Display Style:
Column Style
अमेरिकाया राजधानी वासिङ्गटन डिसी डुबानय्
लहना न्यूज | ने.सं.११३९ दिल्लाथ्व सप्तमि (९ जुलाइ २०१९), मंगलवाः
अमेरिकाया राजधानी वासिङ्गटन डिसी तसकं वा वयाः खुसिबाः वःगुलिं डुबानय् लाःगु दु ।
वंगु चान्हय् वःगु खुसिबाःया हुनिं वासिङ्गटन डिसिया ह्वाइट हाउसलिसें थीथी क्षेत्रय् तकं लिच्वः लाःगु दु । अथे खःसां ह्वाइट हाउसय् दुगु ऐतिहासिक अभिलेख, दस्तावेज, घोषणा पौ, संविधान थेंजाःगु महत्वपूर्ण दस्तावेज सुरक्षित जूगु अधिकारीतसें न्ह्यथंगु दु । ह्वाइट हाउसया वेष्ट विङ्गया बेसमेन्टय् लः दुहांवंगु नं न्ह्यथंगु दु ।
अथे हे, शहरया थीथी क्षेत्रय् लः दुहांवंगुलिं लँ अवरुद्ध जुयाः गुलिखय् यात्रुत अन हे लानाच्वंगु दु । लँ अवरुद्ध जुइवं उपिं थःपिनिगु सवारी साधन त्वःताः वनेत बाध्य जूगु खः व गुलिखे मनूतय्त उद्धार तकं यायेमाःगु एजेन्सीं न्ह्यथंगु दु । थ्व हे झ्वलय् लःया सतह खुगू न्हय्गू फिट च्वय् थाहां वःगु नं एजेन्सीं धाःगु दु ।
अथे हे, अण्डरपासय् धाःसा २००गू मिटरतक लः दुगु खः । भूमिगत रेलमार्ग नं डुबानय् लाःगु खः ।
शहरय् छक्वलं खुसिबाः वयेधुंकाः नेशनल वेदर सर्भिसं तसकं खुसिबाः वयेफइगु अनुमान याःगु दु । खुसि दुहां वःगुलिं उगु लागाय् सर्वसाधारणपिन्त वयेवने तकं मयायेत इनाप याःगु दु ।
अमेरिकाय् शक्तिशाली भुखाय् ब्बःल
लहनान्युज | दिल्लाथ्व तृतिया ११३९ (जुलाइ ४ २०१९)
अमेरिकाय् शक्तिशाली भुखाय् ब्बःगु दु । क्यालिफोर्निया राज्यया लस एन्जलसपाखे उत्तरपूर्वय् रिजक्रेस्ट नगर केन्द्रविन्दु जुया ६.४ रेक्टर स्केलया भुखाय् ब्बःगु खः ।
आः तक दक्षिण क्यालिफोर्नियाय् निगु दशकय लिपा थःथे तसकं भुखाय् ब्बःगु धका धाःगु दु । उगु भुखाचं गुलि भौतिक क्षति जुल धका सिइ मदुनिसा मानवीय क्षतिबारे न सिइ मदुनि ।
उगु भुखाय् ब्बःगु धक्का नेभादा राज्यया लास भेगास तक महसुस जुगु खः । भुखाचं करिब निगु दर्जन ति थासय् मिं न नःगु खः । छु मनूत घाइतया उद्धार यासे अस्पताल छ्वया बिगु खः ।
६.४ रेक्टर स्केलया भुखाय् ब्बःगु लिपा आः न निरन्तर परकम्प जुया च्वंगु दु । अमेरिकी भूगर्भ निकाय (यूएसजी) न भूकम्पविद् पिन्स आ न परकम्प वनातु च्वनि धका न धाःगु दु ।
लिविया शरणार्थी शिविरय् छम्ह नेपाली मन्त, च्याम्हसित लितछ्वया हल
लहनान्युज | दिल्लाथ्व दुतिया ११३९ (जुलाइ ४ २०१९)
शिविरय् अझ न खुम्ह नेपाली उद्धारया लागि पिया च्वन
लिवियाय् आप्रवासी हिरासत केन्द्रय् जुगु आक्रमणय् छम्ह नेपाली सन्तोष श्रेष्ठया ज्यान वःगु पुष्टि जुगु दु ।
