Display Style:
Column Style
रुसं युक्रेनय् सैन्य हस्तक्षेप यायेगु ख्याच्वः
लहनान्यूज | चिल्लागा त्रयोदशी ११४१, चैत्र २७ गते शुक्रबाः
रुसं युक्रेनय् दूपिं थः नागरिकया रक्षाया नितिं आवश्यक जूसा सैन्य हस्तक्षेप यायेगु ख्याच्वः बिउगु दु ।
युक्रेनया सेनां देय्या पूर्वी भागय् सक्रिय पृथक्तावादी पुचःयात आक्रामक कारबाही न्ह्याकेगु धायेधुंका रुसं नं जवाफी ख्याच्वः बिउगु खः । युक्रेनय् रुसी मूलया पुथक्तावादी पुचःयात रुसं ग्वहालि व समर्थन यानावःगु दु ।
सन् २०१४ निसें युक्रेनया पूर्वी लागा डोनबास लिसेंया क्षेत्रय् तनाव जारी दु । लिपांगु ई पृथक्तावादी पुचः व युक्रेनी सेना दथुइ ल्वापुया घटनात अप्वयाच्वंगु दु ।
पृथक्तावादी पुचःयात युक्रेनं निर्णायक कारबाही न्ह्याकेगु तयारी याःगु नापं रुसं युक्रेनलिसेया सिमाय् थःगु सेनाया तैनाथी अप्वयेकुुगु दु । थ्यंमथ्यं २०द्वः सिवें अप्वः रुसी सेना आः युक्रेनया सिमाय् तयारी अवस्थाय् दु ।
युक्रेनय् दूपिं रुसी भाषीपिनि रक्षाया नितिं आवश्यक जूसा सैन्य हस्तक्षेप यायेगु रुसी अधिकारीपिनि ख्याच्वः दु । यदी युक्रेनं रुसी समर्थकतयेत निशाना दयेकुसा उगु युक्रेनया हे नितिं पतनया शुरुवात जुइगु रुसया छम्ह वरिष्ठ सैन्य अधिकारीया दावी दु ।
थ्वहे दथुइ जर्मनीं युक्रेनया सीमापाखें थः सेना लितयंकेत रुसयात इनाप याःगु दु । सन् २०१४ अप्रिलय् सरकारी सुरक्षाकर्मीयात विद्रोहीं हताः याःगु निसें उगु क्षेत्रय् रुसी सेना कार्यरत दु ।
थुखे अमेरिकां नाटो ग्वहालिमिपिंलिसे रुसी सेनाया आन्दोलनया खँय् सहलह यानाच्वंगु न्ह्यथंगु दु ।
लिपांगु दिंलय् युक्रेनया सीमा क्षेत्रय् तनाव अप्वयावनाच्वंगु दु । वंगु वालय् जक विद्रोहीया हताःलय् ५म्ह रुसी सैनिक सीगु खः ।
म्यानमारय् जारी हिसाय् थप ११म्ह सीत , सुरक्षाकर्मीया दमन जारी, थ्यंमथ्यं ३द्वःम्ह हिरासतय्
लहनान्यूज | चिल्लागा त्रयोदशी ११४१, चैत्र २७ गते शुक्रबाः
म्यानमारय् जारी हिंसाय् लाना लिपांखुसिइ ११म्ह ब्वज्यामि सीगु दु ।
ंवंगु फेब्रुअरीइ सेनां जननिर्वाचित सरकार क्वथला सत्ता ल्हातये कायेधुंका जुयाच्वंगु विरोध ब्वज्याया झ्वलय् सुरक्षाकर्मीं बल छ्यबल य् २०म्ह घाःपाः जूगु बीबीसीं न्ह्यथंगु दु ।
आन्दोलनकारीतयेसं निषेधाज्ञा त्वाथलेगु न्ह्याकेधुंका सुरक्षाकर्मीं कयेकुगु गोलीं लाना ११ म्ह सीगु अनया सञ्चारमाध्यमतयेसं न्ह्यथंगु दु ।
उत्तरपश्चिम म्यानमारस्थित ताज शहरय् तःधंगु ल्याःखय् ब्वज्यामिपिं मुना सुरक्षा घेरा त्वाथलेगु झ्वलय् बल छ्यलेधुंका निगू पक्ष दथुइ ल्वापु जूगु खः ।
वंगु फेब्रुअरी १ निसें म्यानमारय् सरकारया विरोधय् न्ह्यानाच्वंगु हिंसात्मक ब्वज्याया झ्वल य् सीपिनि ल्याः ६सःम्ह पुलावंगु दु ।
