Display Style:
Column Style
उत्तर कोरियां यात क्षेप्यास्त्र परीक्षण
चिल्लाथ्व दशमी, ११४१, चैत्र ११ बुधबाः
उत्तर कोरियां सतीगु दूरीया क्षेप्यास्त्र परीक्षण याःगु दु । उत्तर कोरियां नेता किम जोङ उन व वय्कःया केहेँनं दक्षिण कोरियाया तकं ब्वतिइ मंकाः सैन्य अभ्यास याःगुप्रति अमेरिकायात कुंखिनाकथं उगु क्षेप्यास्त्र परीक्षण जूगु सीएनएनं धाःगु दु ।
उत्तर कोरियां याःगु क्षेप्यास्त परीक्षणया अमेरिकी अधिकारीतय्सं पुष्टि याःगु खः । राष्ट्रपति जो बाइडेनं सत्ता कःघायेधुंकाः उत्तर कोरियां क्षेप्यास्त्र परीक्षण याःगु थ्व न्हापांगु खुसी खः ।
राष्ट्रपति बाइडेनं उत्तर कोरियालिसे स्वापू भिंकेत वार्ता यायेगु धयाच्वंबलय् हाकनं क्षेप्यास्त्र परीक्षण जूगु खः । अमेरिकी विदेशसचिव एन्टोनी ब्लाइन्केनं वंगु वालय् उत्तर कोरियायात थःगु आणविक ज्याझ्वः स्थगन यायेत दवाव बीत चीनलिसे सहलह याःगु समाचार सार्वजनिक जूगु खः ।
तर चिनियाँ अधिकारीतय्सं उत्तरया क्षेप्यास्त्र परीक्षण क्वकायेत आणविक ज्याझ्वः कथं हे संयुक्त राष्ट्रसंघय् प्रस्ताव पेश मजूगु धाःगु दु । न्हापाया दँय् अमेरिकी राष्ट्रपति डोनाल्ड ट्रम्पलिसे नेता किमं स्वक्वः वार्ता याःसां सम्बन्ध भिनेमफूगु खः । व धुंकाः अमेरिकालिसे लिपांगु दच्छि उत्तर कोरियाया छुं हे संवाद मजूगु धाःगु दु ।
निगुलिं देय्या अधिकारीत लिपांगु खुसी सन् २०१९ या अक्टोबरय् स्वीडेनय् नापलाःगु खः । थुखे बाइडेन प्रशासनं किमलिसेया वार्ताय् दुथ्याःपिं अधिकारीतलिसे नं सहलह यानाच्वनागु धाःगु दु ।
अमेरिकाया कोलोराडोय् बन्दुकधारीं यःयःथे गोलीं कय्का ११म्ह सीत
चिल्लाथ्व दशमी ११४१, चैत्र १० मंगलबाः
अमेरिकाया कोलोराडो राज्यय् छम्ह बन्दुकधारीं गोलीं कयेका छम्ह प्रहरीलिसें १०म्ह सर्वसाधारया ज्यान वंगु दु । कोलोरोडोया बोल्डर काउन्टीया छगु ग्रोसरी पसलय् बन्दुकधारीं यःयःथें गोलीं कयेकूगु खः ।
घटना लिपा बन्दुकधारीयात प्रहरीं जवाफी कारबाही याना घाइते याना कजय् काःगु खः । थ्वहे दथुई अमेरिकी राष्ट्रपति जो बाइडेनं घटनाप्रति दुःख ब्यक्त यासें अमेरिकाय् सर्वसाधारणं बन्दुक तयेगु कानुनी व्यवस्था दूगु हुनिं थज्यागु घटना जुइगु जुगुलिं थुकिया बारे वाः चायेकामाःगु प्रतिक्रिया बियादिल ।
घटना जुगु थासय् सुरक्षा ब्यबस्था तच्वयेकूगु दु । घटनाया अनुसन्धान नं न्ह्याकूगु दु ।
यमनय् खुदँ निसें न्ह्यानाच्वंगु युद्ध अन्त्यया नितिं साउदींपाखें शान्तिया प्रस्ताव, नाकाबन्दी चिइकेमाःगु विद्रोहीया शर्त
चिल्लाथ्व दशमी ११४१, चैत्र १० मंगलबाः
साउदी अरेबियांं युद्धविरामया नितिं यमनलिसे इनाप याःगु दु । थ्यंमथ्यं ६दँ निसें न्ह्यानाच्वंगु यमनया युद्ध अन्त्यया नितिं साउदी अरेबियां न्हूगु शान्ति योजना प्रस्ताव न्ह्यब्वगु खः ।
साउदीं थःपिं समर्थक यमनया सरकार व इरानया समर्थन दूगु हुथी विद्रोही दथुइ संयुक्त राष्ट्रसंघं सुपरीवेक्षण याइगु याना युद्धविराम यायेत प्रस्ताव याःगु दु । थुगु प्रस्तावय् राजनीतिक वार्ता न्ह्याकेत व महत्वपूर्ण हवाई लिसें जलमार्ग हाकनं चायेकेगु विषय नं कःघाःगु बीबीसीं न्ह्यथंगु दु । यमन सरकार व संयुक्त राष्ट्रसंघं साउदीया युद्धविरामया योजनाया लसकुस याःगु दु ।
