भारतया लिपांगु २४घौ दुने कोभिड १९ पाखें थप छगू लखः ३४द्वः संक्रमित जूगु दु।

थ्वलिसें भारतय् आःतक निगू क्वःति ८४ लखः ४१द्वः मनुत कोरोना संक्रमित जूगु भारतया केन्द्रीय स्वास्थ्य तथा परिवार कल्याण मन्त्रालयं न्ह्यथंगु दु।

भारतय् लिपांगु ईलय् सक्रिय संक्रमित ल्या ८०द्वः २३२म्ह म्हो जूगु दु धाःसा सक्रिय संक्रमित जुयाच्वपिनिगु ल्याः १७लखः १३द्वः दु । लिपांगु छुं दिं सक्रिय संक्रमित ६.२१ प्रतिशतं कुहाँवयाच्वंगु मन्त्रालयं न्ह्यथंगु दु।

कोभिड १९ संक्रमित जुया २४घौ दुने थप निद्वः व ८८७म्ह मनुपिनिगु ज्यान वंगु दु । थ्वलिसें भारतय् आःतक कोभिडया हुनिं सीपिनिगु ल्याः ३गू लखः ३७द्वः ९८९ थ्यंगु दु ।

अथेहे संक्रमणमुक्त जुपिनिगु ल्याः नं न्हियान्हिथं अप्वःयाच्वंगु दु । आःतक निगू क्वःति ६३लखः ९०द्वः मनुत संक्रमणमुक्त जूगु दु ।

भारतं मस्तय्त कोरोना खोपया परीक्षण सुरु यागु दु। भारत हे दयकूगु कोभ्याक्सिन खोपया परीक्षण मंगलवाः सुरु यागु दु।

पटनाय् १२ निसे १७ दँ तक समूहय् स्वम्ह मस्तय्त परीक्षणया रुपय् खोप बिइ धुकुगु दु व उपि स्वस्थ दुगु धक एम्स अस्पतालया कोभिड इन्चार्ज डा. सन्जिव कुमारं जानकारी बिगु दु।

वइगु महिनाय् ५२५ म्ह मस्तय्त खोपया परीक्षण यायेगु धका धागु दु। निगु चरणय् न खोपया नकारात्मक असर खनु मन्तकि स्वंगु चरणया खोप बिइगु धा धागु दु।

उकिया प्रभावकारिताया आधारय् खोप अनुमोदन याइगु धका धागु दु। आःतक १८ दँया च्वयेयापिन्त जक कोरोना खोप बिया वयाच्वंगु दु।

सौर्यमण्डलय् दकलय् क्वागू ग्रह धका म्हसिगु शुक्र ग्रहय् अमेरिकी अन्तरिक्ष संस्था नासां निगु मिसन सञ्चालन यायेगु घोषणा यागु दु।

सन् २०२८ व २०३० या दथुइ उगु मिसन सञ्चालन यायेगु नासाया योजना दु। न्हापागु मिसनया नां ‘डाभिन्सी प्लस’ व निगुगु मिसनयात ‘भेरिटास’ नां बिगु दु।

थुगु निगुलि हे मिसनया लागि ५०÷५० करोड डलर बजेट छुटे यागु दु धका नासां धागु दु। पृथ्वीया न्ह्यः हे छाय् थुलि क्वागु धका पत्ता लगे यायेगु कथं अन्तरिक्ष मिसन सञ्चालन यायेत्यंनागु धका नासाया प्रशासक बिल नेल्सनं धागु दु।

शुक्र ग्रहया सतह यागु तापक्रम ५ सय डिग्री सेल्सियस दु धका  वैज्ञानिकपिन्स धागु दु।

लिपागु २४ घण्टाया दुने भारतय् कोरोना भाइरस (कोभिड–१९) या संक्रमणं ३ हजार २०७ म्ह सीगु दु।

भारतया स्वास्थ्य तथा परिवार कल्याण मन्त्रालय कथंउगु हे इलय् कोरोना सक्रमणं १ लाख ३२ हजार स्वया अप्वो न्हुपि संक्रमित थपे जुगु दु।

थ्व नाप आःतक भारतय् कोरोना संक्रमितपि २ करोड ८३ लाख ७ हजार स्वया अप्वो थ्यंगु दु। आःतक कोरोना संक्रमणया कारण ३ लाख ३५ हजार १०२ म्ह सी धुकुगु दु।

२४ घण्टाय् तामिलनाडुइ २६ हजार स्वया अप्वो न्हुपि संक्रमितपि थपे जुगु दु सा केरलाय् १९ हजार स्वया अप्वो न्हुपि संक्रमितपि थपे जुगु दु। महाराष्ट्र व कर्नाटकय् न्हुपि संक्रमितपि १४ हजार स्वया प्वो थ्यंगु दु।

उच्च नश्लया खिचां नतुना कोरोना संक्रमण जू कि मजू धैगु धायेफइगु छगू अध्ययनं क्यंगु दु । ल्याब्रडोर जातया तालिमप्राप्त खिचां याःगु कोरोना परीक्षण नतिजा पिसिआर वा एन्टिजेनसिबें तच्वयेक याःगु खनेदत । थीथी देशय् याःगु परीक्षणय् थुजागु निष्कर्ष पिहाँवःगु अमेरिकी अखबार द न्यूयोर्क टाइम्सं न्ह्यथंःगु दु।

अमेरिका, फ्रान्स, बेलायत, चिली, अष्ट्रेलिया, बेल्जियम, जर्मनी, थाइल्याण्डलिसें यक्वः हे देशय् खिचापाखें कोरोना परीक्षण न्ह्याःगु दु । सार्वजनिक यातायात, रंगशालालिसें भिडभाड जुइगु सार्वजनिक थासय् कोरोना संक्रमित म्हसिकेत थ्व विधि अपुइगु अनुसन्धानं क्यंगु दु । लिपांगु पटक थाइल्याण्डया बैंककया छुलालोङकोर्न विश्वविद्यालयया भेटेनरि विभागं खुम्ह खिचां कोरोना परीक्षण याःगु खः।

थुकिया नतिजा विमानस्थल व सार्वजनिक थासय् यानावयाच्वंगु एन्टिजेन परीक्षण सिबें बाँलागु विश्वविद्यालयं न्ह्यथंगु दु । परीक्षणया नितिं संक्रमित मनुया याक्व वा वयागु मोजाया चःतिं कपाय् प्याकिइ । वयांलिपा उगु कपाय् खिचायात नतुंकिइ । कोरोना जूपिनिगु पाखें विशेष कथंया गन्ध खिचां वाः चायेकी । वहे गन्धया लिधंसाय् मेमेपिं संक्रमित त खिचां म्हसिकिइ।

खिचां याःगु परीक्षण ९६.२ प्रतिशत ज्वःलाःगु विश्वविद्यालयया अनुसन्धातापिन्सं धाःगु दु । थ्वयां न्ह्यः जर्मनी र संॐयुक्त अरब इमिरेट्सय् नं बाँलागु लिच्वः वःगु खः ।