आन्दोलकारीपिन्सं आङसाङ सूचीया सरकारया पुर्नबहालीया माग यासें विरोध यानाच्वंगु दु । देशया मू शहर याङ्ुनय् आःतक्क दक्वःल्य् आपा ब्वज्यामि सीगु धाःगु दु ।
थःगु पलाःया विरोध याःगु थ्यंमथ्यं ३द्वःम्हसिक सेनां हिरासतय् काःगु धाःगु दु ।
क्रिकेटर सचिन तेन्दुलकर कोरोना संक्रमणमुक्त
लहनान्युज | चिल्लागा त्रयोदशी ११४१,चैत्र २७ शुक्रवाः
विश्वप्रसिद्ध भारतीय क्रिकेटर सचिन तेन्दुलकर कोरोना संक्रमणमुक्त जुया छेँ लिहावःगु दु।
तेन्दुलकरयात अस्पतालं म्हिगः बहनि हे डिस्चार्ज याःगु खः। अय्न छु दिं होम क्वारेन्टिय् च्वनेनिइगु जुगु दु।
वःगु २७ माचय् सचिन कोरोनापाखे संक्रमित जुगु समाचार सार्वजनिक जुगु खः । २ अप्रिलय् अस्पताल भर्ना जुगु खः।
अस्पतालपाखे डिस्चार्ज जुइवं सचिनं थः शुभेच्छुक व उपचारय् संलग्न चिकित्सकपिन्त सुभाय् देछागु दु।
बेइजिङ दकले अप्वः अर्बपति दूगु शहर
लहनान्यूज | चिल्लागा द्वादशी ११४१, चैत्र २६ गते, विहीबाः
अमेरिकाया न्यूयोर्कयात ल्यूने लाका चीनया राजधानी बेइजिङ हलिंया हे दकले आपा अर्बपति दूगु शहर जूगु दु ।
फोब्र्स म्यागजिनं सार्वजनिक यागु धलः कथं ३३म्ह न्हूम्ह अर्बपतिपिं थपू जुया बेइजिङय् च्वनिपिं अर्बपतिपिनिगु ल्याः सच्छि थ्यंगु खः ।
लिपांगु न्हेदँतक्क दकले अपा अर्बपति च्वनिगु शहर जुयाच्वंगु न्यूयोर्क थुगुसी धाःसा निगूगु थासय् कुहाँवःगु दु । कोभिड–१९ कजय् कायेत ताःलागु, प्रविधि सम्बन्धी कम्पनीया उदय व स्टक मार्केटं चीनय् अप्वः अर्बपतिपिनिगु थपू जूगु फोब्र्सया धापू दु ।
अथेसां बेइजिङया अर्बपतिपिनिगु मुक्कं पुँजीसिबेंं न्यूयोर्कया अर्बपतिपिनिगु पुँजी ८०गू अर्ब डलरं अप्वः दु । अथेहे अमेरिकाय् ७२४म्ह व चीनय् चीनय् ६९८म्ह अर्बपति दु ।
भारत अप्वः अर्बपति दुगु देशया स्वंगूगु थासय् लाःगु दु । भारतं थुगुसी १४०म्ह अर्बपति दूगु नं फोब्र्सं न्ह्यथंगु दु । प्यंगुगु व न्यागूगु थासय् धाःसा जर्मनी व रुस छसिकथं १३६म्ह व ११७म्ह अर्बपति दूगु देशय् लाःगु दु ।
प्रत्येक १७ घौलय् न्हूम्ह छम्ह अर्बपति थपू जुइगु फोव्र्सं न्ह्यथंगु दु ।
सुरक्षासम्बन्धी न्हूगु कानुन लागू जुइवं बेलायत वनेत आवेदन ब्यूपिं हङकङया नागरिकया ल्या अप्वल
लहनान्यूज | चिल्लागा द्वादशी ११४१, चैत्र २६ गते, विहीबाः
हङकङया द्वलंद्व नागरिकपिन्सं बेलायत वनेत भिसा आवेदन ब्यूगु दु ।
हङकङय् राष्ट्रिय सुरक्षासम्बन्धी न्हूगु कानुन लागू यायेवं शिक्षा, आवास व रोजगारीया नितिं बेलायत वनेत भिसा आवेदन ब्यूपिं हङकङया नागरिकपिनिगु ल्या न्हियान्हिथं अप्वयावंगु दु ।
बेलायतं न्यादँया नितिं आवास भिसा बीगु जुइवं २७द्व मल्याक हङकङया नागरिकपिन्सं आवदेन बिइधुंकूगु बीबीसीं धागु दु ।
चीनं हङकङया वृहत्तर सुधारया नितिं न्हूगु सुरक्षा कानुन पारित यायेवं बेलायतं हङकङया नागरिकपिन्त रोजगारी, आवास व शिक्षाया अधिकारनाप न्यादँया नितिं भिसा बीगु धागु खः ।
