Display Style:
Column Style
सुरक्षासम्बन्धी न्हूगु कानुन लागू जुइवं बेलायत वनेत आवेदन ब्यूपिं हङकङया नागरिकया ल्या अप्वल
लहनान्यूज | चिल्लागा द्वादशी ११४१, चैत्र २६ गते, विहीबाः
हङकङया द्वलंद्व नागरिकपिन्सं बेलायत वनेत भिसा आवेदन ब्यूगु दु ।
हङकङय् राष्ट्रिय सुरक्षासम्बन्धी न्हूगु कानुन लागू यायेवं शिक्षा, आवास व रोजगारीया नितिं बेलायत वनेत भिसा आवेदन ब्यूपिं हङकङया नागरिकपिनिगु ल्या न्हियान्हिथं अप्वयावंगु दु ।
बेलायतं न्यादँया नितिं आवास भिसा बीगु जुइवं २७द्व मल्याक हङकङया नागरिकपिन्सं आवदेन बिइधुंकूगु बीबीसीं धागु दु ।
चीनं हङकङया वृहत्तर सुधारया नितिं न्हूगु सुरक्षा कानुन पारित यायेवं बेलायतं हङकङया नागरिकपिन्त रोजगारी, आवास व शिक्षाया अधिकारनाप न्यादँया नितिं भिसा बीगु धागु खः ।
पुटिनं २०३६ तक्क सत्ताय् च्वनाच्वनेगु नियमय् ल्हाचिं तल
लहानान्युज | चिल्लागा नवमी ११४१,चैत्र २४ मंगलवाः
रुसया राष्ट्रपति भ्लादिमीर पुटिनं थःगु कार्यकाल ताहाक यायेफइगु कानूनय् ल्हाचिं तयादीगु दु ।
सन् २०२४ य् थःगु कार्यकाल क्वचाइगु जूसा नं थःगु कार्यकाल पुटिनं २०३६ तक्क सत्ताय् च्वनेफइगु कानूनी व्यवस्था यानादीगु खः । न्हूगु कानून जारी जुइधुंका थःगु कार्यकाल क्वचागु ६ दँ तक्क पुटिनं शासन यायेगु लँपू चालिगु जूगु दु ।
राष्ट्रपति पुटिनया कार्यकाल ताहाक यायेत रुसं थगुने हे संविधान संशोधन याःगु खः । न्हूगु कानुनी व्यवस्थालिसें ६८ दँया राष्ट्रपति पुटिनं रुसय् ८३ दँया वैंशतक्क रुसया नेतृत्व यानादी ।
४क्वःखुसिइ राष्ट्रपति जुयादीम्ह पुटिनया थ्व निगूगु कार्यकाल खः । फ्रान्सय् थगुने विपक्षीपिन्सं पेन्सन सुधारया माग तया आन्दोलन तकं याःगु खः ।
तर राष्ट्रपति पुटिनं उगु माग सम्बोधन यायेत कानुन संशोधन जुइधुकुगु धयावयादीगु दु ।
बन्दुकधारीपिनिगु हताःलय् १८म्सःम्ह सिबें अप्वः कैदीबन्दी बिस्यूवंन
चिल्लागा नवमी ११४१,चैत्र २४ मंगलवाः
नाइजेरियाया छगू कारागारं १८सःम्ह सिवें अप्वः कैदीबन्दी बिस्य्ुंवंगु दु । बन्दुकधारीपिन्सं कारागारय् हताः याःगु नापं उपिं कैदीबन्दी बिस्युंवंगु बीबीसीं न्ह्यथंगु दु ।
दक्षिण पश्चिम शहर ओभरीइ दूगु कारागारय् अनधिकृत कथं दुहाँवना उपिं बन्दुकधारीतयेसं न्ह्योनेलाथें हताः याःगु धाःगु दु । विद्रोहीया हताःलिपा नं ३५म्ह कैदीबन्दी धाःसा बिस्युंमवंगु धाःगु दु ।
नाइजेरिया सरकारं प्रतिबन्धीत विद्रोही चरमपन्थीं कारागारय् हताः याःगु दावी याःगु दु । राष्ट्रपति मुहम्मद बुहारीं ल्वाभः दूगु पुचःलं नागरिकय् ग्याचिकु ब्वलंकुगुलिइ निन्दा यानादीगु दु ।
