Display Style:
Column Style
तालिवानी लडाकूं अफगानिस्तानय् सशस्त्र ज्याखँ तच्वयेकल
बछलाथ्व चर्तुदशी ११४१, असार ९ बुधबाः
तालिवानी लडाकूतयेसं अफगानिस्तानया आपालं जिल्ला नियन्त्रणय् काःगु दु ।
विद्रोहीतयेसं वंगु मे महिना निसें ३७गू जिल्ला थःगु नियन्त्रणय् लाःगु दावी याःगु बीबीसीं उल्लेख याःगु दु । तालिवानीतये ज्यापहः अप्वयावंगु नापं संयुक्त राष्ट्रसंघया विशेष दूत डेबोरा लियोनं अफगानिस्तानय् गम्भीर परिदृष्य खनेदूगु धका सुरक्षा परिषदया ध्यानसालाकयादीगु दु ।
तालिवानीतयेसं म्हिगः जक ताजकिस्तानलिसेया मू सीमा क्षेत्रयात नियन्त्रणय् काःगु दु । अमेरिकी सेना लिहाँवनेगु न्ह्यायेधुंका सशक्त कारवाही न्ह्याकुगु तालिवानी पुचःलं हिंसात्मक ज्याखँ तच्वयेकुबलय् विस्थापित जूपिनि ल्याः नं अप्वयावंगु दु ।
तालिवानीतयेसं अमेरिकी सेनाया थी थी चेकपोष्टय् हताः याना नियन्त्रणय् काःगु धाःगु दु । काबुल प्रशासनं धाःसा विद्रोहीं छुं थाय् नियन्त्रणय् काःसा नं इपिं विरुद्धया कारवाही न्ह्यानाच्वंगुलिं सरकांरं याकनं हे सफलता चूलाकिगु दाबी याःगु दु ।
थ्वहे दथुइ कतारय् सरकार व विद्रोही दथुइ लिपांगु ई जूगु वार्ताय् आः तक्क नं छुं स्यल्लागु सहमति जुइ फूगु मदुनि । शान्ति वार्ता लिच्वःलय् मथ्यनेवं विद्रोहीतयेसं थःगु ज्यापहः तच्वयेकुगु नापं ल्वापु हाकनं पुलांगु हे अवस्थय् थ्यनिगु खः कि धइगु चिउता तकं प्वंकुगु दु ।
भारतय् छन्हू हे ८०गू लखः खोप
बछलाथ्वः द्वादशी ११४१, असार ८ गते मंगलबाः
भारतय् छन्हुं हे ८०गू लखम्हसित कोरोनाया खोप बिउगु दु ।
भारतय् छन्हुं हे थुलि आपालं ल्याःखय् खोप बिउगु थ्व न्हापांखुसिइ खः । खोप अभियानयात तच्वकं न्ह्याकुगु भारतं म्हिगः ८० गू लख म्हसित खोप बिउगु खः ।
भारतीय प्रधानमन्त्री नरेन्द्र मोदीं कोरोनाविरुद्ध ल्वायेगु ल्वाभःया कथं दूगु खोप अभियानतया तच्वयेकेज्या जूगु धासें थः नागरिकयात खोपपाखे छखे मलाकेगु घोषणा यानादील ।
भारतं १८दँ च्वयेय् वैंशया मनूयात कोरोनाविरुद्धया खोप सितिकं चूलाकेगु नीति काःगु कथं थुगु अभियान न्ह्याकुगु खः ।
थ्वयान्ह्यः प्राथमिकता धलःखय् लाःपिन्त जक खोप तयेकेगु व्यवस्था याःगु खः ।
खोपया व्यवस्थापन यायेत हाथ्याः दू : डब्लुएचओं
बछलाथ्वः द्वादशी ११४१, असार ८ गते मंगलबाः
विश्व स्वास्थ्य संगठन (डब्लुएचओं) गरिब देय्तयेत चूलाकेगु कोरोनाविरुद्धया खोपया अझं आवश्यकता दूगु न्ह्यथंगु दु ।
विश्वव्यापी साझेदारी योजना कथं कोरोनाया खोप काइगु गरिब देय्तये ल्याः अप्वः दूगुलिं माक्वः खोपया व्यवस्थापन यायेत हाथ्याः दूगु नं डब्लुएचओं न्ह्यथंगु दु । डब्लुएचओया वरिष्ठ सल्लाहकार डा ब्रुस ऐलवर्डं कोरोनाया खोप सच्छि व ३१गू देययत चूलाकेज्या जूसा नं अझं उगु माक्वः मजूगु धयादीगु बीबीसीं उल्लेख याःगु दु ।