तर हुथी विद्रोहीतयेसं धाःसा युद्धविरामया प्रस्तावय् न्हूगु खँ मजूगु प्रतिक्रिया बिउगु दु । हवाई व जलमार्गय् तःगु नाकाबन्दी चिइकेमाःगु उमिगु बः दु । हुथीया मू वार्ताकार मोहम्मद अब्दुसलामलं थःपिन्सं साउदी, अमेरिका व मध्यस्थकर्ता ओमानलिसे शान्ति सम्झौतया नितिं मदिक्क खँ ल्हायेु धाःगु रोयटर्सं उल्लेख याःगु दु ।
साउदी अधिकारीपिन्सं थःगु पलाःया खँय् संयुक्त राष्ट्रसंघ व अमेरिकालिसे समन्वय यानाच्वंगु धाःगु दु । थ्वयान्ह्यः वंगु फेब्रुवरीइ अमेरिकी राष्ट्रपति जो बाइडनं यमनय् जुयाच्वंगु आक्रामक कारबाहीस अमेरिकां यानावःगु समर्थन लितकायेगु ख्याच्वः बियादीगु खः । ६दँ सिव्ें ताहाकःगु ई निसें न्ह्यानाच्वंगु युद्धय् यमनय् छगू लख १० द्वः सिवें अप्वः मनू सीइधुंकुगु दु ।
मदिक्कया युद्धया हुनिं यमनया ८०गू प्रतिशत सिव्े अप्वः सर्वसाधारणयात मानविय ग्वहालि मजिमगाः दूगु संयुक्त राष्ट्रसंघं न्ह्यथंगु दु ।
अफगानिस्तानय् दुपिं अमेरिकी सेना लित सःतेत अमेरिका सकारात्मक
चिल्लाथ्व नवमी ११४१, चैत्र ९ सोमबाः
अमेरिकी रक्षासचिव लोयड अस्टिन अफगानिस्तानया आकस्मिक भ्रमणय् झाःगु दु । राजधानी काबुलय् राष्ट्रपति असरफ घानी नापलानाः विदेश सचिव लोयडं अफगानिस्तान भ्रमण यानाच्वनादीगु खः ।
वय्कलं अफगानिस्तानय् न्ह्यानाच्वंगु द्वन्द्व क्वचाकेत कुतः याइगु धयातःगु दु । नापलाय्ज्याय् अमेरिकी सेना लित सःतेगु सरकारया थ्वसिवे न्ह्यःया निर्णय पालना याकेगु विषयलय् खँ जूगु धागु दु ।
अफगानिस्तानय् न्ह्यानाच्वंगु द्वन्द्व व हिंसात्मक ज्यापहः क्वचायेकेत वय्क सकारात्मक जुयादीगु दु । हिंसा क्वचायेकेगु लिपांगु उपाय कथं शान्तिवार्ता जूगु न धागु दु । अमेरिकी रक्षासचिव अस्टिनं तालीवानी बिद्रोहीनाप न्ह्यानाच्वंगु वार्तायात निरन्तरता बीत राष्ट्रपति घानीयात छ््याता तकं बियादिल ।
सन् २०२० या फेब्रुअरीइ ल्हाःचिं तःगु सम्झौताय् तालिबानीपिन्सं थःपिनिगु प्रतिवद्धता पूवंकूसा १४लादुने अमेरिकां थः सेना लितसःतेगु धागु खः । तालिबानीपिन्सं पूवंकेमाःगु बचनय् इमिगु नियन्त्रण क्षेत्रय् अल कायदा वा मेमेपिं लडाकुपिन्त कारबाही मयाकेगु उल्लेख याःगु खः ।
ऐतिहासिक सम्झौतालिपा तालिबानीपिन्सं अन्तर्राष्ट्रिय फौजय् आक्रमण दिकूगु खःसां अफगान सरकारनापया संघर्ष मदीकूनि । अफगान सरकारनाप वार्ता न्ह्याकेगु सर्तय् तालिबानीपिन्सं थः द्वलंद्व मनूतय्त त्वःतेत माग याःगु खः ।
अनलिं सन् २०२० या सेप्टेम्बरय् दोहाय् वार्ता न्ह्याःगु खःसां अझं उकिइ ठोस निष्कर्ष पिहाँमवःनि ।
अस्ट्रलियाय् मदिक्क वाः वया जनजीवन लिच्वलय्
चिल्लाथ्व नवमी, ११४१, चैत्र ८ आइतबाः
अस्ट्रेलियाय् खुसीवाः वया अनया जनजीवन लिच्वःलय् लाःगु दु । अस्ट्रेलिया सरकारं ‘प्राकृतिक विपत’ तकं घोषणा याःगु दु ।
सिड्नीलिसें थासय् तसकं वाः वया खुसिवहाः वया न्यू साउथ वेल्स राज्यया छुं लागाय् प्राकृतिक विपत घोषणा याःगु खः । विपतया लिच्वःलय् लाःपिं जनता पिनिगु उद्धार व राहतया नितिं केन्द्र व राज्य सरकारया दक्व आपतकालीन निकाय त परिचालन याःगु दु ।
छुं दिंनिसें मदिक्क वःगु वाः या हुनिं सिड्नी शहर जलमग्न जूगु दु । प्रभावित क्षेत्रया बासिन्दापिन्त छेँय् पिहाँमवेत व आपतकालीन सेवाया सूचनय् ध्यान बिइत इनाप याःगु दु ।
तसकं वःगु वाःलं राजमार्ग व सतक बन्द जूगु दु । न्यू साउथ वेल्सय् अझं छुं दिं तसकं वाः वइगु मौसमविदपिन्सं न्ह्यथंगु दु ।
