विश्व स्वास्थ्य सङ्गठन (डब्लुएचओ) न इजिप्टयात औलोमुक्त घोषणा याःगु दु। थुगु उपलब्धियात डब्ल्यूएचओ न ‘धाथे हे ऐतिहासिक’ व रोग निर्मूल यायेत करिब छगू शताब्दी ताहाकःगु ज्याया लिच्वः खः धका धाःगु दु।

विश्व स्वास्थ्य सङ्गठनया प्रमुख टेड्रोस अधानोम गेब्रेयसस न धाःगु दु, “औलो इजिप्टया सभ्यता थे पुलागु खः, आः थ्व ल्वय् इजिप्टया इतिहास जूगु  दु। इजिप्ट औलोमुक्त जुयाच्वनिइ।” वयकलं धाःगु दु, “इजिप्टयात औलोमुत्तया कथं जूगु थ्व प्रमाणीकरण वास्तवय् ऐतिहासिक खः, व थ्व प्राचीन सङ्कटं थःत मुक्त यायेत इजिप्टया जनता व सरकारया प्रतिबद्धता याःगु दसि खः।”

हलिमयय् ४४ गु देय् व छगू क्षेत्र औलोमुक्त घोषणा जुइ धुकुगु दु। औलोमुक्त घोषणाया निति उगु देशं हाकन सङ्क्रमणया सम्भावना दिकेगु क्षमता न प्रदर्शन यायेमाः। विश्व स्वास्थ्य सङ्गठनया कथं औलोया कारण दँय् दँसं खुगु लख सीना च्वंगु दु, उकि मध्ये ९५ प्रतिशत अफ्रिकाय् खः।

टर्कीइ बुधबार ५.९ म्याग्निच्युडया भुखाय् ब्बःगु दु। टर्कीया प्रकोप एजेन्सीं केन्द्रविन्दु दक्षिणी मलात्या प्रान्तया काले जिल्लाय् लागु दु धका धयादीगु दु।

उगु भुखाय् करिब १०.०७ किलोमिटर दुने वःगु दु धका धाःगु दु। भुखाय् या धक्का दियारबाकिर, इलाजिग, कहरामनमारास, टोकाट, एर्जिनकान, टुन्सेली व अदियामान प्रान्तय् तक महसुस जूगु दु धका धाःगु दु।

अन विद्यालय छन्हु बन्द यायेगु धका धाःगु दु।

इजरायलय् च्वनाच्वपि सेनातय्त उत्तरी बेसयात लक्षित यान ड्रोन आक्रमण याःगु दु। उगु आक्रमणय् प्यम्ह सैनिकया ज्यान वंगु दु सा ६० म्ह घाःपाः जूगु दु धका इजरायलया रक्षा बल (आईडीएफ) न धाःगु दु।

हाइफाया दक्षिणय् २० माइल अर्थात् ३३ किलोमिटर तापाक्क च्वंगु सहर बिन्यामिनाया सिथय् आक्रमणय् न्ह्यय्म्ह सैनिकपि तसकं घाःपाः जूगु दु। तेल अभिभ व हाइफाया दथुइ च्व्ंगु इजरायली रक्षा बल (आईडीएफ) गोलानी ब्रिगेडय् प्रशिक्षण शिविरयात लक्षित याःगु खः।

हिजबुल्लाहं उगु आक्रमणया जिम्मेवारी काःगु दु। घाःपा जूपि ३७ म्हेसित एम्बुलेन्स व हेलिकप्टरं अस्पतालय् यकूगु धका अन्तराष्ट्रिय सञ्चारमाध्यमं धागू दु।

अमेरिकाया निवर्तमान राष्ट्रपति व वइगु चुनावय् राष्ट्रपति पदया उम्मेदवार डोनाल्ड ट्रम्पया सभा लिक्क प्रहरीं बन्दुक व लोड पेस्तोललिसें छम्ह मनूयात ज्वंगु दु।

क्यालिफोर्नियाया कोचेलाय् ४९ दँया वेम मिलरं ट्रम्पया सभाय् गाडी चले यायेत स्वयाच्वंगु खः। सुरक्षा जाँचया झ्वलय् प्रहरीं वयाके निगः ल्वाभः बरामद याःगु दु धका बीबीसीं जानकारी ब्यूगु दु।

अमेरिकाया गोप्य सेवां ट्रम्पयात छुं कथंया खतरा मदुगु व घटनां सुरक्षा संचालनय् छुं लिच्वः मलाःगु धाःगु दु। लिसें सुरक्षा अधिकारीं थुगु घटनाय् हत्याया कुतः जूगु छुं नं संकेत मदुगु धाःगु दु।ट्रम्प मञ्चय् च्वनेगु छघौ न्ह्यः उगु घटना जूगु खः।

वयां लिपा ट्रम्प चुनावी मञ्चय् भाषण यायेत वःबलय् कडा सुरक्षा ब्यूगु समाचारय् न्ह्यथनातःगु दु। अमेरिकाय् धाःसा वइगु महिनाय् राष्ट्रपतिया चुनाव जुइत्यंगु दु।

बेल्जियमय् जूगु स्थानीय निकायया निर्वाचनय् निम्ह नेपालीमूलया उम्मेदवारतय्स त्याका न्हुगु इतिहास तःगु दु।

बेल्जियमया राजनीतिइ अन याःगु स्थानीय निकायया निर्वाचनय् ब्रुगे नगरपालिकाया सदस्यः नेपाःया निगु पुस्ताया प्रज्ञा तिमील्सिना व लुभेन नगरपालिका सदस्यय् न्हापागु पुस्ताया सूर्य ढकाल निर्वाचित जूगु खः।

उगु निर्वाचनय् मेमेगु नगरपालिका व मेमेगु थासय् ११ म्ह नेपाःमिपि उम्मेदवार जुगुलि तिमिल्सिना ७८८ व ढकालं १०७४ मत कया निर्वाचित जूगु खः।