क्यानडाया दक्षिणी प्यासिफिक नर्थवेष्ट थासय् तापक्रम अप्वोया ६०म्ह मनू सीगु दु।

ब्रिटिश कोलम्बिया प्रहरीं सोमवाः लिपा सीपि ६० म्ह स्वया अप्वो थ्यंगु दु। सीपि अप्वो ज्येष्ठ नागरिकपि खः। ब्रिटिश कोलम्बियाया लीटन तापक्रम ४९ दशमलव ९ डिग्री सेल्सियस थ्यंगु खः।

गर्मी अप्वोया अनयागु जनजीवन तक प्रभावित जुगु दु। अनयागु ग्लोब व मेल पत्रिकाया कथं लीटनय् छेँ न पिहाँ वयेत तक थाकूगु दु। तापक्रमया क्यानडा वातावरण सम्बन्धी निकाय न ब्रिटिश कोलम्बिया व अल्बेर्टाय् चेतावनी सहित सूचं जारी यागु दु। उगु थासया उत्तरपश्चिमी भू–भागय् सचेत जुया च्वनेत धागु दु।

लकडाउनया इलय् मास्क मतःगु धासे अस्ट्रेलियाया न्हुम्ह उपप्रधानमन्त्री बर्नाबी जोसेयात प्रहरीं जरिवाना यागु दु।

सत्ताधारी गठबन्धनया छगु घटक नेशनल पार्टीया मुख्यनेता जोसया स्थानीय प्रहरीं न्यु साउथ वेल्स राज्यया उत्तर पश्चिमी आर्मिडेलया पेट्रोल पम्पय् पेट्रोल जायेका सर्भिस सेन्टर दुने मास्क मतस्ये च्वंंगु खः।

“मास्कविना च्वंगुलि उम्ह भद्र महाशयं प्रहरीयात क्षमायाचना सहित विनम्रतापूर्वक सहयोग याये, वयात निसः सय डलरया जरिवाना तोके याये,” स्थानीय प्रहरीं धागु दु। उपप्रधानमन्त्री जोसें थः विमानस्थल वने लिबागुलि थः जहानया लागि गाडीइ चिकं तयेत क्वहावंगु व सर्भिस सेन्टर दुने दुहावइगु ३० सेकेन्डय् थः प्रहरीया कार्बाहीइ लागु स्वीकार यानादीगु दु।

अस्टेलियाय् कोरोना भाइरसया जोखिम अप्वोया वगुलि न्यु साउथ वेल्स, क्विन्स्ल्याण्ड, पश्चिम अस्ट्रेलिया व नथर्न टेरिटोरीय् प्रतिबन्ध तःगु दु। वंगु २४ घन्टाय् अस्ट्रेलियाय् २९ म्ह न्हुपि संक्रमण जुपि खने दुगु खः। उकि २३ म्ह स्थानीय व प्यम्ह विदेशपाखे वया क्वारेन्टिनय् च्वना च्वपि खः।

भारतय् आःतक ३२ करोड ३६ लाख डोज स्वया अप्वो कोरोना भाइरस (कोभिड–१९) विरुद्धया खोप मनू तयेत बिइ धुकुगु दु।

भारतया स्वास्थ्य तथा परिवार कल्याण मन्त्रालयं सोमवाः छगु तथ्यांक सार्वजनिक यासे भारतं कोरोना खोप वितरणया मामिलाय् अमेरिकायात हे लिउने लाकूगु दु।

मन्त्रालयया कथं आःतक अमेरिकाय् ३२ करोड ३३ लाख डोज कोरोना खोप मू तयेस काये धुकुगु दु। भारतया स्वास्थ्य मन्त्रालयं सामाजिक सञ्जार ट्वीटरपाखे अमेरिकायात कोरोना खोप बिइगु मामिलाय् लिउने लाकगू दु धका धागु दु अथेहे वंगु २४ घण्टाय् भारतय् कोरोना ४६ हजार स्वया अप्वोसित संक्रमण जुगु दु सा ९७९ म्ह सीगु दु।