Display Style:
Column Style
अमेरिकापाखें मेक्सिकोपाखें दुहां वइगु हलंज्वलनय् कर थकाल
लहनान्युज | ने.सं. ११३९ बछलागा द्वादशि (३१ मे, २०१९), शुक्रवाः
अमेरिकां मेक्सिकोपाखें आयात जुइगु फुक्क हलंज्वलनय् ५गू प्रतिशत कर अप्वयेकेगु क्वःछ्यूगु दु ।
अमेरिकी राष्ट्रपति डोनाल्ड ट्रम्पं माइक्रो ब्लडिङ साइट ट्वीटरपाखें मेक्सिकोपाखें आयात जुइगु फक्क हलंज्वलनय् कर अप्वयेकेगु धयादीगु खः । उगु क्वःछिना वइगु जुन १० तारिखनिसें लागू जुइगु व हरेक महिना ५गू प्रतिशतया दरं थकाइ । नापं अक्टोबर १ निसें २५ प्रतिशत थ्यंकी ।
अवैध आप्रवासीया समस्या मज्यंतलय् कर बृद्धि निरन्तकथं अप्वया वनीगु राष्ट्रपति ट्रम्पया धापू खः । मेक्सिकों बर्षौंनिसें अमेरिकालिसे बांलाःगु व्यवहार मयागुलिं आः धाःसा स्वायत्त सरकारया अधिकारयात कयाः म्हसीका बीगु पाः वःगु नं राष्ट्रपति ट्रम्पं धयादीगु बिबिसीं न्ह्यथंगु दु ।
अवैधकथं अमेरिकाय् दुहां वइपिं आप्रवासीया मू नाका मेक्सिकोय् हलंज्वलनय् याःगु कर बृद्धिया क्वःछिनायात कयाः सीमा सुरक्षाकःमितसें लसकुस याःगु दु । समालोचकतसें धाःसा अप्रवासीयात अन्यायपूर्ण व्यवहार याःगु धकाः टिप्पणी याःगु दु ।
उत्तर अमेरिकाया नितिं मेक्सिकन वरिष्ट कुटनीतिज्ञ जिसस सेइडें अमेरिकी क्वःछिनायात विनाशकारी पलाःकथं ब्याख्या यानादीगु दु । कर अप्वयेकेगु क्वःछिना कार्यान्वयन जूसा मेक्सिकों प्रतिकारया नितिं कडा पलाः छीगु वय्कःया धापू खः ।
चुनावी अभियाननिसें हे मेक्सिकोलिसेया सीमा सुरक्षाया विषय ल्ह्वना वयाच्वनादीम्ह राष्ट्रपति ट्रम्पं पःखालं ग्वयेगु नितिं फ्याःगु धेबा थ्व स्वयां न्ह्यः संघीय न्यायाधीसपिन्सं रोक्का यानाब्यूगु खः ।
नरेन्द्र मोदीं भारतीय प्रधानमन्त्रीया सपथ काल
लहनान्युज | बछलागा द्धादशी ११३९ (मे ३१ २०१९)
नरेन्द्र मोदीं भारतीय प्रधानमन्त्रीया सपथ छगु ज्याझ्वः दथुइ काःगु दु । लोकसभा चुनावय् भाजपा याकचां बहुमत व एनडीए गठबन्धनं प्रचण्ड बहुमत हया मोदी निक्वःगु पटक प्रधानमन्त्री जुगु खः ।
राष्ट्रपति कार्यालय् जुगु उगु सपथ ग्रहण ज्याझ्वलय् प्रधानमन्त्री केपी शर्मा ओलीया न सहभागी दुगु खः ।
मोदीया ५९ सदस्यीय मन्त्रिपरिषद न्हुपि १९ म्ह दुथ्याकुगु दु ।
२५ क्याबिनेट मन्त्रीं भारतीय जनता पार्टी (भाजपा) अध्यक्ष अमित शाह न दुथ्या ।
कांग्रेस अध्यक्ष राहुल गान्धीयात चुनावय् बुकुम्ह स्मृती इरानीयात न मन्त्री दयेकुगु दु ।
नरेन्द्र मोदीं थौं पद व गोपनीयताया सपथ ग्रहण याइगु
लहनान्युज | बछलागा एकादशी ११३९ (मे ३० २०१९)
भारतया प्रधानमन्त्री नरेन्द्र मोदीं थौं पद व गोपनीयताया सपथ ग्रहण याइ जुगु दु । मोदीयात राष्ट्रपति रामनाथ कोविन्दं बहनिया ७ बजे सपथ ग्रहण याइगु ज्याझ्वः दु ।
छु दिं न्ह्यःजक क्वचाःगु १७ क्वःगु लोकसभा निर्वाचनय् भाजपां स्पष्ट बहुमत हया मोदी निक्वःगु कार्यकालया लागि प्रधानमन्त्री जुइ त्यःगु खः ।
