वल्र्ड नेवाः अर्गनाईजेशन, नेपाः च्याप्टरया ग्वसालय् थौंनिसे नेवाः पहिचानया विविध आयाम विषय राष्ट्रिय गोष्ठी जुइत्यंगु दु।

नेपाल भाषा व संस्कृति नाप समसामयिक विषययात कया जनमत दयकेगु, विचार विमर्श शुरुवात यायेगु उद्देश्यं थुगु ज्याझ्वः यायेत्यनागु धका नेपाः च्याप्टरया अध्यक्ष सुरेन्द्रभक्त श्रेष्ठं म्हिगः छगु पत्रकार याना जानकारी बियादीगु खः।

उगु गोष्ठीइ न्हापागु दिं डा.मिलन शाक्यं नेवाः पहिचानया विविध आयाम विषय न्ह्यःब्बइ। नेवाः शिक्षा व सञ्चार विषय न्हापागु सत्रय् प्रा.डा.चुन्दा बज्राचार्य न नेपाःया शिक्षाप्रणालीइ नेपालभाषा, वरिष्ठ पत्रकार सुरेशकिरण मानन्धरं नेपाल भाषाया पत्रकारितां ज्वनेमाःगु लँ व लिपि अध्येयता शरद कसाः न नेपाल लिपिया बारे कार्यपत्र न्ह्यब्बयादीगु ज्याझ्वः दु। न्हापागु सत्रया अध्यक्षता प्राडा ओमकारेश्वर श्रेष्ठ न यानादी।

अथेहे निगुगु सत्रय् किरण के रञ्जितं विश्वय् नेवाः, प्रेमराज शिल्पकारंण् पहिचानया लागि जुयाच्वंगु आन्दोलन व श्याम मानन्धरं नेपाल संवत् व शंखधर साख्वाया विषयय् कार्यपत्र प्रस्तुत न्ह्यब्बयादी निगुगु सत्रया अध्यक्षता डा. विजयप्रकाश सैंजु न यानादी।

अथेहे शनिबाः जुगु स्वगुगु सत्रय् जितेन्द्र बज्राचार्य न नेवाः संस्कृति गणेश, शोभा श्रेष्ठं हाकु पटासी व वरिष्ठ पत्रकार पुष्करभक्त माथेमा न नेवाः पहिचानय् अतिक्रमण विषय कार्यपत्र प्रस्तुत यानादी।

उगु सत्रया अध्यक्षता इतिहासकार पुरुषोत्तमलोचन श्रेष्ठं यानादी। प्यगुगु सत्रय् राजनलाल जोशीया अध्यक्षताय् नेवाः अमूर्त संस्कृति अन्तर्गत पत्रकार रत्न मनं येँया पून्हि, विराजकाजी राजोपाध्यायं ख्यः संगः व त्रिरत्न मानन्धरं दाफा बारे कार्यपत्र प्रस्तुत यानादी।

अथेहे लिपागु दिं लोककवि राजभाई जकःमीं संकलन यानादीगु नेवाः पुर्खा विषय सचित्र सफू लोकापर्ण जुइगु धका पत्रकार सम्मेलनपाखे धयादीगु खः। उगु गोष्ठीइ वंगु विषय व उकिया टिप्पणी, बहस व न्ह्यसःया आधारय् घोषणापत्र जारी जुइ धका नेपाल च्याप्टरया उपाध्यक्ष रमेशमान मुनिकारं धयादीगु खः।

थौं बिहीबाः सेयर बजाः ७४.९३ अंकं थहावना २ हजार स्वया अप्पो बिन्दुइ थहावंगु दु।

सुरुइ बजाः २०३७.६४ बिन्दुइ थ्यना रोके जुगु खः। म्हिगः बुधबाः सेयर बजाः ४१ अंकं थहावंगु खः।

कारोबार रकम तक बुधबाया तुलनाय् थौं बिहीबाः थहावंगु दु। २२७ कम्पनीया ४७ हजार ३९२ गु कारोबारपाखे ७२ लाख ५४ हजार ७० कित्ता सेयर किनबेच जुगु खः।

थौं २ अर्ब ४५ करोड ८६ लाख १९ हजार ४९५ रुपैयाँ बराबर कारोबार जुगु खः। अथेहे थौं व्यापार व वित्त उपसमूहय् अप्पो कारोवार जुगु खः।

