Display Style:
Column Style
म्यानमारय् न्ह्यानाच्वंगु ब्वज्याय् थप ३८म्ह ब्वज्यामि सीत
चौलाथ्व द्धितीया ११४१, चैत्र २ गते सोमबाः
म्यानमारय् न्ह्यानाच्वंगु हिंसाय् थप ३८ म्ह ब्वज्यामि सीगु दु । प्रजातन्त्रवादी नेतृ आङ साङ सूचीया दल नेशनल लिग फर डेमोक्रेसी (एलएडी) नेतृत्वय् दूगु दलया जननिर्वाचित सरकार अपदस्त याना सेनां सत्ता कायेधुंका लिपांगु लच्छि निसें न्ह्यानाच्वंगु हिंसाय् प्रहरीया दमनय् ३८म्ह सीगु खः ।
सरकार विरोधी ब्वज्या अप्वयावनेधुंका मू शहरय् सुरक्षा व्यवस्था अप्वयेकुगु दु । आन्दोलनकारीं औद्योगिक क्षेत्रय् दूगु चिनियाँ स्वामित्वय् दूगु छगू कापः कारखानाय् हताः याःबलय् चिनियाँ नागरिकपिं नं घाःपाः जूगु दु ।
उगु क्षेत्रय् जक १०म्ह ब्वज्यामि सीगु खः । थी थी ल्वाभः नापं ब्वज्यामिं उगु क्षेत्रय् हताः याःगु धका चीनं थःगु नागरिकया सुरक्षा यायेत म्यानमार सरकारया ध्यानाकर्षण तकं याःगु दु । उगु कारखानाय् हताः जुइधुंका सुरक्षाकर्मीं दमन न्ह्याकुगु अन्तर्राष्ट्रिय समाचार संस्थातयेसं दावी याःगु दु ।
म्यानमारया मू सहर याङगुनय् सुरक्षाकर्मीया दमनया हुनिं आपालं ब्वज्यामि घाःपाः जूगु बीबीसीं न्ह्यथंगु दु । अधिकारीतयेसं सुरक्षाकर्मीया दमनया हुनिं घाःपाः जूपिनि ल्याः अप्वयाच्वंगुलिं सीपिनि ल्याः थप जुइ फइगु आशंका प्वंकुगु दु । थुखे सरकारी अधिकारीतयेसं नं ब्वज्याया झ्वलय् थःपिनि पाखे नं क्षति जूगु दाबी याःगु दु ।
उगु ब्वज्याय् छम्ह प्रहरी अधिकृत नं सीगु धाःगु दु । आःतक्क सच्छि व २०म्ह मल्याक्क ब्वज्यामि सिइधुंकुगु धाःगु दु । विरोध ब्वज्या न्ह्यानाच्वंगुलिं सरकारं थ्यंमथ्यं १५सः सिवें आपाःसित ज्वना हिरासतय् तःगु धाःगु दु । वंगु फेब्रुअरी १ निसें सूची लिसेंया मू नेतातयेत सेनाया हिरासत व नजबन्दय् तःगु दु ।
एस्ट्राजेनेका खोपया बुखँया खण्डन
चौलाथ्व द्धितीया ११४१, चैत्र २ गते सोमबाः
कोरोनाविरुद्धया खोप निर्माता कम्पनी एस्ट्राजेनेकां खोपया खँय् वःगु बुखँया खण्डन याःगु दु । थःपिन्सं निर्माण यानागु कोरोनाया खोप तःपिं मनूखया हि कुनिगु समस्या वःगु धइगु बुखँया उगु कम्पनीं खण्डन याःगु खः ।
थःपिन्सं निर्मांण यानागु खोप बेलायतलिसें हलिंयंक छ्यलेज्या जुइधुंकुगुलिं खोप तःपिं मनूयात गम्भीर समस्या मवःगु कम्पनीया दावी दु । छुं राष्ट्रं उगु खोप कायेधुंका आपालं मनूखय् स्वास्थ्य समस्या वःगु धासें प्रतिवन्ध तःगु नापं एस्ट्राजेनेकां उगु धापूया खण्डन याःगु खः ।
एस्ट्राजेनेकां हलिंया आपालं देशय् थःपिन्सं निर्माण यानाःगु खोप छ्यलेज्या जुयाच्वंगुलिं हिइ खनेदूगु धइगु खोखिमया छुं नं स्यल्लागु दसि मलूगु दावी तकं याःगु दु ।
उगु कम्पनीया खोप कायेधुंका थी थी समस्या वःगु धका आयरल्याण्ड, डेनमार्क, नर्वे, आइसल्याण्ड व नेदरल्याण्ड लिसेंया देशं थप समस्या वयेक मबिइगु धका एस्ट्राजेनेकाया उत्पादन छ्यलेगुलिइ रोक तःगु दु ।
थुखे युरोपेली मेडिसिन एजेन्सीं खोप तयेधुंका स्वास्थ्यय् उगु समस्या वःगु धइगु स्यल्लागु दसि मलूगु दावी याःगु दु । अयेसां कम्पनीं थप परीक्षण व अध्ययन धाःसा न्ह्याकातयेगु न्ह्यथंगु दु ।
