Display Style:
Column Style
चीनय् कोरोना भाइरसं ५१म्ह सङ्क्रमित
लहनान्युज | तछलाथ्व चौथी ११४०,जेठ १३ मंगलवाः
चीनय् म्हिगः सोमवाः बहनि तक हाकनं थप ५१ म्हेसित कोरोना भाइरसया सङ्क्रमण पुष्टि जुगु दु ।
सङ्क्रमित जुपि मध्ये अधिकांश कोरोना भाइरस पिहा वःगु थाय् वुहानपि हे जुगु दु । उगु थासय् वःगु झींन्हुया दुने ६० लाख मनू तयेतःगु स्वास्थ्य परीक्षण याःगु दु ।
सरकारी स्वास्थ्य अधिकारीपिन्स सोमवाः बिःगु जानकारी कथं आः थपे जुपि ११ म्ह सङ्क्रमितपिनिगु विवरण आइतवाः हे बिःगु खः । उपि ११ म्ह मध्ये झीम्ह मङ्गोलिया स्वशासित थासय् व छम्ह सिचुवान प्रान्तयापि जुगु चिनियाँ राष्ट्रिय स्वास्थ्य आयोगं धाःगु खः ।
कोरोनापाखे सङ्क्रमित जुपि तर शंकास्पद अवस्थायापि ४० म्ह मध्ये ३८ म्ह वुहानय् च्वपि खः । चीनय् आतक ३९६ म्ह थज्याःगु हे प्रकारया ल्वगि तयेस वासः याका च्वःगु दु धका जानकारी बिःगु खः । उकि मध्ये ३२६ म्ह वुहानयापि खः ।
वुहानय् थ्व स्वया न्ह्यः जनवरी व मार्चय् जक ५० द्धः स्वया अप्वोसित सङ्क्रमित जुगु खः ।
कोरोना भाइरसया हलियकं ३ लाख स्वया अप्वोसिगु ज्यान वन
लहनान्युज | तछलाथ्व चौथी ११४०,जेठ १३ मंगलवाः
विश्व स्वास्थ्य संगठन डब्लूएचओं औलो ल्वय् यायेत छ्यलिगु वासः कोरोना सङ्क्रमण पिन्त छ्यलिगुलि रोके याःगु दु ।
संगठनं सुरक्षाया कारण क्यसे कोरोना भाइरस विरुद्धया सम्भावित परीक्षणया लागि छ्याला च्वंगु औलो ल्वय् विरुद्धया वासः हाइड्रो साइक्लोरोक्विन प्रयोगय् अस्थायी रुपं रोके यायेगु लगे यायेगु निर्णय याःगु दु ।
थी थी देशय् थुगु वासः परीक्षण जुयाच्वंगुलि सावधानी अपने याना च्वंगुलि अस्थायी रुपं परीक्षण रोके यायेगु निर्णय याःगु दु । छगु अध्ययनं औलो विरुद्धया वासः कोरोना सङ्क्रमितपिन्त प्रयोग याइ इलय् ज्यान तक वनेगु जोखिम अप्वो वःगुलि संगठनं उगु निर्णय याःगु खः ।
अमेरिकी राष्ट्रपति डोनाल्ड ट्रम्पं कोरोना भाइरसपाखे बचे जुइत उगु वासः छ्यला च्वंगु दु धका धाःगु खः ।
अथेहे, हलियकं साढे २३ लाख स्वया अप्वो मनूत कोरोना सङ्क्रमित उपचार लिपा छेँय् वने धुकुगु दु । ५५ लाख ८२ द्धः स्वया अप्वोसित कोरोना पुष्टि जुगु दु । ३ लाख ४७ द्धः स्वया अप्वोसिया ज्यान ज्यान वःगु दु ।
डा शाक्यं इजरायली सरकारपाखे उत्कृष्ट राजदूतया सम्मान
नृपेन्द्रलाल श्रेष्ठ | तछलाथ्व द्धितीया ११४०,जेठ ११ आइतवाः
इजरायलया लागि नेपाली राजदूत डा. अञ्जान शाक्य ‘द एम्बेसडर क्लब अफ इजरायल’ पाखे सम्मानित जुयादिगु दु । ‘द एम्बेसडर क्लब अफ इजरायल’ पाखे इजरायलया ७२ क्वःगु स्वतन्त्रता दिवसया लसताय् जुगु ज्याझ्पलय् डाक्टर शाक्ययात ‘एम्बेसडर अफ द इयर २०१९–२०२०’ सम्मानया घोषणा याःगु खः ।
९० गु देशया दुतावास दुगु इजरायलय् राजदूत डाक्टर शाक्ययात उगु सम्मानपाखे सम्मानित जुयादिगु खः । उगु सम्मानया लागि ९० गु देशया राजदूतपिन्स वयकःया पक्षय् मत तयादिगु खः ।
