यलया मंगलबजारय् भिद्यःया न्ह्यने छगु ऐतिहासिक शिलापत्र लुगु दु।

देगःया न्ह्यने ढल निकास दयकेगु झ्वलय् धःया पाइप जडान यायेगु झ्वलय करिब १० फिट क्वय् अन्दाजी साढे ४ फिट तग्वःगु शिलापत्र लुगु खः।

उगु थासय् म्हुया स्वंगु इलय् पूरा हे शिलापत्र लुगु खः।

उत्तर–लिच्छविकालिन लिपि प्रयोग जुगु खने दुगु उगु शिलापत्रय् उत्तर लिच्छवीकालीन जुइफुगु अनुमान याउगु दु।

उगु थासय् न्हापा लिच्छविकालय् हःखाः खुसि नामं खुसि दुगु जनश्रुति दु।

किपा शिवेश शर्मा

नेपाःया कलाकारिता मनोरञ्जन ख्यलय् बहुमुखी प्रतिभाया धनी स्वतन्त्र संसार महर्जन कीर्तिपुर अस्पतालय् वासः याकाः वयाच्वनादीगु दु।

आः थौंकन्हय् कलाकार स्वतन्त्र संसार महर्जन कीर्तिपुर अस्पतालय् वासः याकाः वयाच्वनादीगु दु । छुं वाः न्ह्यःनिसें ज्वरो वःगु खःसा वय्कःया जँ क्वय् छगः कै पाके जुयावःगुलिं अस्पताल भर्ना जुयाः वासः याकाः वयाच्वनागु खः।

नेपालभाषाया छगू संकिपाया फाइट सिन छायांकन यायेगु झ्वलय् किपूया बाघभैरव परिसरय् दुर्घटनाय् लानाः जँया नसा सम्बन्धी ‘स्पाइनल कर्ड’ जुयाः स्वतन्त्र संसारयात ल्वचं कःगु खः।

उगु ल्वचं स्वतन्त्र संसार महर्जनं तुति चलेमजुयाः ह्वील चेयरया ग्वाहालि कयाः वयाच्वंगु खः।

नेपाःया बुद्ध धर्म ख्यलय् नांजाम्ह भाईराजा साहु द्रव्यमान सिंह तुलाधर म्हिगः बहनी सनिलया ६ ता इलय् आकाझाकां मन्त।

छुं ई न्ह्यःनिसें म्हं मफयाः मेडिसिटी अस्पतालय् वासः याकाः वयाच्वंम्ह वयकः ९१ दँ मदुगु खः।

वयकःया जहान बसुन्धरा तुलाधर, निम्ह काय् व छम्ह म्ह्याय् दी।

प्रतिनिधिसभाया बैठक थौं न च्वनेत्यंगु दु। थौं १ बजेया लागि बैठक सःतूगु दु धका संसद् सचिवालयं धाउगु दु।

नेकपा (एमाले) न धासा निरन्तर संसद् बैठकय् अवरोध यानाच्वंगु दु।

अय्न, सभामुखं एमालेया विरोधयात बेवास्ता याना बैठक सञ्चालन यानावया च्वंगु दु।

वर्तमान इलय् मौलिक नेपाली संस्कृति तनानाच्वंगु धासें सरोकारवालातय्सं च्यूताः प्वंकूगु दु ।

राजोपाध्याय समाजं यल मंगःस्थित लाय्कू मणिकेशव नारायण चुकय् ग्वसाः ग्वःगु ज्याझ्वःया वक्तापिन्सं आयातित संस्कृतिया प्रभावं ल्याय्म्ह पुस्ता दथुइ मौलिक नेपाली संस्कृति तनावनाच्वंगु धासें च्यूताः प्वंकूगु खः ।

ज्याझ्वलय् न्ववासें संघीय मामिला तथा सामान्य प्रशासन मन्त्री राजेन्द्र प्रसाद श्रेष्ठं विदेशी संस्कृतिया प्रभाव नेपाली समाजय् अप्वयावंबलय् थनया मौलिक संस्कृतिया अस्तित्व संकटय् लाःगु बिचाः प्वंकादिल ।

मन्त्री श्रेष्ठं नेपाली मौलिक संस्कृतिइ सुलाच्वंगु जीवन दर्शनं समाजयात सभ्य व सुसंस्कृत दयेकेगु शिक्षा बीगु धासें आः आयातित संस्कृतिइ समाज तक्यंबलय् समस्या अप्वःगु दावी यानादिल ।

‘नेपालय् विदेशी च्यानललिसें विदेशी संस्कृतिया प्रभाव नं अप्वयावंगु दु । व हे हुनिं आःया ल्यायम्ह पुस्तां नेपाली संस्कृति ल्वःमंका वनाच्व्ंगु दु’, मन्त्री श्रेष्ठं धयादिल, ‘झीसं थःगु संस्कृतिया मौलिकतायात थुइकाः, थुकिया दर्शन सीकाः न्ह्याःवनेमाः ।’

ज्याझ्वलय् मन्त्री श्रेष्ठं तन्त्रविद् महेश्वर जुजु राजोपाध्यायं च्वयादीगु ‘नेपाल आँखाको नानी हो’ व नव साहित्यकार नीलप्रभा राजोपाध्यायया ‘आमा’ सफूया लोकार्पण यानादीगु खः ।

सफू लोकार्पण धुंकाः थःगु सफूया विषयवस्तुबारे प्रकाश यासें तन्त्रविद् जुजुं वैदीक परम्पराया नामय् नेपाली समाजय् कौल परम्परा लोप जुयावंगु धयादिल ।

वर्तमान इलय् वैदीक परम्परायात जक प्राथमिकताय तःबलय् द्यःपिंलिसे साक्षात्कार यायेगु तन्त्रया व्यवहारीक पक्षं समाज तापानावंगु जुजुया धापू खः ।

‘झीगु संस्कृतिं व्यवहारय् बः ब्यूगु दु, तर झीसं वयात ल्वःमंका वनाच्वना । झी वेद पाठय् जक छाय् तक्यनाच्वना, तान्त्रिक विधिव्यवहार झीगु संस्कृतिया मौलिकता खः धइगु ल्वःमंमंके’ जुजुं धयादिल ।

साहित्यकार नीलप्रभां थः मदुम्ह मांया लुमन्तिइ च्वयागु खँग्वलं हे आमा सफूया रुप काःगु धयादिल ।

ज्याझ्वलय् राजोपाध्याय समाजया नायःसंजय शर्मा राजोपाध्याय, संस्थापक नायः वदन ज्वालानन्द राजोपाध्याय व न्वकू रचना शर्मा राजोपाध्यायं समाजया गतिविधि बारे जानकारी ब्युसें समाजया हक, अधिकार व पहिचान स्थापित यायेत क्रियाशिल जुयाच्वनेगु खँय् बः बियादिल ।

तन्त्रविद् जुजुं च्वयादीगु सफू ‘नेपाल आँखाको नानी हो’ राजोपाध्याय समाजं पिथंगु खः ।