नेपाल भाषा व साहित्य ख्यः प्यंगः थां कथं नाप भाषा निभाः प्रेमबहादुर कंसाःया झ्वाता शनिबाः उलेज्या ज्या जुगु दु।

नासः दबू जीर्णोद्धार समितिया ग्वसालय् जुगु उगु ज्याझ्वलय् जनकवि दुर्गालाल श्रेष्ठं महाकवि सिद्धिदास महाजु, पूर्व उपप्रधानमन्त्री प्रकाशनमान सिंहं गद्यगुरु नाप पण्डित निष्ठानन्द बज्राचार्य, वाग्मती प्रदेशया खानेपानी, सिंचाई नाप उर्जा मन्त्री वसन्त मानन्धरं योगवीरसिंह कंसाः, येँ महानगरपालिकाया पूर्वमेयर विद्यासुन्दर शाक्यं मास्टर जगतसुन्दर मल्ल, वडाअध्यक्ष नीलकाजी शाक्यं भाषा निभा प्रेमबहादुर कंसाःया झ्वाता उलेज्या यानादीगु खः। वाग्मती प्रदेश सरकारया ग्वाहालिं मूर्तिकार महेश तुलाधर दयकादीगु उगु झ्वाता येँ महानगरपालिका– २५ जनबहाःया केल त्वालय्  नासः डबूलिइ उगु झ्वाता तःगु खः।

उगु ज्याझ्वलय् वाग्मती प्रदेशया मन्त्री मानन्धरं नेपाल भाषा साहित्य ज्वः मदुगु योगदान यानादीपिनिगु झ्वाता तये खगुलि गौरवको अनुभव जुगु धका धयादीगु खः। नेपाल भाषा साहित्यय् ज्वःमदुगु योगदान यानादीपिनिगु जीवनी, योगदान, कृतित्वबारे जानकारी कायेत थुगु हे थासय् टिओआर कोट तयेमाःगु वंं उकया लागि वाग्मती प्रदेशं माःगु ग्वाहालि यायेगु धका मन्त्री मानन्धरं बचं बियादीगु खः।

अथेहे येँ महानगरपालिकाया पूर्व मेयर शाक्यं थः मेयर जुयागु इलय् ‘येँ देय् म्हसिके’ पाठयक्रम दयका शिक्षकपिनिगु व्यवस्था याना येँ महानगर दुनेया निजी व सार्वजनिक विद्यालय कक्षा १ निसे ८ तक ब्बकेगु शुरुआत यानागु धका धयादीसे उकियात अझ व्यवस्थित व मजुबत यायेमाःगुलि बः बियादीगु खः।

येँ दुनेया बँ पसः चिइकेगु अभियान मदिक्क न्ह्याकेगु नितिं येँ महानगरपालिकाया मेयर बालेन शाहयात ज्ञापन पौ लःल्हाइगु जूगु दु।

थौं शुक्रवाः येँया नेपाः ब्यांक्वेटय् नेवाः जागरण मञ्चं ग्वसालय् बँ पसःयात कयाः नेवाः सरोकार विषयस जूगु सहलह मुँज्या थथे क्वःछ्यूगु खः।

उगु सहलह मुँज्याय् नेवाः देय् दबूया न्वकू उमेश स्थापित, अभियन्तापिं सुमन सायमि, गणपतिलाल श्रेष्ठ, यादवलाल कायस्थ, मनिष मानवलिसें थीथी क्लब व संघसंस्थाया प्रतिनिधिपिन्स बँ पसः चिइकेगु अभियानयात ताःलाकेगु नितिं ग्वाहालि यायेगु व थुकियात मदिक्क न्ह्याकेगु नितिं खबरदारी यायेगु सहलह जूगु खः।

विश्व बैंकं नेपाःया लागि १ सय मिलियन डलर (पौने १३ अर्ब रुपैयाँ) ऋण स्वीकृत याउगु दु।

विश्व बैंकया कार्यकारी निर्देशक बोर्डं नेपाःया जलवायु–उत्थानशील व समावेशी विकासय् ग्वाहालि यायेगु उद्देश्यं उगु ऋण स्वीकृत याउगु दु धका विश्व बैंकं धाउगु दु।

ग्रीन, रेसिलियन्ट व इन्क्लुसिभ डेभलपमेन्ट ((जीआरआईडी) य् स्वःगु चरणया मध्ये न्हापागु चरणया ज्याझ्वः कार्यान्वयन यायेत थुगु ऋण ग्वाहालि याउगु खः धका विश्व बैंकं धाउगु दु।

विश्व बैंकया माल्दिभ्स, नेपाल व श्रीलंकाया लागि निर्देशक फारिस हदाद जेभोसं कोभिड–१९ महामारी लिपा नेपालय् हरित व समावेशी विकासय् विश्व बैंकं ग्वहालि केन्द्रित याउगु खः।

अमेरिकी डलरया भाः हाकन न्हुगु रेकर्ड तःगु दु। थौं शुक्रबाः असार ३१ गते (१५ जुलाई २०२२) य् डलर भाः न्हुगु रेकर्ड तःगु खः।

शुक्रबाःया लागि १ अमेरिकी डलर १२८ रुपैयाँ ११ पैसा थ्यःगु दु धका नेपाल राष्ट्र बैैंकं धागु दु। अथेहे खरिद भाः १२७ रुपैयाँ ५१ पैसा थ्यःगु दु।

अमेरिकी डलरया तुलनाय् भारतीय मुद्रा थप कमजोर जुगुलि उकिया प्रभाव नेपाली मुद्राय् न लागु दु। नेपाली व भारतीय मुद्राय् स्थिर विनिमय दर जुगु दु।

उकियाना भारतीय मुद्रा कमजोर जुइवं नेपाली मुद्रा न कमजोर जुगु दु। असार १६ य् १२६ रुपैयाँ ६६ पैसा थ्यःगु डलरया भाः २० असारय् १२६ रुपैयाँ ६३ पैसाय् कुहावंगु खः।

वया लिपा थहा कुहावना असार ३० गते १२७ रुपैयाँ ७२ पैसाय् कारोबार जुगु डलर न्हापागु पटक १२८ रुपैयाँ थ्यःगु दु।

अमेरिकां मचापिन्त कोरोना विरूद्धया खोप थप १० लाख ८ हजार डोज फाइजर भ्याक्सिन उपलब्ध यानाबिउगु दु।

न्यादँनिसे झीनिदँ दुपिनिगु लागि बिइ मिले जुगु १० लाख ८ हजार डोज भ्याक्सिन बिहीबाः बहनि नेपाः थ्यःगु दु धका नेपालय् च्वंगु अमेरिकी दूतावासं धाउगु दु।

थ्व नाप स्वास्थ्य तथा जनसङ्ख्या मन्त्रालय व युनिसेफ नेपाः नाप सहकार्यय् अमेरिकां फाइजर–बायोटेक कोभिड–१९ भ्याक्सिन ४० लाख स्वया अप्पो डोज नेपालय् निशुल्क उपलब्ध याये धुकुगु दु।