Display Style:
Column Style
भारतय् खनेदूगु खतरनाक भेरिएन्टया मेगु देशय् न न्यनेधुंकुगु डब्लुएचओया धापू
चौलागा आमै ११४१,बैसाख २८ बुधवाः
विश्व स्वास्थ्य संगठन डब्ल्युएचओं भारतय् खनेदूगु न्हूगु भेरिएन्टया कोरोना भाइरस तसकं हे खतरनाक सावित जूगु लिच्वः पिकाःगु दु ।
डब्ल्युएचओया कोभिड १९ प्रमुख मारिया वेन केरखोवं भारतय् खनेदूगु बी.१.६१७ भेरिएन्ट तसकं संक्रामक जूगु धासें थुकिं हलिंया मेगु देय् नं प्रभावित जुइ फइगु धका चिउता प्वंकादीगु दु ।
थगुनेया डिसेम्बरय् न्हापांखुसिइ भारतय् लूगु थुगु भेरिएन्ट थुगुसिइया अक्टोबरतक्क न्यनेधुंकुगु केरखोवया धापू दु । थुगु भाइरस भारत जुया उमिगु जःलाखला देय् लिसेंया मेगु देशय् न्यनेधुंकुगु दावी यासें थुकिं द्वलंद्वःम्हसिया ज्यान कायेफइगु ख्याच्वः डब्ल्युएचओया दु ।
नापं केरखोवं हलिंया आपालं देशं भारतया उडानय् रोक तयेधुंकुगु अवस्थाय् मेगु देय्तयेसं नं सावधानी नालेत इनाप यानादील । थ्वहे दथुइ डब्ल्युएचओया प्रमुख टेड्रोस गेब्रेयासिसं डब्ल्युएचओं टुगेदर फर इन्डिया अभियान न्ह्याकेगु जानकारी बिउसं भारतया नितिं अक्सिजन, वासः लिसेंया स्वास्थ्य ज्वलंत चूलाकेगु तयारीइ दूगु धयादीगु दु ।
थुकिया नितिं कोष खडा यायेगु तयारीइ दूगु टेड्रोसया धापू दु । भारतय् कोरानो भाइरसया संक्रमितया ल्याः न्हिंयान्हिथं ४ गू लखया हाराहारीइ थ्यंगु दु ।
भारतय् कोरोना नियन्त्रणया लागिं सेनाया अवकाशप्राप्त स्वास्थ्यकःमितय्त भर्ना याइगु
चौलागा चतुर्दशी ११४१,बैसाख २७ मंगलवाः
भारतय् कोरोना महामारी नियन्त्रणया लागिं सेनाया अवकाश चूलाःपिं स्वास्थ्यकःमितय्त करारय् भर्ना यायेगु निर्णय याःगु दु ।
महामारीया दथुइ स्वास्थ्य प्रणाली बल्लाकेत धासें ४सः पूर्व सैन्य स्वास्थ्यकःमियात ११लाया लागिं भर्ना यायेत्यंगु खः । अथे हे, अनलाइन परामर्शया लागिं नं चिकित्सकत भर्ना याइगु जूगु दु ।
अप्वःथे राज्यय् संक्रमण दरलिसें मृत्युदर नं न्हियान्हिथं थहांवनेधुंकाः कर्नाटक व तमिलनाडुइ थौंनिसें पूवंक लकडाउन घोषणा याःगु दु । राजस्थानय् वइगु २४ मे तक्क लकडाउनया ई थकाःगु दु ।
देय्न्यंक लकडाउनया लागिं प्रधानमन्त्री नरेन्द्र मोदीयात दबाब अप्वयाच्वंगु दु । भारतय् लिपांगु २४ घौ दुने ४द्वः स्वयां अप्वः सीगु दुसा संक्रमितया ल्याः ४ लख स्वयां अप्वः दु ।
भारतय् कोरोनाया हुनिं आःतक्क २ लख ४६द्वः सच्छि स्वयां अप्वः सीबलय् २ क्वःति २६ लख ६२द्वः व ४सः स्वयां अप्वः संक्रमित दु ।
अमेरिकाया अन्धाधुन्ध गोली चले जुया खुम्हेसिगु ज्यान वन
मनिष | चौलागा चतुर्दशी ११४१,बैसाख २७ मंगलवाः
अमेरिकाया कोलोराडाय् बुदिं हना च्वंगु पाटीइ अन्धाधुन्ध गोली चले जुया खुम्हेसियागु ज्यान वंगु दु ।