उगु सम्मानपाखे सम्मानित जुयादिम्ह एसियाली देशयाम्ह हे न्हापाम्ह राजदूत जुयादिगु दु । आतक यूरोप व अमेरिकी देशपिन्स जक उगु सम्मान कया वयाच्वंगु खः । उगु सम्मान घोषणा जुइ धुका राजदूत शाक्यं ‘थ्व सम्मानयात नेपाल व नेपाली प्रतिया सम्मानया रुपमा कयादिगु दु, ‘थुग सम्मानं नेपाल व नेपाली याःगु छ्य धःस्वागु दु धका न धयादिगु दु ।’
राजदूत शाक्यं थःत थुुगु सम्मानपाखे सम्मानित जुइत ग्वाहालि यानादिपि ९० गु देशया राजदूत, इजरायली सरकार, इजरायली जनता व नेपाःमिपिन्त सुभाय् देछानादिगु दु । नाप ‘थुगु सम्मानं थःत थप जिम्मेवार दयेकुगु द धका न धयादिस, ‘जिगु योग्यता व क्षमतां भ्याय जुगुतले नेपाल–इजरायल सम्बन्ध अझ बालाका यंकेगु जइ धका धयादिगु दु ।’
डा. शाक्यं राजदूत पद बहाली लिपा इजरायल व नेपाल दथुइ प्रविधि, कृषि, शिक्षा, स्वास्थ्य लगायतय् ग्वाहालि याकेगु लागि उल्लेख्य भूमिका म्हितादिगु खः । अथेहे छु दि न्ह्य डा. शाक्यया पहलय् नेपाल इजरायल चेम्वर अफ कमर्श व इजरायल चेम्बर अफ कमर्श दथुइ व्यापार व्यवसाय आदान–प्रदान यागु सम्बन्धी सम्झौता ज्ुगु खः । उगु सम्झौताय् व्यापार, लगानी, उद्योग, कृषि, पर्यटन, प्रविधि, यातायात, पूर्वाधार विकास, उर्जा थे ज्याःगु क्षेत्रय् व्यापार व्यवसाय यायेगु सम्झौता जुग खः ।
भारतय् कोरोना संक्रमितपि १ लाख स्वया अप्वोल
लहनान्युज | बछलागा आमै ११४०,जेष्ठ ९ शुक्रवाः
भारतय् कोरोना भाइरस (कोभिड–१९) पाखे संक्रमित जुपिनिगु ल्याः १ लाख १८ हजार स्वया अप्वो जुइ धुकुगु दु ।
भारतया स्वास्थ्य मन्त्रालयया कथं, भारतय् छगु लाख १८ हजार ४४७ म्हेसित कोरोना भाइरसया संक्रमण पुष्टि जुगु दु । वःगु २४ घण्टाया दुने भारतय् कोरोना भाइरसं ६०८८ म्हेसित संक्रमित खनेदुगु दु ।
अथेहे, भारतय् कोरोना भाइरसं सीपिनिगु ल्याः ३५८३ म्ह थ्यःगु दु । वःगु २४ घण्टाया दुने भारतय् कोरोना भइरसं १४८ म्ह सीइगु दु ।
भारतय् दकलय् दकलय् प्रभावित महाराष्ट्र राज्यय् आतक कोरोना भाइरसं संक्रमित जुपिनिगु ल्याः ४१ द्धः ६४२ म्ह थ्यःगु दु । अन द्धःछि व ४५४ म्ह कोरोना भाइरसया कारण सीगु दु ।
अथेहे, तमिलनाडुइ १३९६७ म्ह कोरोना भाइरसया संक्रमण खनेदुुगु दुसा सीपि ९४ म्ह थ्यःगु दु । गुजरातय् १२९०५ म्ह संक्रमित व ७७३ म्ह सीगु दु । मध्य प्रदेशय् ५९८१ संक्रमित जुगु
दुसा २७० म्ह सीगु दु ।
भारतय् आतक ४८ द्धः व ५३४ संक्रमितपि वासयाका छेँय् लिहा वने धुकुगु दु ।
भारतय् ४५ द्धः कोरोना संक्रमित वासयाका छेँ लिहावन
लहनान्युज | बछलागा चःह्रे ११४०,जेष्ठ ८ बिहिवाः
भारतय् कोरोना भाइरसया ४५ द्धः स्वया अप्वो संक्रमित वासयाका छेँय् लिहावःगु दु ।
अन १ लाख १२ द्धः ३५९ संक्रमितपि मध्ये ४५ द्धः व स्वसः वासयाका छेँय् लिहावःगु दु धका भारतया स्वास्थ्य मन्त्रालयं धाःगु दु ।
वःगु २४ घण्टाय् जक अन ५५०९ म्ह न्हुपि कोरोना संक्रमित थपे जुगु दु ।
भारतय् आतक कोरोना भाइरसं सीपिनिगु ल्याः स्वद्धः व ४३५ म्ह थ्यःगु दु । वःगु २४ घण्टाय् भारतय् १३२ म्ह कोरोना भाइरसया कारण सीइगु दु ।
