प्रधानमन्त्री शेरबहादुर देउवां निम्ह मन्त्री थपे यायेगु तयारी याउगु दु।

वइगु सोमबाः तक मन्त्रीमण्डल विस्तार यायेगु तयारी याउगु दु। प्रधानमन्त्री देउवां रक्षा व उद्योग, वाणिज्य तथा आपूर्ति मन्त्री थप यायेत्यःगु खः।

आः उगु मन्त्रालयं कार्यभार देउवा थम्हेसिया कःघाना वयाच्वंगु खः। बाँकी केन्द्रीय सदस्य मनोनीत यायेगु न तयारी यानाच्वंगु दु। कांग्रेस सभापति देउवां बाँकी १७ म्ह केन्द्रीय सदस्य न मनोनीत यायेगु तयारी यायेत्यःगु दु।

नेपाली कांग्रेसया विधानं सभापति न ३३ म्ह केन्द्रीय सदस्य मनोनीत यायेगु व्यवस्था दु । थ्व स्वया न्ह्यः, देउवां १६ म्ह केन्द्रीय सदस्य मनोनीत याये धुकुगु दु।

वंगु २४ घण्टाया दुने देयन्यक ८३६ म्हेसित कोरोना संक्रमित पुष्टि जुगु दु।

कोरोना सक्रमित जूपि द्धःछि स्वया म्हो जुयावंगु दु। स्वास्थ्य तथा जनसंख्या मन्त्रालयया कथं पीसीआर व एन्टिजेन परीक्षणं वंगु २४ घण्टाय् जम्मा ८३६ म्हेसित संक्रमण पुष्टि जुगु दु।

४ हजार २६० म्हेसिगु पीसीआर परीक्षणय् ४९१ म्ह व २ हजार ३९४ म्हेसिगु एन्टिजेन परीक्षणय् ३४५ म्ह याना ८३६ म्हेसित संक्रमण पुष्टि जुगु खः।

अथेहे मन्त्रालयया कथं वंगु २४ घण्टाय् कोरोना संक्रमणं प्यम्हेसिगु ज्यान वंगु दु। १ हजार ८२६ म्ह संक्रमणमुक्त जुगु दु।

सत्तारुढ गठबन्धनया स्वगु प्रमुख दलया शीर्ष नेतापि दथुइ थौं शनिबाः छलफल जुगु दु।

प्रधानमन्त्रीया सरकारी निवास बालुवाटारय् प्रधानमन्त्री व नेपाली कांग्रेसया सभापति शेरबहादुर देउवा, नेकपा माओवादी केन्द्रया अध्यक्ष पुष्पकमल दाहाल प्रचण्ड व नेकपा एकीकृत समाजवादीया अध्यक्ष माधवकुमार नेपाल दथुइ छलफल जुगु दु।

वंगु छु ई अमेरिकी सहयोग परियोजना मिलेनियम च्यालेन्ज कम्प्याक्ट (एमसीसी) सम्झौता संसदं पारित यायेगु कि मयायेगु धइगु विषय सत्तारुढ गठबन्धन दथुइ विवाद जुगु खः।

नेपाली कांग्रेस व प्रधानमन्त्री शेरबहादुर देउवा थुगु सम्झौता संसदं याकन पारित यायेगु पक्षय् दुगु खः। तर माओवादी केन्द्रया अध्यक्ष प्रचण्ड व एकीकृत समाजवादीया अध्यक्ष नेपाल धासा एमसीसी सम्झौता संशोधनविना पारित यायेमज्यू धइगु अडानय् दु।

यलया सुनाकुथिस्थित बालकुमारी देगलं वंगु माघ ८ गते खुयायंकूगु मूर्ति लुइकूगु दु ।

सशस्त्र प्रहरीया क्याम्पलिक्क दुगु करूणा देगः न्ह्यःनय् बालकुमारीया मूर्ति लूगु खः । यलया प्रमुख जिल्ला अधिकारी घनश्याम उपाध्यायं खुमलटारस्थित क्लासिक टावरया ल्यूनय् मूर्ति लुयावःगु पुष्टि यानादीगु खः ।

निगू फिट तजाःगु छगूत्या फिट ब्या दुगु मूर्ति वंगु माघ ८ गते सुनाकुथिया देगःलं खुयायंकूगु खः ।

आः बालकुमारीया मूर्ति सुनाकोठी लितयंकूगु दु । बाजंगाजंलिसं मुंगु सुनोकोठीवासी व धर्म, संस्कृतिप्रेमीपिनिगु बाजगाजंलिसें सिन्दुर जात्रा याना बालकुमारी मूर्ति जावालाख्यःपाखें सुनोकाठी लितयंकूगु खः ।

 

निर्वाचन आयोगं स्थानीय तहया निर्वाचन प्रयोजनया लागि फागुन ५ गतेनिसे दल दर्ताया आह्वान यायेगु तयारी याउगु दु।

स्रोतं बिउगु जानकारी कथं आयोगं वइगु फागुन ५ निसे १५ गते तक दल दर्ताया लागि ई बिइगु आन्तरिक कार्यतालिका दयकूगु खः।

आयोगं दल दर्ताया लागि झीन्हु ई बिइगु जुगु दु। अथेहे दर्ता जुइगु दलया छानबिन यायेत छवाःया ई बिइगु जुगु दु।

स्थानीय तहया निर्वाचन वैशाख ३० जुइत्यःगु खः।