इजरायलं हाकनं गाजापट्टी हवाई आक्रमण याःगु दु।

अन्तर्राष्ट्रिय सञ्चारमाध्यम कथं इजरायली सेनां बुधबाः सुथय् विद्रोही पुचलं हमासयात ताक याना बम कयेकूगु खः।

इजरायलय् न्हूगु सरकार गठन जूगु स्वन्हू मबिइवं गाजाय् हाकनं हमला याःगु खः । वंगु लाय् ११न्हू दिं तक्क इजरायलं व हमासं रकेट कयेकूगु खः।

बन्यामि नेतन्याहू प्रधानमन्त्रीपाखें पिदनेधुंका इजरायल व प्यालेस्टाइन व हमासयात यायेगु व्यवहारय् हिउगु मनतुनाकथं बुधबाः हवाई आक्रमण जूगु खः।

हमासं छु बेलुन त दक्षिणी इजरायलय् छ्वःगुलिं आक्रमण यायेमाःगु इजरायलया सेनां न्ह्यथंगु दु । इजरायली सेनाया कथं हमासया नेतापिन्सं बैठकया नितिं छ्यलिइगु क्षेत्रयात ताक याना हताः याःगु खः।

इजरायलं कयेकूगु बमपाखें मानवीय क्षति जूगु विवरण वःगु मदुनि । वंगु लाय् जूगु रकेट हानाहानय् २सः व ५०म्ह प्यालेस्टाइनी व १३म्ह इजरायलीपिनिगु मृत्यु जूगु खः धाःसा गाजाय् १६द्वः सिबें अप्वः छेँय् क्षति जूगु खः।

हलिंया हे दकलं अपाः दुज दूगु परिवारया हामा जियोन चान मन्त । भारतया मिजोरम प्रान्तया आइजोललिक्क च्वंगु बख्तवांग गाँया ७६दँया जियोना चाना मदुगु बीबीसी न्ह्यथंगु दु । जियोनाया ३८म्ह कला, ८९मह मस्त, १४म्ह भौ व ३६म्ह छेय् त दु । उपिं फुक्कं हे १००गू कोठा दूगु प्यतजाःया छेँय् च्वनावयाच्वंगु खः । थ्वहे परिवारया कारण हे बख्तवांग गाँ पर्यटकया लागि आकर्षणया केन्द्र जूगु वीवीसीं धाःगु दु । जियोना पेशां सिकःमि जुयादिइ । परिवार न्ह्याकेत वय्कया तःधिम्ह कलां नं फुक्क परिवारपिन्त ज्या इनाबिइगु व अनुगमन नं याई । गुलिखे काय् पिं थःथःगु ज्या याइगु व मेपिं कला व भौमचापिन्सं बुँज्या याना परिवारया आर्थिक ग्वहालि यानावयाच्वंगु दु । वय्कया परिवारयात न्हियान्हिथं ४५गू केजी जाकी, ४०म्ह खाः, २५गू केजी दाल, ६०गू केजी तरकारी, दर्जनौं खँय् व २० केजी फलपूmल खपत जुइगु खः । यक्व परिवारया दुजः दूगु हुनिं हे भारतय् उगु क्षेत्रय् चुनाव जुइगु ईलय् दक्व नेतापिन्सं उगु परिवारयात लय्तायेकेगु कुतः याई । गुबले गुबलें लाः सुं नेतापिन्त त्यायेत उमिगु परिवार हे निणार्नायक नं जुयावयाच्वंगु धाःगु दु ।

बेलायतय् न्ह्यानाच्वंगु लकडाउन छलाः सिबें अप्वेयका १९ जुलाई तक्क ताःहाकेकू दु । कोरोना भाइरसया न्हूगु भेरियन्ट खनेदेवं बेलायतय् वंगु छुं ईनिसें न्ह्यनाचवंगु लकडाउनया ई आकनं थप याःगु खः । बेलायतया प्रधानमन्त्री बोरिस जोन्सनं डेल्टा भाइरस कोरोनां संक्रमित जूपिं म्हो मजूगु व न्हियान्हिथं अस्पताल भर्ना जुइपिनिगु ल्वगितय्गु ल्या अप्वयावंगु धासें कजय् कायेया नितिं लकडाउनया ई थप यायेमाःगु जानकारी बियादिल । अथेहे प्रधानमन्त्री जोनसनं वइगु १९ जुलाइलय् लकडाउन क्वचायेकेफइगु घोषणा तक्कं यानादिल । वय्कलं ४०दँसिबें अप्वः बेलायती नागरिकपिन्त कोरोनाविरुद्धया निगूगु डोज उपलब्ध यायेगु नं जानकारी बियादिल । बेलायतय् आःतक्क कोरोनाया कारण छगू लखः २७द्व व ९सः सिबें अप्वः मनुतय्जु ज्यान वनेधुंकूगु दु ।