बिहीबाः नेपाल फाइनान्स, मैलुङखोला जलविद्युत् आयोजना, ङ्यादी हाइड्रोपावरया भाः सकारात्मक सर्किटय् थ्यःगु दु। अथेहे ग्लोबल आईएमई डिभेन्चर, बरुण हाइड्रो, गुराँस लघुवित्तसहितया कम्पनीपिनिगु भाः कुहावंगु दु।

थौं शिवम् सिमेन्ट, हिमालयन डिष्ट्रिलरी, एसियन लाइफ इन्स्योरेन्स कम्पनीया सेयर यक्को किनबेच जुगु खः।

थीथी प्यंगु देय्या लागि नियुक्त जूपि राजदूतपिन्स थौं बिहीबाः सपथ काउगु दु।

कतारया लागि नेपाली राजदूत डा.नरेशविक्रम ढकाल, चीनया लागि नेपाली राजदूत विष्णु पुकार श्रेष्ठ, अष्ट्रेलियाया लागि नेपाली राजदूत कैलाशराज पोखरेल व इजरायलया लागि नेपाली राजदूत कान्ता रिजालं राष्ट्रपति विद्यादेवी भण्डारीसमक्ष पद व गोपनीयताया शपथग्रहण याउगु दु।

सरकारया सिफारिस व संसदीय सुनुवाइ समितियो अनुमोदन लिपा छु दिं न्ह्यः जक राष्ट्रपति भण्डारीं राजदूत व स्थायी प्रतिनिधिइ नियुक्त याउगु खः। सपथ समारोहय् परराष्ट्रमन्त्री डा.नारायण खड्का लगायत नेपाल सरकारया उच्च पदस्थ कर्मचारीपिनिगु न सहभागिता दुगु खः।

भारतीय राजदूत नविन श्रीवास्तवं राष्ट्रपति विद्यादेवी भण्डारीसमक्ष थौं बिहीबाः ओहदाया प्रमाणपत्र बुझे याउगु दु।

राष्ट्रपति भवन शितल निवासय् ग्वसाः ग्वंगु विशेष समारोहय् नेपाःया लागि भारतीय राजदूत श्रीवास्तवं राष्ट्रपति भण्डारी समक्ष ओहदाया प्रमाण पत्र बुझे याउगु खः।

उगु समारोहय् परराष्ट्रमन्त्री डा.नारायण खड्का लगायत नेपाः सरकारया उच्च पदस्थ कर्मचारीपिनिगु न सहभागिता दुगु खः।

बागमती प्रदेशय् सत्तारुढ नेपाली कांग्रेस व नेकपा माओवादी केन्द्रं मुख्यमन्त्री हिलेगु तयारी सुरु याउगु दु।

सत्तारुढ गठबन्धनया सहमतिइ मुख्यमन्त्री जुम्ह नेकपा एकीकृत समाजवादीया राजेन्द्र पाण्डे न सहमति कार्यान्वयन मयाउगु धासे कांग्रेस व माओवादी केन्द्रं मुख्यमन्त्री हिलेगु लागि दबाव बिइगु कथं थौं बिहीबाः सांसदपिनिगु हस्ताक्षर संकलन याउगु दु।

बागमती प्रदेशय् कांग्रेस, माओवादी केन्द्र व एकीकृत समाजवादी दथुइ पालंपाः सरकार न्ह्याकेगु सहमति जुगु खःसा मुख्यमन्त्री पाण्डे न सहमति कथं राजीनामा मबिउसे आलटाल यानाच्वंगुलि दबाव बिइत हस्ताक्षर संकलन न्ह्याकगू धका सांसद सीता अधिकारीं धाउगु दु। पाण्डेलिपा कांग्रेसया इन्द्रबहादुर बानियाँ मुख्यमन्त्री जुइगु कथं स्वगु दल दथुइ सहमति जुगु खः।

तर पाण्डे धासा सत्ता गठबन्धनया शीर्ष तहया सहमति जूसा जक पद त्वत्येगु धका धयावया च्वंगु खः। थौं बिहीबाः कांग्रेस व माओवादी सांसदपिन्स खाली भ्वँतय् हस्ताक्षर याउगु दु।