Display Style:
Column Style
जापानय् छगू एनिमेशन स्टुडियो मिं नल
लहनान्यूज | ने.सं. ११३९ दिल्लागा दुतिया (१८ जुलाइ, २०१९), विहिवाः
जापानया क्योटो सहरय् च्वंगु छगू एनिमेशन स्टुडियोस थौं विहिवाः जूगु मि च्यानाः म्होतिं २३म्ह मनूत सीगु दु । नापं दर्जनौं मनूत घाःपाः जूगु दु । उगु कम्पनीइ तसकं च्याःगु मि योजनाबद्धकथं जूगु प्रहरीाय धापू दु ।
मि च्याःगु इलय् उगु भवनय् ज्या यानाच्वंपिं मनूत ताःमलाःगुलिं सीपिनिगु ल्याः अझ अप्वयेफूगु अधिकारीतसें धाःगु दु । छेलि व मातनय् १२म्हेसित गम्भीर अवस्थाय् उद्धार याःगु व उमित सासः ल्हायेगु समस्या खनेदुगु अग्नि नियन्त्रण विभागया अधिकारीतय्त उद्धृत यासें एएफपी समाचार समितिं न्ह्यथंगु दु ।
मिइ लानाः सीपिं अप्वः धइथे उगु कम्पनीइ ज्या यानाच्वंपिं धाःगु दु । अथे खःसां थुगु घटनाय् सीपिं मनूतय्गु औपचारिक पुष्टि धाःसा जूगु मदुनि ।
मातनय् च्वंपिं मनूत बिस्युं वनेत ताःमलाःगु धाःगु दु । सरकारी अधिकारीपिनिगुकथं थुगु मिइ लानाः ३५म्ह मनूत घाःपाः जूगु व उपिं मध्ये १०म्हेसगु अवस्था चिन्ताजनक दु । कम्पनीइ थ्यंमथ्यं ७०म्ह ज्या यानाच्वंगु न्ह्यथंगु दु ।
थ्व हे झ्वलय् प्रहरीं छम्ह शंकास्पद मनूयात घाःपाः जूगु अवस्थाय् नियन्त्रणय् काःगु दु । वयागु स्थानीय अस्पतालय् प्रहरीया निगरानीइ वासः जुयाच्वंगु दु ।
उम्ह मनू पेट्रोलथें जाःगु तरल पदार्थ ज्वनाः भवनय् दुहांवंगु सिसिटिभीया फुटेजय् खनेदुगु खः । वं हे भवनया छेलिइ पेट्राल ह्वलाः मि तःगु आशंका प्रहरीं याःगु दु ।
निगूगु चन्द्र मिसन प्रक्षेपण यायेगु भारतया घोषणा
लहना न्यूज | ने.सं. ११३९ दिल्लागा दुतिया (१८ जुलाइ, २०१९), विहिवाः
भारतं वइगु सोमवाः निगूगु चन्द्र मिसन प्रक्षेपण यायेगु घोषणा याइगु जूगु दु ।
अन्तरीक्ष एजेन्सीं चन्द्रयान टू चन्द्रमाया दक्षिण भू–भागय् अवतरण याइ । १५गू करोड डलरय् दयेकूगु चन्द्रयानया न्हापांगु संस्करण सन् २००८य् प्रक्षेपण याःगु खः ।
न्हापांगु यानं चन्द्रमाया सतहस अवतरण जुइ मफूसां नं राडारपाखें लः सम्बन्धी अध्ययन याःगु खः । चन्द्रमाया सतहस दुगु लः, अन ब्वइगु भुखाय् व खनिजयात कयाः अध्ययन जूगु खः ।
चन्द्रयानं चन्द्रमाया सतहस अवतरण यायेत ताःलाःसा भारत अवतरण याकूगु प्यंगूगु देय् जुइ । थ्व स्वयां न्ह्यः अमेरिका, चीन व तत्कालीन सोभियत युनियनं जक चन्द्रयान सतहस अवतरण यायेत ताःलाःगु दु ।
अमेरिकी राष्ट्रपति ट्रम्प विरुद्ध खेद प्रस्ताव पारित
लहना न्यूज | ने.सं. ११३९ दिल्लागा पारु (१७ जुलाइ, २०१९), बुधवाः
प्यम्ह मिसा सांसदपिन्त नश्लवादी टिप्पणी याःग धासें अमेरिकी संसदं राष्ट्रपति डोनाल्ड ट्रम्प विरुद्ध खेद प्रस्ताव पारित याःगु दु ।