कोरोना संक्रमण छुं म्हो जुयाच्वंगु ईलय् हाकनं निगूगु वःया डेल्टा भेरियन्टया कोरोना भाइरस हाकनं खनेदयावःगु दु । भारतय् ६गू राज्य याःगु स्वाब परीक्षणय् उगु डेल्टा म्यूटेशनया भारस पत्ता लगे जूगु खः । वैज्ञानिकपिन्स थुगु म्यूटेशनयात के ४१७ एन नां छुयादिगु दु । थ्व भेरियन्ट दकले अपाः भारतया तमिलनाडुइ खनेदूगु व महाराष्ट्र, गुजरात, ओडिशा, कर्नाटक व आन्द्र प्रदेशय १/१म्ह ल्वगि खनेदूगु भारतीय स्वास्थ्य मन्त्रालयं न्ह्यथंगु दु । भारतय् निगूगु वःया बेटा भेरियन्टय् ज्वः लाइगु म्यूटेशन डेल्टाय् ज्वः लाःगु भारतीय वैज्ञानिकपिन्सं धाःगु दु । थ्वः भेरियन्टया कारणं मनुत छक्व सिबें अप्वः पटक कोरोना संक्रमण जुइफइगु व खोप कासां नं संक्रमित जुइगु सम्भावना अप्वः दूगु धाःगु दु ।

इजरायलया संसद न्हूगु गठबन्धन पक्षय् बहुमत दयेवं नेतान्याहूया सरकार क्वदःगु दु ।

थ्वलिसें नप्mताली बेनेट इजरायलया न्हू प्रधानमन्त्री कथं कार्यभार काःगु खः । इजरायली संसदय् जूगु मतदानय् बेनेटें ६०म्हया समर्थन काय्त ताः लागू खः धाःसा नेतान्हूया ५९ जूगु खः ।

प्रधानमन्त्री पाखें विदाइ जुम्ह नेतान्हू आ लिकुड पार्टीया प्रमुख व इजरायली संसदया प्रमुख प्रतिपक्षी दलया नेता जुइमाःगु दु । नेतन्याहू इजरालया दकले ताःहाकयेक प्रधानमन्त्री जुयादिम्ह खः । वय्क न्याक्वः तक्क इजरायलया प्रधानमन्त्री जुयादीगु खः ।

नेतान्याहू न्हापांखुसी सन् १९९६ प्रधानमन्त्री जुयादिगु खःश्र अथेहे सन् २००९ निसें वःलाक्क सत्ताया नेतृत्व यानाच्वंगु खः । विपक्षी ८गू राजनीतिक दलं गठबन्धन निर्माण याना नेतन्याहूयात सत्तां पिनेछ्वःगु खः । बेनेटं थःगु पार्टीया ६म्ह जक सांसद जूसां नं गठबन्धनया नेतृत्व याना प्रधानमन्त्रीया सपथ काःगु खः । बीबीसीया कथं छुं ई न्ह्यः ४९दँया बेनेटया नेतान्याहूया बफादार कथं कयावयाच्वंगु खः ।

विपक्षी गठबन्धनय् जूगु सहमति कथं बेनेटं आः निदँ इजरायलया प्रधानमन्त्री जुयादि । वः लिाः याइरलापिड इजरायलया प्रधानमन्त्री जुइगु विपक्षी गठबन्धनया सहमति दु । मार्च २३य् जूगु निर्वाचनय् नेतान्याहूया पार्टी ३०गु सिट त्याकूगु खः ।

तर मेमेगु स्वंगु पार्टीलिसे गठबन्धन याना संसदय् नेतान्याहूया पक्षय् ५९गू मत थ्यंगु खः । तर उगु मतं नं सत्ताय् च्वनाच्वने मफत ।