वाङमय शताब्दी पुरूष डा.सत्यमोहन जोशी अक्सिजनया मात्रा कम जुगुलि अस्पताल भर्ना जुयादिगु दु।

वय्कःयात छेँ अक्सिजन बियातःगुलिं म्हिगः मत सिसेलिं छेँ अक्सिजन विइत समस्या जुसेलिं यलया किस्ट मेडिकल कलेजय् भर्ना यायेमाःगु धका अजरमान जोशी धयादीगु खः।

आः वयकःया स्वास्थ्यय् सुधार वयेधुकुगु दु सा स्वासप्रश्वास व रक्तचाप फुक्कं सामान्य दु।

येँ महानगरपालिकां वागमती व विष्णुमती खुसि सिथय् करीब १७ गु पार्क निर्माण यायेगु ज्या न्ह्याकूगु दु।

वडा–१७ या लुँतिइ गुरुयोजना अन्तर्गत इन्द्रायणी पार्कया शिलान्यास येँँ महानगरपालिकाया प्रमुख विद्यासुन्दर शाक्यं यानादीगु दु। ‘येँ महानगरपालिकाय् जनप्रतिनिधि निर्वाचित जुइ धुका जिमिसं सार्वजनिक जग्गा संरक्षण यायेगु, हरियाली प्रर्वद्धन यायेगु, पार्क निर्माण यायेगु योजना न्ह्यने यकागु दु,’प्रमुख शाक्यं धयादीगु दु, उगु योजना कथं कालीमाटी निसे बालाजु तक विष्णुमती सिथय् हरियाली कायम यायेत इन्द्रायणी पार्कया शिलान्यास जुगु खः धका धयादीगु खः।

प्रमुख शाक्यं सार्वजनिक जग्गा संरक्षण, हरियाली प्रवर्धन व पार्क निर्माण यायेगु ज्याय् नीति, बजेट व ज्याझ्वः याउगु प्राथमिकता बियाउगु दु। प्रमुख शाक्यं निर्माणधिन पार्कय् परम्परागत ल्ह्वःहिति, चःबि व खुला व्यायमशाला दइगु कथं पार्क निर्माण जुइगुलि जेष्ठ नागरिक, अपाङ्गता जूपि सकसित मनोरञ्जन जुइ कथं पार्क निमार्ण जुइ धका धायादीगु खः।

छु महिना न्ह्यः जक ‘छगु वडा छगु पार्क निर्माण’ यायेगु नीति कथं प्रमुख शाक्यं छन्हु हे वडा–३२ य् करीब ४ रोपनी ११ आनाय् निर्माण जुइगु ‘बागमती दोभान’ व ‘अमरावती’ निगु पार्कया शिलान्यास यानादीगु खः। येँ महानगरपालिका दुने ५० गु पार्क निर्माण जुयाच्वंगु दु। वडा १७ या अध्यक्ष नविन मानन्धरं खुसि सिथय् च्वंगु सार्वजनिक जग्गा संरक्षण अभियान कथं हे थुगु इन्द्रायणी पार्क निर्माणया योजना न्ह्यने हयाउगु धका धयादीगु खः।

इन्द्रायणी पार्कया लागत १ करोड ८० लाख रुपैयाँ याउगु खः। असार तक सम्पन्न यायेगु योजना दु धका महानगरपालिकां जानकारी बिउगु दु।

च्वापू म्हितःवपि निम्ह मस्त गोरखा बारपाकय् बेपत्ता जुगु दु।

बारपाक सुलिकोट गाउँपालिका वडा नम्वर १ या साइला घले व वडा नम्वर २ या करन घले वंगु बिहीवाः निसे सम्पर्कय् मवंगु धका प्रहरीं धाउगु दु।

प्रहरीया कथं निम्ह १६ दँ दुपि खः। माघ २० गते उपि जा नया वःपि सम्पर्कय् मवःगुलि २३ गते बारपाक प्रहरी चौकीइ मौखिक जानकारी बिउगु खः।

उमित मालेगु निति जिल्ला प्रहरी कार्यालय लिखित निवेदन तक बुझे याउगु खः।

सरकारं दुग्ध विकास संस्थानया महाप्रवन्धक पदय् पदपूर्तिया लागि प्रक्रिया न्ह्याकूगु दु।

कृषि तथा पशुपन्छी विकास मन्त्रालयं थौं पदपूर्ति सम्बन्धी सूचं जारी यासे दरखास्त बिइत आह्वान याउगु दु। छु न संस्था वा निकायय् व्यवस्थापकया हैसियतं म्हति न झीदँया अनुभव दुम्ह नेपाःमियात २१ दिं दुने दरखास्त बिइफइ धका मन्त्रालयं धाउगु दु।

नाप उम्मेदवारं कृषि तथा पशुपन्छी विकास मन्त्रालय सम्बद्ध सार्वजनिक निकायया पदाधिकारीया नियुक्ति तथा मनोनयन सम्बन्धी निर्देशिका, २०७६ या दफा ३, उपदफा २ (ग) बमोजिम शैक्षिक योग्यता हासिल यायेमाःगु धका सूचंखय् धाउगु दु।

दरखास्तया नाप दुग्ध विकास संस्थानया वर्तमान अवस्था, चुनौती व सुधारया विषय दुथ्याउगु म्हति न न्याद्ध शव्दया व्यावसायिक कार्ययोजना तक पेश यायेमाःगु धका मन्त्रालयं धाउगु दु।

छुं दिं न्ह्यः जक नीस्वंगु न्यूरोड गेट क्लबया हिदान ज्याझ्वः क्वचाःगु दु । क्लबया परिचयात्मक ज्याझ्वः कथं क्लबं येँया न्यूरोड गेट लिक्क हे हिदान ज्याझ्वः याःगु खः ।

ज्याझ्वलय् ७७म्ह रक्तदातातयसं हिदान याःगु खः । कोभिड महामारीया हुनिं हिया अभाव जुइफुगु अवस्थायात ध्यानय् तसें क्लबं हिदान ज्याझ्वः यानागु धाःगु दु ।

ज्याझ्वलय् येँ महानगरपालिकाया मेयर विद्यासुन्दर शाक्यया लिसें येँ मपा २२ वडाया वडाध्यक्ष चिनीकाजी महर्जन, सभासद् विराजभक्त श्रेष्ठलिसेंया उपस्थिती दुगु खः ।

उगु इलय् येँ महानगरया मेयर विद्यासुन्दर शाक्यं नकतिनि जक नीस्वंगु क्लबया ज्या खनाः थः नं उत्साहित जुयागु धासें समाजया हित जुइगु कथंया ज्याय् थःगु साथ दइगु धयादिल ।

क्लबया नायः आशिषमान सिंहं भ्वसिक्व, प्यूखालिसेंया न्यूरोड लागा थौंकन्हय् तसकं अव्यवस्थित जुयावंगुलिं आः क्लबं त्वाःयात व्यवस्थित दयेकेगु नितिं ज्या यानावनेगु धयादिल ।

‘थौंकन्हय् थुगु लागा तसकं फोहोर जुयावन । आः जिपिं तुफि ज्वनाः त्वाः सफा यायेत पिहांवयेगु मखु, त्वाःबहाःया यचुपिचु यानातय्माःगु खँय् समाजय् सचेतना थनेगु ज्या याये’ नायः सिंहया धापू खः ।

त्वाः सफा यायेगुलिसें फुटपाथ पसः, अव्यवस्थित पार्किङयात व्यवस्थित यायेगु नितिं नं क्लबं ज्या यानावनेगु क्लबया उपाध्यक्ष अशोक महर्जनं धयादिल ।