देयन्यक ७५३ पालिकाय् चुनावया लागि मेयर व अध्यक्षय् ६ हजार २९३ नगरपालिकाय् मेयरया लागि २२९ म्ह व ४६० गाउँपालिकाया अध्यक्षय् १५५ मिसापि उम्मेदवार जुगु निर्वाचन आयोगया तथ्याङ्कय् दु।

मेयरय् मिजंपि ३ हजार ९ म्ह दु सा अध्यक्षय् २ हजार ९ सय ३७ म्ह दु। नगरय् मेयर उम्मेदवारी बिउपि मिसापि जम्मा ७ प्रतिशत व गाउँपालिका अध्यक्षय् ५ प्रतिशत दु सा उपमेयरय् भचा अप्पो दु।

उपमेयर व उपाध्यक्ष याना ४ हजार १ सय २७ उम्मेदवार मिसापि ३ हजार ७७ म्ह दु । देयन्यक ६ हजार ७ सय ४३ वडाय् अध्यक्षया लागि ३२ हजार ४ सय ९७ म्ह उम्मेदवारपि दु।

उकि मध्ये मिसापि ९ सय ४७ अर्थात ३ प्रतिशत जक दु। हरेक वडाय् निम्ह खुला सदस्यपि दु। उकिइ ५३ हजार १ सय ७३ म्ह उम्मेदवार दु। मिसा २ हजार ४ सय ७ व मिजंपि ५० हजार ७ सय ६६ पि दु। हरेक वडाय् छम्ह मिसा व छम्ह दलित मिसा सदस्य अनिवार्य याउगु दु।

मिसा सदस्य २५ हजार ५ सय ९६ म्ह व दलित मिसा सदस्य २३ हजार २ सय ८४ म्ह दु धका निर्वाचन आयोगया तथ्याङ्कय् दु।

वैशाख ३० गते जुइगु स्थानीय तह निर्वाचनया लागि छापे याये धुकुगु मतपत्र ढुवानीया क्वचाःगु दु धका निर्वाचन आयोगं धाउगु दु।

निर्वाचन आयोगया प्रवक्ता शालिकराम शर्मा पौडेलया कथं माःगु दक्को मतपत्र छापे याये धुकुगु दु व उगु मतपत्र थौं तक दक्को जिल्लाय् ढुवानी यायेगु जुइ धका जानकारी बिउगु दु।

आयोगया कथं वाउगु रंगया मतपत्रय् चुनाव चिं हाकूगु रंगय् दु। मतपत्रय् दकलय् च्वये राष्ट्रिय पार्टींे चुनाव चिं दु। वया लिपा जिल्लाय् क्रियाशील राजनीतिक दल व स्वतन्त्र उम्मेदवारपिनिगु चुनाव चिं दु।

यल महानगरय् वंगु स्थानीय तहया निर्वाचनय् त्यापि २९ म्ह वडाअध्यक्ष मध्ये २२ म्ह हाकन वडाध्यक्षय् चुनावी मैदानय् कुहावंगु दु।

२०७४ य् एमालेपाखे त्याःपि १५ म्ह वडाध्यक्षपि मध्ये १२ म्ह वडाध्यक्ष हाकन उम्मेदवार जुगु दु। एमाले न न्ह्यम्हेसित हाकन उम्मेदवार दयकूगु दु।

एमालेबाट विभाजन जुया नेकपा एकीकृत समाजवादीइ निम्ह, स्वतन्त्रपाखे स्वम्ह हाकन उम्मेदवारी बिउगु दु। हाकन वडाध्यक्षया उम्मेदवार जूपि एमाले न ४ नम्बरय् नारायण केसी ५ नम्बर वडाय् विकासमान श्रेष्ठ, ११ नम्बरय् इन्द्रमान महर्जन, १२ नम्बरय् नारायणलाल अवाले, १७ नम्बरय् विनोद महर्जन, २५ नम्बरय् विष्णुकुमार कार्की व २९ नम्बरय् गणेशकुमार महर्जनपि खः।

अथेहे वडा नम्बर २ य् राजेश कुमार महर्जन, वडा नम्बर ३ य् श्रीगोपाल महर्जन नेकपा एकीकृत समाजवादीपाखे उम्मेदवार जुगु खः। अथेतु एमालेपाखे वडाध्यक्ष त्यापि १४ नम्बर वडाय् रामबाबु महत, १८ नम्बर वडाध्यक्ष पुरुषोत्तम खड्का, व १९ नम्बर वडाय् विनोद ताम्राकार स्वतन्त्रं उम्मेदवार बिउगु खः।

