२४ घण्टाय् थप येँ २०३ म्हेसित कोरोना संक्रमण जुगु दु धका स्वास्थ्य मन्त्रालयं धाउगु दु।

अथेहे यलय् ४५ म्ह व ख्वपय् १७ म्ह संक्रमितपि थपे जुगु दु धका स्वास्थ्य मन्त्रालयं धाउगु दु।

मेमेगु जिल्ला मोरङय् २९, कास्कीइ २५, नुवाकोटय् २०, बाँकेय् १९, झापाय् १८, सुनसरीइ १६ व दाङय् १४ म्हेसित कोरोना संक्रमण पुष्टि जुगु दु।

वंगु २४ घण्टाया दुने देयन्यक १,१२८ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं देयन्यक १७ हजार ४४७ म्हेसिगु पीसीआर परीक्षणय् ६६६ म्ह व ३ हजार ५४२ एन्टिजेन परीक्षणय् ४६२ म्ह याना १ हजार १२८ म्हेसित संक्रमण पुष्टि जुगु दु।

थ्व नाप आःतक नेपालय् ११ लाख ९ हजार ११४ म्ह संक्रमण जुइ धुकुगु दु धका मन्त्रालयं धाउगु दु। कोरोना संक्रमण कारण वंगु २४ घण्टाय् थप १४ म्ह सीउगु दु।

थ्व नाप आःतक कोरोना सक्रमणं ११ हजार ८७८ म्ह सी धुकुगु दु।

नेकपा एमालेया अध्यक्ष नाप पुलांम्ह प्रधानमन्त्री केपी शर्मा ओलीं शताब्दी पुरुष नाप संस्कृतिविद् सत्यमोहन जोशी याउगु भिं उसायँया कामना याउगु दु।

अध्यक्ष ओलीं एमाले नेता कृष्णगोपाल श्रेष्ठपाखें भिं उसायँया कामना यासें सन्देश छ्वयाहःगु खः। कृष्णगोपाल श्रेष्ठं थौं शुक्रवाः सुथय् जोशीयात नापलायेत किष्ट अस्पताल वना भिं उसायँया कामना यानादीगु खः।

जोशीया उसायँ अवस्था सुधार जुयाच्वंगु दु धासे चिकित्सकपिन्स जोशीया स्वँय् जमेजूगु लः लिकायेधुनागुलिं स्वास्थ्य अवस्था न्हापा स्वया बालाना वःगु दु धका धाउगु खः।

नेकपा एमालेया अध्यक्ष केपी शर्मा ओली न वैशाख ३० गते जुइगु निर्वाचनय् थःगु पार्टी न बहुमत स्थानीय तहय् निर्वाचित जुइगु दावी याउगु दु।

शनिबाः एमाले न ग्वसाः ग्वःगु स्थानीय तह निर्वाचन केन्द्रित प्रशिक्षण ज्याझ्वलय् सम्बोधन यासे ओली सत्तारुढ गठबन्धननाप याकचा ल्वाना हे बहुमत स्थानीय तहय् त्याकेगु जुइ धका धयादीगु खः।

ओलीं धाउगु दु, ‘मत स्याना त्याकेगु, मतपत्र खुया त्याकेगु सपना मखसा ज्यु।’ वयकलं वइगु प्रतिनिधिसभा व प्रदेशसभा निर्वाचनय् न बहुमत हयेगु दावी याउगु दु।

नेकपा एमाले, वौद्धिक क्षेत्र व सञ्चार माध्यमं दबावय् जक सरकार चुनाव घोषणा यायेत बाध्य जुगु धासे ओलीं सत्तारुढ गठबन्धन एमालेया वर्चश्व जुगु कारण स्थानीय चुनावय् ग्याउगु धका धाउगु खः।

स्वास्थ्य तथा जनसंख्यामन्त्री विरोध खतिवडां २४ लाख डोज कोरोना खोप तःगु मखु धका स्पष्टीकरण बिउगु दु।

थःम्हेसिया ज्या यानागु उपलब्धि सार्वजनिक यासे पत्रकारपिनिगु न्ह्यसः लिसः बिइगु झ्वलय् मन्त्री खतिवडां खोप तःगु मखुु धका धाउगु खः। लँय् तःगु व सिइतिइ वंगु खोपया तथ्यांक वये ल्यदनिइ धका धाउगु खः।

खोप मालेगु लागि मन्त्रालयया प्रमुख विशेषज्ञ डा. गुणराज लोहनीया संयोजकत्वय् न्याम्ह सदस्यीय समितिपिनिगु छानबिन याये धुकगु धका वयकलं धाउगु खः। समितियात निवाःया ई बिउगु खः।

‘केन्द्रं प्रदेशय्, प्रदेशं जिल्लाय्, जिल्लां स्थानीय तहय् गुलि छ्वयागु खः उकिया रिपोर्ट समितिं फागुन २ गते दुने याइ,’ धका वयकलं धाउगु खः।