दक्षिण अफ्रिकाया संसद् भवनय् मिं नःगु दु । देय्या दक्वःलय् पुलांगु व निगूगु तःधंगु शहर केपटाउनय् दूगु दक्षिण अफ्रिकी संसद् भवनय् थौं सुथय् मिं नःगु खः ।

सुरक्षाया नितिं गठन जूगु केपटाउन मेयर कमिटीया दुजः जेपी स्मिथया कथं मिं नःगुया हुनिं पुलांगु एसेम्बली हलया पौ छ्वगु दु व पुलांगु चेम्बरय् नं आपालं क्षति जूगु दु ।

दक्षिण अफ्रिाकी अधिकारीतये कथं मिं नःगुया हुनिं भवनय् तःतःधंगु चिरा बाःगु दु । क्षतिया पूर्ण विवरण वयेत धाःसा ल्यंदनिइ । मिं नःगु संसद्या सभा हलं न्ह्यागु खः ।

संसद भवनय् जडान यानातःगु फायर अलार्मं बाँलाक्क ज्या मयाःगु धाःगु दु । घटनास्थलया स्थलगत अवलोकन यासें  राष्ट्रपति सिरिल रामापोसां भवनयु जडान यानातःगु अग्नि नियन्त्रण उपकरणं बाँलाक्क ज्या मयाःगु पत्रकारतयेत जानकारी बियादीगु दु ।

अयेसां अग्नि नियन्त्रक टोली ६गू मिनेट दुने हे घटनास्थल थ्यंका मिं नियन्त्रणय् काःगु धका राष्ट्रपति रामापोसां उमिगु च्वछायादील ।

हलिंया जनसंख्या ७गू क्वःति ४०गू लखं अप्वःगु छगू तथ्यांकं क्यंगु दु ।

अमेरिकी तथ्यांक व्यूरोया कथं थ्व लिसें हलिंया जनसंख्या ७ गू अर्ब ८० गू क्वःति थ्यंगु दु । चीन आः नं हलिंया दक्वःलय् अप्वः जनसंख्या दूगु देय् खःसा अनया जनसंख्या १गू अर्ब ४०गू क्वःति दु ।

चीनयात लिनाच्वंगु भारतया जनसंख्या १गू अर्ब ३८गू क्वःति थ्यंगु दु । वइग्ु ३दँ दुने भारतं चीनयात लिउने लाकिगु ताकं दु । व्यूरोया कथं जनसंख्याया दृष्टिं अमेरिका हलिंया हे ३गूगु तःधंगु देय् जूगु दु ।

अमेरिकाया  जनसंख्या ३३ गू क्वःति २०गू लख थ्यंगु दु  । अमेरिकालिपा इण्डोनेसिया व पाकिस्तान छसिकथं ४गूगु व ५गूगु तःधंगु देय् जूगु दु । इन्डोनेसियाया जनसंख्या २७गू क्वःति ५०गू्र लख दुसा पाकिस्तानया २३गू क्वःति ८० गू लख पुलावंगु दु ।

सन् २०२१ य् हलिंिया जनसंख्या शून्य फुति ९गू प्रतिशतं अप्वःगु खः । मुक्कंलय् हलिंया जनसंख्या अप्वःसा नं बृद्धि दर धाःसा सन् १९६० या मध्य निसें मदिक्क कुहाँवनाच्वंगु दु । सन् २१०० सिवें न्ह्यः थुगु दर हाकनं थाहाँवनिगु विज्ञतयेसं ताकं याःगु दु  । राष्ट्रसंघं नं हलिंया जनसंख्या सन् २१०० तक्क मदिक्क थाहाँवनिगु तर थुकथंया वृद्धि छुं क्षेत्रय् जक केन्द्रित जुइगु न्ह्यथंगु दु ।

व्यूरोया  कथं वइगु छुं दशक कंगो, इजिप्ट, इथोपिया, भारत, इन्डोनेसिया, नाइजेरिया, पाकिस्तान, तान्जेनिया व अमेरिकाय् जनसंख्या थाहाँवनिगु धाःगु दु ।

थुगु शताब्दीया अन्त्यय् ५५गू देय्या जनसंख्या छगू प्रतिशत सिवें अप्वःलं कुहाँवनिइ । राष्ट्रसंघं बुल्गेरिया, लात्भिया, लिथुनिया व युक्रेनया जनसंख्या २०गू प्रतिशतं कुहाँवनिगु न्ह्यथंगु दु ।

खराब मौसम व कर्मचारीत कोरोना संक्रमित जूगु हुनिं शनिबाः छन्हूं हे हलिंयंक ४४ सः हवाई उडान रद्द जूगु दु ।

उगु मध्ये अमेरिकाय् जक २५सः उडान रद्द जूबलय् द्वलंद्वः यात्रु अलपत्र जूगु दु । थी थी विमान  कम्पनीया चालक दलया दुजः लिसें मेपिं कर्मचारीत कोरोना संक्रमित जूगु हुनिं कर्मचारी अभावया हुनिं उडानत रद्द जूगु धाःगु दु ।

अथेहे अमेरिकाया थी थी थासय् तच्वकं च्वापुं गाःगुलिं नं उडान रद्द जूगु दु । उडान रद्द जुइधुंका न्हू दँ व क्रिसमस हनेत थी थी देयया भ्रमणय् वंपिं बिमानस्थलय् हे अलपत्र जूगु दु ।