छम्ह बन्दुकधारीं अन्धाधुन्ध गोली चले यायेवं खुम्हसिगु ज्यान वंगु धका धासे उम्ह मनूखं थःत न गोली क्यकूगु धका प्रहरीं धागु दु ।
प्रहरीया कथं आक्रमणकारीयागु न ज्यान वंगु दु धका धागु दु । घटना गुकथं जुगु धका धासा सिइमदुनि। अथेहे, आक्रमणकारीया पहिचान खुले जुगु मदुनि ।
मोबाइल होम पार्कय् जुगु छगु ट्रेलरय् बुदिं हनेगु निति जम्मा जुपि मनूतयेत आक्रमणकारीं गोली चले यागु धका बीबीसीं धागु दु।
अफगानिस्तानया छगू ब्वनेकूलिक्क बिस्फोट जूबलय् म्ह्वोतीं ३०म्ह विद्यार्थी मन्त
चौलागा त्रयोदशी ११४१, वैशाख २६ आइतबाः
अफगानिस्तानया राजधानी काबुलया छगू ब्वनेकूलिक्क बिस्फोट जूबलय् म्ह्वोतीं ३०म्ह विद्यार्थीत सीगु दु । घटनाय् दर्जनौं घाःपाः जूगु दु ।
विद्यार्थीत भवनं पिहाँवयेगु झ्वलय् विस्फोट याकूगु सरकारी अधिकारीपिन्सं धागु दु । घटनाय् सीपिं यक्वः धइथें मस्त लाःगु धागु दु । विस्फोट सुनां याकल धइगु आःतक सीमदुनि । अथेखःसां तालिवानी आतंककारीपिन्सं याकूगु खः कि धकाः आशंका यानाः अनुसन्धान प्रक्रिया न्ह्याकूगु दु ।
अफगान अधिकारीपिन्सं कारय् मोर्टारं कयेकाः विष्फोट याकूूगु दाबी याःगु दु । पश्चिमी काबुलय् द्वलंद्वया ल्याखय् अल्पसंख्यक समुदायत च्वनेगु याः । वंगु दँ न उगु हे थासय्च्वंगु प्रसुती अस्पतालय् विस्फोट याकूगु खः ।
उगु घटनाय् न निगू दर्जन मचाबूपिं मिस्त व मस्त सीगु खः । अमेरिकां थः सेना लित यंकेगु घोषणा याःगुनाप अफगानिस्तानय् हाकन हिंसात्मक ज्यापहः जूगु धागु दु । थुखय् अमेरिकानाप थीथी देशं थःपिनिगु राजनीतिक स्वार्थ पूवंकेत मस्तय्त स्यानाच्वंगु धागु दु ।
इमिसं राजनीतिक अभिष्ट पूवंकेत मस्तय्त निशाना दयेकूगु पाय्छि मजूगु टिप्पणी जूगु दु । सन् २०१८ य् न आईएस लडाकूया पुचलं ट्यसन सेन्टरय् हःता याःबलय् ७०म्ह मस्त सीगु खः । आईएस व अफगान सरकारदथुइ वार्ताया कुतः न्ह्यानाच्वंगु ईलय् विस्फोट याकूगु घटनां समस्यायात झं जटिल यानाब्यूगु दु ।
दिल्लीइ हाकनं थपे यात लकडाउन
लहानान्युज | चौलागा त्रयोदशी ११४१,बैसाख २६ सोमवाः
दिल्लीया मुख्यमन्त्री अरविन्द केजरीवालं दिल्लीइ थप छवाःया लागि लकडाउन थपे यायेगु निर्णय यागु खः।
मुख्यमन्त्री केजरीवालं थुगु पटकया लकडाउन थप कडा याययगु धका धागु दु। लकडाउन स्वया न्ह्यः कोरोना संक्रमण जूपि ३५ प्रतिशत दुगु खःसा आः घटे जुया २३ प्रतिशतय् क्वहावंगु दु धका धागु खः ।
केजरीवालं लकडाउन ताहाकेगु रहर मखु बाध्यता खः धका धयादीगु खः। सोमवाः निसे दिल्लीइ मेट्रो रेल चले जुगु मदुनि। आः यागु लकडाउन १७ मे तक जारी जुइ ।
वंगु अप्रिल १९ य् केजरीवालं खुन्हु जक लकडाउनया घोषणा यागु खः । वया लिपा लकडाउन मे ३ व मे १० य् याना निक तक थपे यागु खः ।
