Display Style:
Column Style
भारतय् संक्रमण अप्वःसेंलि खोप निर्यात मयाइगु
चिल्लाथ्व एकादशी, ११४१, चैत्र १२ विहीबाः
भारतं कोरोना बिरुद्धया खोप निर्यातय् रोक तःगु दु । कोरोनाभाइरस सङ्क्रमितया ल्याः अप्वयाच्वंबलय् वइगु वालय् घरेलु माग अप्वःइगु व खोप भारतय् हे आवश्यक जुइगु उमिगु धापू दु ।
भारतया खोप निर्माता सीरम इंस्टिच्युटं बेलायत व ब्राजिलया नितिं खोप निर्यातय् लिबाकाच्वंबलय् भारतया थुगु निर्णयलं आपालं देय्त प्रभावित जुइगु जूगु दु । भारतं अक्सफोर्ड–एस्ट्राजेनेका खोप आःतक्क ७६गू देशय् ६गू कोति खोप चूलाकेधुंकुगु दु ।
भारतय् छन्हूं हे ४७ द्वः कोरोना संक्रमित जूबलय् २ सः व ७५ म्ह सीइधुंक भारत सरकार कोरोना नियन्त्रणया उपाय अवलम्बन यायेगुपाखे न्ह्यागु दु । भारतय् वइगु अप्रील निसें ४५ दँ च्वयेय्या वैंश पुचःया मनूतयेत खोप बिइगु ज्याझ्व क्वजिउगु दु ।
भारतया थ्व निर्णय नापं नेपालं भारतं खरिद याःगु १०गू लख डोज खोप मवइगु जूगु दु ।
जापानया समुद्रय् कोरियां यात मिसाइल परीक्षण
चिल्लाथ्व एकादशी, ११४१, चैत्र १२ विहीबाः लहनान्यूज
उत्तर कोरियां निगः ब्यालेस्टिक मिसाइल कयेकुगु दु । उत्तर कोरियां जापानया समुद्री सिथय् निगः ब्यालेस्टिक मिसाइल प्रक्षेपण याःगु जापानी अधिकारीया धापू दु ।
अमेरिकाया राष्ट्रपतिइ जो बाइडेन निर्वाचित जुइधुंका उत्तर कोरियाया थ्व न्हापांगु मिसाइल परिक्षण खः । संयुक्त राष्ट्रसंघीय सुरक्षा परिषदया प्रावधान कथं उत्तर कोरियां ब्यालेस्टिक मिसाइल प्रक्षेपण याये दइमखु ।
छुं दिं न्ह्यः जक उत्तर कोरियां यल्लो सी लय् निगः नन–ब्यालेस्टिक क्रुज मिसाइल प्रक्षेपण याःगु खः । क्रुज मिसाइलया परीक्षण प्रतिबन्धित मदु । तर ब्यालेस्टिक मिसाइलयात खतरनाक ल्वाभः नालेगु याः । जापनया प्रधानमन्त्री योहिहिदे सुगां उत्तर कोरियां याःगु मिसाइल परीक्षणं क्षेत्रीय सुरक्षा व शान्तिइ खतरा ब्वलनिगु धाःगु अन्तराष्ट्रिय समाचार संस्थातयेसं न्ह्यथंगु दु ।
दक्षिण कोरियालिसे संयुक्त सैन्य अभ्यास याःगुलिइ उत्तर कोरियां थौं कन्हय् अमेरिकाया कुँख्यंगु खः ।
बंगलादेशया प्रधानमन्त्री शेख हसिनाया हत्याया कुतः याःपिं १४म्हसित मृत्युदण्डया सजायँ
चिल्लाथ्व दशमी, ११४१, चैत्र ११ बुधबाः
बंगलादेशया प्रधानमन्त्री शेख हसिनायात हत्याया प्रयास याःपिं १४म्ह इस्लामिक चरमपन्थी लडाकुपिन्त बंगलादेशया अदालतं मृत्युदण्डया पैmसला न्यंकूगु दु ।
बंगलादेशया विशेष अदालतं उगु सजाय न्यंकूगु १४म्ह मध्ये गुम्ह आः बंगलादेशया जेलय् हे दु धाःसा न्याम्ह बिस्यूंवनाच्वंगु दु । विशेष अदालतं न्यायाधीश अबु अब्दुल्लाह भुइल्यानं उपिं १४म्हेसित हे राजद्रोह व आपराधिक गतिविधिया मुद्दाय् दोषी ठहर याःगु खः । उपिं दक्वं हर्कत उल जिहाद अल इस्लामि संगठनया लडाकू त जूगु न्यायाधीशं धयादिल ।
सन् २००० य् हसिनाया हत्याया कुतःलय् छगू बम आक्रमण जूगु खः । हसिनां हःगु धर्मनिरपेक्षताया नीतिया विरोधय् इस्लामिक कट्टरपन्थी पुचलं हसिनाया हत्याया कुतः याःगु खः ।
