Display Style:
Column Style
भारतया ७२क्वःगु गणतन्त्र दिवस
पोहेलाथ्व त्रयोदशी ११४१, माघ १३ मंगलवाः
भारतं थौं ७२क्वःगु गणतन्त्र दिवस हनाच्वंगु दु । थ्व हे झ्वलय् राजधानी न्हू दिल्लीया राजपथय् विशेष परेडया ग्वसाः ग्वयेत्यंगु दु ।
न्हापा भव्य परेड यानावःगुलिइ थुगुसी कोरोना महामारीया हुनिं ज्याझ्वःया आकार क्वकाःगु दु । थ्वयां न्ह्यः गणतन्त्र दिवसय् छुं देय्या राष्ट्रप्रमुखयात मू पाहांया रुपं ब्वनेगु याःगुलिइ थुगुसी सुइतं नं सःतूगु मदु ।
गणतन्त्र दिवसका झ्वलय् बिइगु पद्म विभूषणं थौं जापानया पूलाम्ह प्रधानमन्त्री सिञ्जो आवेयात हनेगू जूगु दु ।
ज्याझ्वःस न्हापांखुसी भारतीय सेनां छुं ला न्ह्यः फ्रान्सं हःगु राफेल लडाकू विमानलिसें टी–९० ट्याङ्क, समविजय इलेक्ट्रोनिक युद्धक प्रणाली, सुखोई–३० एमके आई लडाकु विमानया प्रदर्शन याइगु जूगु दु ।
परेडय् थुगुसी २५द्वःम्ह मनूतय्सं जक ब्वति कायेदइ सा १५ दं क्वय्या दँ पुचःयापिं व ज्याथः नागरिकपिन्त दुहां वयेके बी मखु । गणतन्त्र दिवसया लागिं भारतन्यंक सुरक्षा व्यवस्था क्वात्तुकूगु दु ।
छुं दिं न्ह्यः जक हे भारतया थीथी शहरय् आतंकवादी हमला जुइफुगु गोप्य सुचंया लिधंसाय् सुरक्षाकःमिं छुंयात नियन्त्रणय् काःगु खः ।
संभावित घटना पनेत हरेक प्रदेशया राजधानीइ विशेष सतर्कता नालाकाःगु दु । थ्व हे दथुइ, दिवसया हे झ्वलय् ग्वसाः ग्वइगु परेड धुनाकथं किसानतय्सं विवादास्पद स्वंगू कृषि कानुनया विरोधय् ट्याक्टर ¥याली याइगु जूगु दु ।
अफ्रिकी देय् मालीइ विद्रोहीया हताःस ६म्ह सैनिक सीत
पोेहलाथ्व द्वादशी ११४१, माघ १२ सोमबाः
पश्चिमी अफ्रिकी देय् मालीइ विद्रोहीया हताःस ६ म्ह सैनिक सीगु दु । बुर्किना फासोया सीमा लिक्कसं जूगु हताःलय् मेपिं छुं घाःपाः जूगु बुखँय् न्ह्यथनातःगु दु ।
तर सरकारी सेनां धाःसा विद्रोहीतय्पाखे ३०म्ह सीगु दावी याःगु दु । विद्रोहीविरुद्धया कारवाहीस इमिगुपाखें तःधंगु ल्याःखय् बन्दोबस्तीया ज्वलं तकं नियन्त्रणय् वःगु सेनाया दावी दु ।
सन् २०१२ निसें मालीइ राजनीतिक अस्थिरता न्ह्यागु नापं विद्रोहीतय्सं हिंसात्मक ज्यापहः यायेगु न्ह्याकुगु दु ।
थी थी जातीय पुचःतयेसं सशस्त्र ज्यापहः सञ्चालन याःगु नापं मालिया थी थी क्षेत्र विद्रोहीया नियन्त्रणय् दूगु अन्तर्राष्ट्रिय समाचार संस्थातयेसं न्ह्यथंगु दु ।
सन् २०१९ सेप्टेम्बरय् नं उगु हे विद्रोही पुचःया हताःस लाना ५०म्ह सरकारी सेनाया सीगु खः । इस्लाम व मुस्मां समुदायया बसोबास दूगु उगु क्षेत्रय् जातीय हिंसाया हुनिं देशं थी थी समस्या फयावःगु दु ।
बेलायतय् कोरोना वःगु २४ घण्टाया दुने १३४८म्ह सीत
लहनान्युज | पोहेलाथ्व द्धादशी ११४१, माघ १२ सोमवाः
बेलायतय् कोरोना संक्रमणया कारण वःगु २४ घण्टाया दुने १३४८ म्ह मनू सी धुकुगु दु ।
विश्व स्वास्थ्य संगठनया कथं बेलायतय् आःतक कोरोनाया कारण सीपिनिगु ल्याः ९७ हजार ३२९ म्ह थ्यःगु दु।
