नेपाली कांग्रेसया १४ क्वःगु महाधिवेशनं मिसा आरक्षण कोटापाखे गुम्ह केन्द्रीय सदस्य निर्वाचित जुगु दु।

सार्वजनिक मत परिणाम कथं डिला संग्रौला पन्त दकलय् अप्वो मत हया निर्वाचित जुगु खः । उनले पन्त दकलय् अप्वो २८८५ मत हःगु खः।

वया लिपा पुष्पा भुसाल २७१८, आरजु राणा देउवा २५३६, अम्बिका बस्नेत २३३९, ईश्वरी न्यौपाने २२५९ मत हया निर्वाचित जुगु दु। अथेहे सरिता प्रसाईं न २०९६, रमा कोइराला पौडेल १८५८, सुशीला ढकाल आचार्य १८०४ व रंगमती शाही १७८९ मत हया निर्वाचित जुगु खः।

मिसापाखे केन्द्रीय सदस्य गुम्हेसिगु निति ३० म्हेसिया उम्मेदवारी बिउगु खः।

श्रम, रोजगार तथा सामाजिक सुरक्षामन्त्री कृष्णकुमार श्रेष्ठ (किसान) नं अमेरिकी सहायता परियोजना मिलेनियम च्यालेन्ज कर्पोरेशन (एमसीसी)बारे सत्तारूढ न्यागु दलया मंका धारणा जुइ धका धाउगु दु।

थःगु गृहजिल्ला तनहुँया दमौलीइ सञ्चारकःमिपि नाप खँल्हासे मन्त्री श्रेष्ठं सत्तारुढ गठबन्धनय् एमसिसीबारे मंकाः धारणा दयकेगु निति कार्यदल गठन जुगु दु व याकन हे धारणा सार्वजनिक जुइ धका धाउगु दु।

किपूया मेयर रमेश महर्जनया बुदिंया लसताय् भिंतुना ज्याझ्वः जुगु दु।

वंगु सोमवाः थिंलाथ्व एकादशि कुन्हु किपू नगरपालिकाया मेयर महर्जनया बुदिं खः। मेयर महर्जनया बुदिंया लसताय् नगरपालिकाय् छगु भिंतुना बिगु ज्याझ्वः जूगु खः।

नगरपालिकाय् दक्कले थकालिम्ह वडा नं. १ या अध्यक्ष हर्ष महर्जनं दक्कले न्हापां मेयर महर्जनयात भिंतुना बियादिसें नेवाः परम्पराकथं खेँय् सगं लःल्हानादीगु खः।

वयांलिपा छसीकथं जनप्रतिनिधिपिं व कर्मचारीपिंसं नगर प्रमुखया बुन्हिया लसताय् भिं–उसाँय्  व ताःआयुया कामनायासें स्वां देछाया व खादां क्वखायेका भिंतुना बियादीगु खः । 

रक्षा मन्त्रालयया जिम्मेवारी प्रधानमन्त्री शेरबहादुर देउवा हे सम्हाले याइगु जुगु दु।

कांग्रेस महाधिवेशनय् महामन्त्री पदय् पराजित जुम्ह डा.मिनेन्द्र रिजालं राजीनामा बिउगुलि प्रधानमन्त्री देउवा हे उगु मन्त्रालयया जिम्मेवारी थःम्हेसिया हे सम्हाले याइगु कथं राष्ट्रपति विद्यादेवी भण्डारी समक्ष सिफारिस याइगु जुगु दु।

राष्ट्रपति कार्यालयं सोमबाः छगु विज्ञप्ति जारी यासे रक्षा मन्त्रालय प्रधानमन्त्री देउवा हे सम्हाले याइगु उल्लेख याउगु दु।

वंगु २४ घण्टाया दुने देयन्यक थप २२० म्हेसित कोरोना भाइरस संक्रमण पुष्टि जुगु दु।

२ हजार ७ सय २५ म्हेसित पीसीआर परीक्षण याउगुलि २१८ म्ह व १ हजार ४१६ म्हेसित एन्टिजेन परीक्षण याउगुलि निम्हयाना २२० म्हेसित कोरोना भाइरसया संक्रमण खनेदु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् कोरोना संक्रमणं छम्ह सीउगु दु सा २६३ म्ह सक्रमणमुक्त जुगु दु।