अन्तर्राष्ट्रिय

Display Style:

Column Style

पाकिस्तानया क्वेटा शहरय् जूगु कार बम मूगुलिइ ४म्ह सित , १२ म्ह घाःपाः

चौलाथ्व दशमी ११४१,बैसाख ९ बिहीवाः

पाकिस्तानय् जूगु बम मूगुलिइ ४म्ह सीगु दु । दक्षिण पश्चिम पाकिस्तानया क्वेटा शहरया छगू होटलय मूगुलिइ लाना १२ म्ह घाःपाः जूगु बीबीसीं न्ह्यथंगु दु ।

पाकिस्तानया नितिं चिनियाँ राजदूत नङ रङ दूगु होटलया कार पार्किङ क्षेत्रय् हताः जूबलय् मूगु धाःगु दु । तर राजदूत नङ रङ अफागानिस्तानया सीमा लिक्कसंया बलूचिस्तान प्रान्तया भ्रमणय् दूगु गृह मन्त्रालयं न्ह्यथंगु दु ।

घटनाया आःतक्क सुनांनं भाला काःगु मकानिगु अनया सरकारं न्ह्यथंगु दु । बलुचिस्तानय् चिनियाँ लाय् दूगु तःधंगु पूर्वाधारत निर्माण जुयाच्वंगु दु ।

ताः ई निसें पाकिस्तानय् सशस्त्र आन्दोलन यानाच्वंगु विद्रोहीतयेसं चीनया लगानीइ न्ह्यानाच्वंगु आयोजनाया विरोध यानावःगु दु । राजदूत रङ उगु हे आयोजनातये निरीक्षणया नितिं क्वेटा शहरया भ्रमणय् दूगु अधिकारीतयेसं न्ह्यथंगु दु ।

भारतय् वंगु २४ घण्टाय् स्वंगु लाख स्वया अप्वो कोरोना सक्रमित

लहानान्युज | चौलाथ्व दशमी ११४१,बैसाख ९ बिहीवाः

भारतय् वंगु २४ घण्टाया दुने स्वंगु लाख स्वया अप्वोसित कोरोना भाइरसया सङ्क्रमण पुष्टि जुगु दु ।

लिपागु २४ घण्टाय् जक भारतय् स्वगु लाख १५ हजार ७२८ म्हेसित सङ्क्रमित जुगु दु। विश्वय् थ्व हे आःतक दकलय् अप्वो सक्रमण जुगु न्हापागु घटना खः।

भारतय् कोरोना सङ्क्रमण पुष्टि जूपि आःतक छगु करोड ५९ लाख स्वया अप्वो जुइ धुकुगु दु । अथेहे २४ घण्टाया दुने कोरोनाका कारण २१०२ म्ह सी धुकुगु दु ।

थ्व नाप भारतय् आःतक कोरोनां सीपि छगु लाख ८४ हजार स्वया अप्वो जुइ धुकुगु दु।

अथेहे २४ घण्टाय् छगु लाख ७९ हजार स्वया अप्वो डिस्चार्ज जुगु दु । थ्व नाप कोरोनामुक्त जुपि छगु करोड ३४ लाख अप्वो थ्यःगु दु ।

भारतय् आःतक २२ लाख ८४ हजार स्वया अप्वो सक्रिय सङ्क्रितपिन्त उपचार यानाच्वंगु दु।

भारतयया छगू अस्पतालय् अक्सिजन म्हो जुया २२म्ह सीत

चौलाथ्व नवमी ११४१,बैसाख ८ बुधवाः

भारतया महाराष्ट्र राज्यया छगू अस्पतालय् अक्सिजन भण्डारण यानातःगु ट्याङ्की प्वाःगना अक्सिजन म्हो जुयावसेंलि अक्सिजन अभावया हुनिं म्होतिं २२म्ह विरामीपिं सीगु दु ।

नासिकया अस्पतालय् जूगु उगु घटनाय् ३५म्ह विरामीया अवस्था गम्भिर जूगु भारतीय सञ्चारमाध्यमं न्ह्यथंगु दु । अक्सिजनया आपूर्ति दिकूगु ईलय् सच्छि व ५०म्ह विरामी दूगु खः ।

गुकिइ २३म्हेसित भेन्टिलेटरय् तयातःगु खः । अक्सिजन म्हो जुयावंसेलि बाघौ तक्क आपूर्ति बन्द जूगु खः । अक्सिजन आपूर्ति बन्द जुसेंलि अस्पतालय् भागदौड जूगु खः ।

ट्याकंरपाखे अक्सिजन तयेगु झ्वलय् उगु घटना जूगु खः । घटनाया अनुसन्धान न्ह्याकेधुंकूगु अधिकारीपिन्सं धाःगु दु ।

युरोपियन युनियनपाखें म्यानमारया १० सैन्य अधिकारीयात प्रतिबन्ध

चौलाथ्व नवमी ११४१,बैसाख ८ बुधवाः

युरोपियन युनियन (ईयूं) म्यानमारया १० सैनिक अधिकारी व निगग्ु सैन्य पुचःयात प्रतिबन्ध तःगु दु ।

वंगु फेब्रुअरीइ जननिर्वाचित सरकारयात अपदस्थ यानाः सत्ता ल्हातय् काःगु सेनां आम नागरिकया विरोध प्रदर्शन क्वत्यलेत यक्व बल छ्यःगु धासें युनियनं प्रतिबन्धया घोषणा याःगु खः ।

म्यानमारया लोकतन्त्र व कानुनया शासनयात कमजोर यायेत दमनकारी नीति काःगु ईयूं द्वपं ब्यूगु दु । म्यानमारया सेनां फेब्रुअरी २१ निसें मानवअधिकारया गम्भीर उल्लंघन यायेत ३सः व ९ उच्च सैन्य अधिकारीया मूख्य भूमिका दुगु ईयूया दावी दु ।

राष्ट्रसंघ व पश्चिमा देय्तय्सं थ्वयां न्ह्यःनिसें हे म्यानमारय् सेनां ल्ह्वंगु पलाःया विरोध यानावःगु दु । सेनाया पलाःया विरोधय् ताः इलंनिसें सडकय् कुहांवयाच्वंपिं प्रदर्शनकारीतय्त ब्वला सालाः सेनां यातना बीगु याःगु ईयूया ठहर दु । म्यानमारय् न्ह्यानाच्वंगु आन्दोलनया झ्वलय् आःतक्क करिब ८ सः सर्वसधारण सीधुंकूगु अनया सञ्चारमाध्यमतय्सं न्ह्यथंगु दु ।

व झ्वलय् प्यद्वः स्वयां आपाः सर्वसाधारणयात ज्वंगु खः । आःतक्क नं ३द्वः व निसःम्ह हिरासतय् हे दुगु धाःगु दु ।