Display Style:
Column Style
अमेरिकां उत्तर कोरियालिसे वार्ता मयाइगु
चिल्लागा द्धितीया ११४१, चैत्र १७ मंगलवाः
अमेरिकी राष्ट्रपति जो बाइडन उत्तर कोरियाली नेता किम जङ–अनयात नापलायेत इच्छुक मदूगु ह्वाइट हाउसं स्पष्ट याःगु दु ।
उत्तर कोरियाप्रति राष्ट्रपति बाइडनया पहः वयेकया पूर्ववर्ती डोनल्ड ट्रम्पया सिवें पाइगु अमेरिकी अधिकारीतयेत उध्रित यासें बीबीसीं न्ह्यथंगु दु । राष्ट्रपति बाइडनं किमयात नापालायेत मनंमतुंगु खँय् धाःसा ह्वाइट हाउसं उल्लेख याःगु मदुनि ।
छखेरं मेखेरया कडा आलोचक जूसा नं सन् २०१८ य् ट्रम्प व किम दथुइ न्हापांखुसिइ सिंगापुरय् भेटवार्ता जूगु खः । उत्तर कोरियाली नेतायात नापलाम्ह ट्रम्प न्हापाम्ह बहालवाला अमेरिकी राष्ट्रपति जुयादीगु खः ।
उकिया दच्छिलिपा सन् २०१९ य् निम्ह नेता दथुइ कोरियाली क्षेत्रय् नापलाय्ज्या जूगु खः । निवा न्ह्यः बाइडन प्रशासनं वंगु फेब्रुअरी महिना थुखे उत्तर कोरियाली सरकारयात स्वापू तयेगु कुतः याःसा नं प्योङ्याङपाखें छुं नं लिसः मवःगु धाःगु खः ।
निगू देय् दथुइ अप्वःगु तनावयात मत्थर यायेत अमेरिकां उत्तर कोरियायात थी थी माध्यमं पत्राचारया कुतः याःगु खः । उत्तरलिसे स्वापू तयेगु कुतः अन्तर्गत न्यूयोर्क च्यानल धाइगु संयुक्त राष्ट्रसंघय् दूगु उत्तर कोरियाली नियोगयात तकं छ्यपिं अधिकारीपिन्सं धाःगु खः ।
सन् २०१७ य् उत्तर कोरियां अमेरिकी शहरय् कयेके फइगु क्षमताया क्षेप्यास्त्र परीक्षण यायेधुंक निगू देय् दथुया स्वापू झन् स्यंगु खः । कोरोना महामारीया हुनिं आः पिनेया हलिंया स्वापूतिं बिस्कं जूगु उत्तर कोरियाया सीमा नं दच्छि निसें बन्द दु ।
म्यानमारय् ब्वज्या झन तच्वल
चिल्लागा द्धितीया ११४१, चैत्र १७ मंगलवाः
म्यानमारय् ब्वज्याया झ्वलय् थप ३म्ह सीगु दु । म्यानमारया यंगुनय् मुंपिं ब्वज्यायामियात प्रहरीं कयेकुगु गोलीं लाना छम्ह सीगु खः । मेपिं निम्ह यंगुन शहर सिवें छुं दूरीइ दूगु ब्वज्या लागाय् सीगु खः ।
यंगुन शहरय् सीम्ह छम्ह मिजंया छ्यंने गोलीं लाना क्वदयेधुकां ब्वज्या तच्वःगु खः । प्रहरीं धरपकड याना गोलीं कयेका लःया फोहोरा व अश्रुग्यास नं कयेकुबलय् ब्वज्यामि घाःपाः जूगु दु ।
ब्वज्यामिपिन्सं गुलेली कयेकुबलय् छुं प्रहरी नं घाःपाः जूगु दु । थ्वयान्ह्यः म्यानमारय् सेनां याःगु हवाई हताःलिपा द्वलंद्वःम्ह सर्वसाधारण बिस्युंवना थाइल्याण्डया उत्तरपश्चिमी सिमानाय् शरण कायेत थ्यंगु खः ।
म्यानमारया सेनां निन्हू न्ह्यः ३गू हवाई हताः यायेधुंका सर्वसाधारणय् भागदौड जूगु खः । म्यानमारया सेनां धाःसा शहर व नगरय् छेँ नं पिहाँमवयेत मस्त नापं सर्वसाधारणयात बिउगु ख्याच्वःयात वास्ता मयाःगु धका हवाई हताः यानागु दाबी याःगु दु ।
म्यानमारय् वंगु फेब्रुअरीइ सैन्य कू जूगु थुखे ब्वज्यामियात दमन यायेगु झ्वलय् ४ सः सिवें अप्वःया ज्यान वनेधुंकुगु दु ।
मोदी वइगु विरोधय् बंगलादेशय् १२म्ह सीत
चिल्लाथ्व प्रतिपदा, ११४१ चैत्र १६ सोमबाः
भारतीय प्रधानमन्त्री नरेन्द्र मोदीया बंगलादेश भ्रमणया विरोधय् जूगु ब्वज्याय् ज्यान त्वफिकुपिनि ल्या १२ म्ह थ्यंगु दु । ३न्हू निसें न्ह्यानाच्वंगु हिंसाया हुनिं १२म्हसिया ज्यान वंगु बिबिसीं न्ह्यथंगु दु ।
