वंगु २४ घण्टाया दुने देयन्यक थप २९० म्हेसित कोरोना संक्रमण पुष्टि जुगु दु।

१२ हजार ४ सय ७३ म्हेसित पीसीआर परीक्षण याउगुलि २५२ म्ह व ४ हजार ६ सय १६ म्हेसित एन्टीजेन परीक्षण याउगुलि ३८ म्ह याना २९० म्हेसित कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् कोरोना संक्रमणं स्वम्ह सीउगु दु सा २३२ म्ह सक्रमणमुक्त जुगु दु।

नेपाली कांग्रेसय् मधेसी आरक्षण कोटां उद्योगी विनोद चौधरी नाप न्याम्ह निर्वाचित जूगु दु।

थौं मंगलबाः क्वचागु मतगणना कथं २५२२ लोकप्रिय मत कया अजय चौरासिया निर्वाचित जूगु दु।

अथेहे विनोद चौधरीं २२०६, चन्द्रमोहन यादवं २१३८, महेन्द्रकुमार रायं १९८४ व दिनेश यादवं १९५९ मत काउगु ख। चौरासिया, चौधरी, राय व दिनेश यादव संस्थापन पक्षयापि खःसा चन्द्रमोहन यादव शेखर कोइराला पक्षयाम्ह खः।

चन्द्रमोहन पूर्व राष्ट्रपति रामवरण यादवया काय् खः।

नेपाल मजदुर किसान पार्टीयां सांसद प्रेम सुवालं प्रमुख प्रतिपक्ष दल नेकपा एमाले न संसद अवरुद्ध यानाच्वंगु इलय संसद बैठक न्ह्याकूगु धासे आपत्ति प्वकूगुु दु।

थौं मंगलबाः एमालेया अवरोध दथुइ न सभामुख अग्नीप्रसाद सापकोटां संसदया कार्यसूची न्ह्यने यकूगुलि सांसद सुवालं अथेहे यायेगु संसदीय परम्पराविरुद्ध खः धका आपत्ति क्यंगु खः। वयकलं संसद अवरोध जुगु इलय् एमसीसी थे जाःगु देशघाती सम्झौंता पारित यायेगु ज्या याये मज्यु धासे सभामुख सापकोटाया गम्भिर ध्यानाकर्षण याउगु दु। वयकलं उगु सम्झौंता देशघाती खः धासे खारेज यायेत माग याउगु खः।

थौंया बैठकय् एमालेया सांसदपिन्स पार्टी फुटे यायेगु षडयन्त्र मुर्दावाद, संसदीय सर्वोच्चता कायम याः, पक्षपातपूर्ण व्यवहार बन्द याः लगायतया नाराबाजी यासे संसदय् वना सभामुख सापकोटाविरुद्ध नाराबाजी याउगु खः। तर एमाले सांसदपिनिगु नाराबाजी दथुइ न संसद बैठक जारी जुगु दु।

प्रतिनिधिसभाया बैठकय् प्रत्यक्ष रिपोर्टिङ यायेगु निति पत्रकार तयेत रोके याउगु दु।

थ्व स्वया न्ह्यः संसद बैठक न्ह्याना च्वंगु इलय् पत्रकारपिन्त संसद बैठकया हल बाल्कोनीइ च्वना रिपोर्टिङ यायेत बिउगु खः।

तर थौं मंगलबाः धासा पत्रकारपिन्त बाल्कोनी वने बिउगु मदुनि। पत्रकार प्रवेश याइगु लुँखा बन्द याउगु दु। पत्रकारपिन्त सुरक्षाकःमिपिन्स दुहा मछ्वंगु दु सा संसद भवनय् टेलिभिजन स्वया रिपोर्टिङ यायेत धाउगु दु।

थौं लुँ तोलां च्यासः घटे जुगु दु।

लुँ तोलां च्यासः घटे जुगु दु धका नेपाल सुनचाँदी व्यवसायी महासङ्घ धाउगु दु।

महासङ्घया कथं थौं च्यासः घटे जुया तोलां ९३ हजार रुपैयाँ कारोवार जुगु दु धका धाउगु दु।

अथेहे, थौं वहः न घटे जुगु दु।

वहः तोलां झीतका घटे जुया १२ सय ३५ रुपैयाँ न कारोवार जुगु दु धका महासङ्घ धाउगु दु।