आप्रवासीपिन्स अन्तराष्ट्रिय संगठन आईओएमं कथं आक्रमण जुया अस्पतालय् उपचारय् यायेगु झ्वलय् सिगु खः । सि म्ह गनया म्ह खः व गये याना अन थ्यन व धासा सिइ मदुनि थकिगु अनुसन्धान न जुया च्वंगु दु ।
लिबियाया राजधानी त्रिपोलीइ पूर्वी क्षेत्रय् आप्रवासी हिरासत केन्द्रय् मंगलवाः हवाई आक्रमण जुगु खः । उगु आक्रमणय् ४० म्हसिया ज्यान वःगु खःसा ८० म्हसिया अप्वो घाइते जुगु खः।
आप्रवासी हिरासत केन्द्रय् मेपि १४ म्ह नेपाली न दुगु खः । तर, इमिगु धासा ज्यान बचे जुगु खः । दूतावासया अनुसार ८ म्ह टर्की जुया नेपाल लित छ्वया हःगु खःसा ६ म्ह लित छ्वया हयेगु
प्रयास याना च्वंगु दुसा इपि खुम्ह त्रिपोलीय् आईओएमया क्याम्पय् च्वना च्वंगु दु । वःगु निलाया दुने २६ म्ह नेपालीया उद्धार यासे नेपालय् लित छ्वया हःगु खः ।
त्रिपोलीइ जूगु आक्रमणय् ४०म्ह सित
लहनान्युज | ने.सं. ११३९ दिल्लाथ्व पारु (३ जुलाइ, २०१९), बुधवाः
लिवियाया ट्रिपोली लिक्क छगू आप्रवासी बन्दीगृहस जूगु हवाई आक्रमणय् लानाः ४०म्ह मनूत सीगु दुसा ८०म्ह स्वयां अप्वः मनूत घाःपाः जूगु दु । सीपिं अप्वः धइथें अफ्रिकी आप्रवासी खः ।
लिबियाया तटीय क्षेत्र जुयाः यूरोप दुहां वनीपिं अवैध आप्रवासीपिन्त नियन्त्रणय् कयाः बन्दीगृहस तयातःगु खः । उगु हे थासय् आक्रमण जूगु खः ।
राष्ट्रसंघीय सहयोगय् परिचालित सरकारया प्रधानमन्त्री फयज अल सिरां उगु आक्रमणय् स्थानीय स्वघोषित हिंसात्मक पुचः लिबियाली राष्ट्रिय सेनाया संलग्नता दुगु धयादीगु दु ।
थ्व स्वयां न्ह्यः वंगु सोमवाः उगु पुचलं हवाई आक्रमणया तयारी यानाच्वंगु धाःगु खः । अथे खःसां थुगु आक्रमणय् थःपिनिगु संलग्नता मदुगु उगु पुचःया प्रवक्ताया दावी दु ।
अवैध आप्रवासी नियन्त्रणय् तयेत सरकारं दयेकातःगु थजाःगु बन्दीगेहया दयनीय अवस्थायात कयाः मानवाधिकारवादी संस्थापाखें कुंखिना वयाच्वंगु खः । थजाःगु बन्दीगृह विशेष यानाः तनावग्रस्त थासय् लिक्क तयातःगु दु ।
कांग्रेस अध्यक्ष राहुल गान्धीं राजीना बिल
लहनान्युज | दिल्लाथ्व पारु ११३९ (जुलाइ ३ २०१९)
राहुल गान्धीं कांग्रेस अध्यक्ष पदपाखे राजीना बिगु दु । लोकसभाया चुनावय् पार्टीपाखे बुगु जिम्मेवारी थःम्हसिया कासे कांग्रेसया अध्यक्ष पदपाखे राजीना बिगु खः ।
नेता राहुलं राजीनाया घोषणा नाप छगु ट्वीट याःगु खः । मेपिन्त न जवाफदेही याये न्ह्य थःनि जवाफदेही जुइ माःगु धका धकयादिगु खः । पार्टी विस्तारया लागि जवाफदेही महत्वपूर्ण खः धासे थुगुु कारण थःम्हसिया कांग्रेस अध्यक्षपाखे राजीना बियागु धका उगु पत्र धाःगु खः।
