येँया फोहोर नुवाकोटय् च्वंगु बञ्चरेडाँडाय् वांछ्वयेगु झ्वलय् थौं बुधबाः न स्थानीयपिन्स अवरोध यायेवं तनावया स्थिति वंगु दु। मंगलबाःनिसे प्रहरीया ग्वाहालिं फोहोर व्यवस्थापन सुरु याउगु खः।

तर थौं बुधबाः न स्थानीयपिन्स अवरोध यायेवं प्रहरीं छु राउण्ड अश्रुग्यास क्यकूगु दु धका उपत्यका प्रहरी कार्यालय, रानीपोखरीया डीआईजी उत्तमराज सुवेदीं धाउगु दु।

स्थानीयपिन्स अप्पां क्यकेवं स्थितियात नियन्त्रण यायेत अश्रुग्यास क्यकूगु खः धका धाउगु दु।

येँ महानगरया नवनिर्वाचित जनप्रतिनिधिपिं उपप्रमुख सुनिता डंगोल, येँ महानगरपालिका १७ वडाअध्यक्ष नविन मानन्धर, १८ वडाअध्यक्ष न्हुछेकाजी महर्जन, २५ वडा नायः राजेश डंगोललिसें स्वंगुलिं वडाया वडासदस्यपिंत त्यंगः त्वाः खलः नं हनेज्या याःगु खः ।

खलःया अध्यक्ष धनबहादुर तिमिलाया सभाध्यक्षताय् जुगु उगु ज्याझ्वःया उलेज्या त्वाःया निम्हम्ह थाकुलि देवनारायण महर्जन व उपप्रमुख डंगोलं मंकाःकथं यानादीगु खः ।

त्यंगः त्वाः मिसा पुचःया नायः नानीहिरा महर्जनं लसकुस यानादीगु ज्याझ्वलय् उपप्रमुख डंगोल, वडाअध्यक्ष, खलःया सचिव मणिकण्ठ महर्जनं थःथःगु नुगःखँ तयादीगु ज्याझ्वलय् बालकृष्ण महर्जनं सुभाय् देछानादीगु खः ।

असारनिसे स्वला तक सडक विभाग मातहतय् च्वंगु लँ म्हुइ मदइगु जुगु दु। सडक विभागं छगु सूचं पिकया असार १ गतेनिसे भदौ मसान्ततक लँ म्हुइगु स्वीकृति मबिइगु व जबरजस्ती म्हुलकि कारबारी यायेगु चेतावनी बिउगु दु।

विभाग मातहतया संघीय सडक सुपरिवेक्षण नाप अनुगमन कार्यालयं सूचं जारी यासे वाः वइगु ई सुरु जुगुलि असार १ गतेनिसे भदौ मसान्ततक थीथी प्रयोजनं लँ म्हुइगु व थुने मदइगु जुगु दु।

स्वनिगः दुने लः, धः, मत, टेलिफोनलगायत मर्मतया लागि लँ म्हुया लँ स्यनिइगु जुगुलि व तत्काल मर्मत याये मफइगु जुगुलि थज्याउगु ज्या स्वला तक बन्द यायेगु कथं सूचं पिकाउगु खः।

यदि सडक डिभिजन कार्यालयया स्वीकृति मकास्ये लँ म्हुगु खनकि सार्वजनिक सडक ऐन २०३१ कथं कारबाही यायेगु अनुगमन कार्यालयं ख्याच्वः बिउगु दु।

येँ महानगरया कार्यपालिका सदस्यय् च्याम्ह प्रतिनिधिपि निर्वाचित जुगु दु। राष्ट्रिय सभागृहय् म्हिगः मंगलबाः सम्पन्न जुगु निर्वाचनय् नेपाली कांग्रेसया ६, नेकपा माओवादी केन्द्र व नेकपा एकीकृत समाजवादीपि छम्ह छम्ह उम्मेदवारपि निर्वाचित जुगु धका मुख्य निर्वाचन अधिकृत राजुकुमार खतिवडां जानकारी बिउगु दु।

थ्व नाप आः ४२ म्ह सदस्यीय कार्यपालिकाय् कांग्रेसया थ्यःगु दु। कांग्रेसय् १९ म्ह निर्वाचित वडाध्यक्ष थ्व स्वया न्ह्यः हे कार्यपालिकाय् थ्यःगु खः। एमालेपाखे उपमेयर नाप १३ म्ह कार्यपालिकाय् प्रतिनिधित्वपि दु। एकीकृत समाजवादीइ छम्ह निर्वाचित वडाध्यक्ष नाप निम्ह व माओवादीया छम्ह कार्यपालिकाय् थ्यःगु दु।

मिसा सदस्य पदय् कांग्रेसया उम्मेदवारपि मीना सुनार, मीना सिंह, कञ्चना नेपाली हरिजन व ललिता खड्गी, नेकपा एकीकृत समाजवादीया मैयाँलक्ष्मी महर्जन निर्वाचित जुगु खः। अथेहे दलित व अल्पसंख्यकपाखे कांग्रेसया उम्मेदवार विनोद अछामी व महेश नेपाली नाप नेकपा माओवादी केन्द्रया अनिता कार्की ढोली निर्वाचित जुगु खः।

तर दलित व अल्पसंख्यक कोटाय् पिनें कार्यपालिका सदस्य निर्वाचित याये फइगु व्यवस्था कथं सत्ता गठबन्धनं माओवादीया ढोलीयात कार्यापलिका सदस्यय् उम्मेदवार दयकूगु खः।

वंगु ३० वैशाखय् जुगु स्थानीय तह सदस्य निर्वाचनपाखे  येँ महानगरया लागि निर्वाचित जनप्रतिनिधि मतदातापिन्स निर्वाचनय् महानगरया प्रमुख बालेन्द्र शाह (बालेन), उपप्रमुख सुनिता डंगोलनाप १६० म्ह दक्को सदस्यपिन्स मतदान याउगु खः। महानगरया कार्यपालिकाय् प्रमुख व उपप्रमुख याना निम्ह व ३२ म्ह वडाध्यक्ष नाप थप च्याम्ह कार्यपालिका सदस्य जुगु दु।

निर्वाचित जूपि जनप्रतिनिधिपिन्स थौं बुधबाः न्हिनय् १ बजे दसिपौ लल्हाइगु ज्याझ्वः दु।

येँ लँय् वान्छ्वयातःगु फोहोर विसर्जनया लागि बञ्चरेडाँडाय् येँ महानगरया गाडी स्थानीयपिन्स अवरोध याउगु दु।

फोहोर ज्वना वंगु गाडी रोके यायेवं प्रहरीं सघर्ष समितिया संयोजक नाप १४ म्हेसित ज्वंगु दु।

नुवाकोट प्रहरी प्रमुख रामप्रकाश शाह न फोहोर व्यवस्थापनय् अवरोध यायेवं ज्वंगु खः।