शेयर कारोबार मापक नेप्से परिसूचक थौं वाःया लिपागु दिं ५ अंकं घटे जुगु दु।

वाःया न्हापागु दिं निसे लगातार घटे जुया वयाच्वंगु बजाः थौं बिहीबाः यक्को कम्पनीया शेयर भाः थहावंगु दु। नेप्से परिसूचक ५ दशमलव ८४ अंकं घटे जुया २ हजार ४ सय ४९ दशमलव ९७ अंकय् कुहावंगु दु।

नेप्से परिसूचक घटे जूसा ‘क’ वर्गय् सूचीकृत कम्पनी कारोबार मापन याइगु सेन्सेटिभ सूचक धासा ०.४३ अंकं थहवंगु दु। न्हिच्छियकं ४१ हजार ३८९ कारोबार जुगु २३१ कम्पनीया ६२ लाख २३ हजार ७२१ कित्ता शेयर जक किनबेच जुगु खः।

२ अर्ब ६७ करोड ३३ लाख ८ हजार ७ सय ९२ रुपैयाँया थौं कारोबार जुगु खः। बिहीबाः होटल व पर्यटन समूहय् दुगु कम्पनीया शेयर भाः थहावंगु दु। थुगु समूहया उपसूचक १८ दशमलव ७७ अंकं थहावंगु दु।

मेमेगु समूह ४ दशमलव १७ अंकं थहावना म्युचुअल फण्ड भचा थहावना सकारात्मक खनेदुगु दु।

वंगु २४ घण्टाया दुने देयन्यक थप २११ म्हेसित कोरोना संक्रमण पुष्टि जुगु दु।

८ हजार १८ म्हेसिगु पीसीआर परीक्षण याउगु १९७ म्ह व १ हजार ४ सय ३३ म्हेसित एन्टीजेन परीक्षण याउगुलि १४ म्ह याना २११ म्हेसित कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयलं धाउगु दु।

अथेहे २४ घण्टाय् निम्ह सीउगु दु सा ३२९ म्ह संक्रमणमुक्त जुगु दु।

खुगु निर्माण कम्पनीयात सरकारं हाकूगुसूचीइ तःगु दु।

प्रधानमन्त्री तथा मन्त्रिपरिषद कार्यालय मातहतं सार्वजनिक खरिद अनुगमन कार्यालयं एलिट कन्स्ट्रक्सन, निलगिरी निर्माण सेवा, च्याङ्ग्रासी निर्माण सेवा, एसएनसी निर्माण सेवा, एसएमएस कन्सट्रक्सन व त्रिदेव निर्माण सेवायात हाकूगु सूचीइ तःगु खः।

निलगिरीयात स्वदँ, एलिट व च्याङ्ग्रासीयात निदँ निदँ नाप मेपिन्त दच्छिया निति हाकूगु सूचीइ तःगु खः।उगु हाकूगु सूचीइ तःगु इलय् सार्वजनिक निकायया छु न खरिद कारबाहीइ ब्बति काये दइ मखु।

नेपाली कांग्रेसया नेता प्रकाशमान सिंहं पार्टी सभापति पदय् थःगु दाबी कायम हे दु धका धाउगु दु।

थौं येँया बिहीबाः सुथय् बानेश्वरय् जुगु सन्त नेता कृष्ण प्रसाद भट्टराईया शालिक अनावरण यानादीसे नेता सिंहं १४ क्वःगु महाधिवेशनय् सभापति पदया दौडय् थः लिचिलागु मदुनि धका धाउगु खः।

कांग्रेसयात विधि विधान कथं न्ह्याकेगु व जनताया अपेक्षा पूरा याये फइगु भरोसायोग्य पार्टी दयका सभापतिइ थःगु दाबी यानागु धका धाउगु खः। कांग्रेसया संस्थापनइतर समूहया सभापति पदया आकांक्षीपिन्स दाबी मत्वतुगुलि उम्मेदवार टुंगे यायेत सकस जुयाच्वंगु इलय् सिंहया थज्यागु भनाइ सार्वजनिक जुगु खः।

संस्थापनइतर समूहपाखे सिंहनाप वरिष्ठ नेता रामचन्द्र पौडेल, महामन्त्री डा. शशांक कोइराला व केन्द्रीय सदस्य डा. शेखर कोइरालापि आकांक्षी खः। शशांकं सहमति जूसा थःम्ह त्वते धका धागु खः। यदि पौडेल, सिंह व शेखर दथुइ सहमति मजुसा सभापतिया रुपं थः न्ह्या वनेगु धका धाउगु खः।

नेपाली कांग्रेसया पूर्वसहमहामन्त्री प्रकाशमान सिंहं थःम्हेसिया न्ह्यागू न हालतय् पार्टी सभापतिइ उम्मेदवारी बिइगु अडान काउगु दु।

उगु अडानं याना साझा उम्मेदवारया निति रामचन्द्र पौडेल समूहया प्रयास संकटय् लागु दु। कांग्रेसया १४ क्वःगु महाधिवेशन कन्ह्य २४ गतेनिसे येँ सुरु जुइत्यंगु खः।

सभापतिया आकांक्षीपि दथुइ सहमतियो प्रयास वंगु स्वन्हुनिसे लगातार बैठक च्वना च्वंसा साझा उम्मेदवारया सहमति जुइफुगु मदुनि। नेता सिंह थःम्हेसिया जक न्ह्यावलय् त्याग यायेमाःगु लाः धका धाउगु खः।

वयकलं धाउगु दु, ‘छुकिया विधि प्रक्रिया । विधि धइगु जि अधिवेशनय् वने, उम्मेदवारी दर्ता याये।’।