न्यत अजिमाया झीनिदँया जात्रा सुरु जुगु दु।

मल्लकालीन निसे सुरु जुगु थुगु जात्रा दँय दँसिं हनाच्वंगु दु।

पत्रकार नाप कलाकार सुरज व्यंजनकारया मां बिष्णु व्यंजनकार शुक्रवाः मंत।

बिष्णु व्यंजनकार ७० दँय् मदुगु खः। वय्कः तःबहाःया छगू क्लिनिकय् थः हे थःगु स्वास्थ्य रिपोर्ट कांवंगु इलय् डाक्टरलिसे खँल्हाना च्वँच्वं हे आकाझाकां हृदयाघात जुयाः मदुगु खँ छेँजःपिंसं धाःगु दु।

मदुम्ह व्यंजनकारया जहान लिसें म्ह्याय् निम्ह व काय निम्ह दी।

वैशाख ३० गते जुइगु स्थानीय तह चुनावय् देयन्यक २१ हजार ९५५ मतदात केन्द्र तोके याउगु दु।

निर्वाचन आयोगं छगु सूचं पिकया १० हजार ७५६ मतदान स्थलय् २१ हजार ९५५ मतदात केन्द्र तइगु जुगु दु।

छगु मतदान स्थलय् छगु स्वया अप्पो केन्द्र दइगु जुगु दु। दकलय् अप्पो मधेस प्रदेशय् ४ हजार १८९ मतदान केन्द्र दइगु धका धाउगु दु। अथेहे दकलय् अप्पो कम कर्णाली प्रदेशय् १ हजार ३८५ गु मतदान केन्द्र दइ धका धाउगु दु।

बागमती प्रदेशय् ४ हजार ९५, प्रदेश १ य् ४ हजार ५१, लुम्बिनी प्रदेशय् ३ हजार ८३२, गण्डकी प्रदेशय् २ हजार ३०० व सुदूरपश्चिम प्रदेशय् २ हजार १०३ मतदान केन्द्र दु धका आयोगं धाउगु दु।

देयन्यक १ करोड ७७ लाख ३३ हजार ७२३ म्ह मतदाता दु धका आयोगं धाउगु दु।

नेपाली कांग्रेसं स्थानीय तहया चुनावय् तालमेलया लागि मापदण्ड दयकेगु तयारी याउगु दु।

शुक्रवाःनिसे सुरु जुगु केन्द्रीय समिति बैठकं यक्को नेतापिन्स तालमेल याये माःगु सुझाव बिउगु दु उकिया लागि मापदण्ड दयकेगु तयारी याउगु दु।

न्हापा त्याउगु थासय् सुरक्षित यासे मेमे थाय् माओवादी केन्द्र, एकीकृत समाजवादी, जसपा व राष्ट्रिय जनमोर्चा नाप चुनावी तालमेल यायेगु कांग्रेसं तयारी याउगु दु। ०७४ सालया स्थानीय तह चुनावय् ७५३ स्थानीय तहमध्ये कांग्रेसं २ सय ५३ तहय् त्याकूगु दु ।

महानगरपालिका व उपमहानगरपालिकाय् केन्द्रपाखे व नगरपालिका नाप गाउँपालिकाय् स्थानीय राजनीतिक नेतृत्वनाप  सहमतिया आधारय् तालमेल यायेगु कांग्रेसया तयारी दु। सभापति देउवानाप नेता रामचन्द्र पौडेल, प्रकाशमान सिंह, डा. शशाङ्क कोइराला, कृष्णप्रसाद सिटौला लगायतया नेतापि चुनावी तालमेलया पक्षय् दु।

शेखर कोइराला पक्षया नेतापि सू नाप तालमेल मयासे याकचा हे चुनावय् वनेगु पक्षय् दु।

नेपाली कांग्रेस केन्द्रीय सदस्यपि निर्वाचनया चुनावी गठबन्धनया पक्षय् दु।

केन्द्रीय कार्यसमितिया बैठकं नेतापिन्स माःगु कथं गठबन्धन याना वनेमाः धका धाउगु दु।

पार्टी कार्यालय सानेपाय् थौं आइतबाः च्वंगु बैठकय् नेतापिन्स माःगु कथं चुनावी गठबन्धन याना न्ह्यायेमाः धका धाउगु दु।

गठबन्धनय् वनेगु मवनेगु धइगु रणनीतिक विषय खः। गुुकथं पार्टीयात फाइदा जुइ व बाहेक मेगु मापदण्ड जुइ फइमखु,’ प्रवक्ता डा. प्रकाशशरण महतं धाउगु, ‘कन्ह्य सकसिया न्ववासिधय धुका जक गुकथं वनेगु धका निर्णय केन्द्रीय समितिं याइ।