बेलायतय् न्ह्यानाच्वंगु लकडाउन छलाः सिबें अप्वेयका १९ जुलाई तक्क ताःहाकेकू दु । कोरोना भाइरसया न्हूगु भेरियन्ट खनेदेवं बेलायतय् वंगु छुं ईनिसें न्ह्यनाचवंगु लकडाउनया ई आकनं थप याःगु खः । बेलायतया प्रधानमन्त्री बोरिस जोन्सनं डेल्टा भाइरस कोरोनां संक्रमित जूपिं म्हो मजूगु व न्हियान्हिथं अस्पताल भर्ना जुइपिनिगु ल्वगितय्गु ल्या अप्वयावंगु धासें कजय् कायेया नितिं लकडाउनया ई थप यायेमाःगु जानकारी बियादिल । अथेहे प्रधानमन्त्री जोनसनं वइगु १९ जुलाइलय् लकडाउन क्वचायेकेफइगु घोषणा तक्कं यानादिल । वय्कलं ४०दँसिबें अप्वः बेलायती नागरिकपिन्त कोरोनाविरुद्धया निगूगु डोज उपलब्ध यायेगु नं जानकारी बियादिल । बेलायतय् आःतक्क कोरोनाया कारण छगू लखः २७द्व व ९सः सिबें अप्वः मनुतय्जु ज्यान वनेधुंकूगु दु ।

कोरोना संक्रमण छुं म्हो जुयाच्वंगु ईलय् हाकनं निगूगु वःया डेल्टा भेरियन्टया कोरोना भाइरस हाकनं खनेदयावःगु दु । भारतय् ६गू राज्य याःगु स्वाब परीक्षणय् उगु डेल्टा म्यूटेशनया भारस पत्ता लगे जूगु खः । वैज्ञानिकपिन्स थुगु म्यूटेशनयात के ४१७ एन नां छुयादिगु दु । थ्व भेरियन्ट दकले अपाः भारतया तमिलनाडुइ खनेदूगु व महाराष्ट्र, गुजरात, ओडिशा, कर्नाटक व आन्द्र प्रदेशय १/१म्ह ल्वगि खनेदूगु भारतीय स्वास्थ्य मन्त्रालयं न्ह्यथंगु दु । भारतय् निगूगु वःया बेटा भेरियन्टय् ज्वः लाइगु म्यूटेशन डेल्टाय् ज्वः लाःगु भारतीय वैज्ञानिकपिन्सं धाःगु दु । थ्वः भेरियन्टया कारणं मनुत छक्व सिबें अप्वः पटक कोरोना संक्रमण जुइफइगु व खोप कासां नं संक्रमित जुइगु सम्भावना अप्वः दूगु धाःगु दु ।

इजरायलया संसद न्हूगु गठबन्धन पक्षय् बहुमत दयेवं नेतान्याहूया सरकार क्वदःगु दु ।

थ्वलिसें नप्mताली बेनेट इजरायलया न्हू प्रधानमन्त्री कथं कार्यभार काःगु खः । इजरायली संसदय् जूगु मतदानय् बेनेटें ६०म्हया समर्थन काय्त ताः लागू खः धाःसा नेतान्हूया ५९ जूगु खः ।

प्रधानमन्त्री पाखें विदाइ जुम्ह नेतान्हू आ लिकुड पार्टीया प्रमुख व इजरायली संसदया प्रमुख प्रतिपक्षी दलया नेता जुइमाःगु दु । नेतन्याहू इजरालया दकले ताःहाकयेक प्रधानमन्त्री जुयादिम्ह खः । वय्क न्याक्वः तक्क इजरायलया प्रधानमन्त्री जुयादीगु खः ।

नेतान्याहू न्हापांखुसी सन् १९९६ प्रधानमन्त्री जुयादिगु खःश्र अथेहे सन् २००९ निसें वःलाक्क सत्ताया नेतृत्व यानाच्वंगु खः । विपक्षी ८गू राजनीतिक दलं गठबन्धन निर्माण याना नेतन्याहूयात सत्तां पिनेछ्वःगु खः । बेनेटं थःगु पार्टीया ६म्ह जक सांसद जूसां नं गठबन्धनया नेतृत्व याना प्रधानमन्त्रीया सपथ काःगु खः । बीबीसीया कथं छुं ई न्ह्यः ४९दँया बेनेटया नेतान्याहूया बफादार कथं कयावयाच्वंगु खः ।

विपक्षी गठबन्धनय् जूगु सहमति कथं बेनेटं आः निदँ इजरायलया प्रधानमन्त्री जुयादि । वः लिाः याइरलापिड इजरायलया प्रधानमन्त्री जुइगु विपक्षी गठबन्धनया सहमति दु । मार्च २३य् जूगु निर्वाचनय् नेतान्याहूया पार्टी ३०गु सिट त्याकूगु खः ।

