवा कमिटी यलया पूर्वअध्यक्ष सुनील महर्जनपिन्स न थःथःगु बिचाः तयादीगु खः।

मूगुठी विसं २०५० निसे दँय् दँसं असार पुन्हि कुन्हु स्वनिगः दुने बौद्ध वक्तृत्वकला कासा न्ह्याका वया च्वंगु प्रतिनिधिमूलक संस्था खः।