Display Style:
Column Style
चिनियाँ कम्पनी सिनोभ्याक खोप प्रभाबकारी खनेदत
मनिष | कछलाथ्व तृतीया ११४१,बैसाख ३१ शुक्रवाः
चिनियाँ कम्पनी सिनोभ्याक बायोटेक लिमिटेडं विकास यागु कोरोनाभाइरस (कोभिड–१९) विरुद्धया खोप आः इन्डोनेशियाया स्वास्थ्यकर्मीपिन्स कागु दु।
उमिगु छु विवाद खने दुगुसा चिनियाँ खोपबारे क्लिनिकल परीक्षणया तुलनाय् बालागु लिच्वः पिहावंगु दु धका धागु दु ।
इन्डोनेशियाया राजधानी शहर जकार्तामा गत जनवरीनिसे मार्चतक एक लाख २८ हजार स्वया आप्वोसिया चिनियाँ खोप कायधुकुगु दु धका छगु अध्ययन क्यंगु दु ।
उगु अध्ययनया झ्वलय् सिनोभ्याक खोपया निगुगु डोज कायेत न्ह्यन्हुलिपा खोपं ९८ प्रतिशतयात कोरोना संक्रमण व ९६ प्रतिशतपिन्त अस्पतालय् भर्ना जुइपाखे बचे जुगु दु धका धागु दु।
बुधवाः इन्डोनेशियाया स्वास्थ्य मन्त्रालयया अधिकारी पन्ड्जी देवान्त्रां थुगु अध्ययनय् चिनियाँ खोप तसक प्रभावकारी खनेदुगु धका धागु दु ।
भारतया गलत पूर्वानुमान हुनिं आः या अवस्था खः : एन्थोनी फाउचीं
कछलाथ्व द्धितीया ११४१,बैसाख ३० बिहीवाः
अमेरिकाया वरिष्ठ संक्रामक रोग विशेषज्ञ चिकित्सक एन्थोनी फाउचीं भारतं कोरोना महामारीया अवस्थायात गलत पूर्वानुमान याःगुलिं आःया नियति फयेमालाच्वंगु बिचाः प्वंकादीगु दु ।
आः भारत महामारीया ग्यानापूगु जालय् तक्यंगु धासें वय्कलं थुकिं पिहांवयेत यक्व ई बीगु धयादिल । महामारीया दथुइ नं संक्रमण फूगु धासें बन्द याःगु क्षेत्रत हाकनं चायेकूगु हुनिं आःया ग्यानापूगु अबस्था फयेमाःगु डा फाउचीया धापू दु ।
भारतय् कोरोनाया निगूु लहर न्ह्याःगुलिसें स्वास्थ्य संकट च्वन्ह्याःगु दु । संक्रमितया वासः यायेत अक्सिजनलिसेंया स्वास्थ्य उपकरणया अभाव यथावत दु ।
थ्व हे दथुइ, भारतय् कोरोनाया संक्रमित अप्वःगुलिसें वैज्ञानिक अनुसन्धानय् सक्रियता नं अप्वयेकूगु दु । भारतय् खनेदुगु कोरोना भाइरसया न्हूगु भेरिएन्ट अःपुक न्यनेफुगु धासें वैज्ञानिकतय्सं अनुसन्धानय् सक्रियता अप्वयेकूगु खः ।
इजरायली हताःपाखें गाजा पट्टीइ १३ तजाया भवन ध्वस्त, २८म्ह सित
कछलाथ्व पारु ११४१,बैसाख २९ बुधवाः
इजरायल व प्यालेष्टाइन दथ्ुया हिंसात्मक ज्यापहः तच्वःगु दु । लिपांगु ई इजरायली सेनाया हताःलं गाजा पट्टीइ दूगु १३ताजा भवन ध्वस्त जूगु दु ।
इजरायली सेनां भवनय् दूपिं मनूतयेत पिहाँमवयेत ख्याच्वः बिउगुृ घौछि त्या लिपा ३सः सिवें आपा हवाई व रकेट हताः जूगु धाःगु दु । प्यालेष्टाइनी लडाकु पुचः हमास व इजरायली सेना दथुइ न्ह्यानाच्वंगु हिंसाया हे झ्वलय् जूगु रकेट व हवाई हताःलय् निखेरया याना ३१ म्ह सीगु दु ।
प्यालेष्टाइनपाखे २८म्ह व इजरायलपाखे ३ म्ह सीगु खः । २ सः सिवें आपा घाःपाः जूगु दु । सन् २०१७ लिपा थुपिं निगू पक्ष दथुइ जूगु थ्वहे तःधंगु हिंसात्मक ल्वापु खः ।