वंगु डिसेम्बर २४ निसें आःतक्क १२द्वः उडानत रद्द जुइधुंकुगु दु । बिमान कम्पनीया कर्मचारीतयेत कोरोनाया न्हूगु भेरिएन्ट ओमिक्रोन संक्रमण जूगु हुनिं आइसोलेशनय् दूगु बिमान कम्पनीतयेसं न्ह्यथंगु दु ।

रुसी राष्ट्रपति भ्लादिमिर पुटिनं युक्रेनया विषययात कया रुसय् न्हूगु नाकाबन्दी तःसा अमेरिकालिसेया स्वापू पूवंक हे विच्छेद जुइगु ख्याच्वः बियादीगु दु ।

अमेरिकी राष्ट्रपति जो बाइडेनलिसे म्हिगः जूगु टेलिफोन खँल्हाबल्हाय् पुटिनं अज्यागु पलाः तःधंगु द्वंका जुइगु धयादीगु क्रेमलिनया प्रवक्तां न्ह्यथंगु दु । तर बाइडेनलिसेया संवाद सन्तोषपूर्ण दूगु नं क्रेमलिनया प्रवक्ता युरी युसाकोभया धापू दु ।

५०गू मिनेट ताः ईया टेलिफोन संवादया झ्वलय् अमेरिकी राष्ट्रपति बाइडेनं युक्रेनयात हताः जूसा अमेरिका व उमिगु सहयात्री देय्तयेसं निर्णायक लिसः बिइगु धयादीगु खः ।

युक्रेनया पूर्वी सिमा क्षेत्रय् रुसं १ गू लख अप्वः सेना तैनाथ यायेधुंका रुस व अमेरिका लिसें पश्चिमा देय्तये दथुइ तनाव तच्वयावंगु दु ।

रुसं धाःसा युक्रेनयात हताः यायेगु छुं नं योजना मदूगु धका थःगु भूमि रक्षाया नितिं युक्रेनया सिमानाय् सेना तैनाथ जूगु तर्क यानावःगु दु ।

बाइडेन व पुटिन दथुइ खँल्हाबल्हा तसकं गम्भीर व अर्थपूर्ण खनेदूगु अमेरिकी अधिकारीतयेसं धाःगु दु । खँल्हाबल्हा लिपा ह्वाइटहाउसया प्रेस सचिव जेन पास्कीं तनाव म्हो यायेत रुसं छु याइ धइगु विषयलं न्ह्योनेया लँपू निर्धारण यायेगु धाःगु दु ।

निगू देय्या अधिकारीतये दथुइ वइगु लाय् जेनेभाय् तप्यंक खँल्हाबल्हा यायेगु तयारी नं जुयाच्वंगु दु ।

विश्व स्वास्थ्य संगठनं निगू भेरियन्ट डेल्टा व ओमिक्रोन छक्वःलं न्यंबलय् कोरोना संक्रमणं सुनामीया रुप काइगु ख्याच्वः बिउगु दु ।

संगठनया प्रमुख टेड्रोस ग्याब्रियसं अमेरिका व युरोपय् थुपिं निगू भेरियन्टया संक्रमण गुकथं अप्वःगु दु उकियात सुनामी धयादीगु खः । फ्रान्सय् छन्हूं हे म्हिगः २गू लख ८ द्वः संक्रमित थप जूगु दु ।

अन छन्हूं न्ह्यः जक १ गू लख ८०द्वःम्ह संक्रमित लूगुु खः । अथेहे अमेरिकाय् लिपांगु वाया रेकर्डं न्हिं २गू लख ६५द्वः सिवें अप्वः न्हू विरामीत थप जुइगु याःगु क्यंगु दु   ।

अष्ट्रेलिया, पोल्याण्ड, डेनमार्क, पोर्चुगल व बेलायतय् नं संक्रमितपिं न्हियान्हिथं न्हू न्हूगु रकेर्ड दयेकुगु दु । औसतय् आः हलिंमय् न्हिं ९ गू लख सिवें अप्वः विरामी थप जुइगु याःगु तथ्यांक सार्वजनिक जूगु दु ।

संक्रमणया गतिं अथे नं त्यान्हु चायेधुंकुपिं स्वास्थ्यकर्मीतयेत थप दबाब अप्वयेकुगु धका ग्याव्रियसं स्वास्थ्य प्रणाली हे फेल जुइगु ला मखु धइगु ग्याचिकु अप्वयेकुगु धयादील ।

तःमि देय्तयेसं चिमि देय्तयेत खोप चूलाकेगु त्वःता थःपिन्सं बुस्टर डोजय् बः बिउबलय् महामारी विचाः याःगु सिवें ताः ई न्ह्याइगु खनेदूगु वयेकया धापू दु ।

आः नं हलिंया सच्छि सिवें आपा देशं थःगु जनसंख्याया ४०गू प्रतिशतयात खोप बिइ मफूगु डब्लुएचओया तथ्यांक दु । डल्ब्लुएचओ प्रमखुं सन् २०२२ या मध्यतक्क हलिंया ७०गू प्रतिशत मनूयात बिइगु न्हू दँया प्रतिवद्धता न्ह्यनेत हलिंया नेतातयेत आह्वान यानादीगु दु ।