चरमपन्थी संगठनं हसिनां भाषण याइगु कलेजय् निग बम तःगु खः । सुरक्षाकःमिपिन्के दूगु डिभाइसं उगु बम लुइका निस्क्रिय याःगु खः । सन् २०१८ य् हसिनाया पार्टी अवामी लिगं बंगलादेशया आम निर्वाचन जित हासिल याना हसिना प्रधानमन्त्रीया प्यंगूगु कार्यकाल न्ह्याकाच्वंगु दु ।
म्यानमारय् प्रहरीया गोली लाना छम्ह मचा सीत
चिल्लाथ्व दशमी, ११४१, चैत्र ११ बुधबाः
म्यानमारय् प्रहरीया गोलिं लानाः न्हय्दँया छम्ह मिसा मचाया ज्यान वंगु दु । थःगु छेँय् हे च्वनाच्वंम्ह उम्ह मिसामचायात प्रहरीं गोलिं कयेकाः स्याःगु परीवारं दावी याःगु दु ।
प्रहरीं धाःसा प्रदर्शनय् वयाच्वंगु इलय् उम्ह मिसा मचा सीगु दाबी याःगु दु । म्यानमारया सैनिक शासनया विरोधय् कुहांवःपिं प्रदर्शनकारीतय्त प्रहरीया दमन कायम दुगु हे इलय् मिसामचा गोलि ं लानाः सीगुलिसें म्यानमार सरकारयात प्यखेरं कुंखिंगु दु ।
म्यानमारया सेनां प्रदर्शकारी स्याःगु घटनाप्रति दुःख प्वंकुसें अराजक ज्याखँ हःगुलिं गोलिं कयेकेत बाध्य जूगु न्ह्यथंगु दु । वंगु फेब्रुअरीनिसें तच्वःगु आन्दोलनया झ्वलय् आःतक्क २० मस्त स्यानाबीधुंकूगु दु ।
सेनां आःतक्क सच्छि व ६४ प्रदर्शनकारी सीगु दाबी याःसां २सः व ६१ प्रदर्शनकारी सीगु छगू तथ्यांकं क्यंगु दु । गोली लानाः म्ह्वतिं छगू दर्जन प्रदर्शनकारी सीधुंकूगु दु । रंगुन, दाबेई व मण्डले शहरय् दक्कले आपाः प्रदर्शनकारी हताहत जूगु धाःगु दु ।
सैनिक शासनविरुद्ध नागरिक अवज्ञा अप्वयावंबलय् सुरक्षाकःमितय्सं सडक प्रदर्शनविरुद्ध बल अप्वयेकायंकूगु दु । प्रदर्शनकारीतय्सं धाःसा म्यानमारया थीथी शहरय् आःतक्क नं प्रदर्शन न्ह्याका हे तःगु दु ।
उत्तर कोरियां यात क्षेप्यास्त्र परीक्षण
चिल्लाथ्व दशमी, ११४१, चैत्र ११ बुधबाः
उत्तर कोरियां सतीगु दूरीया क्षेप्यास्त्र परीक्षण याःगु दु । उत्तर कोरियां नेता किम जोङ उन व वय्कःया केहेँनं दक्षिण कोरियाया तकं ब्वतिइ मंकाः सैन्य अभ्यास याःगुप्रति अमेरिकायात कुंखिनाकथं उगु क्षेप्यास्त्र परीक्षण जूगु सीएनएनं धाःगु दु ।
उत्तर कोरियां याःगु क्षेप्यास्त परीक्षणया अमेरिकी अधिकारीतय्सं पुष्टि याःगु खः । राष्ट्रपति जो बाइडेनं सत्ता कःघायेधुंकाः उत्तर कोरियां क्षेप्यास्त्र परीक्षण याःगु थ्व न्हापांगु खुसी खः ।
राष्ट्रपति बाइडेनं उत्तर कोरियालिसे स्वापू भिंकेत वार्ता यायेगु धयाच्वंबलय् हाकनं क्षेप्यास्त्र परीक्षण जूगु खः । अमेरिकी विदेशसचिव एन्टोनी ब्लाइन्केनं वंगु वालय् उत्तर कोरियायात थःगु आणविक ज्याझ्वः स्थगन यायेत दवाव बीत चीनलिसे सहलह याःगु समाचार सार्वजनिक जूगु खः ।
तर चिनियाँ अधिकारीतय्सं उत्तरया क्षेप्यास्त्र परीक्षण क्वकायेत आणविक ज्याझ्वः कथं हे संयुक्त राष्ट्रसंघय् प्रस्ताव पेश मजूगु धाःगु दु । न्हापाया दँय् अमेरिकी राष्ट्रपति डोनाल्ड ट्रम्पलिसे नेता किमं स्वक्वः वार्ता याःसां सम्बन्ध भिनेमफूगु खः । व धुंकाः अमेरिकालिसे लिपांगु दच्छि उत्तर कोरियाया छुं हे संवाद मजूगु धाःगु दु ।
निगुलिं देय्या अधिकारीत लिपांगु खुसी सन् २०१९ या अक्टोबरय् स्वीडेनय् नापलाःगु खः । थुखे बाइडेन प्रशासनं किमलिसेया वार्ताय् दुथ्याःपिं अधिकारीतलिसे नं सहलह यानाच्वनागु धाःगु दु ।