तर मेमेगु स्वंगु पार्टीलिसे गठबन्धन याना संसदय् नेतान्याहूया पक्षय् ५९गू मत थ्यंगु खः । तर उगु मतं नं सत्ताय् च्वनाच्वने मफत ।

अमेरिकां प्रविधिया लागाय् बादशाक कथं कयाच्वंगु तःधंगु कम्पनीपिन्त लगाम तःगु दु । उकिया नितिं अमेरिकाय् सदनया निगू तःधंगु दल डेमोत्र्mयाट व रिपब्लिकनया सांसद दथुई वादविवाद जूगु बुखँ सार्वजनिक जूगु दु।

हलिंयात हे थःगु इशाराय् न्ह्याकाच्वंगु प्रविधिया बादशाहपिं गूगल, फेसबुक, ऐप्पल व अमेजनयात अमेरिकी सरकारं लगाम तयेत्यंगु खः । उकिया लागि अमेरिकी सदनय् न्यागू विधेयक पेश याःगु दु । सदनं स्वीकृती बिइवं उपि तःधंगु प्रविधि कम्पनीया मनोमानीयात कजय कायेगु जुई । अमेजन, गूगल, ऐप्पल व फेबुक थें जाःगु कम्पनी १६लाः याःगु छानविन धुंका उगु विधेयकया मस्यौदा सदनय् पेश याःगु खः।

विधेयकय् डाटा म्यानेजमेन्ट, धेँधेँबल्लाय् हःपा व चीधंगु कम्पनीतय्त तंका छ्वःगु थें जाःगु बीबीसी न्ह्यथंगु दु । सोमबाः जक फ्रान्सं गूगलयात तःधंगु जरिवाना तःगु खः । गुकिं थुजागु कम्पनीया विश्वसनीयताय् न्ह्यसः ब्वलंकूगु दु । विश्वया हे दकले तःधंगु मालेगु इन्जिन गूगलविरुद्ध हलिंयंकया सरकारया रवैया बाँमलानावंगु ईलय् फेसबुक, ऐप्पल व अमेजनतयसं नं गुगु देय्या सरकारपाखें मुद्दा वा कडा कुँखिनाया सामना यायेमालाच्वंगु बीसीसी न्ह्यथंगु दु।

अमेरिकी कानून विभागं गूगलयात एकति याःगु धाःसें वयात एन्टी ट्रष्ट कानून हाचां गाःगु धकाः मुद्दा तःगु खः । अथेहे फेसबुकयात ४६गू राज्यलिसें केन्द्र सरकारं सन २०२०य् हे एकत्ति याःगु द्वपंया मुद्दा दायर याःगु खः । धेँधेँबल्लाखय् दूगु कम्पनीयात याः त थःयात मिइगु वा कम्पनी हे सिदेयका बिइगु धम्की बिइगु द्वपं उगु कम्पनीयात लाःगु दु । गूगल, फेसबुक थें जाःगु कम्पनीं अष्ट्रेलिया, यूरोप, भारतय् तकं नं अनेकन आरोप फयमालाच्वुं दु।

बजारय् मेगु कम्पनीतय्त म्वाके मबिइगु नीति या हुनिं फेसबुकं इन्स्टाग्रामयात छगू अरब डलर व ह्वाट्सएपयात १९गू अरब डलरं न्याःगु द्वपं लानाच्वंगु दु ।

फ्रान्सया राष्ट्रपति इम्यानुल म्याक्रोंयात न्येतले दाम्ह युवकयात अदालतं प्यलाया जेल सजाय न्यंकूगु दु ।

२८दँया दामियन तारेलं मंगलबाः छगू सार्वजनिक समारोहय् राष्ट्रपति म्याक्रोंया न्यतले दाःगु खः । उगु घटना जुइवें सुरक्षाकःमिपिनसं वयात ज्वंगु खः । भ्यालेन्सया छगू अदालतं विहीबाः वयात सार्वजनिक पदय् दुम्ह मनुविरुद्ध हिंसा याःगु अभियोय् दोषी ठहर याना जेल सजायँ न्यंकूगु खः ।

सुनुवाईया वलय् तारेलं थःयात म्याक्रोंया कारण फ्रान्सया विकास सुस्त गतिइ जुयाच्वंगु धाःगु दु । वय्कलं पासापिंलिसे जाना म्याक्रोंयात खँय् व क्रिमं कयेकिगु योजना दयेकागु जूसां नं व ज्या मयानागु धयादिल । न्येतले दायगु योगनाविना हे यानागु धाल । उगु घटना जूसां नं राष्ट्रपति म्याक्रोंनं आम नागरिकलिसे नापलायज्याय् निरन्तरता बिउगु खः ।

थःयात थुजागु घटना छुं फरक मजुइगु राष्ट्रपति म्याक्रों नं धयादिल । म्याक्रोंयात दाःगु घटनाया फ्रान्सया राजनीतिज्ञपिन्सं नं कुँखिंगु दु ।