बेलायतय् कोरोना संक्रमितपिनिगु ल्याः ३६ लाख १७ हजार ४६३ म्ह थ्यःगु दु।
वःगु २४ घण्टाया दुने ३३ हजार ५५२ म्ह संक्रमित थपे जूगु दु ।
भारतया उत्तराखण्डय् छन्हुया लागि १९ दँ दुम्ह मुख्यमन्त्री
शोभा श्रेष्ठ | पोहेलाथ्व द्धादशी ११४१, माघ १२ सोमवाः
भारतया उत्तराखण्डय् छम्ह १९ दँ दुम्हेसित छन्हुया लागि मुख्यमन्त्री दयकूगु दु। हरिद्वार जिल्ला दौलतपुर गांया सृष्टियात कार्यकारी अधिकार सहित छन्हुया लागि मुख्यमन्त्री दयकूगु खः।
वयागु उपस्थितिइ विधानसभा बैठक च्वनेत्यःगु खः। विधानसभाया कोठा नम्बर १२० य् बैठक च्वंनिइ भारतीय सञ्चारमाध्यमं धाःगु दु। सृष्टियात मुख्यमन्त्री दयेका बैठक आयोजना यायेगु स्वीकृति व निर्देशन उत्तराखण्डका मुख्यमन्त्री त्रिवेन्द्र सिंह रावत बिःगु खः।
उत्तराखण्ड बाल संरक्षण आयोगया अध्यक्ष उषा नेगीं २४ जनवरीइ राष्ट्रिय बालिका दिवसया लसताय् सृष्टियात उत्तराखण्डय् छन्हुया लागि मुख्यमन्त्री दयेकूगु खः। बुधवाः मुख्य सचिव ओमप्रकाशयात छगु पौं छ्र्वया २४ जनवरीया छन्हुया लागि मचातयेत लुमकेगु कथें सशक्तिकरणया लागि छम्ह प्रतिभाशाली छात्रायात मुख्यमन्त्रीया जिम्मेवारी बिइगु धका नेगीं धाःगु खः।
थुगु छन्हुया कार्यकालय् सृष्टि न विकास कार्यक्रमया समीक्षा याइ । उकिया लागि छाने याःपि विभागया अधिकारीं ५(५ मिनेटया इलय् थःथःथु रिपोर्ट पेस याइ। विधानसभाय् १२ बजे निसे ३ बजे तक न्ह्याइ। उत्तराखण्डया मुख्यमन्त्री त्रिवेन्द्र सिंह रावत न थुगु ज्याझ्वलय् सहभागी जुइ।
नाभाल्नीयात ज्वंगुया विरोधय् द्वलंद्वः समर्थक कुहाँवल
पोहेलाथ्व एकादशी ११४१, माघ ११ आइतवाः
रसियाया विपक्षी नेता एलेक्सी नाभाल्नीयात ज्वंगुया विरोधय् दुथ्यापिं द्वलंद्वःम्ह समर्थकयात प्रहरीं नियन्त्रणय् काःगु दु ।
रसियाया थी थी शहरय् जूगु ब्वज्याय् कुहाँवःपिं थ्यंमथ्यं ३ द्वःम्ह ब्वज्यामियात प्रहरींं नियन्त्रणय् काःगु खः । राजधानी मस्कोय् प्रहरीं ब्वज्यामियात दाया लुतुलुया नियन्त्रणय् काःगु खः ।
राष्ट्रपति भ्लादिमिर पुटिनया विरोधय् जूगु थ्व आःतक्कया हे तःधंगु ब्वज्या जूगु न्ह्यथंगु दु । ब्वज्या न्ह्यः प्रहरीं मनूतयेत छेँ दुने हे च्वनेत ख्याच्वः बिउगु खःसा नाभाल्नीया लिक्कसंया ग्वहालिमिपिन्त ब्वज्या न्ह्यः हे ज्वंगु खः ।
वंगु आइतबाः वासः यायेज्या लिपा जर्मनीं स्वदेश लिहाँवःम्ह नाभाल्नीयात विमानस्थलय् ज्वनेधुंका समर्थकपिन्सं सामाजिक सञ्जालपाखे. ब्वज्याया आह्वान याःगु खः । नाभाल्नीयात राष्ट्रपति पुटिनया कट्टर कडा आलोचक नालेगु याः । सन् २०१८ या राष्ट्रपतीय निर्वाचनय् वयेक उम्मेदवार जुइत स्वःगु खः । तर आर्थिक हिनामिनाया द्वपनय् उम्मेदवार जुइके मबिउगु खः ।
वंगु अगस्टय् ४४ दँया नभाल्नीयात स्नायु विष बिउगु खः । ताः ईया वासः यायेज्या लिपा मस्को लिहाँवःम्ह नाभाल्नीयात विमानस्थलया पासपोर्ट नियन्त्रण कक्षपाखें प्रहरीं नियन्त्रणय् काःगु खः ।
