नेकपा एमाले न भरतपुर नगर कमिटीया मेयर याउगु उम्मेदवारय् विजय सुवेदीया नां सिफारिस याउगु दु।

सर्वसम्मत रुपं सुवेदीया नां  जक सिफारिस जुगु दु।आः टिकट सुवेदीपाखे वइगु निश्चित थे जुगु दु। उम्मेदवार सिफारिसया लागि एमाले भरतपुर महानगर कमिटीया विस्तारित बैठक आइतबाः च्वंगु खः।

बैठकय् एमाले पोलिट्ब्यूरो सदस्य नाप चितवन जिल्ला इन्चार्ज देवी ज्ञवालीं सुवेदीया नां प्रस्ताव याउगु खःसा चितवन क्षेत्र नं. २ या सांसद कृष्णभक्त पोखरेलं समर्थन याउगु खः।

मेयरया दावेदार कथं कयातम्ह ज्ञवालीं थः जिल्ला इन्चार्ज जुगुलि नेतापिनिगु सहमतिइ सुवेदीयात न्ह्यने हयागु जानकारी बिउगु खः।

मेयरय् सुवेदी व उपमेयरय् ११ म्ह आकांक्षीपिनिगु नां आः प्रदेश कमिटी जुया केन्द्रय् वनिइ धका एमाले चितवनया अध्यक्ष रामप्रसाद न्यौपाने न जानकारी बिउगु दु।

प्रमुख प्रतिपक्षी दल नेकपा एमाले न सरकारं अर्थतन्त्र सुधार याये मफया थःगु कमजोरी तपूइगु निति नेपाल राष्ट्र बैंकया गभर्नरयात निलम्बन याउगु दु धका द्धपः बिउगु दु।

नेकपा एमालेपाखे अर्थ मन्त्रालय सम्हाले याये धुकुपि नेतापि उपाध्यक्ष विष्णु पौडेल, उपाध्यक्ष सुरेन्द्र पाण्डे व डा. युवराज खतिवडां थौं आइतबाः मंकाः पत्रकार सम्मेलन यासे सरकार अर्थतन्त्र जोगे यायेगु स्वया गभर्नरयात कारबाही याना उम्मेदवारी तपूइत स्वंगु धका धाउगु दु।

‘‘गठबन्धन सरकारं थःगु नालायकीपन तपुइत नेपाल राष्ट्र बैंकया गभर्नरयात निलम्बन याउगु खः। अय्न, थ्व सरकारं प्रायोजित कथं गभर्नरयात सुरुनिसे कारवाही आपत्तिजनक जक मखु निन्दनीय तक जू’ स्वम्ह अर्थमन्त्रीपिन्स जारी याउगु विज्ञप्तिइ धयातःगु दु। एमाले न अर्थमन्त्री जनार्दन शर्मायात अराजक धासे दबाव बिया प्रधानमन्त्री शेरबहादुर देउवां गलत निर्णय याउगु टिप्पणी याउगु दु। ‘अराजक अर्थमन्त्रीया दबावय् प्रधानमन्त्रीं गलत निर्णय याउगु दु।

वित्तीय अपचलनया मतियार जुइ मखना, निहित स्वार्थ–समूहया व्यवसायिक स्वार्थ पुरा याये मखना, अर्थतन्त्र कःघाये मफुगु व अर्थमन्त्री हिलेमाःगु तक चर्चा सत्ता गठबन्धन दुने जुया च्वंगु इलय् अर्थमन्त्रीया हे दवावय् थःगु  असफलता तःपूइत गभर्नरयात कार्वाही याउगु छु न शंका मदु ’ एमाले न धाउगु दु।

‘गठबन्धन सरकारं तसक गैरजिम्मेवार ढंगं आः अर्थतन्त्रय् खेलवाड यानाच्वंगु दु। थथे याना गठबन्धनं आर्थिक स्थायित्व, विकास व सुशासनविरोधी थःगु सक्कली ख्वाः क्यःगु दु’ एमालेया विज्ञप्तिइ धयातःगु दु।

नेकपा एमालेया अध्यक्ष केपी शर्मा ओलीं देशय् आर्थिक अवस्था श्रीलङ्का थे जुइत्यःगु दु धका टिप्पणी यानादीगु दु।

थौं आइतवाः नेपाल राष्ट्रिय शिक्षक सङ्गठनया १३ क्वःगु राष्ट्रिय महाधिवेशन उलेज्या यानादीसे सम्बोधन यायेगु झ्वलय् अध्यक्ष ओलीं देशय् अर्थतन्त्र श्रीलङ्का थे जुइत्यंगु दु धका धयादीगु खः।

वयकलं धयादीगु दु, छु ईलिपा कर्मचारीपिन्स तलब कायेमखन, व ज्येष्ठ नागरिकपिन्स भत्ता कायेमखन धका अजू चायेमालि मखु धका धयादीगु दु।

देशया अवस्था थथे जुगुलि गठबन्धन सरकार एमालेयात सरकारं हटे याना आनन्द कयाच्वंगु दु धका धयादीगु दु। अध्यक्ष ओलीं विद्यार्थीपिन्त जीवनोपयोगी शिक्षा बिइगु लागि शिक्षकपिन्त इनाप यानादीगु दु।

यलया हरसिद्धि प्याखं येँया पशुपतिइ न्ह्यानाच्वंगु दु।

हरसिद्धि (जलद्यः) प्याखं जयवागेश्वरी दबुलि शुक्रबाःनिसे सुरु जुगु खः।

सरकारं थौं सार्वजनिक बिदा बिउगु दु।

रामनवमीया लसताय् थौं सरकारं सार्वजनिक बिदा बिउगु खः।

चैत २४ गते च्वंगु मन्त्रिपरिषदया बैठकं दक्को सरकारी कार्यालय ्व सार्वजनिक निकायय् सार्वजनिक बिदा बिइगु निर्णय जुगु दु धका गृह मन्त्रालयं धाउगु दु।