ब्राह्राणबरिया लिसेंया थासय् म्हिगः नं विरोध ब्वज्या जूगु खः । म्हिगःया हड्तालया इलय् जूगु ल्वापुया झ्वलय् घाःपाः जूपिं मनूतय् अस्पतालय् ज्यान वंगु अस्पतालं न्ह्यथंगु दु ।
मोदीं विरोधया बाबजुद बंगलादेशया संस्थापक शेख मुजिबर रहमानया जन्मशताब्दी समारोहस ब्वति काःगु खः । शुक्रबाः वयेकलं बंगलादेशया संस्थापक लिसें आःयाम्ह प्रधानमन्त्री शेख हसिनाया अबु शेख मुजीबुर रहमानया ५० क्वःगु जन्म शताब्दी समारोहस ब्वति काःगु खः ।
मोदीया भ्रमणया पूर्व सूचं वय्वं ढाकास्थित बैतुल मोकर्रम मस्जिदय् हिंसात्मक ब्वज्या जूगु खः । ब्वज्यामियात तिरवितर यायेत प्रहरीं अश्रुग्यास व रबरया गोली तकं कयेकुगु खः ।
शुक्रबाःया प्रार्थनालिपा सलंसः ब्वज्यामिपिं मस्जिदया पिने मुंगु खः । छगू पुचःलं मोदीया अनादरया चिं कथं लाका ल्ह्वनेधुंक मेगु पुचःलं उमित पनेत स्वःगु खः । अनलिं हिंसात्मक ल्वापु जूगु अन्तर्राष्ट्रिय समाचार संस्थां धाःगु दु ।
म्यानमारय् नरसंहान न्ह्यात
चिल्लाथ्व पुन्ही ११३१, चैत्र १५ आइतबाः
म्यानमारय् सैनिक शासनविरुद्धया ब्वज्याय् नरसंहार अझं मद्यूनि । प्रजातन्त्रया पक्षय् सडकय् कुहाँवःपिन्त सेनां गोलीं कयेकाः स्याःगु दु ।
थ्वहेदथुइ सेनां कयेकूगु गोलीं लानाः छन्हुं हे ९०म्ह मल्याक सीगु दु । सुरक्षाकःमिपिनिगु ज्यादतीयात म्यानमारय् विरोध याःबलय् गोलीं कयेकूगु खः । स्थानीय सञ्चार माध्यमं धाःकथं सीपिनिगु ल्या अझं अप्वइ ।
सडकय् थः नागरिकपिन्त स्याये न्ह्यः सत्ता कःघाःम्ह सेना प्रमुख आङ लाइङं शनिवाः राष्ट्रिय टेलिभिजनमार्फत सम्बोधन यानाः ब्वज्या मयायेत ख्याच्वः बियादीगु दु ।
निर्वाचनय् प्रजातन्त्रवादी नेतृ आङ साङ सूचीया दलं दुई तिहाई बहुमत हःगुनाप संसद्या मुँज्या च्वनीगु ईलय् सेनां कु यानाः सत्ता कःघाःगु खः ।
निर्वाचनय् थः समर्थित दलया पत्तासाफ जुइवं सेनां वंगु फेब्रुअरीनिसें शासन यानावःगु दु । सेनां शासन याःगु थुखय् सेनां प्यसः मल्याक प्रजातन्त्र समर्थित मनूतय्त स्याःगु दु ।
भारतय् संक्रमित पिनिगु न्हूगु रेकर्ड
चिल्लाथ्व त्रयादशी ११४१, चैत्र १३ गते शुक्रबाः
भारतय् कोरोना भाइरस संक्रमितया ल्याःखं हाकनं न्हूगु रेकर्ड कायम याःगु दु । लिपांगु २४ घौ दुने भारतय् ५९द्वः व ६९ म्हसिके कोरोना संक्रमण पुष्टि जूगु दु ।
भारतय् छन्हूं हे थुलि आपालंसिके संक्रमण पुष्टि जूगु थुगु दँया हे आपालं जूगु भारतीय संचारमाध्यमतयेसं न्ह्यथंगु दु । भारतय् कोरोनाया हुनिं सीपिनि ल्याः १ गू लख ६० द्वः ९सः व ८३ म्ह थ्यंगु दु ।
लिपांगु २४ घौ दुने अन थप २सः व ५७ म्ह सीगु न्ह्यथंगु दु । थ्व नापं भारतय् संक्रमितया ल्याः छगू क्वःति १८गू लख ४६ द्वः व ८२म्ह थ्यंगु दु । भारतय् सक्रिय संक्रमितया ल्याः ४गू लख २२द्वः ५सः व ९६ म्ह दूगु धाःगु दु ।
थ्वहे दथुइ भारतं कोरोना खोप निर्यातय् छुं नं बन्देज मतयागु धाःगु दु । साझेदारी देय्यात चरणबद्ध कथं खोप सप्लाई यायेगु भारतं न्ह्यथंगु दु ।
छुं अन्तर्राष्ट्रिय सञ्चारमाध्यमं भारतं अस्थायी रुपंय् खोप निर्यात बन्द याःगु बुखँ प्रकाशित यायेधुंक भारतं उकिया खण्डन याःगु खः ।