अफ्रिकाया छुं देशय् संक्रमणया ३गूगु लहर खनेदूगुलिं खोपया अझं आवश्यकता दूगु डब्लुएचओया धापू दु । दक्षिण अफ्रिकाया राष्ट्रपति सिरिल रामाफोसां तःमि देय्तयेसं खोपया माक्वः ल्याः नियन्त्रणय् तःगुलिं गरिब देशय् समानुपातिक वितरण जुइ मफूगु द्वपं बियादील । वयेकलं खोपय् नियन्त्रण मयायेत नं तःधंगु देय्तयेत इनाप यानादीगु खः ।
अफ्रिकाय् आः तक्क २ गू प्रतिशतं जक कोरोनाया खोप काःगु धासें वयेकलं संक्रमण पूवंक कथं नियन्त्रणया नितिं थथें तःधंगु ल्याःखय् खोप आपूर्ति यायेमाःगुलिइ बः बियादील । थुखे डब्लुएचओं दक्षिण अफ्रिकाय् कोभ्याक्सया क्षेत्रिय कथं उत्पादन यायेत तयारी न्ह्यागु न्ह्यथंगु दु ।
डब्लुएचओ व मेगु अन्तर्राष्ट्रिय संस्थातये कुतःलय् सन् २०२१ या अन्त्यतक्क निगू अर्ब डोज खोप हलिंयंक चूलाकेगु धाःगु दु ।
अमेरिकाया आलाबामा राज्यय् सवारी दुर्घटनाय् ९म्ह मस्तलिसें १०म्ह सीत
बछलाथ्व एकादशी ११४१,असार ७ सोमवाः
अमेरिकाया आलाबामाय् जूगु सवारी दुर्घटनाय् ९म्ह मिसा मस्त नापं १०म्ह सीगु दु ।
धाकु फसं लिच्वः लाःगु राज्य आलाबामाय् १८गः सवारी ज्वलंत छगू हे दुर्घटनाय् लाबालय् मेपिं ५म्ह नं घाःपाः जूगु बीबीसीं न्ह्यथंगु दु । बट्लर काउन्टीइ जूगु दुर्घटनाय् ज्यान त्वफिकुपिंलय् ९ ला निसें १७ दँ तक्कया मिसा मस्त दूगु स्थानीय अधिकारीं उल्लेख याःगु दु ।
वाः वःगु हुनिं चुलुगु सतकय् सवारी ज्वलंतयेसं नियन्त्रण त्वफिका दुर्घटना जूगु जुइफइगु धाःगु दु । आलाबामाय् खुसिबाः व टोरनाडो वःलय् आपालं छेँ क्षतिग्रस्त जूगु दु ।
छगः कारय् दूम्ह ९ ला मिसा मचा व वयेकया २९दँया अबुम्ह सीगु खः । मेपिं ८म्ह फोस्टर होम टालापूसा काउन्टी गर्ल्स रान्चय् च्वना वःपिं मिसा मस्त खः ।
भारतय् कोरोना संक्रमणपि कम जुयावन
शोभा श्रेष्ठ | बछलाथ्व एकादशी ११४१,असार ७ सोमवाः
भारतय् कोरोना भाइरस (कोभिड–१९) संक्रमणय् निरन्तर कम जुयावंगु दु।
भारतय स्वास्थ्य तथा परिवार कल्याण मन्त्रालयया कथं वंगु २४ घण्टाय् न्हुपि संक्रमितपि ५३ हजारय् क्वहावंगु दु। थुगु ल्याः ८८ दिं लिपा दकलय् कम खः। वंगु २४ घण्टाय् कोरोना संक्रमणया कारण १ हजार ४२२ म्ह सीगु दु।
अथेहे भारतय् कोरोनाया सक्रिय संक्रमितपि करीब ७ लाखय् क्वहावंगु दु। थ्व नाप भारतय् कोरोनाया समग्र संक्रमितपि २ करोड ९९ लाख ३५ हजार अप्वो थ्यंगु दु।
अथेहे आःतक कोरोना संक्रमणया कारण ३ लाख ८८ हजार १३५ म्ह सी धुकुगु दु।
