स्वनिगलय् थप ४३७ म्ह संक्रमण पुष्टि जुगु दु।

स्वास्थ्य मन्त्रालयया कथं स्वनिगलय थप ४३७ म्ह कोरोना संक्रमण पुष्टि जुगुलि येँ ३५० म्हेसित कोरोना सक्रमण पुष्टि जुगु दु।

अथेहे, यलय् ५९ म्ह व ख्वपय् २८ म्हेसित कोरोना संक्रमित पुष्टि जुगु दु। स्वास्थ्य मन्त्रालयया कथं मोरङय् ९०, कास्कीइ ५६, झापाय् ४३, सुनसरी व नुवाकोटय् ३४÷३४ म्ह व काभ्रेपलाञ्चोकय् ३१ म्हेसित कोरोना संक्रमण पुष्टि जूगु दु।

रुपन्देहीइ २३, चितवनय् २१, बाँकेय् १६, मकवानपुरय् १४, दाङय् १३, तनहुँइ १२, धनुषाय् ११ व नवलपरासी पुर्वय् १० म्हेसित कोरोना संक्रमितपि थपे जुगु दु धका मन्त्रालयं धाउगु दु।

वंगु २४ घण्टाया दुने देयन्यक कोरोना भाइरस (कोभिड–१९) या संक्रमणपाखे थप १३ म्हेसिगु ज्यान वंगु दु।

अथेहे थौं देयन्यक १ हजार ५७० म्हेसित कोरोना संक्रमण पुष्टि जुगु दु। स्वास्थ्य तथा जनसंख्या मन्त्रालयया कथं देयन्यक ११ हजार ३६५ म्हेसित नमुना परीक्षण याउगु खः।

७ हजार ८७४ म्हेसिगु पीसीआर परीक्षण याउगुलि १ हजार २२ म्ह व ३ हजार ४९१ म्हेसिगु एन्टीजेन परीक्षण याउगुलि ५४८ म्ह याना १ हजार ५७० म्हेसित संक्रमण पुष्टि जुगु खः।

वंगु २४ घण्टाय् ६ हजार १४६ म्ह संक्रमणमुक्त जुगु दु। आःतक देयन्यक ४० हजार १११ म्ह संक्रिय संक्रमितपि दु। उकि मध्ये ३८ हजार ८८३ म्ह संक्रिय संक्रमित होम आइसोलेसनय् व १ हजार २२८ म्ह संस्थागत आइसोलेसनय् च्वना च्वंगु दु।

वाःया न्हापागु दिं आइतबाः ४० अंकं घटे जुगु शेयर बजाः सोमबाः धासा दोहोरो अंकं सुधार जुगु दु।

थौं सोमबाः शेयर कारोबार मापक नेप्से परिसूचक १५ दशमलव ६९ अंकं बढे जुया २ हजार ८ सय ५१ दशमलव ८६ अंकय् थ्यंगु दु। नेप्से परिसूचक नाप ‘क’ वर्गया कम्पनीपिनिगु कारोबार मापन याइगु सेन्सेटिभ परिसूचक न ३.०५ अंकं बढे जुगु दु।

नेप्से व सेन्सेटिभ परिसूचक निगुलि सुधार जूसा कारोबार रकम धासा उत्साह खनेमदु। आइतबाः स्वया थौं सोमबाः कारोबार रकम घटे जुगु दु।

आइतबाः करिब ६ अर्ब थ्यःगु दु सा शेयर कारोबार रकम सोमबाः धासा ५ अर्बय् सीमित जुगु दु। न्हिच्छियकं ६६ हजार ११३ कारोबारपाखे २२४ कम्पनीया ९५ लाख १२ हजार ५ सय ८० कित्ता शेयर किनबेच जूगु खः।

उगु कारोबार रकम ५ अर्ब २ करोड २० लाख १७ लाख १८१ रुपैयाँय् सीमित जुगु खः।

सरकार स्थानीय तहया निर्वाचन वैशाख ३० गते यायेगु निर्णय याउगु दु।

मन्त्रिपरिषद आः च्वना च्वंगु बैठकं स्थानीय निर्वाचनया मिति क्वछिउगु दु धका छम्ह मन्त्रीं जानकारी बिउगु दु।

निर्वाचन आयोगं छगु हे चरणमा यायेगु खःसा १४ वैशाख व निगु चरणय् यायेगु खःसा १४ व २२ वैशाखया मिति सिफारिस याउगु खः। तर सत्तारुढ न्यागु दलीय गठबन्धनं जेठ मसान्त दुने निर्वाचन यायेगु धका आयोगं ४ जेठ प्रस्ताव याउगु खः।

स्थानीय तह निर्वाचन ऐन कथं आः कायम दुगु स्थानीय जनप्रतिनिधिपिनिगु कार्यकाल ५ जेठ २०७९ य् क्वचाइ। नाप संविधानं स्थानीय तह जनप्रतिनिधिविहीन जुइगु कल्पना याउगु मदु।

स्वनिगलय् थौंनिसे जोर बिजोर प्रणाली हटे जुगु दु नाप फागुन १ गतेनिसे हे भौतिक उपस्थितिइ हे विद्यालय सञ्चालन याइगु जुगु दु।

कोभिड–१९ संकट व्यवस्थापन समन्वय केन्द्र (सीसीएमसीसी)या सिफारिस कथं स्वनिगः दुनेया स्वंगु हे जिल्ला (येँ, यल व ख्वप) या प्रशासन कार्यालयं म्हिगः थौं चान्ह्यनिसे सवारी साधानय् जोर बिजोर हटे यायेगु निर्णय याउगु दु। फागुन १ गतनिसे स्कुल, कलेज, ट्युसन सेन्टर लगायतया शैक्षिक क्रियाकलाप सञ्चालन याये फइगु जुगु दु।

तर १२ दँ पुरा मजुगु  विद्यार्थीपिनिगु हकय् स्थानीय तहया समन्वय न पालंपाः वा सिफ्ट प्रणालीइ कक्षा सञ्चालन यायेगु  व्यवस्था मिले यायेमाःगु धका धाउगु दु। दक्को परीक्षा जेड आकार फागुन १ गतेनिसे सञ्चालन याये फइगु सूचंखय् उल्लेख याउगु दु।

सार्वजनिक व निजी सेवा प्रदायकयात सम्भव जू तले विद्युतीय प्रणालीपाखे सेवा बिइगु सूचनाय् उल्लेख याउगु दु सा उगु आदेश पालना अवज्ञा मयाइपि व्यक्ति वा संस्थायात संक्रामक रोग ऐन, २०२० व स्थानीय प्रशासन ऐन, २०२८ बमोजिम कारबाही व सजाय जुइगु प्रशासनं धाउगु दु।

अथेहे सपिङ मल, डिपार्टमेन्टल स्टोर, सुपर मार्केट व दक्को प्रकारया पसलय् छकलं २० म्ह स्वया अप्पो भेला याये दइमखु।