पुननिर्मित ऐतिहासिक लानिपूखु थौं येँ महानगरपालिकायात हस्तान्तरण याइगु जुगु दु।

थौं विहिवाः न्हिनय् ३ बजे शखंधरपार्कया शान्तिबातिकाय् छगु ज्याझ्वः दथुइ राष्ट्रिय पुननिर्माण प्राधिकरणं येँ महानगरपालिकायात हस्तान्तरण याइगु ज्याझ्वः दु।

२०७२ सालया तःभुखाचं लानिपूखु क्षति जुगुलि प्राधिकरणं पुननिर्माण याउगु खः। मल्लकालिन कथं हे लानिपूखु शिखर शैलीइ निर्माण याउगु खः।

नेपाली कांग्रेस प्रदेश नम्बर २ या नेतृत्व चयनया लागि मतदान शुरु जुगु दु। म्हिगः बुधबाः हे मतदान यायेगु कार्यतालिका दुु सा मतपत्र छपाई ढिला जुगुलि थौं जक मतदान सुरु जुगु खः।

संस्थापन पक्षं कांग्रेस रौतहटया सभापति कृष्ण यादवया नेतृत्वय् प्यानलनाप उम्मेदवारी दर्ता याउगु खःसा मेगु पक्षं कांग्रेस प्रदेश नं २ संसदीय दलया नेता रामसरोज यादवया नेतृत्वय् प्यानलनाप उम्मेदवारी दर्ता याउगु खः।

७२ पदया लागि १७४ म्हेसिया थीथी पदय् उम्मेदवारी बिउगु खः। उकि मध्ये न्याम्ह सदस्य निर्विरोध निर्वाचित जुइ धुकुगु दु सा गुलिं उम्मेदवारं उम्मेदवारी लित काये धुकुगु दु।

प्रदेशय् च्यागु जिल्लाया ६४ प्रदेश निर्वाचन क्षेत्रपाखे २५ म्हयाना निद्धः मतदातापि दु धका धाउगु दु।

नेपाली कांग्रेसय् समावेशी अन्तर्गत दलितपाखे केन्द्रीय सदस्यपिनिगु मतगणना क्वचाःगु दु।

बुधबाः चान्ह्य सम्पन्न मतगणना कथं दलितपाखे न्याम्ह व मिसापाखे प्यम्ह केन्द्रीय सदस्यपि निर्वाचित जुगु दु। कांग्रेसया केन्द्रीय निर्वाचन समिति आःतक न मत धासा सार्वजनिक याउगु मदुनि।

खुला केन्द्रीय सदस्यय् मानबहादुर नेपाली, प्रकाश रसाइली स्नेही, नृपबहादुर वड, हरिशरण नेपाली व मैकुलाल बाल्मीकी निर्वाचित जूगु दु। स्नेहीबाहेक दक्को संस्थापन समूहया उम्मेदवारपि ख।

वंगु २४ घण्टाया दुने देयन्यक थप २३६ म्हेसित कोरोना संक्रमण पुष्टि जूगु दु।

७ हजार २ सय ३३ म्हेसिगु पीसीआर परीक्षण याउगुलि २१७ म्ह व ४ हजार ४३ म्हेसिगु एन्टीजेन परीक्षण याउगुलि १९ म्ह याना २३६ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् कोरोना संक्रमणं निम्ह सीउगु दु सा २७२ म्ह कोरोनामुक्त जूगु दु। मन्त्रालयं बिउगु जानकारी कथं ख्वपय् १३ म्ह, यलय् ३३ म्ह व येँ ७६ म्ह याना स्वनिगः दुने १२५ म्हेसित कोरोना संक्रमण पुष्टि जूगु दु।

नेकपा मसालया भातृ संस्था प्रगतिशील पत्रकार संघया केन्द्रीय अध्यक्षपाखे उदय जिएमं राजीनामा बिउगु दु।

पार्टी दुने अन्तरविरोध प्रवृत्ति अप्वोया वंगुलि जीएमं विज्ञप्पिाखे राजीनामा बिउगु दु धका धाउगु दु।

वयकः नेपाल पत्रकार महासंघया केन्द्रीय उपाध्यक्ष न जुयादीम्ह खः।