तर विद्रोहीं घटनाया भाला मकाःगु अन्तर्राष्ट्रिय समाचार संस्थातयेसं धाःगु दु । आक्रमणकारीं धाःसा छुं सवारी ज्वलं व भौतिक संरचनाय् तक मिं च्याकुगु दु ।
वंगु जनवरीनिसें नाइजेरियाया थी थी शहरय् दूगु प्रहरी पोष्ट व सवारी ज्वलं लिसें भौतिक संरचनाय् मिं च्याकेगु ज्या जुयावःगु दु । अथेहे तःधंगु ल्याःखय् ल्वाभः लुटपाटया घटनात जुयाच्वंगु दु ।
तर सुनांनं नं उकिया भाला मकाःगु बुखँ न्ह्यथनातःगु दु ।
भारतया महाराष्ट्रय् कर्प्mयु
चिल्लागा नवमी ११४१,चैत्र २३ सोमवाः
भारतय् कोरोना भाइरस संक्रमण तच्वकं न्यंगु नापं कोरोनाया हटस्पट जूगु महाराष्ट्र राज्यय् थौनिसें रात्रिकालिन इलय् कर्फ्यु तयेत्यंगु दु ।
कोरोना नियन्त्रणय् मवःसा वइगु वालंनिसें लागू जुइगु याना पूवंक कथं लकडाउन लागू जुइगु धाःगु दु । भारतय् म्हिगः छन्हूं हे थप जूपिं ९३द्वःम्ह संक्रमितमध्ये बाब्वः सिवें अप्वः महाराष्ट्रय् दूगु धाःगु दु ।
थौंनिसें महाराष्ट्रय् चान्हय् ८ ता ई निसें सुथय् ७ ता ई तक्क कर्फ्यु लागु जुइत्यंगु दु । कफर््युया इलय् अत्यावश्यक सेवा जक सञ्चालनय् दइगु नियम लागू याःगु दु ।
थ्वयान्ह्यः महाराष्ट्र राज्यया मुख्यमन्त्री उद्दव ठाकरें छुं मनूतयेसं सुरक्षाया उपायत नालामकाःगु व मास्क तयेगु त्वःतूगु हुनिं खोप तःसा नं छुं संक्रमित जूगु धासें देशय् याकनं हे लकडाउन घोषणा यायेगु न्ह्यथनादीगु खः ।
इन्डोनेसिया खुसिबाःया हुनिं ५०म्ह सीत
चिल्लागा नवमी ११४१,चैत्र २३ सोमवाः
इन्डोनेसिया व पूर्वी टिमोरय् वःगु खुसिबाःया हुनिं ५०म्ह सीगु दु । मदिक्कया वाःया हुनिं वःगु खुसिबाःलं आपालं भौतिक संरचनाय् क्षति जूगु दु । खुसिबाःया हुनिं टापुइ क्षति जूगु बीबीसीं न्ह्यथंगु दु ।
इन्डोनेसिया व पूर्वी टिमोरय् खुसिबाःलं अप्वः क्षति याःगु दु । इन्डोनेसियाया प्रकोप नियन्त्रण विभागया अधिकारीतय्सं खुसिबाः व चलःया हुनिं सीपिं व प्रभावित जूपिनि ल्याः अझं अप्वयेफइगु अनुमान याःगु दु ् ।
विभागया प्रवक्ता रादित्य जातीं इन्डोनोसियाया ४गू जिल्ला व ७गू गाँमय् खुसिबाःलं अप्वः लिच्वः लाकुगु दु । थी थी क्षेत्रय् तनाच्वंपिन्त मालेगु जुयाच्वंगु अधिकारीतयेसं न्ह्यथंगु दु ।
थुखे टिमोर लेस्टरया अधिकारीतयेसं राजधानी डिल्लीइ नं तनाच्वंपिनि मालेगु जुयाच्वंगु न्ह्यथंगु दु । अन ११म्ह सीगु धाःगु दु । खुसिबाः चलःखय् लाना घाःपाः जूपिनि थी थी अस्पतालय् वासः जुयाच्वंगु अनया अधिकारतयेसं जानकारी बिउगु दु ।
