लुँया भाः थौं द्धःछि कुहावंगु दु।

लुँ तोला द्धःछि कुहावया थौं ९७ हजार रुपैयाँ न कारोबार जुगु दु धका नेपाल सुनचाँदी व्यवसायी महासंघं धाउगु दु।

अथेहे वहः तोला न थौं स्वीतका कुहावंगु दु। वहः तोलां स्वीतका कुहावया १२ सय ४५ रुपैयाँ तोके याउगु दु धका महासंघं धाउगु दु।

नेकपा एमाले येँ जिल्ला कमिटीया ग्वसालय् थौं जुगु चुनावी सभाय् एमाले येँया मेयर उम्मेदवार केशव स्थापितं येँ देय् दयेकेगु भिजन एमालेयाके दूगुलिं सकलसित बैशाख ३० गते जुइगु चुनावय् सुद्यः चिन्हय् छाप तयाः अत्याधिक मतं त्याकेत इनाप याःगु दु।

येँ महानगरपालिकाया मेयरय् नेकपा एमालेया उम्मेदवार केशव स्थापितं थःम्हेसिया न्ववानागु खँ सुयात घाः लाउगु दुसा माफी फ्वने धका धाउगु दु।

थौं मंगलबाः येँया भृकुटीमण्डपय् जुगु चुनावी सभाय् सम्बोधन यासे छु गल्ती जूसा क्षमा फ्वनेगु संस्कार थःके दु धका धयादीसे ‘आईएनजीओपाखे सञ्चालित तँहकेँहपिके’ माफी फ्वनागु दु धका धयादीगु दु। ‘जि दक्को तँहकेँहपि, मां धाये दइ। छु मिसा तँहकेँहपिन्स मथु ’ धका धयादीगु दु।

वयकलं धयादीगु दु चुनावया इलय् थःत हमला याउगु  धका धयादीसे थःगु अभिव्यक्तिं सुयात न चोट लाउगु दुसा माफी फ्वने धका धयादीगु खः।

सन् २०११ या मिस नेवाः सुनिता डंगोल नेकपा एमालेपाखे येँ महानगरया उपप्रमुखया प्रत्यासी खः।

डंगोलं रञ्जना लिपि प्रचार यायेगु कथं छम्ह अभियन्ता कथं ज्या याउगु खः। नेपाल भाषा विज्ञ कथं टेलिभिजनया ज्या याये धुकुम्ह खः। डंगोल पार्टीया मत जक मखु स्वतन्त्र मत तक थःपाखे वइ धका दाबी याउगु दु।

‘येँच्वपिनिगु मतिना याउगु दु, पार्टीया शक्ति न दु’ डंगोल धाउगु दु, ‘न्युट्रल भोट स्वयेगु खःसा आः देयन्यक ल्याय्म्हपिन्त मौका बिइमाः धका सः वयाच्वंगु दु।’ मतदातापिनिगु इच्छा कथं हे थःत पार्टी न अवसर बिउगु खः धका उम्मेदवार डंगोलं धाउगु दु। 

येँ महानगरपालिकाया मतपत्र देयन्यकया हे दकलय् तपागु जुगु दु।

येँ महानगरय् ६४ गु प्रकारया चिं समावेश याउगु दु। राजनीतिक दल व स्वतन्त्रपिनिगु चिं निगु लहरय् मतपत्र छापे याउगु दु।

गुलि स्वतन्त्र उम्मेद्वारपिनिगु नाप फरक फरक चिं दुगुलि तपागु मतपत्र जुगु धका कर्मचारीपिन्स धाउगु दु।

थीथी जातजातिया पहिचानय् वयाच्वंगु कमी कमजोरीयात वाःचाय्काः थुकियात ज्यंकाः सकसित छधी छप्पाँय् दय्केत न्ह्यचिलेगु जमर्को यासें जिं उम्मेदवारी बियागु दु ।

नेवाः संस्कृति, सम्पदाया संरक्षण, सम्वद्र्धन याय्माःगु दु, नेवाः धयापिं थनया आदिवासी खः धइगु खँ थुइकाः न्ह्याय्माःगु खँय् वास्ता दयाच्वंगु मदु । झीगु संस्कृतिइ विकृति वयाः बिरुप जुयाच्वंगु अवस्थाय् छगू गुरुयोजना हे तयार यानाः मूल्य मान्यता कायम याय् नं हथाय् जुइधुंकल।

थीथी जातजातिमध्ये नेवाःत समुच्च रुपय् आर्थिक स्तरय् थहां वयेफुगु अवस्था मदुनि। थन स्वायत्तता म्हुतुइ जक जुयाः व्यवहारय् छ्यलेमफुबलय् परनिर्भर जुजुं वनाच्वंगु दु। सरकारय् बाय् गनं नं प्रतिनिधित्व याकेत सबल, सक्षम व निस्वार्थ भावना ब्वलंम्ह लोकंह्वाःम्ह नेतृत्व झीथाय् खनेदयाच्वंगु मदु।

उकिं एकताया नितिं जोड बीमाःगु दु । थ्व सकतां खँयात बिचाः यानाः वडाय् दुने थीथी कथंया ज्याझ्वःत हय्गु जुइ । वडा विकासया लागिं वइगु बजेट वडाय् दुने च्वंपिं बेरोजगार दाजुकिजापिंत ज्याय् छ्यलेगु नं जिगु मू लक्ष्य खः । थन झीगु त्वाःबहाःयात कुरुप दय्काच्वंगु अव्यवस्थित तार, सडकय् लालाःथे मोटर पार्किङ्ग आदि कथं समस्या चीकेत ज्या याय्गु योजना दु । वडाय् दुने मूलँपु, दुने लँपु (गल्ली) बहाः बहि, चुक, ननिइ मगाःमचाःथाय् बिजुली मतया व्यवस्था याय्।

वडाय् सेवाग्राहीपिन्त थःगु मातृभाषा छ््यय्केबीगु, यदि भाय् मथूम्ह जूसा छकःया लागिं थःपिन्सं ग्वहालि यानाबीगु जुइ । वडाय् दुने नेपालभाषां ब्वंकावःगु सरकारी व निजी बिद्यालययात थप व्यवस्था यासें मातृभाषा शिक्षायात धिसिलाकेगु जुइ । अथे हे, वडा दुने च्वंपि स्थानिय मनूत अस्पताल वनेमालीबलय्यात आःयात छगः एम्बुलेन्सया व्यवस्था याय्गु जुइ। वडा दुनेया छुं नं ज्याखँय् आवश्यकता कथं हनेबहःपिं प्रबुद्ध व्यक्ति, दाजुकिजापिनि सल्लाह सुझाव कथं ज्या न्ह्याकेगु जुइ।