अफ्रिकी देय् सोमालियाय् विद्रोही पुचःया २१म्ह लडाकूपिन्त मृत्युदण्ड बिउगु दु ।

विद्रोही पुचः अल सबाबया दुजः जूग प्रमाणित जुइवं छगू सैनिक अदालते उपिन्त मृत्युदण्डया सजाय न्यंकूगु खः । सोमालियाया अर्ध स्वायत्त पन्तल्याण्ड राज्यय् छक्वलं गोलीं कय्का उपिन्त मृत्युदण्ड बिउगु खः ।

मृत्युदण्ड बिउपिंमध्ये १८म्ह दशकौंनिसें बम हमला व आतंकवादी हमलाय् आबद्ध जुयाच्वंगु सोमालिया सरकारं न्ह्यथंगु दु । सोमालियायाय इतिहासय् थथे कठोर सजायँ बिउगु थ्वः न्हापांखुसी खः ।

उपिन्त मृत्युदण्डया सजायँ बिइगु ईलय् बिद्रोही पुचः अल सबाबं सोमालियाया मेमेगु शहरय् आतंकवादी हमला यायबलय् यक्वः सैनिकपिं सीगु खः ।

कोरोनाविरुद्धया नियम अःखः चुप्पा याःगु किपाः सार्वजनिक जूबलय् बेलायती स्वास्थ्यमन्त्रीया पद वंगु दु । दबाब अप्वःसेंलि स्वास्थ्यमन्त्री मयाट ह्यानककं राजीनामा बिउगु खः । भौतिक दूरीया नियम हाचांगाया ह्यानककं थः सहकर्मीयात चुप्पा नःगु खः । ह्यानकक व जीन कोलेड्यानजेलो दथुया चुप्पा नयाच्वंगु किपाः द सन पत्रिकां पिथंगु खः । प्रधानमन्त्री बोरिस जोनसनं धाःसा राजीनामा पौ पाखें थः दुःखी जूगु न्ह्यथंगु दु । न्हूम्ह स्वास्थ्यमन्त्री आः पुलाँम्ह अर्थमन्त्री शजिद जावेदयात भाला बिउगु दु । ह्यानकक व जीन कोलेड्यान दथुया चुप्पाया किपाः द सन पत्रिकां पिथना ह्यानककयात पद त्वतेत दबाब अप्वःगु खः । ह्यानककं थःपिन्सं हे दयेकूगु नियम पालना यायेगु थःपिनिगु कर्तव्य जूगु धासें माफी वना राजीनामा बिउगु खः ।

चीनया छगू मार्सल आर्ट ब्वनेकुथिइ मिं च्याना १८म्ह ब्वंमित सीगु दु।

चीनया हेनान प्रान्तय् दूगु ब्वनेकुथिइ जूगु घटनाय् दक्वं धैथें ७दँ निसें १६दँया मस्त लाःगु धाःगु दु । ३४म्ह ब्वंमि दूगु ब्वनेकुथिइ १६म्ह घाःपाः जूगु दु।

विद्युत शर्ट जुया मिं च्याःगु अधिकारिपिन्सं धाःगु दु । मिं च्याना ब्वनेकूया भवन पूवंके हे क्षतिग्रस्त जूगु दु ।

घाःपाः जुपिनिगु अवस्था गम्भीरु जूगु कारण सीपिनिगु ल्याः अप्वये फइगु धाःगु दु ।

वंगु दँय् अमेरिकाया मिनियापोलिस सतकय् जर्ज फ्लोडयात स्याम्ह पुलाम्ह प्रहरी डेरेक चौविनयात २२दँया जेल सजायँ बिउगु दु।

लोड सिइधुंका प्रहरीं हाकुपिन्त क्रुरता व दमन याःगु धासें तच्वयेक ब्वज्या जूगु खः । न्यायाधीश पीटर काहिलं थ्व सजाय भावना व जनमतया लिधंसाय् मजूगु धाल।

२२गू पेजया तःहागु पैmसलाय् न्यायाधीशं चौविनं भलसा व अख्तियारया दुरुपयोग याःगु कारण कठोर सजायया भागिदार जुइमाःगु जिकिर यानादिल ।

अमेरिकाया फ्लोरिडा राज्य मयामी सहर नाप छगु १२ तले भवन भत्के जुया दर्जनौं सम्पर्कविहीन जुगु। घटनास्थलय् छम्ह सीगु दु।

भवन भत्के जुगु थाय् गुलि मनू दु सिगु मदुनि। मयामीया उत्तरय् लागु थाय् सर्फसाइड क्षेत्रय् भवन सन् १९८० य् दयकेता तःगु खः। उगु छेँ २३० गु फ्ल्याट दु। उकि मध्ये बच्छि मल्याक दुगुं दु धका बीबीसीं धागु दु।

फ्लोरिडा राज्यया गभर्नर रन डिसेन्टिसं क्षति यक्कोजुगु धका अनुमान यागु दु।

३५ म्हेसित घटनास्थलपाखे उद्धार यागु दु सा गुलिसितउपचारया लागि अस्पताल छ्वःगु दु धका अधिकारीपिन्स धागु दु।