मोदीया सपथग्रहण समारोहय् ब्बति कायेगु लागि प्रधानमन्त्री केपी शर्मा ओली थौं हे दिल्ली वने त्यःगु खः ।
थौं जुइगु सपथ ग्रहण समारोहय् नेपाल, भुटान, मोरिससया प्रधानमन्त्री नाप श्रीलंका, बंगलादेश, म्यानमारया राष्ट्रपति पिनिगु न ब्बति दइ ।
बेलायती प्रधानमन्त्री थेरेसापाखें राजीनामाया घोषणा
लहनान्युज | ने.सं. ११३९ बछलागा षष्ठि (२४ मे, २०१९)
बेलायती प्रधानमन्त्री थेरेसा मे नं राजीनामाया घोषणा यानादीगु दु ।
वय्कलं वइगु जुन महिनाया ९ तारिखय् कन्जरभेटिभ पार्टीया नेताया पदपाखें राजीनामा बीगु धयादीगु दु । पार्टी नेतापाखें राजीनामा बीधुंकाः न्हूम्ह प्रधानमन्त्री ल्ययेगु नितिं लँपु चाली ।
बेलायत यूरोपेली युनियनपाखें पिहां वनेगु विषयस थःम्हेस्यां देशबासीया समर्थन कायेत यक्व हे कुतः याःसां नं ताःमलाःगु धयादीगु दु । आः न्हूम्ह प्रधानमन्त्रीपाखें नं उगु कुतः न्ह्यानाच्वनीगु प्रधानमन्त्री में धयादिल । वय्कलं थःम्हेस्यां पद त्वःतेगु विषयस कन्जरभेटिभ पार्टीया नेतातय्गु नं समर्थन दुगु धयादीगु दु ।
छगू भावुक सम्बोधनय् थेरेसां प्रधानमन्त्री जुयाः ज्या यायेगु थःगु जीवनया दकलय् लसताया ई जूगु धयादीगु दु ।
भाजपां सरकार दयेकीगु निश्चित, मोदी हाकनं प्रधानमन्त्री जुइगु
लहनान्युज | ने.सं. ११३९ बछलागा पञ्चमि (२३ मे, २०१९)
भारतीय लोकसभा चुनावय् सत्तारुढ गठबन्धनं तसकं न्ह्यःने लानाच्वंगु दु । प्रारम्भिक मतगणनाय् भारतीय जनता पार्टीं जक २९१गू सिटय् न्ह्यःने लानाच्वंगु दु । अथे हे कांग्रेस ५१गू सिटय्
न्ह्यःने लानाच्वंगु दु ।
लोकसभाया मुक्कं ५४३ सिटमध्ये बहुमतया नितिं २७२ सिट माः । सन् २०१४या चुनावय् भारतीय जनता पार्टीं २८२ सिट त्याकूगु खः । भारतीय लोकसभाया दकलय् अप्वः सिट ८०गू सिट दुगु उत्तर प्रदेशय् नं आःया चुनावय् भारतीय जनता पार्टी न्ह्यःने हे लानाच्वंगु दु । भाजपां ५६गू सिटय् न्ह्यःने लानाच्वंगु दु । थ्व स्वयां न्ह्यःया चुनावय् नं भाजपां उत्तर प्रदेशपाखें ७१गू सिट त्याकूगु खः ।
थ्व हे झ्वलय् भारतीय कांग्रेसका नायः राहुल गान्धीं चुनावी हार स्वीकार यानादीगु दु व प्रधानमन्त्री नरेन्द्र मोदीयात भिन्तुना देछानादीगु दु ।
मतगणना जुयाच्वंगु इलय् पत्रकार सम्मेलन यानाः राहुलं पराजयया जिम्मेवारी कायेगु धयादीगु दु । विचारधारया लडाई न्ह्यानाच्वंगु धयादिसें वय्कलं विचलित मजुइत पार्टीइ नेता व कार्यकर्तातय्त इनाप यानादिल । राहुल थः हे अमेठीइ भारतीय जनता पार्टीया उम्मेदवार स्मृति ईरानीलिसे पराजित जूगु दु । अथेखःसां मेगु क्षेत्रपाखें चुनाव त्याकादीम्ह राहुलं अमेठीया जनताया फैसलायात सम्मान यायेगु धयादिल ।
मतगणना स्थानीय ईकथं सुथसिया ८ताः इलंनिसें न्ह्याःगु खः । हलिमय् दकलय् अप्वः ९०गू करोड मतदातापिन्सं ब्वति काःगु चुनाव न्हय्गूगु चरण यानाः वंगु आइतवाः जक क्वचाःगु खः
