श्रीलंकाया राष्ट्रपति अनुरा कुमारा दिशानायके न संसद विघटन याःगु दु। नापं तु वयकलं संसदीय निर्वाचनया तिथि न क्वछिउगु दु।

शनिवाः जुगु राष्ट्रपति निर्वाचनय् वामपन्थी नेता दिशानायके निर्वाचित जूगु दु। तर २२५ सदस्यीय संसदय् वयकःया दल नेशनल पिपुल्स पावर (एनपीपी)या स्वम्ह जक सांसद दु।

राष्ट्रपति दिशानायके न मंगलवाः थःगु दलया सांसद डा. हरिनी अमरासूर्ययात प्रधानमन्त्री व विपथा हेराथयात मन्त्री दयकूगु खः। वया लिपा हे मंगलवाः चान्ह्यनिसे लागू जुइगु कथं वयकलं संसद भंग यानादीगु खः। श्रीलंकाया संविधानं राष्ट्रपतियात उगु अधिकार बिउगु दु।

नाप १४ नोभेम्बर २०२४ य् संसदया निति निर्वाचन जुइगु दु। ४ अक्टोबरपाखे उम्मेदवारी दर्ता जुइ। निर्वाचनपाखे वइपि न्हुगु संसदया न्हापागु बैठक २१ नोभेम्बर २०२४ य् जुइगु क्वछिउगु दु।

नेशनल पिपुल्स पावर (एनपीपी) या सांसद डा. हरिनी अमरासूर्या श्रीलंकाय् न्हूम्ह प्रधानमन्त्रीइ नियुक्त जूगु दु। वय्कलं मंगलवाः राष्ट्रपति अनुराकुमार दिशानायकेलिसे पद व गोपनीयताया सपथ ग्रहण यानादीगु खः।

शनिवाः जूगु राष्ट्रपति निर्वाचनय् बामपन्थी दिशानायके त्याःगु खः। वय्कलं सोमवाः शपथ ग्रहण यायेधुंकाः प्रधानमन्त्री दिनेश गुणवर्दनें राजीनामा बियादीगु खः।२२५ सदस्यीय संसदय् डा. अमारा सूर्यलिसें विजिथा हेराथ व लक्ष्मण निपुन आरागची जक सांसद जूगु खः।

राष्ट्रपति दिशानायकें अमरसूर्ययात प्रधानमन्त्री व हेराथयात मन्त्री नियुक्त याःगु खः। अथेहे श्रीलंकाया संचारमाध्यमं वय्कलं थौं चान्ह्यः संसद विघटन याइगु बुखँ पिहावःगु दु। राष्ट्रपति दिशानायकें रक्षा व अर्थलिसेंया मन्त्रालय थःके हे तयातःगु दु।

प्रधानमन्त्री अमरा सूर्ययात शिक्षा, विज्ञान व प्रविधिया मन्त्रालय ब्यूगु दुसा परराष्ट्र लगायतया मन्त्रालय हेराथयात ब्यूगु दु।

श्रीलंकाय् राष्ट्रपति निर्वाचनया मतगणना जुयाच्वंगु दु। आःतक वःगु लिच्वलय् वामपन्थी नेता अनुरा दिसानायकें न्ह्यने लानाच्वंगु दु।

श्रीलंकाया निर्वाचन आयोगया कथं १० लाख मतगणना लिपा डिसानायकें ५० प्रतिशत मत हये धुकुगु दु। राष्ट्रपति निर्वाचित जुइत ५१ प्रतिशत मत कायेवं हे गाः। डिसानायके राष्ट्रिय जनसत्ता गठबन्धनया उम्मेदवार खः। वय्कःया जनमुक्ति मोर्चा पार्टी नं थ्व गठबन्धनय् दुथ्याः।

दिसानायके धुंकाः निगूगु थासय् साजित प्रेमादासया पार्टी २० प्रतिशत व स्वंगूगु थासय् वर्तमान राष्ट्रपति रानिल विक्रमसिंघे १८ प्रतिशत मत हःगु दु पूर्वराष्ट्रपति गोटाबाया राजपक्षेया काय् नमल राजपक्षें १ प्रतिशत जक मत काःगु खः।श्रीलंकाया राष्ट्रपतिया नितिं ३८ म्ह उम्मेदवारतय् प्रतिस्पर्धा जुयाच्वंगु दु।

न्हूम्ह राष्ट्रपति ल्ययेगु नितिं शनिवाः मतदान जूगु खः। बीबीसीया कथं निर्वाचनय् ७० प्रतिशत मतदान जूगु खः।

गाजापट्टीया दक्षिणी क्षेत्र खान युनिसय् शनिवाः न्हिनय् छम्ह प्यालेस्टिनी मचायात कुपोषण व उपचारया अभावं सीउगु  दु।

थ्व नाप कुपोषणं सीपि मस्ततयेगु ल्याः ३७ म्ह थ्यःगु दु। चिकित्सा स्रोत प्यालेस्टिनी समाचार समिति (वाफा) यात कुपोषण व नसाँ आपूर्तिया अभावं मस्त सीउगु दु धका धाःगु दु। गाजाय् ५० हजार स्वया अप्पो मस्ततय्त गम्भीर कुपोषणं ग्रस्त जुयाच्वंगु दु धका युनिसेफं घोषणा याःगु दु।

संयुक्त राष्ट्रं गाजापट्टीइ मानवीय अवस्था दयनीय दु धका चेतावनी बिउगु दु। गाजापट्टी च्वना च्वपिन्स अक्टोबर ७ निसे जुयाच्वंगु विनाशकारी इजरायली युद्धया कारणं अभूतपूर्व मानवीय व स्वास्थ्य सङ्कटया सामना यायेमाला च्वंगु दु।

फ्रान्सय् दक्षिणपन्थी नेता मिशेल बार्नियर प्रधानमन्त्री नियुक्त जुइवं प्रदर्शन तच्वःगु दु। म्हिगः फ्रान्सया राजधानी पेरिस, नाइस व लेमन लगायत देय्या थीथी शहरय् बार्नियरया नियुक्तिविरुद्ध द्धलं द्धः नागरिक तय्स प्रदर्शन यागु दु धका बीबीसीं धाःगु दु।

आन्तरिक मन्त्रालयं म्हिगः देयन्यक १ लाख १० हजार म्हेसिया विरोध प्रदर्शन याःगु दु धका धाःगु दु। थौ न देयन्यक सच्छिगु मल्याक थीथी थासय् प्रदर्शन यायेगु तयारी दु धका धाःगु दु। प्रदर्शनया मू ग्वसाः खलः फ्रान्सेली ट्रेड युनियन व वामपन्थी दल तय्स यायेत्यःगु खः।

राष्ट्रपति इमानुएल म्याक्रोनं वाम दलया उम्मेदवारयात प्रधानमन्त्रीइ समर्थन मयावं वयकःया बिरुद्ध प्रदर्शन जुयाच्वंगु खः। प्रदर्शन तःच्वयेवं प्रधानमन्त्री मिशेल बार्नियरं सरकार गठन यायेत थः वामपन्थी नाप मेमेगु दल नाप खँ ल्हाय्त तयार दु धका धाःगु दु। फ्रान्सय् जूगु चुनावय् बामपन्थी दलं दकलय् अप्पो सिट हःगु खः।

तर दक्षिणपन्थी नेता बार्नियर प्रधानमन्त्री जुइवं यक्कोसिया मयमूगु खः।