प्रतिनिधिसभां राष्ट्रपति ट्रम्पया टिप्पणी नश्लवादी जूगु ठहर यासें खेद प्रस्ताव पारित याःगु विविसीं न्ह्यथंगु दु । राष्ट्रपति ट्रम्पं फरक जातीय पृष्ठभूमिपाखें वःपिं मिसा सांसदपिं अलेक्जान्ड्रिया ओकासियो कोर्टेज, राशिदा तलाइब, आयात्रा प्रेस्ली व इल्हान ओमर लक्षित टिप्पणी यानादीगु खः ।
ट्रम्पं उपिं मिसा सांसदपिं पूवंक हे असफल देशपाखें अमेरिका वःगु धयादिसें उमित थःगु हे देशय् लिहां वनेत धयादीगु खः । अथेखःसां वय्कलं धाःसा नश्लीय व अपमानजनक टिप्पणी मयानागु दावी याना वयाच्वनादीगु दु ।
प्रतिनिधिसभाया १८७म्ह डेमोक्राटिक सांसदलिसें संसदय् उपस्थित सुं सुं रिपब्लिकन सांसदतसें तकं खेद प्रस्तावय् ऐक्यबद्धता प्वंकूगु खः । उगु प्रस्ताव प्रतिनिधसभाय् २४०कू मतं पारित जूगु खः ।
ट्रम्पं कम्युनिस्ट व समाजवाद चाहे जुपि अमेरिका त्वःतेत चेतावनी
लहनान्युज | दिल्लाथ्व पुन्हि ११३९ (जुलाई १६ २०१९)
समाजवादी व साम्यवादीपिन्त अमेरिका त्वःत्येत चुनौति बिइगु ट्वीटं अमेरिकी राष्ट्रपति डोनाल्ड ट्रम्प हाकन विवादय् वःगु दु ।
अमेरिकी राष्ट्रपति ट्रम्प खुला सिमानाया पक्षय् न्ववासे डेमोक्रेटिक पार्टीप्रति तक प्रहार याःगु खः ।
ट्रम्पं थौं हे मंगलवाः छकलं स्वक्वः तक ट्वीट यासे अमेरिका गुवलय् न समाजवादी व कम्युनिस्ट जुइ फइ मखु धका धयादिगु खः ।
वयकलं थुगु खँ लय्ता मफुपिन्सं अमेरिका त्वःता वनिगु विकल्प दुगु धका न धयादिगु खः ।
सू मनू न अमेरिकायात घृणा याना च्वंगु धयादिसे ट्रम्पं इपि इजरायल विरोधी, अलकायदा समर्थक जुग धका धयादिगु खः ।
ट्रम्पं वामपन्थी डेमोक्र्याटपिन्स खुला सिमाना चाहे जुगु व इमिस लागू पदार्थ, अपराध व मानव बेचबिखन थेज्यागु ज्याय् यायेत प्रोत्साहन बिगु आरोप न लगे यानादिगु खः ।
मेक्सिकोया वित्तीय मन्त्री कार्लोसपाखें राजीनामा
लहनान्यूज | ने.सं. ११३९ दिल्लाथ्व नवमि (९ जुलाइ, २०१९), बुधवाः
अर्थतन्त्रय् अतिवाद हावी जूगु धयादिसें मेक्सिकोया वित्तीय मन्त्री कार्लोस उर्जुवां राजीनामा बियादीगु दु ।
मेक्सिकोया राष्ट्रपति आन्द्रेस लोपेज ओब्रेडोरं वित्तीय मन्त्रीया थासय् छम्ह उप–मन्त्रीयात प्रस्ताव यायेगु तयारी यानाच्वंगु इलय् कार्लोसं राजीनामा बियादीगु खः ।
राजीनामा पौयात माइक्रो ब्लगिङ साइटय् ट्वीटरपाखें सार्वजनिक यानादिसें वित्तीय मन्त्री कार्लोसं सरकारं छुं हे आधार मदयेकं आर्थिक नीति दयेकूगु न्ह्यथनादीगु दु ।
आर्थिक नीतिया न्ह्याबलें बल्लाःगु आधार दयेमाःगु व थुकियात कयाः फुक्कस्यां थःथःगु धारणा तय् दयेमाःगु धइगु विश्वास यानागुलिं हे थःत थीथी द्वपं ब्यूगु नं वय्कःया धापू दु । तर थजाःगु द्वपनं थःगु कार्यकालय् लिच्वः मलाकूगु दावी नं कार्लोसं यानादीगु बिबिसीं न्ह्यथंगु दु ।