नेपाली कांग्रेसं त्याःपि गुम्ह मध्ये खुम्ह वडाध्यक्षपि हाकन उम्मेदवार जुगु दु। उकि मध्ये कांग्रेसपाखे प्यम्ह व निम्ह स्वतन्त्रं उम्मेदवार जुगु दु। कांग्रेसपाखे हाकन उम्मेदवार जूपि वडाध्यक्षपि १ नम्बर वडाध्यक्ष निर्मल तण्डुकार व १३ नम्बरय् गणेश केसी स्वतन्त्र उम्मेदवार जुगु दु।

कांग्रेसपाखे ७ नम्बर वडाध्यक्ष कुलबहादुर शाक्य, ९ नम्बर वडाध्यक्ष राजु महर्जन, १६ नम्बरय् वडाध्यक्ष निर्मल रत्न शाक्य व २० नम्बर वडाध्यक्ष चन्द्र लाल महर्जन हाकन उम्मेदवार जुगु दु। अथेतु नेकपा माओवादी केन्द्रं त्याःपि प्यम्ह मध्ये स्वम्ह हाकन उम्मेदवार जुगु दु।

माओवादीं त्याःपि २१ नम्बर वडाय् रविन्द्र महर्जन, २६ नम्बर वडाय् सुरेश महर्जन व १८ नम्बरय् राजेश महर्जनपि हाकन वडाध्यक्षय् उम्मेदवार जुगु दु। वंगु निर्वाचनय् १० नम्बर वडाय् स्वतन्त्र त्याःम्ह नरसिंह व्यञ्जनकार हाकन उम्मेदवार जुगु दु। यल महानगरय् जम्मा ५८७ म्हेसिया उम्मेदवारी बिउगु दु। उकि मध्ये १४७ म्ह वडाध्यक्षय् उम्मेदवार बिउगु दु।

येँ महानगरपालिका स्थानीय तह चुनावय् देयन्यकय् दकलय् अप्पो उम्मेदवार दुगु स्थानीय तह खः।

येँ ८२६ म्ह उम्मेदवार चुनावी मैदानय् दु। येँ महानगरय् ३२ गु वडाया लागि २०९ म्हेसिगु वडाध्यक्ष उम्मेदवारी दु। उकि मध्ये २५ म्ह निवर्तमान वडाध्यक्षपि दु।

२०७४ य् नेकपा एमालेपाखे निवार्चित १८ वडाध्यक्ष मध्ये १५ म्ह हाकन मैदानय् दु। उकि मध्ये ११ म्ह एमालेपाखे उम्मेदवार जुगु दु। एमाले विभाजन जुया आः नेकपा एकीकृत समाजवादीपाखे प्यम्ह वडाध्यक्ष उम्मेदवार जुगु दु।

अथेहे नेपाली कांग्रेसपाखे विजयी जूपि १४ मध्ये १० वडाय् पुलापि हे वडाध्यक्षपि हाकन उम्मेदवार जुगु दु। नेकपा एमाले व राष्ट्रिय प्रजातन्त्र पार्टी राप्रपां ३२ गु वडाय् वडाध्यक्ष थःगु दु।

नेपाली कांग्रेसं वडा नं. ३२ य् एकीकृत समाजवादीयात समर्थन याउगु दु सा ३१ गु वडाय् उम्मेद्वारी बिउगु दु। अथेहे १९ गु वडाय् एकीकृत समाजवादीया वडाध्यक्ष उम्मेदवार बिउगु दु सा नेकपा माओवादी केन्द्रं १७ गु वडाय् वडाध्यक्षको उम्मेद्वारी बिउगु दु।

चितवनय् सत्ता गठबन्धनया सभाय् सम्बोधन यायेत कांग्रेस सभापति शेरबहादुर देउवा वःगु दु।

सभाय् सम्बोधन याये न्ह्यः भरतपुर महानगरपालिकाया उमेदवार जगन्नाथ पौडेलयात नाप लाइगु ज्याझ्वः दु। छु ई लिपा देउवा व पौडेल दथुइ नापलाइगु ज्याझ्वः दु।

सभापति देउवा म्हिगः बुधबाः हे चितवनय् वःगु खः।