थ्वहे दथुइ इजरायली प्रधानमन्त्री बेन्जामिन नेतान्याहुं हमासं सीमा रेखा पुलावःगु प्रतिक्रिया बिउसें थुकिया तःधंगु मू पुलेमालिगु ख्याच्वः बियादील । तर हमासं धाःसा इजरायलं जबरजस्ती रुपय् हताः याःगु धासें प्रतिकार यायेगु लिसः बिउगु दु । इजरायल व प्यालेस्टाइन दथुइ लिपांगु ई जेरुसलमय् दूगु नाँजाःगु अल अक्सा मस्जिदय् दाबीया विषयलं हिसा तच्वःगु खः ।
इजरायलं नं उगु मस्जिद थःपिनि पवित्र धार्मिक थाये धका दाबी यायेधुंका थुगु हे मस्जिदया विषयलय् निगू देय् दथुइ तनाब अप्वःगु खः । अन्तर्राष्ट्रिय समुदायं निगुलिं पक्षयात संयमता नालेत इनाप याःगु दु ।
गंगा खुसीइ लूगु सीम्हया ल्या ७१ थ्यन
कछलाथ्व पारु ११४१,बैसाख २९ बुधवाः
भारतया विहारस्थित गंगा खुसीया किनारय् बेबारिसे सीम्हया ल्याः ७१म्ह थ्यंगु दु । म्हसिका मस्युगु उपिं सिम्ह गन वल धैगु सीदुगु मदुनि । लिपांगु ईलय् महादेव घाटय् लूगु ७१म्ह सीम्ह बक्सर जिल्ला प्रशासनं पोष्टमार्टम याना गाडे याःगु दु ।
थ्वयान्ह्यः गंगा खुसिइ ४०म्ह सीम्ह लूगु खः ।
चौसा प्रखण्ड स्थित खुसिइ लँय् बुयाच्वंगु सीम्ह जनावरतयेसं लाकाकयाच्वंगु लुँ सार्वजनिक जुइधुंका सनसनी न्यंगु खः । चौसा प्रखडं विकास पदाधिकारी अशोक कुमारं उगु सीम्ह उत्तराखण्डं चुइका हःगु जुइफइगु आशंका याःगु दु ।
अयेसां स्थानीयं धाःसा कोरोनां सीपिनि बाब्व छ्वयेधुंकुगु सीम्ह गंगाय् वान्छ्वगु धका कुँख्यंगु दु । स्थानीय प्रशासनं घटनाया अनुसन्धान न्ह्याकुगु दु ।
भारतय् खनेदूगु खतरनाक भेरिएन्टया मेगु देशय् न न्यनेधुंकुगु डब्लुएचओया धापू
चौलागा आमै ११४१,बैसाख २८ बुधवाः
विश्व स्वास्थ्य संगठन डब्ल्युएचओं भारतय् खनेदूगु न्हूगु भेरिएन्टया कोरोना भाइरस तसकं हे खतरनाक सावित जूगु लिच्वः पिकाःगु दु ।
डब्ल्युएचओया कोभिड १९ प्रमुख मारिया वेन केरखोवं भारतय् खनेदूगु बी.१.६१७ भेरिएन्ट तसकं संक्रामक जूगु धासें थुकिं हलिंया मेगु देय् नं प्रभावित जुइ फइगु धका चिउता प्वंकादीगु दु ।
थगुनेया डिसेम्बरय् न्हापांखुसिइ भारतय् लूगु थुगु भेरिएन्ट थुगुसिइया अक्टोबरतक्क न्यनेधुंकुगु केरखोवया धापू दु । थुगु भाइरस भारत जुया उमिगु जःलाखला देय् लिसेंया मेगु देशय् न्यनेधुंकुगु दावी यासें थुकिं द्वलंद्वःम्हसिया ज्यान कायेफइगु ख्याच्वः डब्ल्युएचओया दु ।
नापं केरखोवं हलिंया आपालं देशं भारतया उडानय् रोक तयेधुंकुगु अवस्थाय् मेगु देय्तयेसं नं सावधानी नालेत इनाप यानादील । थ्वहे दथुइ डब्ल्युएचओया प्रमुख टेड्रोस गेब्रेयासिसं डब्ल्युएचओं टुगेदर फर इन्डिया अभियान न्ह्याकेगु जानकारी बिउसं भारतया नितिं अक्सिजन, वासः लिसेंया स्वास्थ्य ज्वलंत चूलाकेगु तयारीइ दूगु धयादीगु दु ।
थुकिया नितिं कोष खडा यायेगु तयारीइ दूगु टेड्रोसया धापू दु । भारतय् कोरानो भाइरसया संक्रमितया ल्याः न्हिंयान्हिथं ४ गू लखया हाराहारीइ थ्यंगु दु ।
