संयुक्त राष्ट्रसंघं अफगानिस्तानया लखौंलख सर्वसाधारण सिइफइगु ख्याच्वः बिउगु दु ।

राष्ट्रसंघया महासचिव एन्टोनियो गुटेरसं अफगानिस्तानया आर्थिक संकटं लखौंलख मनूया ज्यान काये फइगु अवस्था वयेफइगु ख्याच्वः बियादीगु खः ।

राष्ट्रसंघया ५ गु अर्ब डलरया मानवीय सहायता कोषय् ग्वहालि यायेत विश्व समुदाययात अपिल याना वयेकलं अफगानिस्तानया रोक्का यानातःगु खाता फुकुवा यायेत विश्व बैंक, आइएमएफ लिसेंयात इनाप यानादीगु दु ।

तसकं ख्वामूगु व सम्पतिविहिन अवस्था अफगान जनताया नितिं तसकं ग्यानापूगु जूगु नं महासचिव गुटेरसया धापू दु । दाताया ग्वहालिइ न्ह्यानावःगु अफगानिस्तानया अर्थतन्त्र तालिवानं सत्ता कजये कायेधुंका झंझं क्वन्ह्यानाच्वंगु दु ।

उकिइ नं तालिवानया शासनयात हाथ्याः बिइत अमेरिका लिसेंया विश्व समुदायं अफगानिस्तानया सम्पति व खाता रोक्का याःगुलिं अर्थतन्त्र चरम संकटय् तक्यंगु दु ।

अमेरिकां जक अफगानिस्तानया ७गू अर्ब डलर रोक्का याःगु दु । अन अस्पतालया चिकित्सक, सेना, पुलिस व सरकारी कर्मचारीं तकं तलब चूलाकाच्वंगु मदु  ।

राष्ट्रसंघया महासचिव गुटेरसं ८७ गू लख अफगानीत आः नं निछा नयेखनिगु अवस्थाय् दूगु धका अनया अर्थतन्त्रया नितिं आवश्यक तरलता थथें चूमलाकेगु खःसा अवस्था ग्यानापूगु जुइगु ख्याच्वः नं बियादीगु दु ।

भारतय् कोभिड–१९ या संक्रमितपि न्हिं झण्डै साढे २ लाख थ्यनेत्यंगु दु। भारतय् वंगु २४ घण्टाय् २ लाख ४७ हजार ४१७ म्ह न्हुपि संक्रमितपि थपे जुगु दु।

थुगु ल्याः मंगलबाःया तुलनाय् २७ प्रतिशत स्वया अप्पोगु खः। थुगु कोरोनाया कहर वंगु मे महिनाया अवस्थाय् थ्यंगु दु। भारतय् झीन्हुया दुने कोरोना संक्रमितपि खुगु गुणा स्वया अप्पोगु दु धका भारतीय समाचार माध्यमं धाउगु दु। वंगु २४ घण्टाया दुने हलियकं ८४ हजार ८२५ म्ह कोरोनामुक्त जुगु दु सा ३८० म्ह सी धुकुगु दु धका समाचारय् धाउगु दु।

ओमिक्रोन संक्रमितप मध्ये महाराष्ट्रय् दकलय् अप्पो १३६७ म्ह दु। अथेहे राजस्थानय् ७९२ म्ह दिल्लीइ ५४९, कर्नाटकय् ४७९, पश्चिम बंगालय् २९४ म्ह व उत्तर प्रदेशय् २७५ म्हेसित भेरियन्टया संक्रमण पुष्टि जुगु दु।

भारतया स्वास्थ्य मन्त्रालयया वंगु २४ घण्टाया दुने जक १ लाख ९४ हजार म्हेसित कोरोना संक्रमण पुष्टि जूगु दु।

अथेहे ४४२ म्ह सीउगु दु। मंगलबाः जक १ लाख ६९ हजार म्हेसित संक्रमण पुष्टि जुगु खःसा २ सय ७७ म्ह सीउगु दु।

भारतया राजधानी दिल्लीइ प्रत्येक प्यम्हे छम्हेसित संक्रमण पुष्टि जुगु धका भारतीय मिडियां धाउगु दु।

दिल्लीइ जक २३ म्ह सीउगु दु धासा थ्व वंगु जुन लिपाय् च्यालाया दुने हे दकलय् अप्वो खः।

उत्तर कोरियां म्हिगः परीक्षण याःगु मिसाइल हाइपरसोनिक मिसाइल हे खःगु दाबी याःगु दु ।

उत्तर कोरियाली समाचार एजेञ्सी केसीएनएं मंगलबाः छवाः दुनेया निगूगु हाइपरसोनिक मिसाइल परीक्षण याःगु धाःगु खः । उत्तर कोरियाली नेता किम जोङ उनं तकं मिसाइल परीक्षणया अनुगमन याःगु धासें किपा तकं सार्वजनिक जूगु ुद ।

मंगलबाःया प्रक्षेपण द्वःछि किलोमिटर तापाक्कया आज्जुइ सुथांलाक्क थ्यंगु दाबी नं समाचार एजेञ्सीं याःगु दु । म्हिगःया मिसाइल प्रक्षेपणया बारे दक्षिण कोरिया व जापान निगुलिइ देय्याके जानकारी दुगु खः ।

प्रक्षेपण जापानया विशेष आर्थिक क्षेत्र दुने लाःगु समुद्रय् कुतुंवंगु खः । हाइपरसोनिक मिसाइल ब्यालिस्टिक मिसाइल स्वयां म्ह्वः जालं जुयाः आज्जुपाखे वनीगु कथंया खः ।

उकिया गति धाःसा ध्वनिया गति स्वयां न्यादुगं अप्वः अर्थात् प्रति घण्टा ६द्वः व २सः किलोमिटर जुइ । सन् २०२० या मार्च धुंकाः नेता किम मिसाइल प्रक्षेपणया झ्वलय् उपस्थिति जूगु थ्व न्हापांगु खुसी खः ।

बिश्व स्वास्थ्य संगठन डब्ल्युएचओं युरोपया बछि जनसंख्यायात ओमिक्रोनया संक्रमण जुइफुगु चेतावनी ब्यूगु दु ।

वइगु निला दुने युरोप न्यंक ओमिक्रोन महामारीया रुपं न्यनीगु चेतावनी ब्युसें थथे धाःगु खः । डब्ल्युएचओया बरिष्ठ चिकित्सक हान्स क्लुगें ओमिक्रोन पश्चिम युरोपं पूर्वी युुरोपतक्क न्यनेधुंकूगु धासें याकनं हे बछि युरोप प्रभावित जुइगु दाबी यानादीगु खः ।

सन् २०२२ थीधुंकाःया छवाःत्या दुने युरोपय् ७० लख न्हूपिं संक्रमित अप्वःगु धाःगु दु । डा. क्लुगें पत्रकार सम्मेलन यानाः सन् २०२१य् हलिंया कयौं राष्ट्रतय्सं डेल्टा भेरिएन्ट नियन्त्रणया लागिं याःगु मदिक्कया कुतलं नियन्त्रण ताःलाःसां ओमिक्रोन महामारी नियन्त्रणया लागिं हाथ्या अप्वःगु धयादिल ।

लिसें, वय्कलं युरोप वप मध्य एशियाली राष्ट्र ओमिक्रोनया चपेटाय् लाइगु दावी नं यानादिल । पूवंगु मात्राय् खोप काःपिं मनू तकं ओमिक्रोनया शिकार जुइगु धासें डब्ल्युएचओं भचा नं लापरवाही मयायेत सकसित इनाप याःगु दु ।