अक्सफोर्ड विश्वविद्यालयया ग्वहालिइ विकास याःगु एस्ट्राजेनेका खोप युरोपियन युनियन व मेगु आपालं देशय् छ्यगु खः । तर अमेरिकां धाःसा अझं थुगु कम्पनीया खोपयात छ्यगु मदुनि ।
श्रीलंकाय् नं बुर्काय् प्रतिबन्ध
चिल्लाथ्व पारु, ११४१ चैत १, आइतबाः
स्विट्जरल्याण्डलिपा श्रीलंकां नं बुर्काय् प्रतिबन्ध तयेगु निर्णय याःगु दु । अथेहे देय्या द्वःछिसिबें अप्वः इस्लामिक ब्वनेकुथि नं बन्द यायेगु तयारी याःगु दु ।
सार्वजनिक सुरक्षा मन्त्री शरत वीरशेखरां शनिबार छगू पत्रकार सम्मेलन याना राष्ट्रिय सुरक्षा हुनिं बुर्का पुइत प्रतिबन्ध तयागु धयादिल । उगु प्रस्ताव अनुमोदनया नितिं मन्त्रिपरिषद् बैठकय् तकं छ्वयागु धयादिल ।
मन्त्री वीरशेखराया कथं न्हापां मुस्लिम मिसापिं व मस्तय्सं बुर्का मपूगु व थ्व धार्मिक अतिवादया प्रतिक छुं न्ह्यःजक चलनय् वःगु वय्कलं धयादिल ।
श्रीलंकाय् सन् २०१९ या इस्टरय् श्रीलंकाय् जूगु आतंकवादी हताः जुबलय् बुर्काय् अस्थायी प्रतिबन्ध तःगु खः । आः धाःसा पूवंक हे प्रतिबन्ध तइगु जूगु दु ।
श्रीलंकाय् थ्यंमथ्यं ९ प्रतिशत मनुत मुस्लिम धर्मावलम्बी त दु धाःसा जनसंख्याया ७० प्रतिशत बुद्ध धर्मालम्वी दु ।
काजकिस्तानय् सैनिक विमान दुर्घटना, प्यम्ह सीत, निम्हसिया उद्दार
चिल्लाथ्व पारु, ११४१ चैत १, आइतबाः
काजकिस्तानय् सैनिक विमान दुर्घटनाग्रस्त जूबलय् ४म्ह सीगु दिु ।
काजकिस्तानया राजधानी नुर सुल्तानं ब्वःगु एन–२६ सैन्य विमान अलमाटी विमानस्थलय् अवतरण यायेगु झ्वलय् दुर्घटनाग्रस्त जूगु खः ।
६म्ह सवार विमानय् निम्ह तच्वकं घाःपाः जूगु दु । अवतरणया झ्वलय् विमानय् मिं च्यागु खः । मिं च्यागुया हुनिं विमान छ्वया ध्वस्त जूगु दु ।
मिं च्यागु नियन्त्रण कायेगु झ्वलय् निम्ह यात्रुयात छुं म्वायेकं उद्दार याःगु खः ।
रुसय् विपक्षी दलया २सः सिवें अप्वः नेता ज्यासनामि ज्वन
चिल्लाथ्व पारु, ११४१ चैत १, आइतबाः
रुसय् विपक्षी दलया नेतातयेसं ग्वसाःग्वःगु सम्मेलनय् दुथ्यापिं २ सः सिवें अप्वः नेतापिं ज्वंगु दु ।
रुसया मस्कोस्थित छगू होटलय् ग्वसाःग्वःगु सम्मेलनया हे झ्वलय् प्रहरीं धरपकड याना उमित नियन्त्रणय् काःगु खः ।
कोरोना महामारीया दथुइ मुना याःगु धासें ज्वंगु न्ह्यथंसा नं नियतबस ज्वंगु विपक्षी नेतातये द्वपं दु । रुसया राष्ट्रपति भ्लादिमीर पुटिनया आलोचक अलेक्सी नाभाल्नीयात ज्वंगु प्रकरणलिपा रुसया विपक्षी नेतातयेसं मस्को सम्मेलनया ग्वसाःग्वयावःगु दु ।
रुसया स्वतन्त्रताया नितिं ग्वसाःग्वःगु सम्मेलनय् दुथ्यापिं नेतातयेसं राष्ट्रपति पुटिनया तच्वकं कुँख्यंगु नापं चुनावी धेंधेंबल्लाय् वयेत चकंकं हा हाथ्याः तकं बिउगु दु् । रुसय् विपक्षी दलया नेतातयेत रुस विरोधी तत्वया छुमां बियावःगु दु । ज्वंपिनि अनुसन्धान न्ह्यागु दु । थुखे विपक्षी दलं धाःसा रुसी राष्ट्रपतिया ज्यादती बन्द यायेत व स्वतन्त्रता हनन् मयायेत ख्याच्वः बियावःगु दु ।
